यसैया 9 - लिम्बुसनारुङ् के़दाःप्पा हाङ् 1 हे़क्केसाङ् खे़न् खामाक्मा ये़म्मिन् नु निङ्साम्मिन् यरिक् केःल्लिक् मे़बेःक्ने़न्॥ के़रे़क्नुःल्ले़ तगिग खुने़ॽ जबलुन लाजेन् नु नाप्तालि लाजेन् नःम्ने़सिर याःन्दुसि, कर के़दाबा ये़म्मोग खुने़ॽ यर्दन वहःङ् नु वरःङ्ङिल्ले़ कुलुम्मो के़ने़बा गालिलबा थिम्मे़न्दङ् सुवाङ्हाॽरे़ खुन्छिॽ ते़ङ्गप्पिन् इङ्धाङ् पिरुरो— 2 खामाक्मो लाङ्गे़घेःक्पा मनाहाॽरे़ लत्छा यम्बा ओःत्तिधिक् मे़निसुआङ् वाॽरो॥ खे़न् सिमे़ल्ले़ नाम्इःक्खङ्ङो के़युङ्बा के़रे़क् मनाहाॽरे़ खुन्छिॽ सम्धाङ् खे़न् ओःत्तिःल्ले़ थोॽरुआङ् वाॽरो॥ 3 यहवे दाङ्बाए, खे़ने़ॽ खे़न् सुवाङ्ङिन् यरिक् मे़बोःन्दे़र के़याःन्दुआङ् वाॽरो हे़क्क्याङ् कन् इस्राइल लाजेॽओबा मनाहाॽ चासुम्मा ये़म्मो पसःत् मे़सःप्पा कुइसिक् खे़ङ्हाॽरे़ खुन्छिॽ सःप्मे़न् के़भोसु के़बिरुसिआङ् वाॽरो॥ थक्सुबाहाॽरे़ मे़नाप्तुसिबा याङ्साकुन्धेहाॽ मे़भःक्सुल्ले़ मे़सःप्पा कुइसिक् खे़ङ्हाॽ मे़अःक्ल मे़सःत्लो॥ 4 थेआङ्भे़ल्ले़ खे़ने़ॽ खे़ङ्हाॽरे़ खुन्छिॽ के़लिःप्पा खे़ःप्सिङ्ङिन् के़ए़क्खु के़बिरुसिरो हे़क्क्याङ् ते़ःम्भुक्किन् स्याक् वयाक् के़भुॽरु के़बिरुसिआङ् वाॽरो॥ यरिक् ये़न् तगि मिध्यान लाजेॽबा थक्सुबाहाॽ के़नाःन्दुसिबा हे़क्केए खे़ने़ॽ के़मनाहाॽ के़युक्पा नु तुक्खे के़जाःप्पा सुवाङ्हाॽ के़नाःन्दुसिआङ् वाॽरो॥ 5 ते़न्धङ्ङो के़रे़क् थक्सुबाहाॽरे़ मे़जाक्खुबा खुन्छिॽ लाङ्सुःप्हाॽ नु माक्खिॽओ सॽमनाबा के़रे़क् चाङ्हाॽ मिधिङ्मारे़ लागि मे़भुक्खुरो हे़क्क्याङ् मिओ हाःम्मारे़ लागि निःङ्गेॽ पोङ्लो॥ 6 थेआङ्भे़ल्ले़ आनिॽ लागि लत्छा ये़म्बित्छासा अङे़ःक्वाधिक् सावाःन्छिङ्ङाङ् वाॽरो॥ आनिॽ लत्छा ये़म्बित्छा साधिक् आम्बिरे़आङ् वाॽरो खुने़ॽए आनिॽ सम्धाङ् युक् चोगुरो॥ खुने़ॽ निङ्वाॽ के़माबा सुजादाङ्बा, मुक्साम्दाङ्बा निङ्वाॽफुमाङ्, नुप्मे़न्दिङ् पानुदिङ् पा, हे़क्क्याङ् सनारुङ्गे़न् हाङ्सा मे़मे़त्तुरो॥ 7 खुने़ॽ युक् चोगुबा मुक्साम्मिन् हाबा चक्मे़ल्लॽए पोआङ् पत्लो, खुने़ॽ कुहाङ्जुम्मो आभे़ल्ले़साङ् सनारुङ् नु नुॽमादामा पोङ्लो॥ हे़क्क्याङ् खुने़ॽ कुधाःक् दाउदरे़ कुएगाङ् के़दाबा हाङ्ङिङ्ग खुने़ॽए पोङ्लो॥ खे़ब्याङ् कुदोःप्मा खासे़न् नु साम्योबान् सोरिक् चोगुआङ् हाङ्युक् चोगुरो॥ खे़न् ये़म्माङ्धो सदादिङ्ले़ लागि खुने़ॽ हाङ्युक् चोगुरो यहवे दाङ्बा मुक्साम्दाङ्बे़ल्ले़ कुसिक्सम्मे़ल्ले़ कन् पाःन्निन् कुलिङ्दो के़त्तुरो॥ इस्राइलओ यहवे दाङ्बे़ल्ले़ कुसाक्के़न् 8 यहवे दाङ्बे़ल्ले़ याकुबरे़ कुदक्ले़ङ्वाओ कन् इङ्घङ्ङिन् हाङुआङ् वाॽरो, हे़क्क्याङ् खे़न् पाःन्निन् इस्राइलिहाॽरे़ खुन्छिॽ सम्दाङ् चुक्लो॥ 9 हे़क्क्याङ् इस्राइलबा के़रे़क् मनाहाॽ नु सामरियाबा मनाहाॽरे़ हाराए कन् पाःन्निन् निङ्वाॽ मे़घोसुरो॥ खे़ङ्हाॽ आङ्दिङ् मे़लॽ हे़क्क्याङ् निङ्वाॽओ यम्बा मे़ले़ङ्सिङ्ङाङ् मे़बाःत्तुरो, 10 “खाम्ले़क्हाॽ लुःन्दे़आङ् ने़रो, कर आनिगे लक्मनाबा लुङ्हाॽरे़ याम्मो से़त्तुम्बे़रो॥ खःक्से़ॽ सिङ्बुङ्हाॽ मे़दाङु मे़सोःन्दुआङ् ने़रो, कर आनिगे खे़ल्ले़ कुले़क्वा नुबा साम्माङ्सिङ्हाॽ लेःत्तुम्बे़रो॥” 11 कर यहवे दाङ्बे़ल्ले़ खे़ङ्हाॽरे़ खुन्छिॽ तक्ले़ङ्वाओ रसिनरे़ कुनिङ्मिहाॽ के़धुम्बा चोगुसिआङ् वाॽरो हे़क्क्याङ् खे़ङ्हाॽरे़ खुन्छिॽ निङ्मिहाॽ खुने़ॽ हुसुसिआङ् वाॽरो॥ 12 अरामिहाॽरे़ तॽइ नाङ्गे़न् पिसाङ्लाम्बा हे़क्क्याङ् पलिस्तिहाॽरे़ नाम्धा पिसाङ्लाम्बा खे़ङ्हाॽरे़ खुन्छिॽ मुरान् हा मे़मे़त्तुआङ् इस्राइलि मनाहाॽ मे़लरु मे़देसुसिरो॥ कम्भ्यारिक्काङ्साङ् खुने़ॽ कुसिक्के़न् मे़न्जिप्पे वाॽरो, खे़ब्याङ् आल्लसाङ् खुने़ॽ कुहुक्किल्ले़ खे़ङ्हाॽ साःप्सुसिआङ् पत्लो॥ 13 कन् मनाहाॽरे़ कम्भ्यारिक् तल्लिक् खुम्दिङ् मे़घोसुसाङ् खे़ङ्हाॽ मे़न्हिन्ने़ मे़वाॽरो, हे़क्क्याङ् मुक्साम्दाङ्बा यहवे दाङ्बे़न् ले़प्माङ् मे़न्हिसिङ्ङे मे़वाॽरो॥ 14 खे़ल्ले़चोगुल्ले़ यहवे दाङ्बे़ल्ले़ थिक्ये़न्ले़ इस्राइललाम्बा कुधे़गेक् नु कुमिन् हे़क्क्याङ् खे़बक्सिङ् पोराःक्हाॽ नु सिदाक्पाहाॽ चाक्ले़ खक्तुदेसुरो॥ 