यसैया 8 - लिम्बुमिक्सेःन्ले़ लागि यसैयाःल्ले़ कुस्सा 1 यहवे दाङ्बे़ल्ले़ आङ्गाॽ मे़त्ताङ्, “लत्छा यम्बा साप्लाधिक् याङ्सिङ्ङे़ॽआङ् खे़प्मो यम्बयम्बा सक्को ‘महेर-सालल-हाज-बज’ साप्ते़ॽ॥ 2 नसाःन्साबा मना ने़त्छि निङ्वाॽफुसाम्बा उरियान् नु बेरेक्याहरे़ कुस्सा जकरियान् तारे़से़ॽआङ् आङ्गाॽ आलागि के़निबा तोःन्दि ये़प्से़से़ॽ॥” 3 खे़ब्याङ् आङ्गाॽ आहिम्सामा माङ्निङ्वाॽपान् के़बाःप्मे़न्नु इप्साङ्, हे़क्क्याङ् खुने़ॽ मे़न्छुक्मा पोःक्खे़आङ् ये़म्बित्छा साधिक् कत्तु॥ खे़म्ब्याङ् यहवे दाङ्बे़ल्ले़ आङ्गाॽ मे़त्ताङ्, “खे़ल्ले़ कुमिङ् ‘महेर-सालल-हाज-बज’ युक्खे़ॽ॥ 4 अङे़ःक्वाःल्ले़ ‘आङ्गाॽ आम्बा’ नु ‘आङ्गाॽ आम्मा’ पाःप्मा ले़मानुःल्ले़ तगिए दमस्कसबा याङ्साकुन्धेन् हारा नाप्पा हे़क्क्याङ् सामरियालाम् मे़नाप्तुसिबा चिगक्वाहाॽ अस्सुरबा हाङ्ङे़ल्ले़ फे़त्लाःन्दु पिआरो॥” अस्सुरबा हाङ्ङिल्ले़ थङ् चोगु 5 याम्मो यहवे दाङ्बे़ल्ले़ आङ्गाॽ अक्खे मे़त्ताङ्लो, 6 “कन् मनाहाॽरे़ ने़ने़आङ् के़युबा सिलो हःङ्गुओबा च्वाःत्ते़न् मे़नाॽरुआङ् रसिन नु पेकह हाङ्हाॽनु मे़सःत्ते़बाल्ले़ चोगुल्ले़, 7 आङ्गाॽ दाङ्बे़ल्ले़ अस्सुरबा पयम् हाङ्ङिन् नु खुने़ॽ के़रे़क् कुधक्सुबाहाॽ यहुदाओ थङ् चोःक्से़ तारुङ्सिङ्लो॥ यम्बा युफ्रेतिस वहःङ्ङिन् कुङ्ङिल्ले़ च्वाःत्तिन् आत्तातान्ने सःक् युआङ् कुया कुदिङ् सधे़क् तिम्बा हे़क्के खे़ङ्हाॽ तगि मे़बो मे़भे़न्लो॥ 8 खे़न् के़गुङ्बा के़युबा च्वाःत्तिन् पोआङ् यहुदा थारिक् कुङ्ङाङ् युरो॥ खे़न् के़गुङ्बा के़युबा च्वाःत्तिन् खे़ॽयोबा मनाहाॽरे़ खुन्छिॽ सित्लाओ थारिक् के़त्लो, खे़ल्ले़ हम्भे़ मे़त्तुबा कुलाप्पिल्ले़ लाजेन् के़रे़क् ते़प्तुरो, इम्मानुएलए!” 9 मे़न्छाम् सुवाङ्से, ते़न्धङ् चोःक्मा उवा चोगे़म्मे़ॽओ हे़क्क्याङ् किसाम्मे़ॽआङ् यक्खे़म्मे़ॽओ! माःङ्घा माःङ्घा के़ने़बा लाजेॽसे, थङ् चोःक्मारे़ लागि यारिप् पोःक्खाम्मे़ॽओ, खे़ब्याङ् खिनिॽ यङ्माॽ के़रे़म्मे़ॽओ! थङ् थक्मारे़ लागि यारिप् पोःक्खे़म्मे़ॽओ, खे़म्ब्याङ् फुत्लुम् थ्यःङ् पोःक्खाम्मे़ॽओ! 10 आक्खेआङ् थङ् थक्माबे फाॽआङ् निङ्वाॽ इःत्ताम्मे़ॽओ, कर खे़न् कुलिङ्दो मे़गे़त्ने़न्लो॥ खे़निॽ चोःक्मा निङ्वाॽ के़जोगुम्बा पाःन्हाॽ युक्खाम्मे़ॽओ, कर खे़न् माबेक्, थेआङ्भे़ल्ले़ निङ्वाॽफुमाङ्ङिन् आनिॽनु वाॽरो॥ यहवे दाङ्बे़न् किरे़म्मे़ॽओ 11 यहवे दाङ्बे़ल्ले़ पयम् यम्बा कुमुक्साम्मिल्ले़ कन् मनाहाॽ लाङ्मे़घेःक्पा लाम्मो लाङ्मे़घेगे़न्ने़ॽ फाॽआङ् आङ्गाॽ मे़त्ताङ्ङाङ् वाॽरो, 12 “मनाहाॽरे़ खुन्छिॽ चे़म्भन्नो खिनिॽ मे़बत्छे़म्मिन्ने़ॽओ हे़क्क्याङ् आत्तिन् पाःन्निन् खे़ङ्हाॽरे़ मे़गिरुॽ, खे़न्नु खिनिॽ मे़गिसे़म्मिन्ने़ॽओ॥ 