यसैया 7 - लिम्बुआहाज हाङ्ङिल्ले़ कुलागि इङ्घङ् 1 उज्जियाहरे़ कुम्मे़न्छाॽ, योतामे़ल्ले़ कुस्सा आहाजे़न् यहुदा हाङ्जुम्मोबा हाङ् वये़ल्ले़ अराम लाजेॽओबा हाङ् रसिने़न् नु इस्राइलओबा हाङ् रमल्याहरे़ कुस्सा पेकहःन् यरुसले़म ये़क्यक्को थङ् चोःक्से़ फे़रे़सि, कर खे़ङ्हाॽरे़ थङ् नाःम्मा मे़सुक्ते़छुन्॥ 2 हे़क्क्याङ्, “इस्राइलरे़ अरामे़न्नु नादङ् चोगु” के़लॽबा इङ्घङ्ङिन् दाउदे़ल्ले़ कुहिम्सयङ्ङो के़रे़॥ हे़क्क्याङ् सुरिःत्तिल्ले़ पोःक्लाओबा सिङ्बुङ्हाॽ वाःन्दुबा कुइसिक् आहाज हाङ्ङिन् नु कुमनाहाॽ खुन्छिॽ किमे़ल्ले़ थे़गक्कक्ना मे़यक्खे़॥ 3 खे़ब्याङ् यहवे दाङ्बे़ल्ले़ यसैयान् मे़त्तु, “आल्ल आबाङे के़स्सा सार्यासुबे़न् तेॽरे़आङ् थोसमा वरक्कोबा वालाम्मो पेगे़ॽ, इग्र चाङ् वागे़हप्पाहाॽरे़ खुन्छिॽ प्याङ्सिओबा माराम्मो पेगे़ॽआङ् आहाजे़न् तुमे़ॽ॥ 4 हे़क्क्याङ् के़निङ्वाॽ सुरोःन् मे़लॽरे़न्ने़ॽ मे़त्ते़ॽ॥ सिरियाबा हाङ् रेसिन नु रमल्याहरे़ कुस्सा पेकहःल्ले़ खुन्छिॽ मि हे़क्तङ्बा सिक्पोःक्मालाम् खे़ने़ॽ मे़गिसे़न्ने़ॽ फाॽआङ् खे़न् मे़त्ते़ॽ॥ खे़ङ्हाॽरे़ खुन्छिॽ मि हे़क्तङ्बा सिक्के़न् मिःक्खोॽ सुःङ्गु सुःङ्गु के़लॽबा मिधक्पु ने़त्छि यारिक्काङ् के़आःप्पा मे़जोक्ने़न्॥ 5 अरामबा हाङ्ङे़न् नु इस्राइलबा हाङ्ङे़न् थिक्हुप् पोःक्खे़सिआङ् खुने़ॽ कुदक्ले़ङ्वाओ अक्तङ्बा चे़म्भन् चोगे़सुआङ् वाॽसि, 6 ‘आनिॽ यहुदा हाङ्जुम्मिन्नु थङ् चोगि॥ खे़न् लाजेन् कुलक् कुलक् चोगुम्माङ् फःक्खुम्, खे़ब्याङ् ताबेलरे़ कुस्सान् खे़ॽयो हाङ् युक्तिङ् चोगुम्॥’ 7 हे़क्केसाङ् आङ्गाॽ यहवे दाङ्बा निङ्वाॽफुमाङ्ङिल्ले़ पाःत्तुङ्लो— “कन् आभे़ल्ले़आङ् मे़बोङ्ने़न्लो, कन् पोङ्माए मे़सुक्ने़न्लो॥ 8 थेआङ्भे़ल्ले़ अराम लाजेॽइन् कल्ले़ कुहाङ्पाङ् दमस्कसे़न्नुःल्ले़ के़धुम्बा मे़जोक्ने़ल्लो॥ हे़क्क्याङ् दमस्कसे़न् रसिन हाङ्ङिन्नुःल्ले़ के़धुम्बा मे़जोक्ने़न्लो इस्राइले़न् तुक्पोङ्ङाङ् ङासि तङ्बेरे़सा कुमिङ्ङे मार यारिक् चुजुक्सा लाजेॽओ पःङ्बेःक्लो॥ 