खासे़न्लोःम्बा 1 - लिम्बुइस्राइलिहाॽरे़ अदोनि-बेजेके़न् मे़दे़म्सु 1 यहोसुन् मासिङ्ङाङ् एगाङ् आत्तिन् थाःक्हाॽरे़ तगि कनानिहाॽ फप्मासि पोङ्ॽ फाॽआङ् इस्राइलिहाॽरे़ यहवे दाङ्बे़न् सेःन्मे़दोसु॥ 2 यहवे दाङ्बे़ल्ले़ खे़ङ्हाॽ मे़त्तुसि, “यहुदाःल्ले़ कुधाःक्हाॽरे़ मे़भत्तुर॥ आङ्गाॽ खे़न् लाजेन् खुन्छिॽ हुक्सुप्तुङ्सिङ्ङाङ् ने़रो॥” 3 यहुदाबा मनाहाॽरे़ खुन्छिॽ फुॽनुसाॽ सिमियोनिहाॽ मे़मे़त्तुसि, “आनिगे लक्को के़धाबा लाजेॽओ खिनिॽ आनिगे़नु थो पेगे़म्मे़ॽ, हे़क्क्याङ् कनानिहाॽनु आनिॽ थङ् चोगि॥ खे़ब्याङ् आनिगे़आङ् खिनिॽ लक्को के़धाबा लाजेॽओ खिनिॽनु थो पेगिगे़ॽ॥” कल्ले़चोगुल्ले़ सिमियोनिहाॽ खे़ङ्हाॽनु थो मे़बे॥ 4 खे़ब्याङ् थङ् चोःक्से़ यहुदाःल्ले़ कुधाःक्हाॽ तगाङ् मे़धासिङ्, हे़क्क्याङ् यहवे दाङ्बे़ल्ले़ कनानिहाॽ नु परिज्जिहाॽ खे़ङ्हाॽ हुक्सुप्तुसि॥ खे़ङ्हाॽरे़ बेजेकओ हे़न्छिङ् थिबोङ् मनाहाॽ मे़से़रुसि॥ 5 खे़ङ्हाॽरे़ खे़प्मो अदोनि-बेजेके़न् मे़दुमुआङ् खे़ङ्हाॽ थङ् मे़जोगे़, हे़क्क्याङ् खे़ङ्हाॽरे़ कनानि नु परिज्जिहाॽ मे़नाःन्दुसि॥ 6 अदोनि-बेजेके़न् खे़त्छिङ्, कर खे़ङ्हाॽरे़ खुने़ॽ मे़नाःत्तुआङ् मे़दे़म्सु, खम्भ्याङ् खुने़ॽ कुहुक्मा नु कुलाङ्माहाॽ मे़घक्तु मे़बिरु॥ 7 अदोनि-बेजेकरे़ पाःत्तु, “कुहुक्मा नु कुलाङ्मा मे़घक्तु मे़बिरुसिबा नुबोङ् हाङ्हाॽरे़ आङ्गाॽ आजा चामा चप्ते़न् सिगाङ् चाजिॽहाॽ सेःक्मा याःम्बक् मे़जोगुआङ् वये़॥ आङ्गाॽ खे़ङ्हाॽ मे़त्तुङ्सिङ्ङाङ् वयाङ्बा हे़क्केए निङ्वाॽफुमाङ्ङिल्ले़ आङ्गाॽ मे़त्ताङ्ङाङ् वाॽ॥” खे़ब्याङ् खे़ङ्हाॽरे़ खुने़ॽ यरुसले़मओ मे़भे़त्तुआङ् खुने़ॽ खे़प्मोए स्ये़रो॥ 8 यहुदाबा मनाहाॽरे़ यरुसले़मओ थङ् मे़जोगुआङ् खे़न् हुक्काप् मे़जोगु॥ खे़ङ्हाॽरे़ खे़प्मोबा मनाहाॽ ताभेःल्ले़ मे़से़रुसि, हे़क्क्याङ् खे़न् ये़क्यक्को मि मे़याक्तु॥ 