13 आङ्गाॽ मुक्साम्दाङ्बा यहवे दाङ्बे़न् सेसेबा चोःक्का के़लॽबा पाःन्निन् खे़निॽ निङ्वाॽ कत्ते़म्मे़ॽओ॥ खे़निॽग आङ्गाॽनु किमा पोङ्लो खे़निॽग आङ्गाॽए याप्मि के़गिरिर पोङ्लो॥ 14 आङ्गाॽग से़ःप्सिङ्दे़न् पोङ्ङारो, हे़क्क्याङ् साॽरिक् सेसेबा चोःक्काबाल्ले़ चोगुल्ले़ आङ्गाॽ आदोःक्तोःक्पा लुङ् हे़क्के लॽआरो॥ आङ्गाॽ यहुदा, इस्राइल नु यरुसले़म ये़क्यक्पा मनाहाॽ चे़न्नो के़धाबा कुसिङ् लॽआरो॥ 15 यरिक् मे़दोःक्काङ् मे़गे़ङ्, खे़ङ्हाॽ मे़जोन्लो हे़क्क्याङ् फुत्लुम् थ्यःङ् मे़बोङ्लो, खे़ङ्हाॽ चे़न्नो मे़धाःॽ हे़क्क्याङ् मे़दे़म्सुसिरो॥” साम्माङ्च्याःङ् मुरागे़मे़प्पाहाॽ साम्दिङ् 16 आङ्गाॽ निङ्वाॽफुमाङ्ङिल्ले़ पिराङ्बा इङ्घङ्हाॽ खे़निॽ आहुॽसाम्बाहाॽरे़ के़जिक्खुम्माङ् के़से़ःप्तुम् के़गत्तुम्ल पोङ्लो॥ 17 याकुबरे़ कुमुॽइदाङ्साहाॽलाम् चित्लि नारा के़जिङ्बा यहवे दाङ्बे़न् आङ्गाॽ हाङ्घुङ्लो, हे़क्क्याङ् खुने़ॽओए आङ्गाॽ आनिङ्वान् युक्खुङ्लो॥ 18 आङ्गाॽ नु यहवे दाङ्बे़ल्ले़ पिराङ्बा आस्साहाॽ आम्भा कॽयोए वयिगे़॥ आनिगे़ग सियोन कोःक्माओ हाङ्युक् के़जोःक्पाआङ् के़युङ्बा मुक्साम्दाङ्बा यहवे दाङ्बे़ल्ले़ इस्राइलओ पाङ्घिगे़बा मिक्सेःन्दिगे़॥ 19 कर मनाहाॽरे़ग साम्माङ्च्याःङ् मुरागे़मे़प्पा नु कित्चाक् के़जोःक्पा मनाहाॽ सुजा नाःक्ताम्सिम्मे़ॽ फाॽआङ् खे़निॽ के़म्मे़त्तिॽ॥ हे़क्केःल्ले़ “मनाहाॽरे़ खुन्छिॽ निङ्वाॽफुमाङ्ङो पेःक्माआङ् सेःन्दोमा मे़बोङ्ने़म्बि? कुहिङ्वे़त्हाॽरे़ लागि के़सिबाहाॽ थेआङ् सेःन्दोमासिबे?” 20 खे़निॽ खे़ङ्हाॽ अक्खे मे़त्ताम्सिम्मे़ॽ, “निङ्वाॽफुमाङ्ङिल्ले़ खे़निॽ थे़मा के़हुॽरिआङ् वाॽ, नुरिक्काङ् खे़प्साम्मे़ॽ! साम्माङ्च्याःङ् मुरागे़मे़प्पाहाॽरे़ खुन्छिॽ पाःन्निन् मे़घे़प्से़म्मिन्ने़ॽ! खे़ङ्हाॽरे़ खे़निॽ थे के़म्मे़त्तिसाङ्, खे़निॽ लागि नुबा मे़बोङ्ने़न्लो॥” तुक्खे चामा ये़म् 21 खे़ङ्हाॽ साॽरिक् तुक्खे मे़जा हे़क्क्याङ् साक्के़ल्ले़ तरुसिआङ् लाजेॽओ ताक्मे़गन्नाङ् मे़वाॽ॥ खे़ङ्हाॽ साॽरिक् साक्के़ल्ले़ तरुसिॽ खे़म्ब्याङ् खुन्छिॽ मिराङ्बा पिःङ्ङाङ् मे़वाॽइल्ले़ खुन्छिॽ याःक्ले़ॽ, खे़ब्याङ् थाःङ् ओमे़मआङ् खुन्छिॽ हाङ्ङिन् नु निङ्वाॽफुमाङ्ङिन् माङ् मे़देसुसि साङ्ग्रा मे़मे़त्तुसिॽ॥ 22 खे़ब्याङ् खे़ङ्हाॽरे़ इक्सादिङ् खाम्बेःक्मा पिसाङ् ओमे़मे़त्तुॽ, कर खे़ॽयो तुक्खे, खामाक्मा नु किप्मा के़घुबा निङ्साङ् पुक्मारक् मे़निसुॽ॥ हे़क्क्याङ् खे़ङ्हाॽ खामाक्लुम्बाःत्तो मे़हो मे़लाःत्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.