याकुब 4 - लिम्बुनिङ्वाॽफुमाङ्ङो आबाङे पिआसे़म्मे़ॽओ 1 खिनिॽ लुम्मो थे़माःल्ले़ खेमा थक्माहाॽ तारुॽबे? खे़ङ्हाॽग खिनिॽ सिगाङ् थङ् के़जोःक्पा फे़न् निङ्वाॽलाम् लःम्बा मेःम्बि? 2 खिनिॽ खोमा निङ्वाॽ के़जोगुम्, कर के़ङ्घोसुम्मिन्॥ हे़क्क्याङ् खिःम्ब्राक् के़जोगुम्माङ् मना के़से़रुम्सिम्लो॥ हे़क्केसाङ् खिनिॽ निङ्वाॽ के़जोगुम्बा पाःन्निन् खोमा के़न्छुक्तुम्मिन् हे़क्क्याङ् के़घेॽइ के़धक्तिॽ॥ आल्लसाङ् के़ङ्घोसुम्मिन् थेआङ्भे़ल्ले़ खिनिॽ निङ्वाॽफुमाङ्ङिन् के़न्नाःक्तुम्मिन्लो॥ 3 खिनिॽ के़नाःक्तुम् कर के़ङ्घोसुम्मिन्, थेआङ्भे़ल्ले़ खिनिॽ आबाङे निङ्वाॽ पाःप्पाःत् चोःक्मा फाॽआङ् फे़न्निङ्वाॽइल्ले़ के़नाःक्तुम्लो॥ 4 नसान् मे़न्जोःक्मनाबासे, इक्सादिङ् खाम्बेःक्मोबा पाःन्हाॽ मिःम्जि के़मे़प्पे़न् निङ्वाॽफुमाङ्ङिल्ले़ कुनिङ्मि पोङ् फाॽआङ् कुसिङ् के़न्निःत्तुम्मिन्बि? इक्सादिङ् खाम्बेःक्मोबा पाःन्हाॽ मिःम्जि के़मे़प्पे़ङ्ग निङ्वाॽफुमाङ्ङिल्ले़ कुनिङ्मि पोङ्लो॥ 5 निङ्वाॽफुमाङ्ङिल्ले़ आनिॽओ युक्खुबा सेसेमाङ्ङिल्ले़ साॽरिक्के कुनाहे़न् फाॽआङ् साम्योसाप्लाओ साप्ते़आङ् के़बप्पे़न् हने़रो फाॽआङ् के़इःत्तुम्बि? 6 कर खे़न्नुःल्ले़आङ् साॽरिक् निङ्वाॽफुमाङ्ङिल्ले़ लुङ्माॽ आदुक्लो॥ खे़ल्ले़चोगुल्ले़ याम्मो साम्योसाप्लाःल्ले़ पाःत्तुॽ, “निङ्वाॽफुमाङ्ङिल्ले़ आङ्दिङ् के़लॽबाहाॽ अत्तुसिॽ, कर नःम्नःम्बाहाॽ लुङ्माॽ तुक्तुसिॽरो॥” 7 खे़ल्ले़चोगुल्ले़ नःम्नःम्बा पोःक्खे़म्मे़ॽआङ् निङ्वाॽफुमाङ्ङो आबाङे पिआसिम्मे़ॽओ॥ माफे़न्साम्मिन् अत्ते़म्मे़ॽ, हे़क्क्याङ् खे़न् खिनिॽलाम् माःङ्घा खे़त्छिङ्लो॥ 8 निङ्वाॽफुमाङ्ङिल्ले़ कुबेसाङ् त्ये़म्मे़ॽ, हे़क्क्याङ् खुने़ॽआङ् खिनिॽ पेसाङ् ताःरो॥ खिनिॽ लायोबासे, लायो चोःक्मा ले़रे़म्मे़ॽओ, हे़क्क्याङ् हिल्लिक्लिक्पा निङ्वाॽ के़गप्पासे, खिनिॽ सिक्लुङ्मान् सेसे चोगे़म्मे़ॽओ 9 लायो के़जोगुम्बाओ मे़रिङ् थक्ते़म्मे़ॽ, हाबे़म्मे़ॽओ॥ खिनिॽ एःप्मान् मे़रिङ् थक्मो, हे़क्क्याङ् खिनिॽ सःप्मे़न् तुक्खेओ ले़क्खे़म्मे़ॽओ॥ 10 दाङ्बाल्ले़ कुदगि नःम्नःम्बा पोःक्खे़म्मे़ॽ, हे़क्क्याङ् खिनिॽ मिङ्सो इङ्धाङ् के़भोसि के़बिरिॽरो॥ चे़ङ्सिङ्मा मेःन् 11 फुॽनुसाॽ नु ने़ॽनुसाॽसे, वेॽहाॽरे़ तक्ले़ङ्वाओ ताप्फे़ःम्बा पान् मे़बारे़म्मिन्ने़ॽओ॥ आत्तिन् कुन्साॽरे़ कुदक्ले़ङ्वाओ ताप्फे़ःम्बा फे़न्पान् पाःत् इग्र आत्तिल्ले़ कुन्साॽ आप्तिक् कुःत्तुॽ, खे़ङ्ग साम्योथिम्मिल्ले़ कुदक्ले़ङ्वाओ पाःत्ताङ् साम्योथिम्मिन् खासे़न् लोःन्दुॽरो॥ आल्ल साम्योथिम्मिन् खासे़न् के़लोःन्दुॽने़ फाॽग्र, साम्योथिम् के़इःप्पा के़नाःप्पा मेःन्, कर साम्योथिम्मिल्ले़न् खासे़न्लोःम्बा के़बोङ्लो॥ 12 साम्योथिम् के़बिबा नु खासे़न्दाङ्बाग थिक्लक् वाॽरो॥ खुने़ॽनुए ताङ्से़ःप्मा नु मे़ङ्मा मुक्साम् वाॽरो॥ कर खे़ने़ॽग आबाङे पाङ्भेॽसाबाहाॽ आप्तिक् के़गुःप्पे़न् हाःत्ने़बे? ताये़म्मिल्ले़ कुयाःम्बेओ आङ्दिङ् लॽमा मेःन् 13 आइन् इग्र ताःन्दिक् आनिगे ये़क्यक्थिक्को पिगिगे़ॽआङ् खे़प्मो तङ्बेधिक् वयिगे़, हे़क्क्याङ् ले़ङ्हङ् चोगुम्बे़ॽआङ् याङ् थगुम्बे़ॽ लॽरिक् के़बाःप्पासे, नुरिक्काङ् खे़प्से़म्मे़ॽओ, 14 थेआङ्भे़ल्ले़ ताःन्दिक् थे पोङ् के़लॽबा पाःन्निन् खिनिॽ के़न्निसुम्मिन्लो॥ खिनिॽ हिङ्मन्निङ्ग सप्फाधिक् के़धाःप्पाआङ् के़माबा के़बेःक्पा तुङ्हिःक् कुइसिक् चोक्लो॥ 15 खिनिॽ हे़क्के पाःप्माल्ले़ कुले़क्वाग दाङ्बाल्ले़ कुनिङ्वाॽ कुइसिक् पोङ्ने़ फाॽग्र हिङिगे़आङ् अक्खे हे़क्के चोगुम्बे़ॽ पाःप्मा के़बोङ्बाने़ वये़॥ 16 कर खिनिॽग आबाङे निङ्सेःक्कोने़ आङ्दिङ् के़लॽरिआङ् के़हे़न्नाॽसिरो॥ खे़न् हे़क्तङ्बा काक् हे़न्छिङ्माङ्ग ताप्फे़ःम्बा पाःन्लो॥ 17 खे़ल्ले़चोगुल्ले़ आत्तिल्ले़ नुबा याःम्बक् चोःक्मा ले़स्सुआङ्साङ् मे़जोगुन्ने़ फाॽग्र खे़ल्ले़ लायो चोगुॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.