यर्मिया 1 - लिम्बुयर्मिया 1 बेन्यामिन लाजेॽबा अनातोत ये़क्यक् के़युङ्बा लत्छा निङ्वाॽफुसाम्बा हिल्कियाहरे़ कुस्सा यर्मियाःल्ले़ पाःत्तुबा पाःन्हाॽ कन्हाॽरो॥ 2 अमोनरे़ कुस्सा योसियाहन् यहुदाबा हाङ् पोःक्खे़बा थिबोङ्ङाङ् सुम्सि तङ्बेओ यहवे दाङ्बे़ल्ले़ कुइङ्घङ्ङिन् चक्मे़न्लॽए यर्मियाओ के़रे़॥ 3 योसियाहरे़ कुस्सा यहोयाकिमे़ल्ले़ हाङ्युक् चोगुबा ये़म् खाराक् नु यहुदाबा हाङ् योसियाहरे़ कुस्सा सिदकियाहःल्ले़ हाङ्युक् चोगुबा थिबोङ्ङाङ् थिक् तङ्बे के़रे़बा ला ङासि थारिक्के यरुसले़ःम्बा मनाहाॽ मे़दे़म्सुसिआङ् लाजेॽ लाःक्कात् मे़न्देॽसिङ्ङे थारिक् यहवे दाङ्बे़ल्ले़ कुइङ्घङ्ङिन् खुने़ॽओ के़रे़र वये़रो॥ यहवे दाङ्बे़ल्ले़ यर्मियान् उःत्तु 4 यहवे दाङ्बे़ल्ले़ कुइङ्घङ्ङिन् आङ्गाॽओ के़रे़रो, 5 “आङ्गाॽ खे़ने़ॽ के़म्मारे़ कुसाप्पोःक्को नावागे़न् चइःत् चोःक्मानुःल्ले़ तगिए सेःक्ने़आङ् वयाङ्लो हे़क्क्याङ् खे़ने़ॽ सावाःन्छिङ्मानुःल्ले़ तगिए यरिक् मे़न्छाम् सुवाङ्हाॽ माङ्निङ्वाॽपान् मे़प्मासिरे़ लागि एःक् चोःक्ने़आङ् वयाङ्लो॥” 6 आङ्गाॽ नुगप् पिरुङ्, “यहवे दाङ्बाए, आङ्गाॽग पाःप्माए मे़ले़आन्, आङ्गाॽग अङे़ःक्वाए वाॽआरो॥” 7 कर यहवे दाङ्बे़ल्ले़ आङ्गाॽ मे़त्ताङ्, “आङ्गाॽ अङे़ःक्वाए वाॽआ लॽरिक् मे़बाःत्ते़न्ने़ॽ कर आङ्गाॽ आत्तिन् मनाहाॽरे़ खुन्छिॽ लुम्मो खे़ने़ॽ पाङ्ने़, खे़ङ्हाॽओ खे़ने़ॽ पेगे़ॽ खे़ब्याङ् आङ्गाॽ खे़ने़ॽ थे इङ्जाङ् पिने़, खे़न् खे़ङ्हाॽ मे़त्ते़से़ॽ॥ 8 खे़ङ्हाॽनु खे़ने़ॽ मे़गिसे़न्ने़ॽ थेआङ्भे़ल्ले़ आङ्गाॽ खे़ने़ॽ से़ःप्मारे़ लागि खे़ने़ॽनु वाॽआ॥ आङ्गाॽ यहवे दाङ्बान् पाराङ्ङाङ् वाॽआरो!” 9 खे़न् एगाङ् यहवे दाङ्बे़ल्ले़ कुहुक्किन् सन्छुआङ् आङ्गाॽ आम्ब्राओ सुसाङ् पिराङ् हे़क्क्याङ् आङ्गाॽ मे़त्ताङ्लो, “खे़प्से़ॽ, इङ्गाॽ आबाःन्जाक्किन् खे़ने़ॽ के़म्ब्राओ केःत्तुङ् पिने़आङ् वाॽरो॥ 10 आइन् खे़ने़ॽ यरिक् मे़न्छाम् सुवाङ्हाॽ हे़क्क्याङ् हाङ्जुम्हाॽओ के़युङ्बाहाॽ आःङ्मासि, सोःम्मासि, मे़ङ्मासि इग्र लाप्फेमासि, फोङ्मासि नु युक्सिङ् चोःक्मासि मुरा मे़त्ने़रो॥” ने़त्छि सुफोहाॽ 11 यहवे दाङ्बे़ल्ले़ कुइङ्घङ्ङिन् आङ्गाॽओ के़रे़, “यर्मियाए, खे़ने़ॽ थे के़निसुर के़बत्?” आङ्गाॽ नुगप् पिरुङ्, “खङ्जङ्सेॽ सिङ्ङिल्ले़ लत्छा कुबोराक् थिक् निसुङ्ॽ॥” 