यर्मिया 12 - लिम्बुयहवे दाङ्बे़ल्ले़ कुदगि यर्मियारे़ कुसेःन्दो पाःन्हाॽ 1 यहवे दाङ्बाए, आङ्गाॽ आयाःम्बेओ खे़ने़ॽनु पाःन्धङ् चोगुङ्लो हे़क्केःल्ले़ खे़ने़ॽए कुदोःप्मा के़लाॽरो, हे़क्केसाङ् खासे़न्ले़ पाःन्नो आङ्गाॽ खे़ने़ॽए सेःन्लाप्मा पोङ्लो॥ थेआङ् ताक्के़भे़ॽबाहाॽ मे़नुॽमे़दार मे़वाॽबाबे? थेआङ् इङ्आले़क्ले़क्पाहाॽ थोबो मे़बोङ्ल मे़वाॽबाबे? 2 खे़ङ्हाॽ के़लेःत्तुसि, हे़क्क्याङ् खे़ङ्हाॽरे़ खुन्छिॽ साःप्पिन् मे़लेःत्तुरो, खे़ङ्हाॽ मे़बोःॽ हे़क्क्याङ् सिङ्सेॽ थोःक्लो॥ खे़ङ्हाॽरे़ के़याःम्बेओ पाःन्ग नुबाए मे़बाःत्तुर मे़वाॽरो कर खे़ङ्हाॽरे़ खुन्छिॽ निङ्वान् खे़ने़ॽलाम्बा माःङ्घा वाॽरो॥ 3 कर यहवे दाङ्बाए, खे़ने़ॽ आङ्गाॽ के़निआरो, हे़क्क्याङ् आङ्गाॽ आनिङ्वाॽओबा पाःन्हाॽ कोःत्ते़ॽओ कन् कुॽइगे़भे़म्बा मनाहाॽ से़त्छे़ तेॽमनासिबा मे़ल्लुक्हाॽ हे़क्के तेॽरे़से़ॽओ खे़ब्याङ् से़प्मासि ये़न् थारिक् खे़ङ्हाॽ से़न्दे़ युक्खे़से़ॽओ॥ 4 आप्फाल्ले़ थारिक् आनिगे लाजेन् हेआङ् ने़बाबे? हे़क्क्याङ् इक्ताप्हाॽओ चाभे़त्लाःन् आभे़ल्ले़ थे़म्बा इरे़म्माङ् युङ्बाबे? कन् लाजेॽओबा यक्युङ्बाहाॽ कुॽइमे़भे़म्बाल्ले़ चोगुल्ले़ थक्सापुसाहाॽ मे़सिर मे़बत्लो, हे़क्केसाङ् कन् मनाहाॽरे़ अक्खे मे़बाःत्तुरो, “निङ्वाॽफुमाङ्ङिल्ले़ आनिगे याःम्बक्किन् मे़निसुन्लो॥” यहवे दाङ्बे़ल्ले़ यर्मियान् नुगप् पिरु 5 यहवे दाङ्बे़ल्ले़ पाःत्तु, “यर्मियाए, खे़ने़ॽ मनाहाॽनु के़लोःक्किल्ले़ए के़नाने़भग्र आक्खेलॽरिक् अन्हाॽनु सोसोरिक् लोःक्मा के़सुक्पे? यम्बा ने़ने़बादे़न्नो खे़ने़ॽ के़जोःन्ने़भग्र यर्दन वहःङ्ङिल्ले़ कुयाओबा फात्ताप्हाॽओ हे़न् चोःक्मा के़सुक्तुबे? 6 खे़ङ्हाॽग खे़ने़ॽए के़म्भुॽ के़न्साॽ नु आबाङे के़हिम्सयङ्बा मनासिरो खे़ङ्हाॽरे़ए खे़ने़ॽ लासाक् के़म्मे़त्ते़आङ् वाॽरो॥ खे़ने़ॽ के़दक्ले़ङ्वाओ के़भत्छे़ खे़ङ्हाॽ मे़द्ये़आङ् मे़वाॽरो॥ खे़ङ्हाॽरे़ खे़ने़ॽनु कुजागे़नुॽबा पान् मे़बाःत्तुसाङ् खे़ङ्हाॽरे़ खुन्छिॽ पाःन्निन् नामे़साॽरे़न्ने़ॽओ॥ 7 “आङ्गाॽ इस्राइले़न् लाप्फुसुङ्ङाङ् वाॽआरो, आप्फेक् सेगुङ्सिङ्बा सुवाङ्हाॽ ले़रुङ्सिङ्ङाङ् मे़वाॽरो॥ आङ्गाॽ आसिराॽ के़धाङ्बाहाॽग निङ्मिहाॽरे़ खुन्छिॽ हुक्को पिरुङ्सिङ्ङाङ् मे़वाॽरो॥ 8 “आङ्गाॽ आप्फेक् आमनाहाॽ आदक्ले़ङ्वाओ मे़बोगे़आङ् मे़वाॽरो॥ खे़ङ्हाॽ ताम्भुङ्ङोबा खिरिङ्बान् हे़क्के मे़लॽरो खे़ङ्हाॽ आङ्गाॽ आसम्धाङ् मे़हुःक्काङ् मे़वाॽरो॥ खे़ल्ले़चोगुल्ले़ आङ्गाॽ खे़ङ्हाॽ पजिःत् चिःत्तुङ्सिङ्लो॥ 9 आङ्गाॽ आप्फेक् आमनाहाॽ ते़क्क्राबा फिःत्चो हे़क्के मे़लॽरो कर खुन्छिॽ आबाङेनि फिःत्चोहाॽरे़ मे़भत्तुसिआङ् मे़वाॽरो॥ ताम्भुङ् थक्साहाॽ खे़ङ्हाॽरे़ खुन्छिॽ किःक्हाॽ चासे़ फुक्खे़से़ॽओ॥ 10 “वेॽ लाजेॽबा यरिक् हाङ्युक्पाहाॽरे़ आङ्गाॽ आजे़ल्ले़क्सेॽ इक्ताप्पिन् मे़मे़क्खुआङ् ने़रो॥ खे़ङ्हाॽरे़ आङ्गाॽ यरिक् आब्याङ्सिगे़न् इक्ताप्पिन् मे़सॽरु मे़लाःक्तुआङ् ने़रो॥ साॽरिक् नुबा आलाजेन् खे़ङ्हाॽरे़ मुरे़क् खारे़क्पा ये़ःङ्घादे़न् मे़जोगुआङ् ने़रो॥ 11 खे़ङ्हाॽरे़ खे़न् थेआङ् के़होप्पा मुरे़क् खारे़क् मे़जोगुआङ् ने़रो, खे़न् आङ्गाॽ आदगि चा मे़न्नुॽमनाबादे़न् पोःक्खे़आङ् ने़रो॥ काक् लाजेन् लत्छा मुरे़क् खारे़क्पा ये़ःङ्घादे़न् पोःक्खे़आङ् ने़रो हे़क्क्याङ् आत्तिल्ले़आङ् खे़न् निनि मे़लाप्तुन्लो॥ 12 एःक्सादे़न्नोबा मुरे़क् खारे़क्पा कोःक्माहाॽ यरिक् आमे़ङ्मे़ङ्बाहाॽरे़ मे़बन्छुरो, हे़क्क्याङ् खे़न् लाजेॽओबाहाॽ नाप्मासि फाॽआङ् खे़ङ्हाॽ मे़द्ये़आङ् मे़वाॽरो॥ आदाभेःल्ले़ लाजेन् थिक् सुक्पोलाम् वेॽ कुसुक्पो थारिक् मे़क्खुरो आत्तिल्ले़आङ् सनारुङ्ङो वाॽमा मे़घोसुन्लो॥ 