यसैया 63 - लिम्बुयहवे दाङ्बे़ल्ले़ मे़न्छाम् सुवाङ्हाॽ नाःन्दुसि 1 एदोमबा बोज्रा ये़क्यक्लाम् हे़ःक्कङ्गङ्बा चाःम्मनाबा चाङ् के़जाङ्बाआङ् के़भे़म्बे़न् हाःत्निबे? हाङ्वा माङ्वा के़याक्पा तेत् नु खुने़ॽ कुमुक्साम्मो तगाङ् के़भे़म्बार के़बप्पे़न् हाःत्पे? “के़से़न्लप्पिन् उवा के़जोःक्पा यहवे दाङ्बान् आङ्गाॽएरो! ताङ्से़ःप्मा मुक्साम् के़गप्पा यहवे दाङ्बे़ङ्ग आङ्गाॽएरो!” 2 चे़ल्ले़क्सेॽ एःम्मादे़न्नो, चे़ल्ले़क्सेॽ के़नुक्पे़ल्ले़ कुदेःत्तिन् हे़क्के खे़ने़ॽ के़जाङ्ङिन् थेआङ् हे़ःत् लॽबाबे? 3 यहवे दाङ्बे़ल्ले़ पाःत्तुरो, “मे़न्छाम् सुवाङ्हाॽ चे़ल्ले़क्सेॽ हे़क्के एःप्सुङ्सिङ्लो, आङ्गाॽ फाॽमारे़ लागि हाःत्ताङ् मे़दे़न्ने़न्लो॥ आसाक्के़न्निल्ले़ खे़ङ्हाॽ तोॽरुसिङ्लो, हे़क्क्याङ् खुन्छिॽ माक्खिल्ले़ के़रे़क् आजाङ्हाॽ पित्तुरो॥ 4 थेआङ्भे़ल्ले़ कुले़क्वा हुङ्मा ये़न् आनिङ्वाॽओ वये़रो, हे़क्क्याङ् खे़ङ्हाॽ थे़ॽमासि तङ्बेन् त्ये़आङ् वाॽरो॥ 5 ओमयाङ्, कर हाःत्ले़आङ् फाॽमा निङ्वाॽ मे़जोगुन्लो, के़भाॽबा निङ्वाॽ के़जोःक्पा मे़होःप्ते़बा निसुङ्ङाङ् आनिङ्वाॽ मये़रो, कल्ले़चोगुल्ले़ आङ्गाॽ आबाङे आमुक्साम्मिल्ले़ खे़ङ्हाॽ से़न्लप् पिरुङ्सिङ्लो, खे़ब्याङ् आसाक्के़न्निल्ले़ आङ्गाॽ फाॽराङ्लो॥ 6 आङ्गाॽ आसाक्के़न्नो मे़न्छाम् सुवाङ्हाॽ तोॽरुङ्सिङ्लो हे़क्क्याङ् मयुसिबा हे़क्के खुन्छिॽ लाङ्हाॽ ए़त्छिङ्ङाङ् खाम्बाङ्ङो मे़जोन्लो, खे़ङ्हाॽरे़ खुन्छिॽ माक्खिन् खाम्बाङ्ङो वदेःन्दुङ्लो॥” यहवे दाङ्बे़ल्ले़ इस्राइलिहाॽ नुॽमा तामा पिरुसिॽ 7 यहवे दाङ्बे़ल्ले़ चक्मे़ल्लॽएबा कुमिःम्जिन् पाःत्तुङ्लो, आनिॽ के़रे़क्ले़ लागि खुने़ॽ चोगुबा याःम्बक्किल्ले़ लागि आङ्गाॽ खुने़ॽ कुनारा फोसुङ्लो॥ खुने़ॽ कुलुङ्मादुक्मा नु चक्मे़ल्लॽएबा कुमिःम्जिल्ले़ चोगुल्ले़ इस्राइलबा मनाहाॽ मुॽइसाम् पिरुसिआङ् वाॽरो॥ 8 खुने़ॽ पाःत्तु, “से़क्खासाङ् कन्हाॽ आङ्गाॽ आमनासिरो, खे़न्हाॽरे़ आङ्गाॽ इङ्मे़ल्ले़क्कान्लो” कल्ले़चोगुल्ले़ खुने़ॽ खे़ङ्हाॽरे़ खुन्छिॽ से़न्लप्दाङ्बा पोःक्खे़रो॥ 9 खे़ङ्हाॽरे़ खुन्छिॽ के़रे़क् तुक्खेओ खुने़ॽ कुनिङ्वाॽ तुगे़रो, हे़क्क्याङ् खुने़ॽ आबाङे खे़ङ्हाॽ थे़ॽरुसिरो॥ खुने़ॽ खे़ङ्हाॽ लुङ्माॽ तुक्तुसि हे़क्क्याङ् नुरिक् मे़त्तुसिरो हे़क्क्याङ् मे़ल्लुङ् हुङुआङ् खे़ङ्हाॽ चोःक्युम्भो पिरुसिरो, खे़ब्याङ् उनाहुरिबा के़रे़क् ये़न्नो खुने़ॽ खे़ङ्हाॽ कुयुसिरो॥ 10 करसाङ् खे़ङ्हाॽरे़ खुने़ॽ कुदक्ले़ङ्वाओ पिफ्युङ् मे़जोगुरो, हे़क्क्याङ् कुसेसे याम्साम्मिन् कुनिङ्वाॽ तुगे़र मे़याःन्दुरो॥ कल्ले़चोगुल्ले़ खुने़ॽ खे़ङ्हाॽरे़ खुन्छिॽ निङ्मि पोःक्खे़रो, खम्ब्याङ् खुने़ॽ आबाङे खे़ङ्हाॽनु थक्ते़रो॥ 11 खे़ङ्हाॽरे़ यहवे दाङ्बे़ल्ले़ कुसे़वारोबा मोसाःल्ले़ कुये़न्निन् नु कुमनाहाॽ निङ्वाॽ मे़इःत्तुसिरो, हे़क्क्याङ् अक्खेलॽरिक् मे़अःक्ते़रो, “मोसाःन्नु सोरिक् मे़ल्लुक्कम्बा कुइसिक् वरःङ्ङोलाम् इस्राइलिहाॽ के़लःप्पा के़भे़प्पे़न् आत्ति वाॽबे? खुने़ॽ कुमनाहाॽनु वाॽसे़ सेसेमाङ् के़बाङ्बे़न् आत्ति वाॽबे? 12 मोसाःल्ले़ कुहुक्किन् फोःक्खुल्ले़ मुक्साम् ओसेःन्दाङ् के़जोक्पे़न्, वरःङ्ङिन् खुन्छिॽ तगि ने़त्छिलक्को के़भःङ्बे़न्, सदादिङ्ले़ लागि कुमिङ् के़दिःप्पा के़जोक्पे़न् आत्ति वाॽबे? 13 वरःङ्ङिल्ले़ कुसिगाङ्लाम् खे़न्हाॽ लाम्गे़लोबे़न् आत्ति वाॽबे?” खे़ङ्हाॽग मुरे़क् खारे़क्पा ये़ःङ्घादे़न्नो के़लोःक्पा, आफाल्ले़आङ् खुन्छिॽ लाङ् मे़न्दोःक्नाबा अन्हाॽ हे़क्के मे़लॽरो॥ 14 पित्हाॽ थक्साहाॽ सेःङ्घाओ चामे़राम्लो, हे़क्केलॽरिक्के यहवे दाङ्बे़ल्ले़ कुयाम्साम्मिल्ले़ खे़ङ्हाॽ नाःम्सिङ्मा पिरुसिरो॥ खे़म्भलॽरिक्के खुने़ॽ आबाङे कुमिङ्ङे़न् मिमिदिङ् चोःक्मारे़ लागि खुने़ॽ कुमनाहाॽ लाम्लोसुसिरो॥ कुभाॽरे़ लागि पेलिगे़न् तुवा 15 साङ्ग्राम्पेदाङ्लाम् ओमे़त्ते़ॽओ, हे़क्क्याङ् के़रे़क्नुःल्ले़ केःम्बा नु सेसेदे़न् हे़क्क्याङ् मिमिदिङ्गे़न् हाङ्युक्नालाम्बा यो ओमये़ॽओ॥ खे़ने़ॽ के़सिक्सम्मान् नु के़मुक्साम्मिन् आत्ति पेबे? खे़ने़ॽ के़नःम्नःम् लॽमान् नु आनिगे याप्मि लुङ्माॽ के़दुक्ते़बान् आत्ति वाॽबे? 16 कर खे़ने़ॽग आनिगे पानुदिङ् पाने़रो, आनिगे थाःक्थे़बा अब्राहाम नु इस्राइलरे़ याप्मि मे़न्दाःक्तिगे़न्छाङ्, यहवे दाङ्बाए, खे़ने़ॽग आनिगे पानुदिङ् पाने़रो, खे़ने़ॽ के़मिङ्ङे़न् उनाहुरिआङ्धोए आनिगे के़धे़ॽबारो॥ 17 यहवे दाङ्बाए, खे़ने़ॽ के़माराम्मोलाम् थेआङ् आनिगे ताप्के़बे़ॽबा याप्मि के़जोःक्पाबे? हे़क्क्याङ् खे़ने़ॽ मिङ्सो इङ्धाङ् मे़म्बिमारे़ लागि थेआङ् आनिगे निङ्वान् पान् मे़ङ्घे़म्नाबा के़जोगुबाबे? खे़ने़ॽ के़से़वारोबाहाॽरे़ लागि, के़लक्के़घोबा आबाङे के़सुवाङ्हाॽरे़ लागि नुःक्खे़ॽओ॥ 18 खे़ने़ॽ के़सेसे मनाहाॽरे़ सप्फारे़ लागिरक् के़सेसेदे़न्निन् लक् मे़घोसुरो, कर आल्लोग आनिगे निङ्मिहाॽरे़ खे़न् खाप्पुथ्यःङ् मे़जोगुरो॥ 19 उनाहुरिआङ्धोए आनिगे़ग खे़ने़ॽ के़मनादिगे़रो, कर खे़ने़ॽ आनिगे सम्धाङ् युक् मे़न्जोःक्के के़वाॽरो, आनिगे़ग खे़ने़ॽ के़मिङ्ङोलाम् मे़न्उःत्ते वयिगे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.