यसैया 60 - लिम्बुसियोन्ले़ कुमिमिदिङ् 1 यरुसले़म के़युङ्बा मनासे, पोगे़म्मे़ॽआङ् नाम् कुइसिक् ओःत्ताम्मे़ॽओ, यहवे दाङ्बे़ल्ले़ कुमिमिदिङ्ङिन् खिनिॽ सम्धाङ् ओःत्ते़आङ् पत्लो! 2 इक्सादिङ् खाम्बेःक्मान् नु वेॽसमा मे़न्छाम् सुवाङ्हाॽ खामाक्मे़ल्ले़ सुःप्तुसिरो, कर खिनिॽ सम्दाङ् यहवे दाङ्बे़ल्ले़ कुओःत्तिन् ओःत्लो, खुने़ॽ कुहाङ्वा कुमाङ्वान् खे़ने़ॽनु वाॽरो॥ 3 इक्सादिङ् खाम्बेःक्मोबा मे़न्छाम् सुवाङ्हाॽ खे़ने़ॽ के़ओःत्तिओ मे़दारो हे़क्क्याङ् हाङ्हाॽ खे़ने़ॽ कुसङ् के़ये़न्निल्ले़ फिर्लि के़ले़क्पा ओःत्तिओ मे़दारो॥ 4 के़मिक्के़न् हन्दे़ॽआङ् के़रे़क् पिसाङ् ओमे़त्ते़ॽओ, खे़ङ्हाॽ के़रे़क् मे़भुङ्सिङ्ङाङ् खे़ने़ॽओ मे़दारो॥ खे़ने़ॽ के़स्सा ये़म्बित्छाहाॽ माःङ्घालाम् मे़दारो, हे़क्क्याङ् खे़ने़ॽ के़स्सा मे़न्छुमाहाॽ अङे़ःक्वा कुसिङ् हुक्को मे़बक्खु मे़दारुसिरो॥ 5 खे़ब्याङ् खे़ने़ॽ कन् के़निसुआङ् के़ओःप्पा के़बोङ्लो, हे़क्क्याङ् खे़ने़ॽ के़सःत्ताङ् के़निङ्वाॽ पदादारो॥ वरःङ्ङोबा याङ्साकुन्धेन् खे़ने़ॽ ले़प्साङ् मे़दारुरो, इक्सादिङ् खाम्बेःक्कोबा मे़न्छाम् सुवाङ्हाॽरे़ खुन्छिॽ याङ्साकुन्धेहाॽ खे़ने़ॽओ मे़दारुरो॥ 6 उमे लुप्हाॽरे़, मिध्यान नु एप्पा लाजेॽबा कक् के़गुबा उमेहाॽरे़ खे़ने़ॽ के़लाजेन् मे़धिम्सुरो॥ सेबा लाजेॽबा के़रे़क् मनाहाॽरे़ यहवे दाङ्बे़ल्ले़ कुनारा मे़भोसुर साम्म्याङ् नु साङ्सिङ् सुक्पा मे़भे़त्तुआङ् मे़भे़न्लो॥ 7 केदारबा के़रे़क् मे़ल्लुक् मे़ःन्दालुप्हाॽ खे़ने़ॽओ मे़जुम्लो, नाबायोतबा के़रे़क् मे़ल्लुक्हाॽरे़ खे़ने़ॽ से़वा के़म्मे़त्लो, खे़ङ्हाॽ सिदुङ्जभा हे़क्के खुने़ॽओ ले़त्ति तोःम्मादे़न्नो ताःक्मा यारुसिबा मे़बोङ्लो, खे़ब्याङ् यहवे दाङ्बे़ल्ले़ खुने़ॽ कुहिम्मे़न् आल्लसाङ् यरिक् मिमिदिङ्बा चोगुरो॥ 8 खाॽमित् कुसिङ् के़बे़बा के़दाबा हे़क्क्याङ् पुत्तुःक्के हे़क्के खे़ङ्हाॽरे़ खुन्छिॽ हाप्पो के़बे़बा कन् हाःप्पे? 9 कुत्चाॽए वागप्खाम्मो के़युङ्बाहाॽरे़ खुने़ॽ ओमे़मे़त्तुरो, तगि ले़ङ्हङ् के़जोःक्पा यम्बा वालाधाहाॽ मे़ये़प्लो॥ यहवे दाङ्बा खे़ने़ॽ के़निङ्वाॽफुमाङ्ङिल्ले़ लागि, इग्र इस्राइलबा सेसे निङ्वाॽफुमाङ्ङिल्ले़ कुमिङ्सो इङ्धाङ्ले़ लागि खे़ङ्हाॽरे़ खे़ने़ॽ के़स्सा ये़म्बित्छा मे़न्छुमाहाॽ खुन्छिॽ साम्म्याङ् युप्पानु सोरिक् माःङ्घा माःङ्घालाम् मे़दारुसिरो॥ थेआङ्भे़ल्ले़ खुने़ॽ कुहाङ्वा कुमाङ्वारे़ के़गाप्ते़आङ् वाॽरो॥ 10 यहवे दाङ्बे़ल्ले़ यरुसले़ःम्मिन् मे़त्तुरो, “वेॽ लाजेॽबा मनाहाॽरे़ के़लुङ्धाक्किन् याम्मो मे़से़त्तुरो, हे़क्क्याङ् खे़ङ्हाॽरे़ खुन्छिॽ हाङ्हाॽरे़ खे़ने़ॽ से़वा के़म्मे़त्लो॥ आङ्गाॽ आसाक्के़न् पोगे़ल्ले़ खे़ने़ॽ हिप्ने़रो, हे़क्क्याङ् आङ्गाॽ आलुङ्माॽ स्याःत् लॽमो खे़ने़ॽ लुङ्माॽ तुक्ने़रो॥ 11 खे़ने़ॽ के़ये़क्यक्कोबा यम्बा लाम्धेःत्हाॽ आभे़ल्ले़साङ् हङ्बे़त् पत्लो, खे़ने़ॽओ मे़न्छाम् सुवाङ्हाॽरे़ खुन्छिॽ याङ्साकुन्धेहाॽ ताःप्मारे़ लागि खुन्छिॽ हारिगे़दाबा हाङ्हाॽ ताःप्मासिरे़ लागि खे़न् लाम्धेःत्हाॽ से़न्दिक् ले़न्दिक् आभे़ल्ले़आङ् मे़न्छुबुन्लो॥ 12 कर खे़ने़ॽ इङ्धाङ् मे़म्बिमनाबा सुवाङ्हाॽ लत्छा मेःन्ने मे़मे़क्लो, खे़ङ्हाॽ खाप्पुथ्यःङ् मे़बोङ्लो॥ 13 “लेबनान लाजेॽबा हाङ्वा माङ्वान् खे़ने़ॽओ तारो— आःङ्हाॽ, सुक्पा सिङ्हाॽ नु साम्माङ्सिङ्हाॽ आङ्गाॽ आसेसे हिम्मिन् नुबा चोःक्मारे़ लागि मे़दारुरो, हे़क्क्याङ् से़वा मे़जोःक्काबा सेसे हिम्मिन् मिमिदिङ्बा चोगुङ्लो॥ 14 खे़ने़ॽ तुक्खे के़जाःप्पाहाॽरे़ खुन्छिॽ ये़म्बित्छासाहाॽ मे़नःम्सिङ्ङाङ् खे़ने़ॽओ मे़दारो, खे़ने़ॽ के़जिःप्पाहाॽ के़रे़क् के़लाङ्ङो अःक्खुम् मे़भन्छिङ्लो॥ खे़ङ्हाॽरे़ खे़ने़ॽ यहवे दाङ्बे़ल्ले़ कुये़क्यक्, इस्राइलबा सेसेबा निङ्वाॽफुमाङ्ङिल्ले़ कुये़क्यक् सियोन के़म्मे़त्लो॥ 15 “आल्लआङ्धो हाःत्ले़आङ् कुनामे़न्छाॽ के़मे़म्मे़त्ने़ल्लो, खे़ने़ॽ आत्तिल्ले़आङ् के़ल्ले़त्ने़न्लो— खे़ने़ॽ के़म्ले़रे़बा नु चिजि खक्खक् के़बोङ्बा ये़क्यक् के़म्बोङ्ने़ल्लो॥ खे़ने़ॽ यम्बा नु नुबा सदादिङ्ले़ लागि आसःत्सःप्पादे़न् चोःक्ने़रो॥ 