15 इस्राइलबा लाम्लोबाहाॽ कुधे़गेःक्सिरो, हे़क्क्याङ् इङ्ले़क् पान् के़हुॽबा माङ्निङ्वाॽपान् के़बाःप्पाहाॽ कुमिसिरो॥ 16 थेआङ्भे़ल्ले़ लाम्लोबाहाॽरे़ मनाहाॽ लाम् मे़भोःत्तुसिआङ् वाॽरो॥ खे़ङ्हाॽरे़ मनाहाॽ मे़क्मासिमा लाम्मो लाम्मे़लोसुसिआङ् मे़वाॽरो॥ 17 खे़ल्ले़चोगुल्ले़ दाङ्बान् नालिगे़न् थाङ्बे़न्हाॽनु मे़सःत्ने़न्लो, हे़क्क्याङ् मेमेदुमाहाॽ नु चुङ्जिगे़न् ये़त्छाबा ये़त्छामाहाॽआङ् लुङ्माॽ मे़दुक्तुसिन्लो॥ थेआङ्भे़ल्ले़ खे़ङ्हाॽ के़रे़क् निङ्वाॽफुमाङ् कुसिङ् मे़न्निःप्मनाबा मे़जोक्लो, खे़ब्याङ् ताप्फे़ःम्बा पान् नु इङ्ले़क्के पान् मे़बाःत्लो॥ आल्लसाङ् यहवे दाङ्बे़ल्ले़ कुसिक्के़न् मे़न्जिप्पे वाॽबाल्ले़ चोगुल्ले़ खे़ङ्हाॽ खुम्दिङ् पिमासिरे़ लागि खुने़ॽ कुहुक्किल्ले़ हाबा साःप्सुसिआङ् पत्लो॥ 18 निस्सेसाङ् ताप्फे़ःम्बा याःम्बक् के़जोःक्पा मनाहाॽ मिःल्ले़ मिमे़दिक्लो, हे़क्क्याङ् खे़न् मिःल्ले़ सेर्दाःक्माहाॽ नु तिङ्हाॽ मिदिक्काङ् खाप्पुथ्यःङ् पोङ्लो॥ खे़न् मिःल्ले़ ताम्भुङ्ङोबा पोःक्लाहाॽ मिधिक्सुआङ् खे़ॽयोनु के़लःम्बा मिःक्खुॽइन् ताङ्साङ्बे़त्थाःङ् माक्स्दिःङ्ग्याःप्पा मिःक्खुन् हाःङ्गु हाःङ्गु लॽबेःक्लो॥ 19 मुक्साम्दाङ्बा यहवे दाङ्बे़ल्ले़ कुसाक्के़न्निल्ले़ लाजेन् खाप्पुथ्यःङ् पोङ्लो, मनाहाॽ मि हाःम्मा तिङ्ग्रेक् हे़क्तङ्बा मे़बोःक्खे़आङ् मे़वाॽरो॥ हे़क्क्याङ् आत्तिन् मनाहाॽरे़आङ् आबाङे खुन्छिॽ फुॽनुसाॽहाॽ लुङ्माॽ मे़न्दुक्तुसिन्लो॥ 20 खे़ङ्हाॽरे़ चुक्वा ले़प्माङ् मे़लरुरो हे़क्केसाङ् खे़ङ्हाॽरे़ खुनिॽ सिक्लाःक्लो॥ खे़ङ्हाॽरे़ फे़ङ्वा ले़प्माङ् मे़जरो, करसाङ् खुन्छिॽ सिक्मे़एःप्तुन्लो॥ खे़ङ्हाॽरे़ आबाङे खुन्छिॽ काॽइ सोॽधोःक्हाॽआङ् मे़जसिरो॥ 21 एफ्राइम्मिल्ले़ कुधाःक्हाॽ नु मनस्सेःल्ले़ कुधाःक्हाॽ आबाङे खुन्छिॽ तक्ले़ङ्वाओ मे़बोक्लो, हे़क्क्याङ् याङ्सि खे़ङ्हाॽ थिक्हुप् मे़बोङ्ङाङ् यहुदान् मे़भत्तुरो॥ करसाङ् यहवे दाङ्बे़ल्ले़ कुसिक् पोःक्मान् मे़न्जिःक्के वाॽरो, हे़क्क्याङ् आल्लसाङ् खुने़ॽ कुहुक्किल्ले़ साःप्सुसिआङ्ङे पत्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.