यसैया 62 - लिम्बु1 सियोनबा साम्योनिमान् तानाम्मिन् ओःप्पा हे़क्के मे़न्ओःत्ते थारिक् यरुसले़ःम्बा से़न्लप्पिन् मिजोत् हे़क्के हुरुरु तिःत्ताङ् युङ्ल मे़न्निए थारिक् खे़ल्ले़ कुलागि आङ्गाॽ स्वाःत् मे़युङ्आल्लो, खे़ल्ले़ कुलागि आङ्गाॽ चक्मे़न्लॽए तुवा चोगुङ्लो॥ 2 इक्सादिङ् खाम्बेःक्मोबा के़रे़क् मे़न्छाम् सुवाङ्हाॽरे़ खे़ने़ॽ के़साम्योनिमान् हे़क्क्याङ् के़रे़क् हाङ्हाॽरे़ खे़ने़ॽ के़हाङ्वा के़माङ्वान् मे़निसुरो, खे़म्ब्याङ् यहवे दाङ्बे़ल्ले़ आबाङे के़वाःत्ते़बा कुसङ् मिङ्ङिल्ले़ खे़ने़ॽ के़उःत्लो॥ 3 खे़ने़ॽ यहवे दाङ्बे़ल्ले़ कुहुक्को मिमिदिङ्ले़ तिच नु खे़ने़ॽ के़निङ्वाॽफुमाङ्ङिल्ले़ कुहुक्को लत्छा हाङ् तिवाजो के़बोङ्लो॥ 4 खे़ने़ॽ याम्मो आभे़ल्ले़आङ् “लाप्मे़भुसुमा” के़मे़म्मे़त्ने़ल्लो, खे़ने़ॽ के़लाजेन् याम्मो आभे़ल्ले़आङ् “चिजि खक्खक् के़बोङ्बा” मे़म्मे़त्तुल्लो॥ कर खे़ने़ॽ “आङ्गाॽ खे़न्नु आनिङ्वाॽ त्ये़बा” के़म्मे़त्लो, खे़ब्याङ् के़लाजेन् “निङ्वाॽ त्ये़र मेःक्खिम् मे़मे़त्तुबा” मे़मे़त्तुरो॥ थेआङ्भे़ल्ले़ यहवे दाङ्बे़न् खे़ने़ॽनु कुनिङ्वाॽ त्ये़आङ् वाॽरो, हे़क्क्याङ् के़लाजेःल्ले़ कुलागि खुने़ॽ हिम्साबा कुइसिक् पोङ्लो॥ 5 नालिगे़न् थाङ्बे़न्निल्ले़ लत्छा सिसागे़न् मे़न्छुमान् ते़न्धाम् मेःक्खिम् मे़त्तुरो, हे़क्केलॽरिक्के खे़ने़ॽ के़स्साहाॽरे़ खे़ने़ॽ मेःक्खिम् के़म्मे़त्लो॥ मेःक्खिम्साबे़न् कुमेःक्खिम्सामे़ल्ले़ कुलागि पसःत्सःत्लो, खे़म्भलॽरिक्के खे़ने़ॽ के़निङ्वाॽफुमाङ्ङिन् के़लागि सःत्लो॥ 6 आङ्गाॽ खे़ने़ॽ के़लुङ्धाक्हाॽओ इक्के़गोबाहाॽ युक्खुङ्सिङ्ङाङ् मे़युङ्लो॥ यरुसले़म के़युङ्बा मनासे! खे़ङ्हाॽग से़न्दिक् ले़न्दिक् स्वाःत् मे़न्युङ्ने़ल्लो, यहवे दाङ्बे़न् पेलि के़भाक्पासे, खे़निॽ मे़नाःम्मासिन्ने़ॽओ, 7 यरुसले़म ये़क्यक्किल्ले़ याम्मो चोगुआङ् के़रे़क् इक्सादिङ् खाम्बेःक्माल्ले़ खे़न् कुनारा फोमा के़लाॽबा ये़क्यक् मे़न्जोःक्के थारिक् खे़ङ्हाॽरे़ यहवे दाङ्बान् नाःम्सिङ्मा मे़म्भाःक्तुल्लो॥ 8 यहवे दाङ्बे़ल्ले़ लत्छा यम्बा माङ्हुप् चोगुआङ् वाॽरो हे़क्क्याङ् खुने़ॽ आबाङे कुमुक्साम्मिल्ले़ खे़न् के़त्तुरो, “आल्लआङ्धो खे़ने़ॽ के़जाहाॽ के़निङ्मिहाॽ मे़बिआसिङ्ङिल्लो हे़क्क्याङ् वेॽ लाजेॽबा मनाहाॽरे़ खे़ने़ॽ के़जे़ल्ले़क्सेॽ थिन् मे़ङ्घोसुन्लो॥ 9 कर आत्तिन्हाॽरे़ याॽरिःम्बा मे़हेॽरुआङ् कुजा मे़सुप्सु, खे़ङ्हाॽरे़ खे़न् कुजान् मे़जरो, हे़क्क्याङ् यहवे दाङ्बे़ल्ले़ कुनारा मे़भोसुरो॥ खे़ब्याङ् आत्तिन्हाॽरे़ चे़ल्ले़क्सेःन् मे़भुक्खु, खे़ङ्हाॽरे़ आङ्गाॽ आसेसेहिम् लक्खुम्हाॽओ खे़न् मे़धुङुरो॥ 10 “यरुसले़ःम्बा मनासे, ये़क्यक्कोलाम् लःन्दे़म्मे़ॽआङ् पेगे़म्मे़ॽओ हे़क्क्याङ् खे़निॽ के़नुःङ्बा के़दाबा आमनाहाॽरे़ लागि लत्छा लाम् चोगे़म्मे़ॽओ! लाम्धिक् यारिप् चोगे़म्मे़ॽओ, खे़म्मोबा लुङ्हाॽ खे़त्ताम्मे़ॽओ! लत्छा मिक्सेःन्धिक् लेःत्ताम्मे़ॽओ हे़क्क्याङ् के़रे़क् मे़न्छाम् सुवाङ्हाॽरे़ खे़न् मे़निसुररो॥ 11 यहवे दाङ्बे़ल्ले़ कन् इङ्घङ्ङिन् के़रे़क् लाजेॽओ हाक्तुसिरो, इस्राइलबा मनाहाॽ मे़त्ते़से़ॽओ, खे़निॽ से़न्लप्दाङ्बे़न् से़ःप्से़ युर पत्लो, ‘ओमत्ते़म्मे़ॽ, खुने़ॽ युःल्ले़ कुधुम्घोन् खुने़ॽनु सोरिक् युरुर पत्लो॥’” 12 खे़निॽग “यहवे दाङ्बे़ल्ले़ कुसेसे मनासिरो,” हे़क्क्याङ् “यहवे दाङ्बे़ल्ले़ थे़ॽरुसिबा सुवाङ्” के़म्मे़त्तिरो॥ यरुसले़ःम्मिन् “निङ्वाॽफुमाङ्ङिल्ले़ लुङ्माॽ तुक्तुबा ये़क्यक्” हे़क्क्याङ् “लाप्मे़म्भुसुम्मा ये़क्यक्” मे़मे़त्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.