यर्मिया 11 - लिम्बुइस्राइलरे़ माङ्हुप्पिन् मे़गे़त्तुन् 1 यहवे दाङ्बालाम् यर्मियाओ अक्तङ्बा इङ्घङ् के़रे़, 2 “कन् माङ्हुप्पो हुप्मनाबा पाःन्हाॽ नुरिक्काङ् खे़प्से़ॽ॥ यहुदा नु यरुसले़म के़युङ्बा यक्युङ्बाहाॽ मे़त्ते़से़ॽ॥ 3 यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ फाॽआङ् खे़ने़ॽ खे़ङ्हाॽ मे़त्ते़से़ॽ, ‘कन् माङ्हुप्पो हुप्मनाबा पाःन्हाॽ इःप्मा नाःप्मा मे़न्दे़म्मनाबा के़रे़क् मनाहाॽ आङ्गाॽ माङ्दे साक्मुरा मे़त्तुङ्सिङ्ॽ॥ 4 खे़ङ्हाॽरे़ ये़त्तुक्खे मे़दुमुबा फे़न्जेॽ योःम्मादे़न् हे़क्तङ्बा मिस्र लाजेॽलाम्बा आङ्गाॽ खे़ङ्हाॽ लःत्तुङ् थाक्तुङ्सिङ्ङिल्ले़ कन् माङ्हुप्पिन् आङ्गाॽ खे़ङ्हाॽरे़ खुन्छिॽ पाधे़बाहाॽनु खे़न् ये़म्मो चोगुङ्ङाङ् वयाङ्॥ आङ्गाॽ आइङ्जाङ्ङिन् खे़ङ्हाॽ इःत्ते़म्मे़ नाःत्ते़म्मे़ॽ हे़क्क्याङ् खे़न् हे़क्के के़रे़क् याःम्बक्हाॽ चोगे़म्मे़ॽ मे़त्तुङ्सिङ्ङाङ् वयाङ्॥’ आङ्गाॽ खिनिॽ मे़त्निङ्, ‘आङ्गाॽ आइङ्जाङ्ङिन् के़इःत्तुम् के़नाःत्तुम्ने़भग्र खिनिॽ आमना के़बोःक्खिॽ खे़ब्याङ् आङ्गाॽ खिनिॽ निङ्वाॽफुमाङ् पोङ्ङा॥ 5 खे़ब्याङ् खिनिॽ पाधे़बाहाॽ पित्नु नु सक्वाघु के़गुङ्बा लाजेॽधिक् पिनिङ् मे़त्तुङ्सिङ्बा माङ्हुप्पिन् के़त्तुङ्॥ हे़क्क्याङ् हाबा खे़न् लाजेॽओ आल्लो खिनिॽ के़युङिर के़वयि॥’” आङ्गाॽ मे़त्तुङ्, “यहवे दाङ्बाए, अक्खेए पोङ्लरो॥” 6 हे़क्क्याङ् यहवे दाङ्बे़ल्ले़ आङ्गाॽ मे़त्ताङ्, “यहुदाबा ये़क्यक्हाॽ नु यरुसले़ःम्मोबा लाम्लाम्मो पेगे़ॽ॥ खे़प्मो आङ्गाॽ आइङ्घङ्ङिन् मे़त्ते़से़ॽ खे़ब्याङ् मनाहाॽ आमाङ्हुप्पो हुप्मनाबा पाःन्हाॽ खे़म्मा नु खे़न् इःप्मा नाःप्मा पाङ्घे़से़ॽ॥ 