यर्मिया 10 - लिम्बुनावाइत्ला से़वा मे़प्मा नु से़क्खाबा माङ्से़वा चोःक्मा 1 इस्राइलिसे, यहवे दाङ्बे़ल्ले़ खिनिॽ थे के़मे़त्तिर के़बत्छि, खे़प्से़म्मे़ॽ॥ 2 खुने़ॽ अक्खे पाःत्तुॽ, “वेॽ सुवाङ्हाॽरे़ खुन्छिॽ सुत्नाःन् खिनिॽ मे़हुॽआसिम्मे़न्ने़ॽओ॥ ताङ्साक्पो के़धाःप्पा परिक् परिक्पा मिक्सेःन्हाॽनु खे़ङ्हाॽरे़ खुन्छिॽ निङ्वाॽ मारो कर खिनिॽग निङ्वाॽ मे़मये़म्मिन्ने़ॽओ॥ 3 इक्सादिङ् खाम्बेःक्मोबा खे़न् मे़न्छाम् सुवाङ्हाॽरे़ खुन्छिॽ साम्यो साक्थिम्हाॽग थेनाधेबा चोक्लो॥ मनाहाॽ ताम्भुङ्ङो मे़बेःक्काङ् सिङ्बुङ्धिक् मे़दाङुरो हे़क्क्याङ् सिङ्गे़गाम्बे़ल्ले़ खे़न् काःङ्भेःल्ले़ खोःन्दुरो॥ 4 मनाहाॽरे़ खे़न् साम्म्याङ् नु युप्पाःल्ले़ मे़जोःक्तुरो॥ खे़न् मे़जोःन्ने़न् मे़गे़ङ्ने़ल्ल फाॽआङ् इमे़घेःक्खुरो हे़क्क्याङ् मे़ये़प्सुआङ् थवाःल्ले़ मे़धे़प्तुरो॥ 5 खे़न् नावाइत्लाहाॽग पइत् ताप्पो मे़ये़प्सुबा खार्जोःम्बा हे़क्तङ्बा मे़जोक्लो॥ खे़ङ्हाॽ पाःप्मा मे़न्छुक्ने़न्लो॥ खे़ङ्हाॽ पङ्माआङ् कुमा कप्मासि पोङ्लो थेआङ्भे़ल्ले़ खे़ङ्हाॽ लाङ्घेःक्मा मे़न्छुक्ने़न्लो॥ खे़ङ्हाॽनु मे़गिसे़म्मिन्ने़ॽ, खे़ङ्हाॽरे़ खिनिॽ थेआङ् हान्ति चोःक्मा के़मे़न्छुक्तिन्लो, खे़ङ्हाॽरे़ थेआङ् नुबा चोःक्मा मे़न्छुक्तुन्लो॥” 6 आङ्गाॽ पाःत्तुङ्, “यहवे दाङ्बाए, खे़ने़ॽ हे़क्तङ्बा वेॽ आत्तिन्नाङ् होप्लो, खे़ने़ॽ मुक्साम्साबा के़जोःक्लो॥ खे़ने़ॽ के़मिङ्ङिन् के़इङ्बा नु मुक्साम्साबा चोक्लो॥ 7 इक्सादिङ् खाम्बेःक्मोबा मे़न्छाम् याप्मिहाॽरे़ खुन्छिॽ हाङ्ङे, हाःत्ले़ खे़ने़ॽ मिङ्सो इङ्धाङ् के़म्बिने़म्बे? खे़ने़ॽग मिङ्सो इङ्धाङ् पिमा के़लाॽबा के़जोःक्लो॥ इक्सादिङ् खाम्बेःक्मोबा सिक्कुम्निबा मना इग्र खे़ङ्हाॽरे़ खुन्छिॽ हाङ्हाॽओ खे़ने़ॽ कुसिङ्बा आत्तिन्नाङ् होप्लो॥ 8 खे़ङ्हाॽ के़रे़क् कुधना के़होप्पा नु कुसुम् मे़न्दम्मनाबा मे़जोक्लो॥ सिङ्लाम्बा मे़जोगुसिबा नावाइत्लाहाॽलाम् खे़ङ्हाॽ थेआङ् हुॽसिङ्मा मे़न्छुक्ने़ल्लो॥ 9 खे़ङ्हाॽरे़ खुन्छिॽ नावाइत्लाहाॽग कार्बोबाहाॽरे़ खुन्छिॽ हुक्कोबा याःम्बक्लो॥ साम्म्याङ् के़धक्पे़ल्ले़ तर्सिस लाजेॽबा युप्पा हे़क्क्याङ् उपज लाजेॽबा साम्म्याङ्ङिल्ले़ खे़न् नावाइत्लाहाॽ सुःप्तुसिरो॥ थाक्थाक्मा के़ले़बा मनाहाॽरे़ मे़धागुबा कुभिङ्ला हे़क्क्याङ् परान्ला चिरिक्किन् खे़ङ्हाॽ तेत् मे़जाक्तुसिरो॥ 10 कर यहवे दाङ्बाए, खे़ने़ॽग से़क्खाबा निङ्वाॽफुमाङ्ने़रो, खे़ने़ॽग कुहिङ्वे़त् निङ्वाॽफुमाङ्ने़रो हे़क्क्याङ् नुप्मे़न्दिङ्बा पयम् यम्बा हाङ्ने़रो॥ खे़ने़ॽ के़याःक्ले़ॽइल्ले़ इक्सादिङ् खाम्बेःक्मान् लोःक्खुरो॥ इक्सादिङ् खाम्बेःक्मोबा आत्तिन् मे़न्छाम् सुवाङ्हाॽआङ् के़सिक् पोःक्किल्ले़ के़दगि ये़प्मा मे़न्छुक्ने़न्लो॥” 11 वेॽ माङ्हाॽ से़वा के़मे़प्पाहाॽ अक्खे मे़त्ते़म्सिम्मे़ॽ, “ताङ्साक्पा नु इक्सादिङ् खाम्बेःक्मा मे़न्जोःक्मनाबा खे़न् माङ्हाॽ कन् इक्सादिङ् खाम्बेःक्मो नु साङ्ग्राम्पेदाङ् सिगाङ्लाम् मे़मा मे़बेःक्लो॥” निङ्वाॽफुमाङ्ङिल्ले़ कुनारा फोमा से़वासाम्लो 12 “यहवे दाङ्बे़ल्ले़ इक्सादिङ् खाम्बेःक्मान् कुमुक्साम्मिल्ले़ नावागे़न् चइःत् ने़स्सुरो, खुने़ॽ आबाङे कुसिक्कुम्निङ्वाॽलाम्बा योॽबा लाजेन् चोगुरो, आबाङे कुघासिङ् निःप्मा साम्मिल्ले़ ताङ्साक्पान् फोसुरो॥ 13 खुने़ॽ कुइङ्जाङ्ङिल्ले़ ताङ्साक्पो च्वाःत्तिन् हुःक्लो, इक्सादिङ् खाम्बेःक्माल्ले़ कुयाओलाम्बा खुने़ॽ खाॽमिःप्पान् फोःक्खुरो, खुने़ॽए पाङ्गे़न्दिङ् वहित्तो साःम्भे ले़क्ल याःन्दुरो॥ खुने़ॽए कुसुरित् याङ्मोलाम् सुरित् केजङ् हुसुरो॥ 14 खे़न् के़रे़क् मनाहाॽ अदङ् नु खासिङ् मे़न्निःप्मनाबा मे़जोक्लो, नावाइत्ला के़जोःक्पाहाॽ सिरिङ्ममो मे़धारो॥ खे़ङ्हाॽरे़ मे़जोगुसिबा नावाइत्लाहाॽ इङ्ले़क्केसिरो हे़क्क्याङ् कुसक्मा मे़न्याक्मनाबा मे़जोक्लो॥ 15 खे़ङ्हाॽग हने़बा नु कुनामे़न्छाॽबा चिगक्वासिरक्लो॥ खासे़न् पोङ्ङिल्ले़ खे़ङ्हाॽ खाप्पुथ्यःङ् मे़बोङ्लो॥ 16 याकुबे़न् के़रे़क् पाःन्हाॽ के़बिबा निङ्वाॽफुमाङ्ङिङ्ग खे़ङ्हाॽ हे़क्तङ्बा मे़जोक्ने़न्लो, खुने़ॽए के़रे़क् पाःन्हाॽ नावागे़न् चइःत् के़ने़बारो हे़क्क्याङ् खुने़ॽ कुमिङ्ङिन् मुक्साम्दाङ्बा यहवे दाङ्बारो॥ खुने़ॽए इस्राइले़न् लक्के़घोबा पोङ्से़ आबाङे सेगुआङ् वाॽरो॥” यहुदान् लाजेॽलाम् पेःक्मा पोङ् 17 यरुसले़ःम्मो के़युङ्बासे, खिनिॽ निङ्मिहाॽरे़ के़म्गबिआङ् के़वयिरो! खिनिॽ लाजेन् ले़प्मारे़ लागि चिगक्वा सामाहाॽ सुप्से़म्सिम्मे़ॽओ॥ 