9 खे़न् एगाङ् यहुदाबा मनाहाॽ लाङ्गे़त् ले़प्माङ् मे़धासिङ् हे़क्क्याङ् कोःक्मा फाङ्जङ्बा लाजेॽओ, नेगेवओ नु ते़म्बेॽओ के़युङ्बा कनानिहाॽनु थङ् मे़जोगे़॥ 10 खे़ङ्हाॽरे़ हेब्रोन के़युङ्बा कनानिहाॽ मे़भत्तुसि, हे़क्क्याङ् सेसै, अहिमन नु तल्मैन् मे़नाःन्दु॥ (हेब्रोनरे़ तगिबा कुमिङ् किर्यत-अर्बा ने़स्से़रो॥) 11 खे़प्मोलाम् खे़ङ्हाॽ दबिर के़युङ्बाहाॽरे़ खुन्छिॽ तक्ले़ङ्वोओ तगि मे़बेआङ् मे़भत्तुसि॥ (दबिररे़ तगिबा कुमिङ् किर्यत-सेपेर ने़स्से़)॥ 12 हे़क्क्याङ् कालेबरे़ पाःत्तु, “हाःत्ले़ किर्यत-सेपेरे़न् फत्तुआङ् हुक्काप् चोगुॽ, खे़न्नु आस्सा मे़न्छिन् अक्सान् ते़न्धाम् मेःक्खिम् मे़त्तुङ्ॽ॥” 13 खे़ब्याङ् कालेबरे़ कुन्साॽ कनजरे़ कुस्सा ओत्निएलरे़ खे़न् हुक्काप् चोगु॥ हे़क्क्याङ् कालेबरे़ कुस्सा मे़न्छिन् अक्सान् खे़न्नु मेःक्खिम् मे़त्तु॥ 14 आल्ल थिक्यान् अक्सान् ओत्निएलरो त्ये़, हे़क्केःल्ले़ कुम्बा कुलक् थिक् लाजेॽ नाःक्मारे़ लागि ओत्निएलरे़ खे़न् हुसु॥ आल्ल कुअदङ्ङोलाम् खे़न् थासिङ्ङिल्ले़ कालेबरे़ खुने़ॽ सेःन्दोसु, “खे़ने़ॽ थे़मा चाहा के़जोगे़?” 15 खे़ल्ले़ पाःत्तु, “आङ्गाॽ लत्छा पे़वा पिराङ्ङे़ॽ॥ खे़ने़ॽ नेगेबओ आङ्गाॽ लाजेॽ के़बिराङ्बे़ल्ले़ चोगुल्ले़ आल्ल च्वाःत् वाबुन्दाक्वाहाॽआङ् पिराङ्ङे़ॽ॥” कल्ले़चोगुल्ले़ कालेबरे़ खुने़ॽ थोसमा नु योसमा ने़प्माङ् च्वाःत् वाबुन्दाक्वाहाॽ पिरुरो॥ 16 मोसाःल्ले़ कुन्नुःप्पाल्ले़ कुमुॽइदाङ्सा, केनिहाॽ यहुदाबा मनाहाॽनु खे़बक्सिङ्हाॽरे़न् ये़क्यक्कोलाम् आराद निःत्ताङ्बा नेगेवओ के़ने़बा यहुदाबा मुरे़क् खारे़क् थेआङ् के़होप्पादे़न्नो मे़बे, हे़क्क्याङ् खे़प्मोबा मनाहाॽनु युङ्मा मे़हेःक्ते़॥ 17 खे़न् एगाङ् यहुदाबा मनाहाॽ खुन्छिॽ फुॽनुसाहाॽ सिमियोनिहाॽनु मे़बेआङ् सपत के़युङ्बा कनानिहाॽ मे़भत्तुसि हे़क्क्याङ् खे़न् ये़क्यक्किन् वरे़ङ्ले़ङ् खाप्पुथ्यःङ् मे़जोगु॥ खे़ल्ले़चोगुल्ले़ खे़न् ये़क्यक्किल्ले़ कुमिङ् होर्मा मे़युक्खु॥ 