यसैया 66 - लिम्बुखासे़न् नु निङ्साङ् 1 यहवे दाङ्बे़ल्ले़ अक्खे पाःत्तुरो— “साङ्ग्राम्पेदाङ्ङिन् आङ्गाॽ आहाङ्युक्नारो हे़क्क्याङ् इक्सादिङ् खाम्बेःक्मे़न् आङ्गाॽ आलाङ् तोॽभेःत्लो, आल्ल आङ्गाॽ आलागि खे़निॽ आक्तङ्बा हिम् नु आङ्गाॽ युङ्मारे़ लागि आक्तङ्बा परिक्पादे़न् चोःक्मा के़सुक्तुम्बे? 2 थे कन्हाॽ के़रे़क् आङ्गाॽए आहुक्किल्ले़ चोगुङ्बा हे़क्क्याङ् कन्हाॽ कम्भलॽरिक् पोःक्खे़बा मेःम्बि?” यहवे दाङ्बे़ल्ले़ पाःत्तुरो॥ “हात् कुनिङ्वाॽओ नःम्नःम्बा नु चुङ्जिगे़न् चोक्, हे़क्क्याङ् आङ्गाॽ आबाःन्जाःक्किन् इःत्तु नाःत्तुॽ, आङ्गाॽ खे़न् इङ्धाङ् पिरुङ्लो॥ 3 कर खे़ङ्हाॽरे़ आबाङे खुन्छिॽ लाम्मिन् मे़सेगुआङ् मे़वाॽरो खे़ब्याङ् खे़ङ्हाॽरे़ खुन्छिॽ याम्साम्मिन् आबाङे खुन्छिॽ सिक्के़ले़ःङ्बा याःम्बक्हाॽओ सःत्लो॥ कुम्बाबा पित् वयागे़न् सिदुङ्जभा के़जोःक्पे़ङ्ग मना के़से़प्पा हे़क्तङ्बारो॥ थुःम्बा वयागे़न् सिदुङ्जभा के़जोःक्पे़ङ्ग कोःत्चोःल्ले़ कुनिःङ्मा के़ए़ङ्बा कुइसिःक्लो॥ हाःत्ले़ कुजा सिदुङ्जभा तोःन्दुॽ, खे़ङ्ग फाक्किल्ले़ कुमाक्खिॽ के़दोम्बा कुइसिःक्लो॥ आत्तिल्ले़ साङ्सिङ् सुक्पा हाःन्दु, खे़ङ्ग नावाइत्ला से़वा के़मे़प्पा हे़क्तङ्बारो॥ 4 कल्ले़चोगुल्ले़ आत्तिन् पाःन्ने़न्नु खे़ङ्हाॽ मे़गि, हाबा खे़न् तुक्खे लाक्खेहाॽए खे़ङ्हाॽरे़ मे़दुमुर याःन्दुङ्सिङ्लो॥ थेआङ्भे़ल्ले़ आङ्गाॽ पाःन्छाःत्तुङ्सिङ्ङिल्ले़ आत्तिन्हाॽरे़आङ् नुगप् मे़म्बिराङ्ङे़न्लो॥ आङ्गाॽ पाराङ्ङिल्ले़ हाःत्ले़आङ् खे़म्घे़म् मे़ल्लाप्तुन्लो, आत्तिन् पाःन्निन् आङ्गाॽ ताप्फे़ःम्बा निसुङ्, खे़ङ्हाॽरे़ हाबा खे़न्ने मे़जोगुरो, खे़ब्याङ् आत्तिन् पाःन्निन् आङ्गाॽ आसिराॽ मे़धाङ्ने़न्, आम्भा खे़न् खे़ङ्हाॽरे़ मे़सेगुरो॥” 5 यहवे दाङ्बे़ल्ले़ कुबाःन्नो के़गिबा के़यङ्बासे, खुने़ॽ कुबाःन्जाक्किन् खे़प्साम्मे़ॽओ, “आमिङ्ङिल्ले़ चोगुल्ले़ खिनिॽ आबाङे मनाहाॽरे़ के़म्जिःत्तिआङ् के़म्से़न्दिरो॥ खे़ब्याङ् किनाःन्दि मे़बाःत्ल खिनिॽ अक्खे के़म्मे़त्तिरो, ‘यहवे दाङ्बे़न् के़रे़क्नुःल्ले़ पयम् यम्बा चोःक्पे़न् खुने़ॽ आबाङे ओसेःन्धाङ् चोगुररो हे़क्क्याङ् खिनिॽ के़से़ःप्तिररो॥ हे़क्क्याङ् खिनिॽ के़सःत्तिबे़न् आनिगे ओमे़प्मा खोसुम्बे़ररो’ कर खे़ङ्हाॽरे़ खुन्छिॽ चाःत्थि पेःक्लो॥ 6 खे़प्साम्मे़ॽ! ये़क्यक्कोलाम् के़दाबा हयङ् किल्लिङ्ङिन्, माङ्हिम्मो खे़म्दे़त्ल पत्लो, खे़ङ्ग यहवे दाङ्बे़ल्ले़ आबाङे कुनिङ्मिहाॽ खुम्दिङ् पिरुसिल्ले़ के़लःम्बा कुइक्लारो! 7 “आङ्गाॽ आसेसे ये़क्यक्किङ्ग कम्भदाङ्मा लत्छा मे़न्छुमा हे़क्तङ्मा चोक्लो, खे़ल्ले़ सागप्मा तुङ्ङिल्ले़ मे़न्याङ्ङे अङे़ःक्वा कत्तुरो॥ 8 अक्तङ्बा पान् हाःत्ले़ खे़प्सुआङ् वाॽबे? कम्दाङ्बा पान् आत्तिल्ले़ निसुआङ् वाॽबे? थे थिक्याःन्ले़ लत्छा लाजेॽ पोङ्मा सुक्पि? इग्र सप्फाधिक्ले़ लत्छा मे़न्छाम् सुवाङ् लःप्मा सुक्मे़दे़प्पि? हे़क्केसाङ् सियोने़ल्ले़ग सादुङ्ङिल्ले़ याङ्घुनुमे़ःन्ने अङे़ःक्वाहाॽ कत्तुसिरो॥ 9 आमनाहाॽ सावाःन्छिङ्मा ये़म् थारिक् के़दारुसिरो हे़क्क्याङ् खे़ङ्हाॽ आङ्गाॽ सावाःन्छिङ्मा मे़भाःक्कासिङ्ङिन् फाॽआङ् मे़इःत्ताम्मिन्ने़ॽओ” यहवे दाङ्बे़ल्ले़ पाःत्तुआङ् वाॽरो॥ 10 “यरुसले़ःम्मिन्नु सःत्ताम्मे़ॽओ, खे़न् ये़क्यक्किन् लुङ्माॽ के़दुक्पा के़रे़क्ले़ आल्लोए खे़न्नु निङ्वाॽ ये़ये़ मे़त्ताम्मे़ॽओ! खे़ल्ले़ कुलागि मे़रिङ् के़धक्पा के़रे़क्, खे़ल्ले़ कुलागि निङ्वाॽ तासाम्मे़ॽओ! 11 लत्छा अङे़ःक्वान् कुम्मारे़ कुनुःन् थुङुल्ले़ सःप्पा कुइसिक् खे़न् नुॽदाःल्ले़ खिनिॽ के़सःत्तिरो॥” 12 यहवे दाङ्बे़ल्ले़ पाःत्तुरो, “आङ्गाॽ खिनिॽ आभे़ल्ले़आङ् मे़न्हेमनाबा वहःङ् कुइसिक् नुॽमादामा पिनिङ्लो॥ थिम्मे़न्दङ् सुवाङ्हाॽरे़ खुन्छिॽ याङ्साकुन्धेहाॽ के़गुङ्बा के़युबा वहःङ् कुइसिक् खे़निॽओ सःक्तारो॥ खिनिॽग कुम्मारे़ कुस्सान् लुङ्माॽ तुक्तुबा हे़क्क्याङ् कुभक्ताङ्ङो युक्खुआङ् यम्बा चोगुबा अङे़ःक्वा हे़क्तङ्बा के़बोक्खिरो॥ 13 कुम्मारे़ अङे़ःक्वान् हाङ्हाङ् मे़त्तुबा हे़क्केए आङ्गाॽ खिनिॽ हाङ्हाङ् मे़त्निङ्लो॥ हे़क्क्याङ् यरुसले़म ये़क्यक्किल्ले़ चोगुल्ले़ खिनिॽ हाङ्हाङ् के़लॽरिरो॥” 14 अक्खे पोङ्बा खे़निॽ के़निसुम्माङ् खिनिॽ निङ्वाॽओ के़सःत्तिरो, हे़क्क्याङ् खे़निॽ यान् हे़क्के चिनॽनॽना के़बोरिरो॥ खे़ब्याङ् यहवे दाङ्बे़ल्ले़ कुबान् के़घे़म्बाहाॽ फाॽरुसिरो कर कुनिङ्मिहाॽ सिक् ओसेःन्धाक्तुसिॽ के़लॽबान् कुसिङ् के़निःत्तुम्लो॥ 15 ओमे़त्ते़म्मे़ॽ, यहवे दाङ्बे़न् मिधुङ्दिङ् मिराःक्नु युर पत्लो, हे़क्क्याङ् कुअन्लाधाहाॽग सुरित् केजङ् इक्सिङ्बा हे़क्के लॽरो॥ खुने़ॽ कुसिक् पोःक्मे़न् कुस्साक्के़न्निन् इसेःङ् हे़क्क्याङ् खुने़ॽ मना कुभे़ःक्मे़न् मिराःक्नु युरुरो॥ 16 थेआङ्भे़ल्ले़ मि नु ताभेलाम्बा यहवे दाङ्बे़ल्ले़ के़रे़क् मनाहाॽ खासे़न् चोगुसिरो, हे़क्क्याङ् यहवे दाङ्बालाम् के़सिबाहाॽ यरिक् मे़बोङ्लो॥ 17 यहवे दाङ्बे़ल्ले़ पाःत्तुॽ, “नावाइत्ला माङ्घमारे़ लागि सुत्थो के़जोःक्सिङ्बा, कुदिःक् कुदिःक् माङ्धाःन्हाॽओ के़बेःक्पा हे़क्क्याङ् फाक्, सुबा नु वेॽ सिक्के़ले़ङ्बा कुजा के़जाबा मनाहाॽरे़ खुन्छिॽ मे़क्मासिमे़न् निःत्ताङ् तार पत्॥ 18 आङ्गाॽ खे़ङ्हाॽरे़ मे़इःत्तुबा खुन्छिॽ निङ्वान् नु याःम्बक्हाॽ कुसिङ् निःत्तुङ्॥ आङ्गाॽ के़रे़क् पाःन्दाङ् नु के़रे़क् मे़न्छाम् सुवाङ्हाॽरे़ खुन्छिॽ फुङ्से़ युआर पत्ता॥ खे़ङ्हाॽ के़रे़क् मे़जुम् मे़जुःत्ताङ् आङ्गाॽ आमिमिदिङ्ङिन् मे़निसुॽ॥ 19 “हे़क्क्याङ् आङ्गाॽ खे़ङ्हाॽरे़ खुन्छिॽ लुम्मो लत्छा मिक्सेःन्धिक् पिरुङ्सिङ्ॽ॥ कर आङ्गाॽ खे़ङ्हाॽओ कुभा के़हिङ्बा के़याःक्पाहाॽ आङ्गाॽ आमिङ् तिःप्पा, चोगुङ्बा याःम्बक्हाॽ, आमुक्साम्मिन् हे़क्क्याङ् के़रे़क्नुःल्ले़ यम्बाआ फाॽआङ् मे़ङ्घे़म्मे के़वाॽबा मे़न्छाम् सुवाङ्हाॽओ नु माःङ्घा माःङ्घाबा लाजेॽहाॽओ पाङ्घुङ्सिङ्ॽ, इग्र तार्सिस, लिबिया नु तोङ् लि याङ्मा के़ले़बा मना के़युङ्बा लुद नु तुबल खे़म्ब्याङ् ग्रिस लाजेॽहाॽओ पाङ्घुङ्सिङ्ॽ॥ कन् लाजेॽहाॽओ आङ्गाॽ पयम् यम्बा चोःक्का फाॽआङ् खे़ङ्हाॽरे़ उवा मे़जोगुॽ॥ 20 खे़म्ब्याङ् खे़ङ्हाॽरे़ इक्सादिङ् खाम्बेःक्मोबा के़रे़क् मे़न्छाम् सुवाङ्हाॽलाम् खिनिॽ के़रे़क् फुॽनुसाॽहाॽ अन्हाॽ, अन्लाधाहाॽ, लाधाहाॽ, अदङ्हाॽ नु उमेहाॽओ कक् मे़जोगुआङ् आङ्गाॽ आसेसे कोःक्मा यरुसले़ःम्मो यहवे दाङ्बे़ल्ले़ कुलागि सिदुङ्जभा हे़क्के मे़दारुॽ॥ इस्राइलबा मनाहाॽरे़ खुन्छिॽ साहाॽरे़ मे़दारुबा पोगुगे़न् कुजाःल्ले़न् सिदुङ्जभाहाॽ सुत्थो खप्प्याओ मे़याक्तुआङ् यहवे दाङ्बे़ल्ले़ कुहिम्मो मे़दारुबा हे़क्के खे़ङ्हाॽरे़ कन्हाॽ मे़दारुसिॽ॥ 21 हे़क्क्याङ् खुन्छिॽ लुम्मो कुभा निङ्वाॽफुसाम्बा नु ले़बि पोङ्मारे़ लागि सेगुङ्सिङ्,” यहवे दाङ्बे़ल्ले़ पाःत्तुरो॥ 22 “आङ्गाॽ आमुक्साम्लाम् कुसङ् इक्सादिङ् खाम्बेःक्मे़न् नु कुसङ् ताङ्साङ्बे़न् थधप् मे़ल्लॽए पक्कन्, हे़क्केलॽरिक्के खिनिॽ मुॽइदाङ्साहाॽ नु खिनिॽ मिङ्ङिन् आभे़ल्ले़साङ् हाबा वाॽरो॥ 23 लादुप् थक्मा हे़क्क्याङ् नाःम्सिङ्मा ये़न्नो के़रे़क् मे़न्छाम् सुवाङ्बा मनाहाॽ आङ्गाॽ से़वा मे़त्छे़ कन् यरुसले़म ये़क्यक्को मे़दारो,” यहवे दाङ्बे़ल्ले़ पाःत्तुरो॥ 24 “खे़ङ्हाॽ मे़लःन्नाङ् मे़बेःक्किल्ले़ आङ्गाॽ आदक्ले़ङ्वाओ पिफ्युङ् के़जोःक्पाहाॽरे़ खुन्छिॽ के़सिबा थक्हाॽ खे़ङ्हाॽरे़ मे़निसुरो॥ खे़न् के़सिबा थक्हाॽ के़जाबा फेॽबाःत्हाॽ आभे़ल्ले़आङ् मे़न्छिने़न्लो हे़क्क्याङ् खे़न् चेधक्हाॽ के़ओॽबा मिन् आभे़ल्ले़आङ् मे़सिने़न्लो, खे़न् निगे़दे़प्पे़न् के़रे़क् मे़न्छाम् सुवाङ्हाॽरे़ खुन्छिॽ लागि साॽरिक् सिक्के़ले़ःङ्बा पोङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.