खासे़न्लोःम्बा 3 - लिम्बुकनान के़युङ्बा के़याःक्पा मे़न्छाम् सुवाङ्हाॽ 1 कनान लाजेॽओ थङ् पोःक्खे़बान् मे़न्दुम् मे़न्निए के़वाॽबा इस्राइलिहाॽरे़ खुन्छिॽ निङ्वाॽ साॽमारे़ लागि यहवे दाङ्बे़ल्ले़ कुभा मे़न्छाम् सुवाङ्हाॽ युङ्मा फाःक्तुसिआङ् वये़॥ 2 इस्राइलओ याङ्सि के़गे़प्पा के़धाङ्बा थाःक्, इग्र तगि थङ् चोःक्मा मे़ल्ले़ए के़वाॽबाहाॽ, आक्खेलॽरिक् थङ् चोःक्मा हुॽमासि के़लॽबा यहवे दाङ्बे़ल्ले़ कुनिङ्वाॽ वये़॥ 3 खे़न् मे़न्छाम् सुवाङ्हाॽग हाबा कन्हाॽएरो—पलिस्तिबा ङासि युक्साबाहाॽ, के़रे़क् कनानिहाॽ, सिदोनि नु ले़बनानबा कोःक्माहाॽओ बाल-हेर्मोन कोःक्मालाम् ले़बो-हमात थारिक् के़युङ्बा हिब्बिहाॽ॥ 4 खुने़ॽ चोःक्मा कोःत्तुबान् मोसालाम् खे़ङ्हाॽरे़ खुन्छिॽ पाधे़बाहाॽ यहवे दाङ्बे़ल्ले़ पिरुसिबा इङ्जाङ्हाॽ इस्राइलिहाॽरे़ मे़इःत्तु मे़नाःत्तुबि मेःम्बि फाॽआङ् साॽमारे़ लागि वये़॥ 5 कम्भलॽरिक् इस्राइलिहाॽ कनानि, हित्ति, एमोरि, परिज्जि, हिब्बि नु यबुसिहाॽनु सोरिक् युङ्मा पोःक्खे़, 6 खे़ङ्हाॽरे़ कनानिहाॽरे़ खुन्छिॽ मे़न्छुमा साहाॽ मेःक्खिम् मे़मे़त्तुसि, हे़क्क्याङ् खुन्छिॽ मे़न्छुमा साहाॽआङ् खे़ङ्हाॽरे़ खुन्छिॽ ये़म्बित्छासाहाॽ नु मेःक्खिम् मे़मे़त्तुसि, हे़क्क्याङ् खुन्छिॽ माङ्हाॽआङ् से़वा मे़प्मा मे़हेःक्तुसिरो॥ ओत्निएले़न् इस्राइलओ खासे़न्लोःम्बा पोङ्ॽ 7 आत्तिन् पाःन्निन् यहवे दाङ्बे़ल्ले़ कुनिमो ताप्फे़ःम्बा चोगे़ इस्राइलिहाॽरे़ हाबा खे़न् मे़जोगु॥ खे़ङ्हाॽरे़ यहवे दाङ्बा खुन्छिॽ निङ्वाॽफुमाङ्ङिन् निङ्वाॽ मे़भेःत्छु हे़क्क्याङ् बाल माङ्हाॽ नु असेरा साम्माङ्हाॽ से़वा मे़मे़त्तुसि॥ 8 इस्राइलिहाॽनु वहवे दाङ्बे़न् कुसिक् पोगे़, हे़क्क्याङ् खुने़ॽ खे़ङ्हाॽ अराम-नाहारैमबा हाङ् कुसन-रिसातैमरे़ कुहुक्को सङ्घुसि, इस्राइलिहाॽ ये़त्छि तङ्बे थारिक् कुसन-रिसातैमरे़ कुयुक्को मे़वये़॥ 9 कर आल्ल इस्राइलिहाॽरे़ कुभाॽरे़ लागि यहवे दाङ्बे़न् पेलि मे़भाक्तु, हे़क्केःल्ले़ खुने़ॽ खे़ङ्हाॽ से़ःप्मासिरे़ लागि कालेबरे़ कुन्साॽ कनजरे़ कुस्सा ओत्निएले़न् फोःक्खु, हे़क्क्याङ् खे़ल्ले़ खे़ङ्हाॽ चोःक्युम्भो पिरुसि॥ 10 यहवे दाङ्बे़ल्ले़ कुयाम्साम्मिन् खे़ल्ले़ओ ये़, हे़क्क्याङ् खे़न् इस्राइलओ लाम्लोबा पोःक्खे़॥ खे़न् थङ् चोःक्मारे़ लागि लःन्दे़, खे़ब्याङ् यहवे दाङ्बे़ल्ले़ आरामबा हाङ् कुसन-रिसातैमे़न् खे़ल्ले़ कुहुक्को थासु॥ ओत्निएलरे़ खे़न् नाःन्दु॥ 11 कम्भलॽरिक् कनजरे़ कुस्सा ओत्निएले़न् मे़न्छिए थारिक् लाजेॽओ लिबोङ् तङ्बे थारिक् सनारुङ् पोःक्खे़रो॥ एहुदे़न् इस्राइलबा खासे़न्लोःम्बा पोङ्ॽ 12 याम्मो इस्राइलिहाॽरे़ यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न् मे़जोगु॥ कल्ले़चोगुल्ले़ यहवे दाङ्बे़ल्ले़ मोआबबा हाङ् एग्लोने़न् इस्राइलओ के़धुम्बा चोगु॥ 13 एग्लोनरे़ अम्मोनिहाॽ नु अमाले़किहाॽ थङ्ले़ लागि फुक्खुसि, हे़क्क्याङ् इस्राइलिहाॽ थङ्ङो फप्मासिरे़ लागि तगि मे़धासिङ्, खम्भ्याङ् खे़बक्सिङ्हाॽ के़युङ्बा ये़क्यक्किन् हुक्को मे़धासु॥ 14 इस्राइलिहाॽ थिबोङ्ङाङ् ये़त्छि तङ्बे थारिक् मोआबबा हाङ् एग्लोनरे़ कुयुक्को मे़वये़॥ 15 याम्मो खे़ङ्हाॽरे़ कुभाॽरे़ लागि यहवे दाङ्बे़न् पेलि मे़भाक्तु, हे़क्क्याङ् खुने़ॽ लत्छा मना, इग्र बेन्यामिनि गेराःल्ले़ कुस्सा, फे़ङ्हुक्या एहुदे़न् खे़ङ्हाॽ चोःक्युम्भो पिमासिरे़ लागि फोःक्खु॥ इस्राइलिहाॽरे़ मोआबबा हाङ् एग्लोनओ खुन्छिॽ सुर्तुक् हुङ्से़ मे़बाङ्घुमे़देसु॥ 16 एहुदरे़ आप्फेक् कुलागि हुक्सिक्थिक् यारिक् केःम्बा ने़प्माङ् ले़प्माङ् कुया के़बप्पा ताभेधिक् कुजुक्वा कुगे़ङ्ङोनु कुलाङ् से़बङ्बो कुदेःत्तिल्ले़ ते़प्तुआङ् हेॽसिङ्॥ 17 खे़न् एगाङ् खुने़ॽ मोआबबा हाङ् एग्लोनओ एःङ् तेॽरुआङ् पे॥ एग्लोने़न् साॽरिक् के़मे़ॽबा मना वये़॥ 18 एहुदरे़ एःङ्याङ्ङिन् तोःन्दु सुरुआङ् खे़ल्ले़ एःङ् के़बङ्बा के़भे़प्पा मनान् पाङ्घुदेसु॥ 19 खुने़ॽग गिलगालओ के़युङ्बा, नावाइत्लाहाॽ के़युङ्बादे़न्ओलाम् नुःक्खे़भे़रे़, हे़क्क्याङ् खे़ल्ले़ मे़त्तु, “पयम् हाङ्ङे, आङ्गाॽ आदाङ्बा स्वाःत्ताङ् थे़माइ मे़प्मा कत्ने़॥” खे़ब्याङ् एग्लोनरे़ मे़म्बाःप्मा इङ्जाङ् पिरुआङ् खुने़ॽ कुसे़वारोबाहाॽ लाःक्कात् पाङ्घुसि॥ 20 आल्ल खुने़ॽ कुहिम्मोबा कौसिओ सुसु के़लॽबा याक्फाङ्ङो युङे़गरे़ल्ले़ एहुदे़न् कुबेसाङ् फे़रे़आङ् मे़त्तु, “यहवे दाङ्बालाम् आदाङ्बा आङ्गाॽ थे़माइ मे़प्मा पान् वाॽ॥” 21 खे़ब्याङ् एग्लोने़न् खुने़ॽ कुयुक्नाओलाम् पोगे़, हे़क्क्याङ् एहुदरे़ खुने़ॽ कुभे़ङ्वा हुक्किल्ले़ कुजुक्वा कुलाङ्से़बङ्बा ले़प्माङ् के़बप्पा ताभेन् लःत्तुआङ् खुने़ॽ कुसाप्पोःक्को फनॽ थुबु॥ 22 ताभेन् कुलाःन्नु सोरिक् लासे़, हे़क्क्याङ् खे़ल्ले़ कुएःक्को पर्दॽ लःन्दे़॥ कुसोःत्तिल्ले़ ताभेन् चिबन् पन्छु॥ खुने़ॽ ताभेन् मे़लःत्तुन्, कर हाबा हे़क्केलॽरिक्के ले़रुध॥ 23 खे़ब्याङ् एहुदरे़ याक्फाङ्ङोबा लाम्धेःत्हाॽ सुबुआङ् ए़त्तुध हे़क्क्याङ् लक्खुम्मो थासिङ् ये़॥ 24 आल्ल खुने़ॽ लाःक्कात् लःन्दे़ चुरे़आङ् एग्लोनरे़ कुसे़वारोबाहाॽ सिगाङ् मे़लासे़, खे़ब्याङ् लाम्धेःत्हाॽओ तिमिक् पत्छे़बा मे़निसुआङ् खे़ङ्हाॽरे़ मे़बाःत्तु, “हाङ्ङिन् खुने़ॽ कुहिम्मोबा सुसु के़लॽबा थाःङ्समा याक्फाङ्ङो पाहारा युङ्सिङ्ङाङ् युङ्बिला॥” 25 यरिक् ये़म् थारिक् खे़ङ्हाॽरे़ मे़हाङ्घुआङ् मे़युङे़ल्ले़ खुन्छिॽ निङ्सिसि लॽरे़, हे़क्केसाङ् एग्लोनरे़ थाःङ्समा याक्फाङ्ङोबा लाम्धेःत्हाॽ मे़न्हन्दुन्॥ खे़ब्याङ् खे़ङ्हाॽरे़ तिमिक्हाॽ मे़देॽरुआङ् लाम्धेःत्हाॽ मे़हन्दु, हे़क्क्याङ् खुन्छिॽ दाङ्बान् खाम्बाङ्ङो स्ये़आङ् ने़स्से़बा मे़दुमु॥ 26 खे़ङ्हाॽरे़ मे़हाङ्घुआङ् मे़युङे़ल्ले़ एहुदे़न् फिःन्छिङ्ङाङ् खे़त्छिङ्॥ खुने़ॽ नावाइत्लाहाॽ के़युङ्बादे़न् लाम्बा लिःन्छिङ् पेआङ् सिरा मे़प्मनाबा ते़न्नो के़रे़॥ 27 हे़क्क्याङ् एफ्राइमबा कोःक्मा फाङ्जङ्बा लाजेॽओ के़रे़आङ् खुने़ॽ सादाङ्ङिन् मुःत्तु, खम्भ्याङ् इस्राइलिहाॽ कोःक्माओलाम् खुने़ॽनु मे़ये़आङ् खुने़ॽ खे़ङ्हाॽ तगि तेॽरुसि॥ 28 एहुदरे़ खे़ङ्हाॽ मे़त्तुसि, “आङ्गाॽ आएगाङ् फे़रे़म्मे़ॽ, थेआङ्भे़ल्ले़ यहवे दाङ्बे़ल्ले़ खिनिॽ निङ्मि मोआबिहाॽ खिनिॽ हुक्के़सुप्तिआङ् वाॽ॥” कल्ले़चोगुल्ले़ खे़ङ्हाॽ खुने़ॽ कुएगाङ् कुएगाङ् मे़धासिङ्ङाङ् मे़ये़ खे़ब्याङ् खे़ङ्हाॽरे़ मोआब कत्नाहाङ् यर्दन वहःङ् कुयाओबा लुङ्हाॽ हुक्काप् मे़जोगु, हे़क्क्याङ् खे़प्मोलाम् आत्तिन्हाॽआङ् नाधाःम्बि पेःक्मा मे़म्भाःक्तुसिन्॥ 29 खे़ङ्हाॽरे़ खे़ल्ले़ याःन्दिक् खप्मे़न् हे़न्छिङ् थिबोङ् मोआबिहाॽ मे़से़रुसि॥ खे़ङ्हाॽ के़रे़क् के़धुम्बा नु मुक्के़गुबा ये़म्बित्छा मे़वये़॥ लत्छाआङ् खे़त्छिङ्मा मे़ङ्घोसे़न्॥ 30 कम्भलॽरिक् खे़ल्ले़ याःन्दिक् इस्राइलिहाॽरे़ मोआबे़न् खुन्छिॽ युक्को मे़दारु, हे़क्क्याङ् लाजेॽओ ये़प्पोङ् तङ्बे थारिक् सनारुङ् पोःक्खे़आङ् ने़स्से़रो॥ समगरे़न् इस्राइलओ खासे़न्लोःम्बा पोङ्ॽ 31 एहुदरे़ कुएगाङ् अनातरे़ कुस्सा समगरे़न् लाम्लोबा पोःक्खे़॥ खुने़ॽ किप् तुक्सि पलिस्तिहाॽ पित् नाःप्मा तक्काःत्तिल्ले़ से़रुसि॥ खे़ल्ले़आङ् इस्राइलिहाॽ ताङ्से़ःप्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.