यसैया 65 - लिम्बुखासे़न् नु से़न्लप् 1 यहवे दाङ्बे़ल्ले़ अक्के पाःत्तुरो, “आङ्गाॽ आमनाहाॽरे़ मे़गोःत्तार के़लॽबा निङ्वाॽ चोगुङ्ङाङ् वयाङ्लो कर खे़ङ्हाॽरे़ मे़ङ्गोःत्ताङ्ङिन्लो॥ खे़ङ्हाॽरे़ आङ्गाॽ मे़घोआर फाॽआङ् यारिप् वयाङ्लो कर खे़ङ्हाॽरे़ आङ्गाॽ खोमा निङ्वाॽए मे़न्जोगुन्लो॥ हे़क्केसाङ् आङ्गाॽ याप्मि पेलि मे़म्भाक्मनाबा सुवाङ्हाॽ ‘आङ्गाॽ कॽयो वाॽआ’ फाॽआङ् मे़त्तुङ्सिङ्लो॥ 2 आङ्गाॽ आमनाहाॽ लाम्दाःक्मासिरे़ लागि आङ्गाॽ आभे़ल्ले़साङ् यारिप् वाॽआरो कर आङ्गाॽ आमनाहाॽ पाःन्मे़ङ्घे़म्मनाबा मे़बोःक्खे़आङ् आत्तिन् पाःन्निन् ताप्फे़ःम्बा चोक्, आम्भा खे़न् मे़जोगुरो खे़ब्याङ् आबाङे खुन्छिॽ लाम्मो लाङ्मे़घेःक्लो॥ 3 खे़ङ्हाॽरे़ खुन्छिॽ सेसेबा फुङ्इक्ताप्हाॽओ आदगिए नावाइत्लाहाॽ से़वा मे़मे़त्तुआङ् कुनामे़न्छाॽ मे़मे़त्ताॽरो॥ खे़ङ्हाॽरे़ नावाइत्ला से़वा के़मे़प्पाहाॽरे़ खुन्छिॽ ले़त्ति तोःम्मादे़न्नो सुक्पा मे़हाःन्दुरो॥ 4 खे़ङ्हाॽ इपुङ्हाॽ सिगाङ् मे़युङ्लो हे़क्क्याङ् से़न्दिक् नाम्दाःत्तात् इक्लक्वा ते़न्हाॽओ मे़इआङ् मे़वाॽरो॥ खे़ङ्हाॽरे़ फाक्सा मे़जरो हे़क्क्याङ् आसुत्थो कुजान् खप्प्याओ मे़धोःक्तुआङ् मे़जरो॥ 5 हे़क्क्याङ् वेॽ मनाहाॽ खे़ङ्हाॽरे़ मे़मे़त्तुसिरो, ‘खे़निॽ आनिगे पेसाङ् मे़द्ये़म्मिन्ने़ॽओ॥ खे़निॽनुःल्ले़ आनिगे सेसेबा चोगिगे़रो!’ हे़क्तङ्बा मनाहाॽ नासिथःप्मा मे़सुक्कासिङ्ङिन्लो, खे़ङ्हाॽ आङ्गाॽ आलागि ले़न्दिक् नाम्धाधा के़हाॽबा हे़क्क्याङ् निङ्ले़ॽले़ॽ के़लॽबा मिःक्खोॽ हे़क्तङ्बासिरो॥ 6 खे़ङ्हाॽ आक्तङ्बा परिक्ले़न् खुम्दिङ् पिमासि पोङ्, आङ्गाॽ तगिए निङ्सेक् चोगुङ् सुरुङ्ङाङ् वाॽरो, आङ्गाॽ साप्लाओ साप्तुङ् सुरुङ्ङाङ् पत्लो॥ आङ्गाॽ आल्ल स्वाःत् मे़युङ्आल्लो, आङ्गाॽ खे़ङ्हाॽ कुले़क्वा नुःक्तुङ् पिरुङ्सिङ्लो॥ 7 खे़ङ्हाॽरे़ खुन्छिॽ लायोल्ले़ लागि हे़क्क्याङ् खे़ङ्हाॽरे़ खुन्छिॽ थाःक्थे़बाहाॽरे़ खुन्छिॽ लायोल्ले़ लागि कुले़क्वा हुङुङ्लो॥ खे़ङ्हाॽरे़ कोःक्माओबा नावाइत्ला से़वा के़मे़प्पाहाॽरे़ खुन्छिॽ ले़त्ति तोःम्मादे़न्हाॽओ सुक्पा मे़हाःन्दुआङ् वाॽरो खे़ब्याङ् आङ्गाॽ आदक्ले़ङ्वाओ मे़बारे़आङ् वाॽरो॥ के़बेःक्पा ये़न्नो खे़ङ्हाॽरे़ मे़जोगुबा लायोन् कुइसिक् आङ्गाॽ खे़ङ्हाॽ खुम्दिङ् पिरुङ्सिङ्लो॥” 