यसैया 6 - लिम्बुयसैयाःल्ले़ निसुबा सुफो नु खोसुबा युक् 1 उज्जियाह हाङ्ङिन् मासिङ्बा ये़म्मो यहवे दाङ्बान् केःम्बा नु चाङ्जाङ्बा हाङ्युक्नाओ युक् चोःक्नु युङे़बा आङ्गाॽ निसुङ्॥ खुने़ॽ ते़रे़ के़बप्पा कुजाङ् तेःत्तिल्ले़ कुसुक्पे़ल्ले़ माङ्हिम्मे़न् सुःप्तुआङ् पत्छे़॥ 2 खुने़ॽ युङे़बाओनु थाःङ् पिसाङ् मि हे़क्के के़ओःप्पा तुक्सि तुक्सि खुन्छिॽ लाप् के़बप्पा सराफहाॽ मे़ये़बे़॥ ने़त्छि खुन्छिॽ लाप्पे़ल्ले़ खुन्छिॽ आबाङे नारान् मे़दे़प्तुआङ् पत्छे़, ने़त्छि खुन्छिॽ लाप्पे़ल्ले़ खुन्छिॽ अबाङे लाङ्हाॽ मे़दे़प्तुआङ् पत्छे़ॽ हे़क्क्याङ् ने़त्छि लाप्ले़ खे़ङ्हाॽ मे़बे़रे़र मे़बत्छे़॥ 3 हे़क्क्याङ् थिक्ले़ वेॽहाॽ अक्खे मे़त्तुसिर खे़ङ्हाॽ साम्मे़लोरे़रो— “मुक्साम्दाङ्बा यहवे दाङ्बे़न् सेसे, सेसे, सेसे चोक्लो, के़रे़क् इक्सादिङ् खाम्बेःक्मे़न् खुने़ॽ कुमिमिदिङ्ङिल्ले़ कुधिम् पोःक्खे़आङ् वाॽरो॥” 4 खे़ङ्हाॽरे़ खुन्छिॽ मिमिदिङ्गे़न् साम्मे़लोरे़बा इक्लाःल्ले़ चोगुल्ले़ माङ्हिम्मोबा लाम्धेःत्हाॽ नु पाङ्यक्हाॽ के़रे़क् यक्खे़, हे़क्क्याङ् माङ्हिम्मे़न् के़रे़क् मिःक्खुल्ले़ सधे़क् तिम्से़॥ 5 आङ्गाॽ पाःत्तुङ्, “आङ्गाॽग चिःत्ताङ्लक् स्याङ्लो! हे़क्क्याङ् आल्ल आङ्गाॽग मे़गाङ्बा पोःक्खे़ लॽरिक् अःक्ताङ्! थेआङ्भे़ल्ले़ आङ्गाॽग आम्ब्राःल्ले़ आसुत्थो पाःन्हाॽ पाःत्तुङ्, खे़ब्याङ् आसुत्थो पान् के़बाःप्पा मनाहाॽरे़ खुन्छिॽलुम्मो वाॽआ, हे़क्केसाङ् आङ्गाॽ हाङ्हाॽरे़आङ् खुन्छिॽ हाङ् मुक्साम्दाङ्बा यहवे दाङ्बान् आङ्गाॽ निसुङ्ङाङ् वाॽ॥” 6 खे़ब्याङ् खे़न् मि हे़क्के के़ओःप्पा सराफहाॽओ थिक्ले़ लाभिःत् थिक् याङ्सिङ्ङाङ् के़दिःप्पा मिघाङ्ग्रोःक्के़न् पक्खु हे़क्क्याङ् आङ्गाॽ वयाङ्बादे़न्नो पे़रे़भे़रे़॥ 7 खे़ल्ले़ खे़न् मिघाङ्ग्रोःक्के़ल्ले़ आम्ब्रान् चित्छु सुसुआङ् मे़त्ताङ्, “ओमे़त्ते़ॽ, कल्ले़ के़म्ब्राःन् सुसुआङ् वाॽ॥ आल्ल के़भे़न् याःम्बक्के़न् यहवे दाङ्बे़ल्ले़ लाःत्लाःत् खे़त्तुदेसु के़बिरे़ हे़क्क्याङ् के़लायोहाॽ मये़आङ् ले़प्मि पोःक्खे़॥” 