7 आत्तिन् ये़म्मो आङ्गाॽ खे़ङ्हाॽरे़ खुन्छिॽ पाधे़बाहाॽ मिस्रलाम् थे़ॽरुङ्सिङ्ङाङ् थाक्तुङ्सिङ्, खे़न् ये़म्मो खे़ङ्हाॽ आङ्गाॽ आइङ्जाङ्ङिन् इःत्ते़म् नाःत्ते़म्मे़ॽ फाॽआङ् ये़त्ले़ङ् साम्दिङ् पिरुङ्सिङ्ङाङ् पत्छाङ् हे़क्केलॽरिक्के आइन् थारिक् कन् मनाहाॽ साम्दिङ् पिरुङ्सिङ्ल वाॽआ॥ 8 कर खे़ङ्हाॽरे़ आङ्गाॽ आइङ्जाङ्ङिन् मे़न्इःत्तुन् मे़न्नाःत्तुन् हे़क्क्याङ् खे़म्घे़म्माङ् मे़ल्लाप्तुन्॥ परुमाल्ले़ खे़ङ्हाॽ आभे़ल्ले़साङ् हादिङ् के़धक्पा नु ताक्के़भे़ॽबारक् मे़बोःक्खे़॥ खे़न् माङ्हुप्पिन् के़प्मारे़ लागि आङ्गाॽ खे़ङ्हाॽ इङ्जाङ् पिरुङ्सिङ्ङाङ् वयाङ् कर खे़ङ्हाॽ हे़क्के चोःक्मा मे़न्दे़न्दे़न्॥ खे़ल्ले़चोगुल्ले़ खे़न् माङ्हुप्पो पोधक् के़बोङ्बा के़रे़क् खुम्दिङ्हाॽ आङ्गाॽ खे़न्हाॽरे़ खुन्छिॽ सम्धाङ् थासुङ्॥” 9 खे़न् एगाङ् यहवे दाङ्बे़ल्ले़ आङ्गाॽ मे़त्ताङ्, “यहुदा नु यरुसले़ःम्मोबा मनाहाॽरे़ आङ्गाॽ आदक्ले़ङ्वाओ चे़म्भन् मे़जोगुर मे़वाॽ॥ 10 आङ्गाॽ आबाःन्जाःक्हाॽ खे़म्मा मे़न्दे़म्मनाबा खे़ङ्हाॽरे़ खुन्छिॽ आबाङे पाधे़बाहाॽरे़ खुन्छिॽ लायो लासोत् ले़प्माङ् खे़ङ्हाॽ मे़लासे़आङ् मे़वाॽ॥ खे़ङ्हाॽरे़ कुसिङ् मे़न्निःत्तुन्छिन्बा एयाङ्बा साम्माङ्हाॽ माङ्से़वा मे़मे़त्तुसिआङ् मे़वाॽ॥ इस्राइल नु यहुदा ने़प्माङ्बा मनाहाॽरे़ खे़ङ्हाॽरे़ खुन्छिॽ पाधे़बाहाॽरे़ मे़जोगुबा माङ्हुप्पिन् मे़ङ्गे़त्ते मे़भेःन्दुआङ् वाॽ॥ 11 खे़ल्ले़चोगुल्ले़ आङ्गाॽ यहवे दाङ्बे़ल्ले़ पाःत्तुङ्ॽ, आङ्गाॽ खे़ङ्हाॽ अक्खेलॽरिक् साम्दिङ् पिरुङ्सिङ्ङाङ् आङ्गाॽ खे़ङ्हाॽरे़ खुन्छिॽ सम्धाङ् मे़क्मासिमे़न् तारुङ्ॽ हे़क्क्याङ् खे़ङ्हाॽ खे़त्छिङ्मा मे़न्छुक्ने़न्॥ खम्भ्याङ् खे़ङ्हाॽरे़ कुभाॽरे़ लागि आङ्गाॽ पेलि मे़भाक्काने़भग्र आङ्गाॽ मे़घे़प्सुङ्ङिन्॥ 12 खे़ब्याङ् यहुदा नु यरुसले़ःम्मो के़युङ्बाहाॽरे़ सुक्पा मे़हाःन्दुआङ् माङ्मे़घयुसिबा साम्माङ्हाॽ मे़हाःप्ल पेलि मे़भाक्तुसिॽ॥ कर खे़न् साम्माङ्हाॽरे़ मे़क्मासिमा ये़म्मो खे़ङ्हाॽ ताङ्से़ःप्मा मे़न्छुक्तुन्सिन्॥ 13 यहुदाओ आक्ख्यारिक् ये़क्यक्हाॽ ने़ःॽ, खे़प्मोबा यक्युङ्बाहाॽरे़ खे़म्म्याक्के यरिक् साम्माङ्हाॽ मे़गत्तुसिॽ॥ यरुसले़ःम्मो आक्खे़म्म्याक् लाम्हाॽ ने़ःॽ, खे़प्मोबा मनाहाॽरे़ खे़म्म्याक्के यरिक् खे़न् आनुःन्नुःम्बा याम्गे़सिङ्बा बाल साम्माङ्ङो सिदुङ्जभा तोःम्मारे़ लागि सुक्पा हाःम्मा ले़त्ति तोःम्मादे़न्हाॽ मे़जोगुआङ् ने़ःॽ॥ 14 “यर्मियाए, कन् मे़न्छाम् सुवाङ्हाॽरे़ लागि तुवा मे़जोगे़न्ने़ॽ इग्र पेलि मे़भाक्ताङ्ङिन्ने़ॽ॥ खे़ङ्हाॽरे़ तुक्खे मे़दुमुबा ये़म्मो कुभाॽरे़ लागि पेलि के़भाक्काल्ले़ आङ्गाॽ मे़घे़प्सुङ्ङिन्॥” 15 यहवे दाङ्बाल्ले़ पाःत्तुॽ, “लुङ्माॽ तुक्तुङ्सिङ्बा मनाहाॽरे़ ताप्फे़ःम्बा याःम्बक् मे़जोगुआङ् मे़वाॽरो॥ आङ्गाॽ आहिम्मो तामा खे़ङ्हाॽरे़ थे युक् मे़गत्तुबे? थे खे़ङ्हाॽरे़ माङ्हे़क् नु थक्सान् सिदुङ्जभा मे़जोगुआङ् ये़त्तुक्खेन् खे़प्मा सुक्तुम्बे़ फाॽआङ् मे़इःत्तुबि? हे़क्क्याङ् थे खे़ङ्हाॽरे़ खुन्छिॽ निङ्वाॽ ताबि? 16 आङ्गाॽ यहवे दाङ्बे़ल्ले़ थिक् ये़म् खे़ङ्हाॽ नुबा सिङ्सेॽ के़धोःक्पा मे़त्तुङ्सिङ्लो लत्छा नुबा सरेःक्याःप्पा पे़ःङ्वालिःत्छेॽ सिङ्बुङ् लॽरिक् मिङ् वाःत्तुङ्सिङ्ङाङ् वये़रो॥ कर आल्ल साःम्भे ले़क्नामे़ःन्ने खे़ल्ले़ कुभे़क्वाओ फाःत्त्रा केःत्तुङ्लो हे़क्क्याङ् कुबोराक्हाॽ फल्लक् फल्लक् ए़क्खुङ्लो॥ 17 “आङ्गाॽ मुक्साम्दाङ्बा यहवे दाङ्बे़ल्ले़ इस्राइल नु यहुदान् लेःत्तुङ्सिङ्ङाङ् वयाङ्, कर आल्ल आङ्गाॽ खे़ङ्हाॽ सम्धाङ् ये़त्तुक्खेन् ताःप्मा खारा चोगुङ्ङाङ् वाॽ॥ ताप्फे़ःम्बा याःम्बक् मे़जोगुआङ् कन् ये़त्तुक्खेन् खे़ङ्हाॽरे़ आबाङे खुन्छिॽ सम्धाङ् मे़दारु॥ बाल साम्माङ्ङो सुक्पा मे़हाःन्दुआङ् खे़ङ्हाॽरे़ आङ्गाॽ आसिक् मे़भोक्खुआङ् वाॽरो॥” यर्मियान् से़प्मा चे़म्भन् 18 आङ्गाॽ आनिङ्मिहाॽरे़ आदक्ले़ङ्वाओ थे चे़म्भन् मे़जोगुर मे़वये़, यहवे दाङ्बे़ल्ले़ खे़न् मे़त्ताङ्ङाङ् आङ्गाॽ निङ्वाॽ खोसुङ्॥ 19 आङ्गाॽग से़त्छे़ तेॽमनाबा लत्छा कुदोःप्मा थुःम्बा हे़क्के वयाङ्॥ खे़ङ्हाॽरे़ आङ्गाॽ आदक्ले़ङ्वाओ चे़म्भन् मे़जोगुबा फाॽआङ् आङ्गाॽ निङ्वाॽ मे़ङ्घोए वयाङ्॥ खे़ङ्हाॽरे़ अक्खे मे़बाःत्तुर मे़वये़, “खे़न् सिङ्बुङ्मान् कुजाॽनुए ताङुम्माङ् सोःन्दुम्॥ कुहिङ्वे़त्हाॽरे़ खुन्छिॽ लाजेॽलाम्बा खे़न् मे़क्खुम् हे़क्क्याङ् खे़ल्ले़ कुमिङ्ङिन् आत्तिन्हाॽरे़आङ् याम्मो निङ्वाॽसोओ मे़न्इःत्तुन्लरो॥” 20 हे़क्क्याङ् आङ्गाॽ अक्खेलॽरिक् पेलिगे़न् तुवा चोगुङ्लो, “मुक्साम्दाङ्बा यहवे दाङ्बाए, खे़ने़ॽ मनाहाॽ खासे़न् के़जोगुसिरो॥ खे़ने़ॽ मनाहाॽरे़ खुन्छिॽ सिक्लुङ्मान् नु निङ्वान् के़साॽरुरो॥ खे़ने़ॽ खे़ङ्हाॽ खुम्दिङ् के़बिरुसिबान् निमा खोसुङ्लरो॥ थेआङ्भे़ल्ले़ आङ्गाॽ आबाःन्निन् खे़ने़ॽ के़हुक्को तोःन्दुङ्ङाङ् वाॽरो॥ 21 “अनातोतबा मनाहाॽरे़ आङ्गाॽ से़प्मा निङ्वाॽ मे़जोगु॥ यहवे दाङ्बे़ल्ले़ कुइङ्घङ्ङिन् खे़ने़ॽ के़से़सुर के़वाॽने़भग्र आनिगे खे़ने़ॽ से़त्तासिगे़ फाॽआङ् खे़ङ्हाॽरे़ आङ्गाॽ मे़मे़त्ताङ्ङाङ् वये़॥ 22 खे़ल्ले़चोगुल्ले़ मुक्साम्दाङ्बा यहवे दाङ्बे़ल्ले़ अक्खे मे़त्ताङ्, ‘ओमे़त्ते़ॽ, आङ्गाॽ खे़ङ्हाॽ खुम्दिङ् पिरुङ्सिङ्! खे़ङ्हाॽरे़ खुन्छिॽ नालिगे़न् थाङ्बे़न्हाॽ थङ्ङो मे़से़रुसिॽ॥ खे़ङ्हाॽरे़ खुन्छिॽ थाङ्बे़न् साहाॽ साक्किल्ले़ हदॽ मे़सिःॽ॥ 23 अनातोतबा मनाहाॽ मे़ङ्मासि ये़म्मिन् ताःप्मा आङ्गाॽ निःन्धो चोगुङ्ङाङ् वाॽ, खे़न् ये़म्मिन् ताआङ्ग आत्तिन्हाॽआङ् मे़न्हिङ्ने़न्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.