12 यहवे दाङ्बे़ल्ले़ आङ्गाॽ मे़त्ताङ्, “खे़ने़ॽ कुदोःप्माए के़निसु, थेआङ्भे़ल्ले़ आङ्गाॽ पाःत्तुङ्बा पाःन्हाॽ के़रे़बान् ओमे़प्मारे़ लागि हाङ्घुङ्ल वाॽआ॥” 13 यहवे दाङ्बे़ल्ले़ कुइङ्घङ्ङिन् याम्मो आङ्गाॽओ के़रे़, “वेॽ थे के़निसुबे?” आङ्गाॽ नुगप् पिरुङ्, “थाङ्गे़त् पिसाङ् आङ्गाॽ लत्छा खप्प्याधिक् लाक्तुर युङ्बा निसुङ्ॽ हे़क्क्याङ् खे़न् कॽयो ले़प्माङ् वे़प्मा चोःक्काङ् युङ्ॽ॥” 14 खुने़ॽ आङ्गाॽ मे़त्ताङ्, “थोहाङ् पिसाङ्लाम्बाए मे़क्मासिमान् लाक्तुआङ् कन् लाजेॽबा मनाहाॽ सम्धाङ् चुक्॥ 15 थेआङ्भे़ल्ले़ आङ्गाॽ थाङ्गे़त् ले़प्माङ्बा के़रे़क् सुवाङ्हाॽ उःत्तुङ्सिङ्ल पत्तारो॥ “खे़ङ्हाॽरे़ खुन्छिॽ हाङ्हाॽ मे़दारो हे़क्क्याङ् खुन्छिॽ हाङ्युक्नान् यरुसले़म लाःप्मा ताःक्हन्हाॽओ मे़युक्खुरो खे़ब्याङ् खे़ङ्हाॽ के़रे़क् पिसाङ्बा लुङ्धाक्हाॽओ नु यहुदाबा के़रे़क् ये़क्यक् खिरिआङ् मे़युक्खुरो॥ 16 आङ्गाॽ आबाङे आमनाहाॽ खुम्दिङ् पिरुङ्सिङ्लो थेआङ्भे़ल्ले़ खे़ङ्हाॽरे़ लायो मे़जोगुआङ् वाॽरो, आङ्गाॽ खे़ङ्हाॽरे़ लाप्मे़भुसाङ्लो हे़क्क्याङ् वेॽ माङ् साम्माङ्हाॽओ साङ्सिङ् सुक्पा मे़हाःन्दुआङ् मे़वाॽरो नावाइत्लाहाॽ मे़जोगुसि खे़ब्याङ् खे़ङ्हाॽ माङ्से़वा मे़मे़त्तुसिआङ् मे़वाॽरो॥” 17 “यर्मियाए, यारिप् पोःक्खे़ॽ, हे़क्क्याङ् पेगे़ॽओ आङ्गाॽ खे़ने़ॽ इङ्जाङ् पिने़बा के़रे़क् पाःन्हाॽ खे़ङ्हाॽ मे़त्ते़से़ॽओ॥ आल्ल खे़ङ्हाॽनु खे़ने़ॽ मे़गिसे़न्ने़ॽओ॥ मेःन्ने़भग्र खे़ङ्हाॽरे़ खुन्छिॽ तगि आरसाङ् यरिक् के़गिबा चोःक्ने़रो॥ 18 यर्मियाए, खे़प्से़ॽओ आइन् लत्छा लिमा सुक्मे़न्दे़प्मनाबा हाङ्यक् हे़क्तङ्बा के़धुम्बा चोःक्ने़आङ् वाॽरो खे़न् ये़क्यक्किङ्ग फे़न्जेॽ सित्लाङ् इग्र कासाःल्ले़न् लुङ्धाक् हे़क्तङ्बा चोक्लो यहुदाबा हाङ्हाॽ, सुहाङ्युक्पाहाॽ, निङ्वाॽफुसाम्बाहाॽ हे़क्क्याङ् मनाहाॽलुम्मो खे़ने़ॽ के़रे़क् लाजेःल्ले़ कुदक्ले़ङ्वाओ थधप् मे़ल्लॽए के़ये़प्लो॥ 19 खे़ङ्हाॽ खे़ने़ॽनु थङ् मे़जोक् कर खे़ने़ॽ नाःम्मा के़मे़न्छुक्ने़न्लो थेआङ्भे़ल्ले़ खे़ने़ॽ के़दाङ्से़ःप्से़ आङ्गाॽ खे़ने़ॽनु वाॽआरो॥ आङ्गाॽ, यहवे दाङ्बाल्ले़ पाःत्तुङ्ङाङ् वाॽआरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.