16 हाङ्माल्ले़ कुनु के़धुङ्बा अङे़ःक्वा हे़क्केए मुक्साम्साबा हाङ्हाॽ नु मुक्के़गुबा मे़न्छाम् सुवाङ्हाॽरे़ खे़ने़ॽ चाहा के़जोःक्पा पाःन्हाॽओ के़निङ्वाॽ के़म्दा के़म्बिरो॥ आङ्गाॽ, यहवे दाङ्बा, के़से़न्लप्दाङ्बा, खे़ब्याङ् खे़ने़ॽ के़धे़ॽबा, हे़क्क्याङ् इस्राइलबा मुक्साम्दाङ्बाआ फाॽआङ् खे़ने़ॽ कुसिङ्गे़निःत्तुरो॥ 17 “आङ्गाॽ कासाःल्ले़ कुले़क्वा साम्म्याङ्, फे़न्जेल्ले़ कुले़क्वा युप्पा, सिङ्ङिल्ले़ कुले़क्वा कासा, हे़क्क्याङ् लुङ्ङिल्ले़ कुले़क्वा फे़न्जेॽ तारुङ् पिनिङ्लो॥ खे़ने़ॽ के़लाम्लोबाल्लो सनारुङ् तारुङ्लो, हे़क्क्याङ् खे़ने़ॽ के़हाङ्युक्पाओ साम्योनिमान् तारुङ्लो॥ 18 खे़ने़ॽ के़लाजेॽओ याम्मो आभे़ल्ले़आङ् खार्मे़न्दक् चोःक्मा पाःन्हाॽ खे़म्मे़दे़त्ने़न्लो, खे़ने़ॽ के़इःन्दोओ ताप्फे़ःम्बा नु मे़क्मासिमा खे़म्मे़दे़त्ने़ल्लो॥ लुङ्धाक्किल्ले़ ये़क्यक्किन् से़ःप्तुबा हे़क्के आङ्गाॽ खे़ने़ॽ ताङ्से़ःप्ने़रो, थेआङ्भे़ल्ले़ खे़ने़ॽ ताङ्से़ःप्ने़आङ् वाॽबाल्ले़ चोगुल्ले़ आनारा के़भोसुरो॥ 19 “आल्लआङ्धो ले़न्दिक् नाम्मिल्ले़ खे़ने़ॽ थोॽमा मे़बोङ्ने़न्लो, हे़क्क्याङ् से़न्दिक् लाबे़ल्ले़ खे़ने़ॽ थोॽमा मे़बोङ्ने़ल्लो॥ आङ्गाॽ यहवे दाङ्बान् सदादिङ्बा खे़ने़ॽ के़लागि ओःत्ति पोङ्ङारो, आङ्गाॽ आमिमिदिङ्ङिल्ले़ कुओःत्तिःल्ले़ के़धोॽरो॥ 20 खे़ने़ॽ के़नाम्मिन् आफाल्ले़आङ् मे़धाने़न्लो, हे़क्क्याङ् खे़ने़ॽ के़लाबे़न्नाङ् चुःक्पा मे़बोङ्ने़न्लो, आङ्गाॽ यहवे दाङ्बा के़निङ्वाॽफुमाङ्ङिन् सदादिङ्बा के़ओःत्ति पोङ्ङारो, के़मे़रिङ् थक्मा ये़न्निन् नुप्लो॥ 21 खे़ब्याङ् के़रे़क् के़मनाहाॽ साम्योबा मे़बोङ्लो, हे़क्क्याङ् खे़ङ्हाॽरे़ खुन्छिॽ लाजेन् सदादिङ्ले़ लागि मे़मे़त्छिङ्लो॥ आङ्गाॽ आमिमिदिङ् ओसेःन्धाङ् चोःक्मारे़ लागि, आङ्गाॽ खे़ङ्हाॽ सिङ्बुङ् कुइसिक् खे़प्मो आबाङे आहुक्किल्ले़ लेःत्तुङ्सिङ्बारो॥ 22 खे़निॽ लुम्मो सुःल्लिक् के़वाॽबाहाॽ हे़न्छिङ् मे़बोङ्लो, हे़क्क्याङ् के़रे़क्नुःल्ले़ चुक्पान् मुक्साम्साबा सुवाङ् पोङ्लो॥ आङ्गाॽ यहवे दाङ्बाआरो, खे़न् ये़म्मिन् ताःल्ले़ कन् पाःन्हाॽ हाराए चोगुङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.