8 यहवे दाङ्बे़ल्ले़ अक्खे पाःत्तुरो, “कर आङ्गाॽ खे़न् के़रे़क् मे़मे़क्खुङ्ङिन्लो थेआङ्भे़ल्ले़ ताप्फे़ःम्बा चे़ल्ले़क्सेॽ कुबजाहाॽओ नुबा चे़ल्ले़क्सेॽ कुजाॽआङ् खोदे़त्लो हे़क्क्याङ् कुभारे़ मे़बाःत्तुॽ, ‘खे़ङ्हाॽ लाप्मे़भुसे़म्मिन्ने़ॽओ— कुभा चे़ल्ले़क्सेॽ कुजाॽहाॽ नुबा चोक्लो!’ खे़ल्ले़चोगुल्ले़ के़रे़क् इस्राइलिहाॽ मे़मे़क्खुङ्सिङ्ङिन्लो, थेआङ्भे़ल्ले़ आल्लसाङ् से़क्खाबा आसे़वारोबाहाॽ मे़वाॽरो॥ 9 आङ्गाॽ आलाजेन् लक् पिमासिरे़ लागि याकुबरे़ कुमुॽइदाङ्सा नु यहुदाबा के़दाङ्बा के़याःक्पा मनाहाॽ आङ्गाॽ ताङ्घुङ्सिङ्लो, सेगुङ्सिङ्बाहाॽरे़ए खे़न्लक् मे़घोसुरो, हे़क्क्याङ् आसे़वारोबाहाॽ खे़प्मो मे़युङ्लो॥ 10 खे़ङ्हाॽरे़ आङ्गाॽ मे़गोःत्तारो हे़क्क्याङ् नाम्धा पिसाङ् सारोनबा ते़म्बेःन् खे़ब्याङ् नाम्गे़न् पिसाङ् आकोरबा सेःङ्घाःन् खे़ङ्हाॽरे़ खुन्छिॽ मे़ल्लुक् नु पित् चाराम्मादे़न् पोङ्लो॥ 11 “कर खिनिॽ आङ्गाॽ याप्मि के़ले़प्पाहाॽरे़ आङ्गाॽ आसेसे सियोन कोःक्मान् निनि मे़न्लाप्तुन्लो, हे़क्क्याङ् तॽयान् ओगे़मे़प्पा गाद नु मेनि माङ्हाॽ से़वा मे़मे़त्तुसिरो, 12 खिनिॽ त्वाबो आसे़त्से़प्पा सिमे़न् साप्तुङ् पिनिङ्ङाङ् पत्लो थेआङ्भे़ल्ले़ आङ्गाॽ पाःन्छाःत्निङ्ङिल्ले़ खिनिॽ के़म्बारिन्लो हे़क्क्याङ् पाराङ्ङिल्ले़ आबाःन्निन् के़ङ्घे़प्सुम्ने़न्लो॥ खिनिॽ निनिबा लायो के़जोगुम्लो हे़क्क्याङ् चिःत्तुङ्बा पाःन्निन् के़सेगुम्लो॥” 13 कल्ले़चोगुल्ले़ यहवे दाङ्बा निङ्वाॽफुमाङ्ङिल्ले़ अक्खे पाःत्तुरो, “ओमे़त्ते़म्मे़ॽ, आङ्गाॽ आसे़वारोबाहाॽरे़ मे़जरो, कर खिनिॽग साक्मे़न्जा के़युङिरो॥ आङ्गाॽ आसे़वारोबाहाॽरे़ मे़धुङु, कर खे़निॽग वामिःक्लो, आङ्गाॽ आसे़वारोबाहाॽ मे़सःत्ताङ् सोसोःत् लराङ् मे़जोक्लो, कर खिनिॽ नाधारो॥ 14 आङ्गाॽ आसे़वारोबाहाॽ निङ्वाॽओ मे़सःत्ताङ् साम्मे़लोरो, कर खिनिॽ निङ्वाॽ तुक्खे चाआङ् के़हाबिरो, खे़ब्याङ् याम्साम्मो निङ्वाॽ तुक्काङ् उःक्काङ् उःक् के़हाबिरो॥ 15 आङ्गाॽ सेगुङ्सिङ्बा आमनाहाॽरे़ खिनिॽ मिङ्ङिन् साङ्ग्रा माङ्दे पान् मे़बाःत्तिल्ले़ मे़याङुरो, हे़क्क्याङ् यहवे दाङ्बा निङ्वाॽफुमाङ्ङिल्ले़ खे़निॽ के़से़रिरो, कर खुने़ॽ कुसे़वारोबाहाॽ वेॽ मिङ् पिरुसिरो॥ 16 आत्तिल्ले़ कन् लाजेॽओ हाङ्वागे़न् मुॽइसाम्मिन् उवा चोगुॽ, खे़ल्ले़ से़क्खाबा निङ्वाॽफुमाङ्ङिल्ले़ कुमिङ्ङो अक्खे चोगुरो, हे़क्क्याङ् कन् लाजेॽओ माङ्गे़हे़क्सिङ्बे़ल्ले़ निङ्वाॽफुमाङ्ङिल्ले़ कुमिङ्ङो माङ्हे़क्सिङ्लो, थेआङ्भे़ल्ले़ तगिबा तुक्खेहाॽ माबेःक्काङ् निङ्वाॽ मुःन्लो॥” कुसङ् नावागे़न् चइःत् 17 यहवे दाङ्बे़ल्ले़ पाःत्तुरो, “आङ्गाॽ कुसङ् इक्सादिङ् खाम्बेक् नु कुसङ् ताङ्साङ्बा चोगुङ्लो, के़बेःक्पा ये़म्मोबा पाःन्हाॽ निङ्वाॽ इःप्मा मे़बोङ्ने़न्लो॥ 