13 आङ्गाॽ आमनाहाॽरे़ सि मे़हेॽरुरो, कर खे़ङ्हाॽरे़ कुदिङ् के़बप्पा याःन्हाॽ मे़सुप्सुरो॥ खे़ङ्हाॽरे़ स्याङ्मे़न्दाङ् याःम्बक् मे़जोगुरो कर खुन्छिॽ हुक्को थेआङ् मे़ध्ये़ने़न्लो॥ आङ्गाॽ साॽरिक् किप्मा के़घुबा आसिक्किल्ले़ हे़क्के पोःक्खे़बारो खे़ङ्हाॽरे़ खुन्छिॽ पोगुगे़न् कुजा मे़धोःक्ते़म्बाल्ले़ खे़ङ्हाॽ सिरिङ्ममो मे़ध्ये़रो॥” इस्राइल निःत्ताङ्बा लाजेॽहाॽओ यहवे दाङ्बे़ल्ले़ कुमाङ्हुप् 14 यहवे दाङ्बे़ल्ले़ अक्खे पाःत्तुॽ, “आङ्गाॽ आबाङे आमना इस्राइलिहाॽ युक् चोःक्मारे़ लागि पिरुङ्सिङ्बा इस्राइल लाजेन् पेसाङ्बाहाॽरे़ मे़ङ्मा मे़गोःत्तुॽ आङ्गाॽ खे़ङ्हाॽनु कुभा पान् पाःप्मा कत्तुङ्ॽ॥ आङ्गाॽ खे़न् कुॽइगे़भे़म्बा थिम्मे़न्दङ् सुवाङ्हाॽ कुबुङ् आःङ्मनाबा हे़क्के आःक्खुङ्सिङ्ङाङ् खे़ङ्हाॽरे़ खुन्छिॽ लाजेॽलाम्बा नाःत्तुङ्सिङ्ॽ॥ यहुदाःन्नाङ् आङ्गाॽ खे़ङ्हाॽरे़ खुन्छिॽ लुम्मोलाम् हाॽयाक् आःक्खुङ्ॽ॥ 15 हे़क्क्याङ् आङ्गाॽ खे़ङ्हाॽरे़ खुन्छिॽ लाजेॽहाॽ आःक्खुङ्देसुङ् हे़क्केसाङ् एगाङ् आङ्गाॽ खे़ङ्हाॽ लुङ्माॽ तुक्तुङ्सिङ्॥ आङ्गाॽ खे़ङ्हाॽ आबाङे खुन्छिॽ लाजेॽओबा इक्ताप्पो नुःक्तुङ् तारुङ्सिङ्॥ 16 थिक्ले़ङ् आङ्गाॽ आमनाहाॽ खे़ङ्हाॽरे़ बाल साम्माङ्ङिन् माङ्से़वा मे़प्मा मे़हुॽरुसि कर आल्ल खे़ङ्हाॽरे़ ‘से़क्खाए यहवे दाङ्बे़न् कुहिङ्वे़त् वाॽबा कुइसिक्’ माङ्मे़हे़क्सिङ् हे़क्क्याङ् आमनाहाॽरे़ खुन्छिॽ सुत्नाःन् नुरिक्काङ् मे़हुॽसिङ्ने़भग्र खे़ङ्हाॽ आङ्गाॽ आमनाहाॽरे़ खुन्छिॽ लुम्मो मे़युक्खुसि॥ 17 कर कुभा मे़न्छाम् सुवाङ्हाॽरे़ आङ्गाॽ आबाःन्जाःक्किन् मे़न्इःत्तुन् मे़न्नाःत्तुन्ने़भग्र आङ्गाॽ खे़ङ्हाॽ हाॽयाक् आःक्खुङ्सिङ्ङाङ् मे़क्खुङ्सिङ्॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.