18 थेआङ्भे़ल्ले़ यहवे दाङ्बे़ल्ले़ अक्खे पाःत्तुरो, “कन् ये़म्मो कन् लाजेॽओ के़युङ्बाहाॽ के़रे़क् लाप्फुसुङ्सिङ्लो, खे़ङ्हाॽ साॽरिक् तुक्खे मे़न्जाए थारिक् यम्बा तुक्खे मे़दुमुर याःन्दुङ्सिङ्लो॥ 19 “यरुसले़म ये़क्यक्को यक्युङ्बाहाॽ फिःक्ते़म्मे़ॽओ, ‘चिःत्ते़ स्ये़, आनिगे साॽरिक् यम्बा काःन्दिगे़आङ् वयिगे़रो! आनिगे काःन्दिगे़बा याङ्घेःक्किन् मे़वेःत्ने़ल्लो आनिगे़ग कन् नासिथःप्मा सुक्तुम्बे़ फाॽआङ् इःत्तुम्बे़आङ् वयिगे़रो॥ 20 आनिगे साःङ्गाहिम्हाॽ हर्जुॽवर्जुॽ चोःन्दे़आङ् ने़रो, के़रे़क् इदाःक्हाॽ स्याक् वयाक् पुॽरे़आङ् ने़रो॥ आनिगे हिन्जाॽबित्छाॽहाॽ के़रे़क् मे़बेमे़जुरे़आङ् मे़होप्लो, आनिगे साःङ्गाहिम्हाॽ याम्मो के़जोःक्पा के़बिबा हाःत्ताङ् होप्लो, खे़ब्याङ् आनिगे साःङ्गाहिम् खाप्मान् के़घिङ्बा के़बिबा एःन्नाङ् होप्लो॥ 21 आनिगे लाम्लोबाहाॽ खासिङ् मे़न्निःप्मनाबा मे़ल्लुक्कम्बा हे़क्के मे़लॽरो॥ यहवे दाङ्बे़ल्ले़ लाम् ओसेःन्आधाक्ल फाॽआङ् खे़ङ्हाॽ पेलि मे़म्भाक्ने़न्लो॥ खे़ल्ले़चोगुल्ले़ खे़ङ्हाॽ कुलिङ्दो मे़ङ्गे़रे़न्लो हे़क्क्याङ् आनिगे मनाहाॽ के़रे़क् पिसाङ् मे़ल्लुक् हे़क्के मे़से़रे़आङ् मे़वाॽरो! 22 खे़प्से़म्मे़ॽ, लत्छा इङ्घङ् के़रे़आङ् वाॽरो, थाङ्गे़त् पिसाङ्बा लत्छा लाजेॽओ यम्बा हयङ् किल्लिङ् पोङ्ल पत्लो॥ खे़ल्ले़ कुधक्सुबाहाॽ मे़युआङ् यहुदाबा ये़क्यक्हाॽ मुरे़क् खारे़क् मे़जोगुरो हे़क्क्याङ् खे़न् यहुदान् किधिःप्पा याङ्दःक् वाॽमादे़न् मे़जोगुरो॥’” यर्मियाःल्ले़ कुबेलि 23 यहवे दाङ्बाए, मनाःल्ले़ कुहिङ्मन् आबाङे कुहुक्को होप्लो खे़ल्ले़ कुलाम्मिन् आबाङे कुयुक्को होप् फाॽआङ् निसुङ्लो॥ 24 यहवे दाङ्बाए, खे़ने़ॽ के़मनाहाॽ के़घासे़न् कुइसिक् तोःन्दे़से़ॽओ॥ खे़ने़ॽ के़सिक् पोःक्मो आनिगे खुम्दिङ् आम्बिरे़न्ने़ॽओ, मेःन्ने़भग्र आनिगे हदॽ मे़गिगे़रो॥ 25 खे़ने़ॽ के़मिङ्ङो निङ्वाॽ मे़म्बिमनाबा नु खे़ने़ॽ के़नाॽबा सुवाङ्हाॽओ, खे़ने़ॽ के़सिक् पोःक्मान् थासे़ॽओ॥ खे़ङ्हाॽरे़ खे़ने़ॽ के़मनाहाॽ इस्राइलिहाॽ मे़लरु मे़देसुसिआङ् मे़वाॽरो खे़ङ्हाॽरे़ मे़लरुसिआङ् मे़मे़क्खुसिरो हे़क्क्याङ् खे़ङ्हाॽरे़ खुन्छिॽ लाजेन् खाप्पुथ्यःङ् मे़जोगुआङ् ने़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.