9 इस्राइल लाजेन् कल्ले़ कुहाङ्पाङ् सामरियाःन्नुःल्ले़ के़धुम्बा मे़जोक्ने़न्लो, हे़क्क्याङ् सामरिया हाङ्पाङ्ङिन् कल्ले़ कुहाङ् रमलियाहःल्ले़ कुस्सा पेकहःन्नुःल्ले़ के़धुम्बा मे़जोक्ने़न्लो॥ खे़ने़ॽ के़नसाःन्ने़न् के़धुम्बा मे़जोक्ने़न्ने़भग्र आङ्गाॽ खे़ने़ॽ के़धुम्बा चोःक्मा मे़सुक्ने़न्लो॥” इम्मानुएलरे़ कुमिक्सेःन् 10 यहवे दाङ्बे़ल्ले़ आहाजे़न् याम्मो मे़त्तु, 11 “खे़मायङ्सङ् यो लाम् इग्र ताङ्साङ्बो थो लाम्साङ् खुने़ॽ कुबाःन्जाःक्किन् कुसिङ् निःप्मारे़ लागि यहवे दाङ्बा के़निङ्वाॽफुमाङ्ङिन् लत्छा मिक्सेन् थिक् नाःक्ते़ॽ॥” 12 कर आहाजे़ल्ले़ मे़त्तु, “आङ्गाॽ हे़क्केलॽरिक् मिक्सेन् मे़नाःक्ङान्॥ खे़ब्याङ् यहवे दाङ्बान् कुनिङ्वाॽ मे़साॽआन्॥” 13 हे़क्केःल्ले़ यसैयाःल्ले़ मे़त्तुसि, “दाउदरे़ कुहिम्सयङ्से, आल्ल खे़प्से़म्मे़ॽ! थे मनाहाॽरे़ खुन्छिॽ नासिथःप्मे़न् के़साॽरुम्साङ् खे़निॽ निङ्वाॽ मे़द्ये़ने़म्बि? थे खे़निॽ निङ्वाॽफुमाङ्ङिल्ले़ कुनासिथःप्मे़न्नाङ् के़साॽरुम्बि? 14 खे़ल्ले़चोगुल्ले़ यहवे दाङ्बे़ल्ले़ आबाङे खे़निॽ लत्छा मिक्सेन् थिक् के़बिरिॽ॥ ओमे़त्ते़म्मे़ॽ, मे़न्छ्याधिक् मे़न्छुक्मा पोङ् हे़क्क्याङ् खे़ल्ले़ लत्छा ये़म्बित्छा साधिक् कत्तुॽ हे़क्क्याङ् खे़न् अङे़ःक्वाःल्ले़ कुमिङ् इम्मानुएल पोङ्॥ 15 नुबा पाःन्निन् सेःक्मा नु ताप्फे़ःम्बा पाःन्निन् नाॽमा कुसिङ् निःप्मा हेःक्तुआङ् कन् हिन्जाॽ चुक्पे़ल्ले़ नुदाक्वान् नु सक्वाघुन् चरो॥ 16 कर खुने़ॽ नुबा नु ताप्फे़ःम्बा फाॽआङ् कुसिङ्निःप्मानुःल्ले़ तगि खे़निॽ खे़न् तल्लिक् के़गिरुम्सिम्बा इस्राइलबा नु अरामबा हाङ्हाॽरे़ खुन्छिॽ लाजेन् मुरे़क् खारे़क् नु चिजि खक्खक् मे़जोगु॥ 17 “यहवे दाङ्बे़ल्ले़ खे़ने़ॽ के़लाजेःल्ले़ कुदक्ले़ङ्वाओ नु खे़ने़ॽ के़हिम्सयङ्हाॽरे़ खुन्छिॽ तक्ले़ङ्वाओ यम्बा तुक्खे लाक्खे तारुॽ॥ हे़क्क्याङ् सोलोमनरे़ कुहाङ्जुम्मिन् इस्राइल नु यहुदा ने़त्छि हाङ्जुम्मो पःक्खे़बा तङ्बेआङ् कत्थो पोःक्खे़बा हिन्धोःक्हाॽनुःल्ले़आङ् पयम् यम्बा किमे़न् हाराए के़निसु के़दुमुॽ॥ खे़ब्याङ् यहवे दाङ्बे़ल्ले़ अस्सुरबा के़आःप्पा हाङ्ङिल्ले़ यरिक् कुधक्सुबाहाॽ तारुसिॽ॥” 18 “खे़न् ये़म्मो यहवे दाङ्बे़ल्ले़ योसमा मिस्र लाजेॽओबा थक्सुबाहाॽ नु अस्सुर लाजेॽओबा थक्सुबाहाॽ मे़दार फाॽआङ् ख्योःक्वालाम्बा उःत्तुसिॽ॥ खे़ङ्हाॽरे़ सिजाहाॽ कुइसिक् खे़ने़ॽ के़गब्रिङ् के़म्बन्नाङ् सक्वाहाॽ कुइसिक् के़म्सिक्काङ् के़म्से़त्॥ 19 खे़ङ्हाॽ मे़दाआङ् के़रे़क् चिहुॽहुॽबा याक्केःक्हाॽ, याक्पेॽ फिःप्माहाॽ, के़रे़क् तिङ्ग्रेक् लाहाॽओ नु के़रे़क् च्वाःत् वालाम्हाॽओ मे़युङ्सिङ्ॽ॥ 20 “खे़न् ये़न्नो यहवे दाङ्बे़ल्ले़ युफ्रेतिस वहःङ्ङिल्ले़ नाधाःम्बिलाम् अस्सुरबा हाङ्ङिन् फे़त्तुॽ, खे़न् थे़गेक् नःङ्मे़न् हे़क्तङ्बा चोक्॥ खे़ल्ले़ खिनिॽ थे़गेक् मुरिक्किन्, खिनिॽ लाङ् मुरिक्किन् हे़क्क्याङ् मुधोॽइन् नःक्खुआङ् नाधासु के़बिरिॽ॥ 21 “खे़न् ये़म्मिन् ताःल्ले़ मनाधिक्ले़ करःङ् पित् थिक् नु मे़ःन्दा ने़त्छिरक् हिङ्घुसिॽ 22 हे़क्क्याङ् खे़न् पित् नु मे़ःन्दालाम् यरिक् पित्नु युबाल्ले़ चोगुल्ले़ चामारे़ लागि नुदाक्वाआङ् वाॽ॥ खे़ब्याङ् लाजेॽओ के़हिङ्बा के़याःक्पा के़रे़क्ले़ नुदाक्वा नु सक्वाघु मे़जरो॥ 23 “खे़न् ये़म्मो हे़न्छिङ् थिक् कुआःत् युप्पा के़याःप्पा हे़न्छिङ् थिक् चे़ल्ले़क्सेल्ले़ कुबुङ् के़युङ्बा नुबा चे़ल्ले़क्सेॽ इक्ताप्पो सेर्दाःक्मा नु कुदिङ् के़युङ्बा फुङ्हाॽ लिङ्से़आङ् सधे़क् तिम्से़॥ 24 सेर्दाःक्मा नु कुदिङ् युङ्बाल्ले़ चोगुल्ले़ मनाहाॽ खे़ॽयो तोङ् लि मे़याङ्सिङ्ङाङ् सा आप्से़ मे़बेःक्॥ हे़क्क्याङ् लाजेन् के़रे़क् तिङ्ग्रेक् नु कुदिङ् के़युङ्बा फुङ्ले़ तिम्॥ 25 काःङ्ङे़ल्ले़ अःक्मनाबा के़रे़क् कोःक्मा थे़गुहाॽओ सेर्दाःक्मा नु तिङ्ङे़न् के़गिरुम्बाल्ले़ चोगुल्ले़ याम्मो खे़निॽ खे़ॽयो के़म्बेगिन्, कर खे़न् ते़न्हाॽ पित् साःङ्वा चाराम्मादे़न् नु मे़ल्लुक् के़लोःक्पाआङ् के़वाॽबादे़न् पोङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.