यसैया 64 - लिम्बु1 ताङ्साङ्बे़न् के़धे़ःक्खुआङ् थेआङ् के़न्धासिङ्ङे़न्बाबे? नाङ्जङ् लुङ्हाॽरे़ खे़ने़ॽ के़म्निसे़मे़न्लो हे़क्क्याङ् किमे़ल्ले़ थे़गक्कक्ना मे़यक्खे़मे़न्लो॥ 2 मिःल्ले़ सिङ्मुजिॽहाॽ हाॽरुरो हे़क्क्याङ् च्वाःत्तिन् लाक्तुबा हे़क्के, खे़ने़ॽ के़निङ्मिहाॽ के़मिङ्ङिन् मे़प्मासिरे़ लागि, खे़ब्याङ् इक्सादिङ् खाम्बेःक्कोबा के़रे़क् मे़न्छाम् सुवाङ्हाॽ खे़ने़ॽ के़बेसाङ् मे़यङ्ल फाॽआङ् कॽयो थासिङ्ङे़ॽओ॥ 3 खे़ने़ॽ किप्मा के़घुबा याःम्बक्हाॽ के़जोगु फाॽआङ् आनिगे निङ्वाॽ इःत्तुम्बे़बाए होःप्ते़रो, खे़ब्याङ् खे़ने़ॽ कॽयो के़धासिङ्लो, हे़क्क्याङ् कोःक्मा फाङ्जङ् नाङ्जङ्लुङ्हाॽ थुरुप्लुप्ना यक्खे़रो॥ 4 खे़ने़ॽ हे़क्तङ्बा निङ्वाॽफुमाङ् के़वाॽ फाॽआङ् उनाहुरिआङ्धोए हाःत्ले़आङ् हे़क्क्याङ् आभे़ल्ले़आङ् मे़न्निए मे़ङ्घे़म्मे वाॽरो॥ खे़ने़ॽओलाम् ओगे़मे़प्पाहाॽरे़ खुन्छिॽ लागि साॽरिक् निङ्वाॽ के़माबा याःम्बक्हाॽ के़जोगुरो॥ 5 कुदोःप्मा याःम्बक् के़जोःक्पा, हे़क्क्याङ् के़लाम्मो लाङ्गे़घेःक्पाहाॽ खे़ने़ॽ के़भाॽरुसिरो॥ खे़ने़ॽ आनिगे़नु के़सिक् पोगे़ कर आनिगे लायो चोगुम्बे़रो, हे़क्क्याङ् आल्लसाङ् लायोबाए वयिगे़ल्ले़ आक्खेलॽरिक् से़ःप्सिङ्मा सुक्तिगे़बाबे? 6 के़रे़क् आसुत्थो मना हे़क्तङ्बा पोःक्खिगे़आङ् वयिगे़रो, हे़क्क्याङ् आनिगे साम्योबा याःम्बक्हाॽ के़रे़क् चिःन्जिःन् के़घुबा कुद्रे़क् चाङ् हे़क्तङ्बा पोःक्खे़आङ् वाॽरो॥ आनिगे के़रे़क् ते़त्लाफे़क्वा कुइसिक् इले़मिघे़रिगे़रो, हे़क्क्याङ् आनिगे लायोल्ले़ सुरित् केजङ्ङिल्ले़ हे़क्के पक्खि तेॽरिगे़रो॥ 7 आत्तिन्नाङ् तुवा चोःक्से़ खे़ने़ॽ ले़प्माङ् मे़हिसिङिल्लो, आत्तिन्हाॽआङ् खे़ने़ॽओ कुभाॽ नाःक्से़ मे़म्बेःक्ने़ल्लो, थेआङ्भे़ल्ले़ खे़ने़ॽ के़नारान् आनिगे़लाम् के़जिक्खुआङ् वाॽरो, हे़क्क्याङ् आनिगे लायोल्ले़ चोगुल्ले़ याप्मि कुसुम् मे़न्दम्नाबा के़जोगे़आङ् वाॽरो॥ 8 हे़क्केसाङ् आल्ल यहवे दाङ्बाए, खे़ने़ॽग आनिगे पानुदिङ् पाने़रो॥ आनिगे खाम्दिगे़, हे़क्क्याङ् खे़ने़ॽग कोम्भाःल्ल्याने़रो, के़रे़क् खे़ने़ॽ के़हुक्किल्ले़ याप्मि के़जोगे़बा याःम्बक्सिगे़रो॥ 9 यहवे दाङ्बाए, साॽरिक् के़सिक् मे़बोगे़न्ने़ॽओ, आनिगे लायो लासोःत्हाॽ तिबेलाबे निङ्वाॽ मे़इःत्ते़न्ने़ॽओ॥ पेलि फाक्कासिगे़, आनिगे लुङ्माॽ आदुक्ते़ॽओ, थेआङ्भे़ल्ले़ आनिगे के़रे़क् खे़ने़ॽ के़मनादिगे़रो॥ 10 खे़ने़ॽ के़सेसे ये़क्यक्हाॽ मुरे़क् खारे़ःक्पा हाःत्ताङ् के़होःप्पादे़न् पोःक्खे़आङ् ने़रो, सियोने़न्नाङ् मुरे़क् खारे़ःक्पा हाःत्ताङ् के़होःप्पादे़न् पोःक्खे़रो, यरुसले़ःम्मिन् थेआङ् के़होप्पा चिजि खक्खक् पोःक्खे़रो॥ 11 आनिगे पाधे़बा सुधे़बाहाॽरे़ खे़ने़ॽ के़नारा मे़भोसुबा आनिगे सेसे नु मिमिदिङ्गे़न् माङ्हिम्मिन् मिदिगे़आङ् ने़रो, हे़क्क्याङ् आनिगे सिराॽ के़धाङ्बा लेःत्तुम्बे़बा चिगक्वा सामाहाॽ कुयःक्वे़त् पोःक्खे़आङ् ने़रो॥ 12 यहवे दाङ्बाए, कन्हाॽ के़रे़क् पोःक्खे़आङ् थे खे़ने़ॽ एगाङ् एगाङ् के़नुःङ्बि? थे खे़ने़ॽ स्वाःत् के़वाॽआङ् आनिगे थःप्माए सुक्मे़न्दे़प्मनाबा तुक्खे याप्मि के़जाःप्पि? |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.