18 आङ्गाॽ च्या नावागे़न् चइःत् चोगुङ्, खे़ॽयो खिनिॽ आभे़ल्ले़साङ् सःत्ताम्मे़ॽओ हे़क्क्याङ् निङ्वाॽ तासाम्मे़ॽओ॥ आङ्गाॽ नावागे़न् चइःत् चोगुङ्बा कुसङ् यरुसले़ःम्मो निङ्वाॽ तामा पाःन्हाॽरे़ कुधिम् पोङ्लो खे़म्ब्याङ् खे़ॽयो के़युङ्बा मनाहाॽ पसःत् मे़सःत्लो॥ 19 यरुसले़म नु खे़प्मो के़युङ्बा मनाहाॽरे़ मे़जोगुल्ले़ आङ्गाॽ आबाङेआङ् सःत्तारो, खे़प्मो हाःप्मा चिःङ्मा नु आभाॽरे़ॽ के़लॽबा इक्ला खे़म्मे़दे़त्ने़न्लो॥ 20 “अङे़ःक्वाहाॽ मे़जुःक्लए मे़न्छिने़न्लो, के़रे़क् मनाहाॽ खुन्छिॽ थाःक् चाॽर थारिक् मे़हिङ्लो॥ किप् थिक् तङ्बेॽ के़गे़प्पाहाॽ थाङ्बे़न् लेःप्मासि पोङ्लो, खे़न्नुःल्ले़ तगि के़सिबाहाॽग आङ्गाॽ खुम्दिङ् पिरुङ्सिङ्बा फाॽआङ् इःप्मा पोङ्लो॥ 21 खे़ङ्हाॽरे़ हिम् मे़जोगुआङ् खे़ॽयो मे़युङ्लो, खे़ङ्हाॽरे़ चे़ल्ले़क्सेॽ इक्ताप् मे़लेःत्तुआङ् खे़ल्ले़ कुजाॽइन् मे़जरो॥ 22 खे़ङ्हाॽरे़ हिम्हाॽ मे़जोगुआङ् आफेक् मे़युङ्लो, वेॽहाॽ मे़लाःत्ताङ् मे़न्युङ्ने़न्लो, हे़क्क्याङ् खे़ङ्हाॽरे़ मे़लेःत्तुबा इक्ताप्हाॽ आबाङे मे़जरो वेॽहाॽरे़ मे़न्जने़न्लो॥ थेआङ्भे़ल्ले़ सिङ्बुङ्ङिन् इरिक् हिङ्बा हे़क्केए आङ्गाॽ आमनाहाॽरे़ खुन्छिॽ थाःक् चाॽरो, खे़ब्याङ् आङ्गाॽ सेगुङ्सिङ्बाहाॽरे़ आबाङे हुक्किल्ले़ मे़जोगुबा याःम्बक्को यरिक् ये़न् थारिक् मे़सःत्लो॥ 23 खे़ङ्हाॽरे़ हुक्मे़याक्तुबा याःम्बक्को खे़ङ्हाॽ कुलिङ्दो मे़गे़त्लो खे़म्ब्याङ् खे़ङ्हाॽरे़ खुन्छिॽ मे़न्छुमा ये़म्बित्छासाहाॽ के़साक्पा तुक्खेओ मे़न्धाने़न्लो॥ खे़ङ्हाॽ नु खे़ङ्हाॽरे़ खुन्छिॽ मुॽइदाङ्साहाॽ के़दाबा ये़न्नो सदादिङ् हाङ्वागे़न् मुॽइसाम् पिरुङ्सिङ्लो॥ 24 खे़ङ्हाॽरे़ आङ्गाॽ पेलि फाक्मानुःल्ले़ तगि खे़ङ्हाॽरे़ आङ्गाॽ मे़नाःक्काबा पाःन्हाॽ पिरुङ्सिङ्लो॥ 25 पराबाहाॽ नु थुःम्बाहाॽरे़ लत्छादे़न्नो सोरिक् कुजा मे़जरो, केबाहाॽरे़ पित्हाॽरे़ मे़जबा कुइसिक् कुहेद्याॽ याॽलाङ्ङिन् मे़जरो॥ कर असेःक्हाॽरे़ खाम्हिःक्के़न् मे़जरो, खे़ङ्हाॽरे़ आङ्गाॽ सेसे आगोःक्माओ ताप्फे़ःम्बा पान् थेआङ् मे़न्जोगुन्लो,” यहवे दाङ्बाल्ले़ पाःत्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.