18 यहुदाःल्ले़ गाजा, अस्कलोन नु एक्रोन ये़क्यक्हाॽ हे़क्क्याङ् कब्रिङ् पिसाङ्बा नु पाङ्जुम्हाॽआङ् मे़त्छिङ्॥ 19 यहवे दाङ्बे़न् यहुदाबा मनाहाॽनु वये़, खे़ब्याङ् खे़ङ्हाॽरे़ कोःक्मा फाङ्जङ्बा लाजेन् मे़युक्तु॥ कर ने़ने़बादे़न्नो के़युङ्बा मनाहाॽ खे़ङ्हाॽरे़ नाःप्मादेमा मे़न्छुक्तुसिन्, थेआङ्भे़ल्ले़ खे़ङ्हाॽरे़ फे़न्जेॽ अन्लाधाहाॽ मे़गत्तु॥ 20 खे़ब्याङ् मोसाःल्ले़ इङ्जाङ् पिरुसिबा कुइसिक् यहुदाबा मनाहाॽरे़ कालेबे़न् हेब्रोने़न् मे़बिरु, हे़क्क्याङ् खुने़ॽ अनाकरे़ सुम्सि कुस्साहाॽ खे़न् लाजेॽलाम् नाःत्तुदेसुसि॥ 21 कर बेन्यामिनिहाॽरे़ यरुसले़ःम्बा यबुसिहाॽ मे़न्नाःत्तुन् मे़न्देसुसिन्॥ कल्ले़चोगुल्ले़ आइन्बा ये़न् थारिक् यरुसले़ःम्मो यबुसिहाॽ बेन्यामिनिहाॽनु मे़युङ्लो॥ योसेफरे़ बेथेलले़न् नाःन्दुबा 22 योसेफरे़ कुधाःक्कोबा मनाहाॽरे़ बेथेल ये़क्यक्किन् मे़भत्तु, हे़क्क्याङ् यहवे दाङ्बे़न् खे़ङ्हाॽनु वये़॥ 23 खे़ङ्हाॽरे़ बेथेलओ थोःम्जिबाहाॽ मे़बाङ्घुसि॥ (तगि बेथेलरे़ कुमिङ् लुज ने़स्से़), 24 कन् थोःम्जिबाहाॽरे़ मनाधिक् ये़क्यक्कोलाम् लाःक्कात् लःन्दे़र पत्छे़बा मे़निसुआङ् खे़न् मे़मे़त्तु, “ये़क्यक्को आक्खेलॽरिक् लाःप्माबे आनिगे आमे़त्ते़ॽआ, हे़क्क्याङ् आनिगे खे़ने़ॽ नुरिक् मे़त्तासिगे़॥” 25 कल्ले़चोगुल्ले़ खे़ल्ले़ ये़क्यक्को आक्खेलॽरिक् लाःप्मा पोङ् फाॽआङ् खे़ङ्हाॽ ओःन्धाक्तुसि, खम्भ्याङ् खे़ङ्हाॽरे़ ये़क्यक्कोबा मनाहाॽ ताभेःल्ले़ मे़से़रुसि, कर खे़न् मनान् नु खुने़ॽ के़रे़क् कुहिम्सयङ्हाॽ थेआङ् मे़म्मे़त्तुसिन्॥ 26 खे़न् मनान् हित्तिहाॽरे़ खुन्छिॽ लाजेॽओ पे, हे़क्क्याङ् खे़ल्ले़ खे़प्मो लत्छा ये़क्यक् चोगुआङ् खे़ल्ले़ कुमिङ् लुज युक्खु॥ खे़न् ये़क्यक्किल्ले़ कुमिङ् आइन् थारिक् हाबा खे़न् ने़रो॥ 27 कर मनस्सेबा मनाहाॽरे़ बेथ-सान, तानाक, दोर, यिबलाम हे़क्क्याङ् मगिद्दो नु कुघिरिबा पाङ्जुम्हाॽओ के़युङ्बाहाॽ मे़न्नाःन्तुन् मे़न्देसुसिन्॥ थेआङ्भे़ल्ले़ कनानिहाॽरे़ खे़न् ते़न्हाॽओ हाबा मे़म्मुन्ने युङ्मा निङ्वाॽ मे़जोगु॥ 28 आल्ल याङ्सि इस्राइलिहाॽ मुक्साम्साबा मे़बोःक्खे़आङ् खे़ङ्हाॽ खुन्छिॽ लागि साक्के़ल्ले़क् याःम्बक् चोःक्मा मे़बाङ्घुसि, कर खे़ङ्हाॽरे़ खे़ङ्हाॽ के़रे़क् आप्फाल्ले़आङ् मे़न्नाःत्तुन् मे़न्देसुसिन्॥ 29 गेजेरओ के़युङ्बा कनानिहाॽ एफ्राइमरे़ मे़नाःत्तुसिन्, खे़ल्ले़चोगुल्ले़ कनानिहाॽ गेजेरओ खुन्छिॽनु सोरिक् मे़युङे़ मे़गरे़॥ 30 जबुलुनरे़ कित्रोन नु नहलोलबा कनानिहाॽ मे़नाःत्तुन् मे़देसुसिन्, खे़ल्ले़चोगुल्ले़ कनानिहाॽ खुन्छिॽनु सोरिक् मे़युङे़, हे़क्क्याङ् खे़ङ्हाॽरे़ खुन्छिॽ लागि खे़ङ्हाॽ साक्के़ल्ले़क् याःम्बक् चोःक्मा मे़बाङ्घुसि॥ 31 आसेररे़ अक्को, सिदोन, अहलाब, अक्जिब, हेलवा, अपेक नु रहोब के़युङ्बाहाॽ मे़नाःत्तुन् मे़देसुसिन्॥ 32 कम्भलॽरिक् आसेरिहाॽ कनानि यक्युङ्बाहाॽनु सोरिक् मे़युङे़, थेआङ्भे़ल्ले़ खे़ङ्हाॽरे़ खे़ङ्हाॽ मे़न्नाःत्तुन् मे़न्देसुसिन्॥ 33 नप्तालिरे़ बेथ-सेमेस नु बेथ-अनातबा यक्युङ्बाहाॽ मे़न्नाःत्तुसिन्, कर खे़प्मोबा कनानिहाॽनु मे़युङे़, हे़क्क्याङ् बेथ-सेमेस यक्युङ्बाहाॽ खे़ङ्हाॽरे़ खुन्छिॽ लागि साक्के़ल्ले़क् याःम्बक् के़जोःक्पा मे़बोःक्खे़॥ 34 एमोरिहाॽरे़ दानरे़ कुमुॽइदाङ्साहाॽ कोःक्मा फाङ्जङ्बा लाजेॽओ मे़नाःत्तुमे़देसुसि हे़क्क्याङ् खे़ङ्हाॽ ने़ने़बादे़न्नो युमा मे़म्भाःक्तुसिन्॥ 35 एमोरिहाॽरे़ हेरेस कोःक्मा, अय्यालोन नु साल्बिमओ मे़म्मुन्ने युङ्मा निङ्वाॽ मे़जोगु, कर योसेफरे़ कुधाःक्हाॽ खे़ङ्हाॽओ मुक्साम्साबा मे़बोःक्खे़आङ् खे़ङ्हाॽआङ् खुन्छिॽ लागि साक्के़ल्ले़क् याःम्बक् के़जोःक्पा मे़जोगुसि॥ 36 एदोमिहाॽरे़ खुन्छिॽ इःन्दोन् अक्रब्बिमबा थाम्माङ्बालाम् सेला थारिक्नुःल्ले़आङ् ना याङ्घुआङ् ने़स्से़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.