खासे़न्लोःम्बा 2 - लिम्बुबोकिमओ यहवे दाङ्बे़ल्ले़ कुमाङ्लाइङ्बा 1 यहवे दाङ्बे़ल्ले़ कुमाङ्लाइङ्बान् गिलगाललाम् बोकिमओ थोःक्सिङ् पे, हे़क्क्याङ् पाःत्तु, “आङ्गाॽ मिस्र लाजेॽलाम् खिनिॽ लःत्निङ् फे़त्निङ्, खे़ब्याङ् आङ्गाॽ खिनिॽ पाधे़बाहाॽ पिनिङ् मे़त्तुङ्सिङ्ङाङ् माङ्हे़क् चोगुङ्बा कन् लाजेॽओ खिनिॽ के़त्निङ् फे़त्निङ्॥ आङ्गाॽ पाःत्तुङ्, ‘आङ्गाॽ खिनिॽनु चोगुङ्ङाङ् वये़बा माङ्हुप्पिन् आभे़ल्ले़आङ् मे़भेःन्नान्॥ 2 खिनिॽआङ् कन् लाजेॽबा मनाहाॽनु माङ्हे़क् मे़जोगे़म्मिन्ने़ॽ॥ खिनिॽ खे़ङ्हाॽरे़ खुन्छिॽ ले़त्ति तोःम्मादे़न्हाॽ लुःन्दे़म् पिरे़म्सिम्मे़ॽ॥’ कर खिनिॽ आङ्गाॽ आबाःन्निन् के़ङ्घे़प्सुम्मिन्॥ ओमे़त्ते़म्मे़ॽ, खिनिॽ थे़मा के़जोगुम्? 3 कल्ले़चोगुल्ले़ आङ्गाॽ पाःत्तुङ्ॽ, ‘आङ्गाॽ खे़ङ्हाॽ खिनिॽ तगिलाम् मे़नाःत्तुङ्सिङ्ङिन्ॽ॥ खिनिॽ लागि खे़ङ्हाॽ तिङ् नु खे़ङ्हाॽरे़ खुन्छिॽ माङ्हाॽ खिनिॽ लागि चे़न् मे़बोङ्ॽ॥’” 4 आल्ल यहवे दाङ्बे़ल्ले़ कुमाङ्लाइङ्बे़ल्ले़ कन् पाःन्हाॽ इस्राइलिहाॽ मे़त्तुसिल्ले़, खे़ङ्हाॽ के़रे़क् वे़ःङ्ङाङ् वे़ःङ् मे़हाबे़॥ 5 कल्ले़चोगुल्ले़ खे़न् ते़न्निल्ले़ कुमिङ् बोकिम मे़युक्खु॥ खे़प्मो खे़ङ्हाॽरे़ यहवे दाङ्बे़ल्ले़ कुलागि सिदुङ्जभाहाॽ मे़दोन्दुरो॥ यहोसुन् मासिङ् 6 यहोसुःल्ले़ इस्राइलिहाॽ लाम्मे़त्तुसिआङ् खे़ङ्हाॽ के़रे़क् खे़न् लाजेॽओ खुन्छिॽ लक्खोमा लक्को के़धाबा आप्फेक् लाजेॽहाॽ युक्मारे़ लागि मे़बे॥ 7 यहोसुन् हिङे़र थारिक् नु खुने़ॽ कुएगाङ्बा लाम्लोबाहाॽ मे़हिङे़र थारिक्, खे़ङ्हाॽरे़ यहवे दाङ्बे़ल्ले़ इस्राइलिहाॽरे़ खुन्छिॽ लागि चोगुबा के़रे़क् यम्बयम्बा याःम्बक्हाॽ मे़निसुआङ् वये़, मनाहाॽरे़ यहवे दाङ्बाओ माङ्से़वा याःम्बक् मे़जोगुर मे़वये़॥ 8 नुनरे़ कुस्सा यहोसु, यहवे दाङ्बे़ल्ले़ कुसे़वारोबे़न्, किप् थिक्काङ् थिबोङ् तङ्बेरे़ मासिङ्, 9 हे़क्क्याङ् खे़ङ्हाॽरे़ खुने़ॽ गास कोःक्मा थाङ्गे़त् ले़प्माङ् एफ्राइमबा कोःक्मा फाङ्जङ्बा लाजेॽओ के़ने़बा खुने़ॽए कुलक्खोमा लक्कोबा तिम्नथ-हेरेसबा इःन्दोओ मे़जिक्खुरो॥ यहवे दाङ्बे़ल्ले़ कुइङ्जाङ्ङिन् इस्राइलरे़ मे़इःत्तुन् 10 खे़न् काक् थाःक्कोबा के़रे़क् मनाहाॽ खुन्छिॽ पाधे़बाहाॽनु तङ्सिङ्से़ मे़बे॥ याङ्सि वेॽ थाःक्हाॽ मे़गे़रे़ मे़धाङे़ खे़ङ्हाॽरे़ यहवे दाङ्बे़न् कुसिङ् मे़न्निःत्तुन् हे़क्क्याङ् खुने़ॽ इस्राइलिहाॽरे़ लागि चोगुआङ् वये़बा याःम्बक्हाॽआङ् मे़न्निसुन्॥ 11 आत्तिन् पाःन्निन् यहवे दाङ्बे़ल्ले़ कुनिमो ताप्फे़ःम्बा चोगे़, इस्राइलिहाॽरे़ हाबा खे़न् चोःक्मा मे़हेःक्तु, हे़क्क्याङ् बाल माङ्हाॽ से़वा मे़प्मा मे़हेःक्तुसि॥ 12 मिस्रलाम् खुन्छिॽ के़लःप्पा के़भे़प्पा आप्फेक् पाधे़बाहाॽरे़ खुन्छिॽ यहवे दाङ्बा निङ्वाॽफुमाङ्ङिन् मे़ले़रुआङ् खे़ङ्हाॽ वेॽ माङ्हाॽ मे़नाःत्तु मे़दिम्दुसि इग्र खुन्छिॽ कब्रिङ् पिसाङ् के़युङ्बा मे़न्छाम् सुवाङ्हाॽरे़ खुन्छिॽ माङ्हाॽ मे़दिम्दुसि॥ खे़ङ्हाॽ खे़न् माङ्हाॽरे़ खुन्छिॽ तगि साबन् मे़भन्छिङ्, हे़क्क्याङ् यहवे दाङ्बे़न् कुसिक् पोगे़र मे़याःन्दु॥ 13 खे़ङ्हाॽरे़ यहवे दाङ्बे़न् मे़ले़रुआङ् बाल नु अस्तोरेत माङ्हाॽ से़वा मे़मे़त्तुसि॥ 14 यहवे दाङ्बे़न् इस्राइलिहाॽनु कुसाक्के़न् पोगे़ खे़ल्ले़चोगुल्ले़ खे़ङ्हाॽ फाःन्दाहाॽ नु आनाप्नाप्पाहाॽरे़ खुन्छिॽ हुक्को थासुसिआङ् खे़ङ्हाॽरे़ मे़नाप्तुसिर याःन्दुसि॥ खुने़ॽ खे़ङ्हाॽरे़ खुन्छिॽ कब्रिङ् पिसाङ्बा निङ्मिहाॽओ सङ्घुदेसुसि, खे़ब्याङ् निङ्मिहाॽरे़ खुन्छिॽ तगि खे़ङ्हाॽरे़ थःप्मा मे़न्छुक्तुन्॥ 15 खे़ङ्हाॽ थङ्ङो थक्से़ मे़लःन्दे़ थक्मा यहवे दाङ्बे़ल्ले़ के़आःप्पा साम्दिङ् पिरुसिबा कुसिक् खे़ङ्हाॽरे़ खुन्छिॽ सम्धाङ् तुक्खे लाक्खेहाॽ तारु, हे़क्क्याङ् खे़ङ्हाॽ साॽरिक् के़साक्पो मे़ध्ये़रो॥ यहवे दाङ्बे़ल्ले़ कुमनाहाॽ ताङ्से़ःप्तुसि 16 यहवे दाङ्बे़ल्ले़ खे़ङ्हाॽओ खासे़न्लोःम्बाहाॽ लःत्तुसि, खे़ङ्हाॽरे़ कन् आनाप्नाप्पाहाॽरे़ खुन्छिॽ हुक्कोलाम् खे़ङ्हाॽ मे़से़ःप्तुसि॥ 17 कर खे़ङ्हाॽरे़ कन् खासे़न्लोःम्बाहाॽरे़ खुन्छिॽ पाःन्हाॽआङ् मे़ङ्घे़प्सुन्॥ खे़ङ्हाॽ याम्बोःप्मा याःम्बक् के़जोःक्पा कुइसिक् वेॽ माङ्हाॽ से़वा मे़प्मासि नु खे़ङ्हाॽरे़ खुन्छिॽ तगि साबन् फन्छिङ्मा मे़हेःक्ते़॥ खे़ङ्हाॽरे़ खुन्छिॽ आबाङे पाधे़बाहाॽरे़ मे़नाःत्तु मे़दिम्दुबा निङ्वाॽफुमाङ्ङिल्ले़ कुइङ्जाङ्ङो लाङ्घेःक्मा लाम्मिन् हाराए मे़ले़रु मे़देसु॥ 18 आप्फाल्ले़साङ् यहवे दाङ्बे़ल्ले़ खे़ङ्हाॽरे़ खुन्छिॽ लागि खासे़न्लोःम्बाहाॽ फोःक्खुसिल्ले़, यहवे दाङ्बे़न् खे़न् खासे़न्लोःम्बान्नु वये़, हे़क्क्याङ् खे़न् कुहिङ्हिङ् खुने़ॽ खे़ङ्हाॽ निङ्मिहाॽरे़ खुन्छिॽ हुक्कोलाम् ताङ्से़ःप्तुसिआङ् पत्छे़॥ आभे़ल्ले़साङ् खे़ङ्हाॽरे़ खुन्छिॽ निङ्मिहाॽरे़ ताप्फे़ःल्लिक् मे़मे़त्तुसि हे़क्क्याङ् तुक्खे मे़जाःत्तुसिआङ् खे़ङ्हाॽ मे़यारे़ल्ले़ यहवे दाङ्बे़ल्ले़ खे़ङ्हाॽ लुङ्माॽ तुक्तुसि॥ 19 कर खे़न् खासे़न्लोःम्बान् मासिङ्नुमे़ःन्ने एयाङ्बा साम्माङ्हाॽ मे़दिम्दुसि हे़क्क्याङ् खे़ङ्हाॽरे़ खुन्छिॽ तगि साम्बोन् मे़भन्छिङ्ङाङ् से़वा मे़मे़त्तुसिर खे़ङ्हाॽ खुन्छिॽ पाधे़बाहाॽनुःल्ले़ आल्लसाङ् यरिक् फे़त्मे़लाॽरे़॥ खे़ङ्हाॽरे़ खुन्छिॽ ताप्फे़ःम्बा ये़प्ले़क्किन् नु हादिङ् थक्मा सुत्नाःन् ले़प्मा मे़न्दे़न्दे़न्॥ 20 कल्ले़चोगुल्ले़ यहवे दाङ्बे़न् इस्राइलिहाॽनु हाङ्गे़न् सिक्चा लोरे़आङ् पाःत्तु, “आङ्गाॽ कन्हाॽरे़ खुन्छिॽ पाधे़बाहाॽनु चोगुङ्बा माङ्हुप्पिन् कन् सुवाङ्बा मनाहाॽरे़ मे़भेःन्दुबा नु आङ्गाॽ आइङ्जाङ्ङिन् मे़ङ्घे़प्सुम्बाल्ले़ चोगुल्ले़, 21 आल्ल यहोसुःल्ले़ कुसिमा ये़म्मो ले़रुधसिबा कन् के़रे़क् सुवाङ्हाॽलाम् लत्छा आत्तिन् सुवाङ्ङिन्नाङ् इस्राइललाम् आङ्गाॽ मे़नाःत्तान् मे़देआन्॥ 22 खे़ङ्हाॽरे़ खुन्छिॽ पाधे़बाहाॽरे़ मे़जोगुबा हे़क्केए खे़ङ्हाॽ यहवे दाङ्बे़ल्ले़ कुलाम्मो कुदोःप्मा लाङ्मे़घेःक्पि हाग फाॽआङ् ओमे़प्मासिरे़ लागि कन् सुवाङ्हाॽलाम्बाए आङ्गाॽ इस्राइलिहाॽ साॽरुङ्सिङ्ॽ॥” 23 कल्ले़चोगुल्ले़ यहवे दाङ्बे़ल्ले़ खे़न् मे़न्छाम् सुवाङ्हाॽ हने़ खे़प्मो युङ्मा फाःक्तुसिआङ् वये़, हे़क्क्याङ् खुने़ॽ यहोसुःल्ले़ कुहुक्को मे़धासुसिन्नाङ् खे़ङ्हाॽ हारा मे़नाःत्तुन् मे़देसुसिन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.