यसैया 61 - लिम्बुचोःक्युम्भो खोमा सुनाइङ् 1 यहवे दाङ्बा निङ्वाॽफुमाङ्ङिल्ले़ कुयाम्साम्मे़न् आङ्गाॽ आसम्धाङ् वाॽरो, थेआङ्भे़ल्ले़ याङ्गे़साॽबाहाॽ सुनाइङ् इङ्भोमासिरे़ लागि यहवे दाङ्बे़ल्ले़ आङ्गाॽ सेःन्दाङ्ङाङ् वाॽरो॥ निङ्वाॽ के़दुक्पाहाॽरे़ खुन्छिॽ याम्साम्मिन् वेःम्मारे़ लागि, पुङ्लाहिम्मो साक्पा के़धाबाहाॽ ले़प्मासिरे़ लागि खे़ब्याङ् इघेःङ्ङो के़धाबाहाॽ चोःक्युम्भो पिमासि उवा चोःक्मारे़ लागि खुने़ॽ आङ्गाॽ पाङ्घाङ्ङाङ् वाॽरो॥ 2 यहवे दाङ्बे़ल्ले़ कुमनाहाॽ से़ःप्मासि हे़क्क्याङ् निङ्मिहाॽ हारि चाःप्मासि ये़म्मिन् त्ये़आङ् वाॽ फाॽआङ् उवा चोःक्मारे़ लागि खुने़ॽ आङ्गाॽ पाङ्घाङ्बारो॥ मे़रिङ् के़धक्पा के़हाःप्पा के़जिःङ्बाहाॽ आःन्छिङ्मा पिमासि फाॽआङ् आङ्गाॽ पाङ्घाङ्बारो॥ 3 सियोन ये़क्यक्को मे़रिङ् के़धक्पाहाॽ खाप्पुःल्ले़ कुले़क्वा पघे़म् के़घे़म्बा तिच खुने़ॽ पिरुसिरो, मे़रिङ् थक्मारे़ कुले़क्वा सःप्मा एःप्मारे़ हाङ्वामुॽइ पिरुसिरो, निङ्साङ् के़होप्पाहाॽ नाराफोमा साम्लो पिरुसिरो, खुन्छिॽ साम्योनिमाओ खे़ङ्हाॽग यहवे दाङ्बे़ल्ले़ आबाङे कुमिमिदिङ्ले़ लागि लेःत्तुसिआङ् वये़बा यम्बा यहिबा सिङ्बुङ् कुइसिक् मे़बोङ्लो॥ 4 खे़ङ्हाॽरे़ तगिबा पाङ्यक्हाॽ याम्मो मे़से़त्तु मे़जोगुरो, के़यम्बा के़लुःम्बा ते़न्हाॽ याम्मो मे़जोगुरो, यरिक् ये़म्माङ्धो के़लुःम्बाआङ् के़ने़बा ये़क्यक्हाॽ खे़ङ्हाॽरे़ याम्मो मे़से़त्तु मे़जोगुरो॥ 5 आमनासे, वेॽ लाजेॽलाम् युङ्से़ के़दाहाॽरे़ खिनिॽ के़मे़ल्लुक् के़मे़ःन्दाहाॽ चामे़राम्सुसिरो, हे़क्क्याङ् वेॽ लाजेॽबा मनाहाॽरे़ खिनिॽ के़इक्ताप् हे़क्क्याङ् के़जे़ल्ले़क्सेॽ इक्को याःम्बक् मे़जोगुरो॥ 6 हे़क्क्याङ् खिनिॽ यहवे दाङ्बाओ से़वा के़जोःक्पा निङ्वाॽफुसाम्बा के़म्मे़त्तिरो, खिनिॽ आनिॽ निङ्वाॽफुमाङ्ङिल्ले़ कुसे़वारोबा फाॽआङ् मिङ् के़म्वाःत्तिरो॥ मे़न्छाम् सुवाङ्हाॽरे़ खुन्छिॽ याङ्साकुन्धेन् खिनिॽ के़जाम्लो, खे़ब्याङ् खे़ङ्हाॽरे़ खुन्छिॽ याङ्साकुन्धेओए खिनिॽ ने़बो पोरो॥ 7 खिनिॽ नुःम्मासिमा नु कुनामे़न्छाॽ पाःन्हाॽ आल्ल नुबे़रो, खिनिॽ आबाङे लाजेॽओ मिङ्सो इङ्धाङ् नु याङ्साकुन्धेन् ने़त्छिले़ङ् यारिक् यरिक् पोङ्लो खे़म्ब्याङ् खिनिॽ सःप्मा एःप्मे़न् आभे़ल्ले़आङ् मे़नुप्ने़ल्लो॥ 8 यहवे दाङ्बे़ल्ले़ पाःत्तुरो, “आङ्गाॽ कुदोःप्मा खासे़न्निन् आसिराॽ थाङ्लो, मना तुक्खे चाःप्मा नु कुॽइभे़म्मे़न् आङ्गाॽ चिःत्तुङ्लो॥ नसाःन्साबा पोङ्ङाआङ् आमनाहाॽ थुम्घो पिरुङ्सिङ्लो, हे़क्क्याङ् खे़ङ्हाॽनु लत्छा नुप्मे़न्दिङ् माङ्हुप् चोगुङ्लो॥ 9 मे़न्छाम् सुवाङ्हाॽरे़ खुन्छिॽ लुम्मो खे़ङ्हाॽरे़ खुन्छिॽ साहाॽरे़ मिङ् तिःत्लो॥ खे़ङ्हाॽ आङ्गाॽए मुॽइसाम् पिरुङ्सिङ्बा फाॽआङ् खे़ङ्हाॽ के़निबा के़रे़क्ले़ कुसिङ् मे़निःत्तुरो॥” 10 आङ्गाॽ यहवे दाङ्बाओ साॽरिक् सःत्तारो, आनिङ्वाॽफुमाङ्ङो आयाम्साम्मिन् साॽरिक् सःत्लो॥ थेआङ्भे़ल्ले़ निङ्वाॽफुसाम्बान् हे़क्के मेःक्खिम्साबे़ल्ले़ कुधे़गेःक्किन् चोःक्तुबा हे़क्के, हे़क्क्याङ् मेःक्खिम्सामे़न् आबाङे साम्म्याङ् युप्पा वाःत्छिङ्बा हे़क्के खुने़ॽ से़न्लप्ले़न् चाङ् चाक्ताङ्ङाङ् वाॽरो, हे़क्क्याङ् साम्योनिमा चाङ्ङिल्ले़ ते़प्ताङ्ङाङ् वाॽरो॥ 11 थेआङ्भे़ल्ले़ खाम्बेःक्माल्ले़ सिङ्सेॽ लिङ्ल याःन्दुरो, हे़क्क्याङ् सिङ्सेॽ इक्किल्ले़ याॽरिःम्बा लिङ्ल चोगुरो, हे़क्केलॽरिक्के यहवे दाङ्बा निङ्वाॽफुमाङ्ङिल्ले़ साम्योबा नु नाराफोमा पाःन्हाॽ के़रे़क् मे़न्छाम् सुवाङ्हाॽरे़ खुन्छिॽ तगि नावागे़न् चइःत् चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.