8 खे़ब्याङ् यहवे दाङ्बान् अक्खे लॽरे़बा आङ्गाॽ खे़प्सुङ्, “आमनाहाॽरे़ खुन्छिॽलुम्मो इङ्घङ् के़साबा हात् पाङ्घुङ्बे! आनिॽ लागि हात् पेःक्पाबे?” हे़क्क्याङ् आङ्गाॽ मे़त्तुङ्, “आदाङ्बे, आङ्गाॽ पेःक्काॽ, आङ्गाॽ पाङ्घाङ्ङे़ॽओ॥” 9 हे़क्क्याङ् खुने़ॽ आङ्गाॽ मे़त्ताङ्लो, “ओःक्, पोगे़आङ् कन् पाःन्निन् आमनाहाॽ मे़त्ते़से़ॽओ, ‘खिनिॽ के़घे़प्सुम्साङ् कुसिङ् के़न्निःत्तुम्मिन्लो, खिनिॽ ओगे़मे़त्तुम्साङ् के़न्निसुम्मिन्लो॥’ 10 खे़ने़ॽ कन् मनाहाॽरे़ खुन्छिॽ निङ्वान् पाःन्मे़ङ्घे़म्मनाबा नु ने़क्खोन् के़धुङ्बा चोगे़ पिरे़से़ॽओ, हे़क्क्याङ् खुन्छिॽ मिक्के़न् ते़प्ते़ पिरे़से़ॽओ॥ मेःन्ने़भग्र खे़ङ्हाॽरे़ खुन्छिॽ मिक्किल्ले़ मे़निसुरो, खुन्छिॽ ने़भाक्किल्ले़ मे़घे़प्सुआङ् खे़ङ्हाॽरे़ खुनिॽ निङ्वाःल्ले़ कुसिङ् मे़निःत्तुरो, हे़क्क्याङ् याम्मो खे़ङ्हाॽ मे़नुःङ् मे़दाआङ् मे़वेःत्लो॥” 11 हे़क्क्याङ् आङ्गाॽ मे़त्तुङ्, “आदाङ्बाए, आक्खे़न् ये़म् थारिक् कन् याःम्बक्किन् आङ्गाॽ चोगुङ्बाबे!” हे़क्केःल्ले़ खुने़ॽ मे़त्ताङ्, “पाङ्जुम्हाॽ खाप्पुथ्यःङ् पोङ्ङाङ् मे़न्छाम् याप्मि मेःन्ने चिजि खक्खक् मे़म्बोङ्ङे थारिक् नु हिम्धाःङ्हाॽ मनामे़ःन्ने कुघाले़म् मे़म्बोङ्ङे थारिक्, हे़क्क्याङ् प्याङ्सिगे़न् इक्ताप्पोबा चाहाॽ खाप्पु थ्यःङ् पोङ्ङाङ् मे़म्मे़क्के थारिक्, 12 हे़क्क्याङ् यहवे दाङ्बे़ल्ले़ के़रे़क् मनाहाॽ माःङ्घा मे़म्बाङ् मे़न्देसे थारिक् खे़ब्याङ् के़रे़क् इस्राइल लाजेन् मुरे़क् खारे़क् पोङ्ङाङ् एःक्सादे़न् मे़म्बोङ्ङे थारिक् कन् याःम्बकिन् चोगे़ॽओ॥ 13 हे़क्क्याङ् इस्राइल लाजेॽओ थिबोङ्लक् यारिक्लक् मनाहाॽ मे़दाङ् मे़याःक्साङ् याम्मो खे़न् के़दाङ्बा के़याःक्पाहाॽ खाम्पु थ्यःङ् मे़जोगुसिरो॥ कर यहिबा इग्र के़साक्पा सिङ्बुङ्हाॽ आःप्मादे़मासाङ् कुमुःत्हाॽ युङ्याःक्काङ् खे़न् सिङ्मुःत्हाॽ याम्मो कुजःक् लिङ्धाङ्बा कुइसिक् खे़न् सिङ्मुःत्तिन् सेसे याॽरिःम्बा पोङ्ङाङ् याम्मो पोधाङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.