Biblia Todo Logo
Bib sou entènèt

- Piblisite -

यसैया 59 - लिम्‍बु


मनाहाॽरे़ खुन्‍छिॽ लायोल्‍ले़ आप्‍तिक्

1 खे़प्‍से़म्‍मो! यहवे दाङ्‌बे़ल्‍ले़ कुहुक्‍किन् खिनिॽ ताङ्‌से़ःप्‍मा मे़न्‍छुक्‍मना पोःक्‍खे़बा होप्‍लो, खुने़ॽ कुन्‍भाक्‍किन् खिनिॽ पेलि के़भाक्‍तुम्‍बे़न् खे़म्‍मा मे़न्‍छुक्‍मना पोःक्‍खे़बा होप्‍लो॥

2 खिनिॽ लायोल्‍ले़ चोगुल्‍ले़ खुने़ॽ कुनारान् खिनिॽलाम्‍बा थेःक्‍तुआङ् पत्‍लो हे़क्‍क्‍याङ् खुने़ॽ खिनिॽ के़जोगुम्‍बा पेलिन् मे़घे़प्‍सुन्‍लो, खिनिॽ लायोल्‍ले़ चोगुल्‍ले़ निङ्‌वाॽफुमाङ्‌लाम् लाःत्‍लाःत् के़बोक्‍खिरो॥

3 थेआङ्‌भे़ल्‍ले़ खिनिॽ हुक्‍किन् माक्‍खिल्‍ले़ नु खिनिॽ हुक्‍चोन् आप्‍तिक्‍किल्‍ले़ थिॽरुआङ् पत्‍लो, खिनिॽ मुराःल्‍ले़ इङ्‌ले़क्‍के पान् नु खिनिॽ ले़सोःप्‍पाल्‍ले़ ताप्‍फे़ःम्‍बा पान् पाःत्तुरो॥

4 नुबा नु कुदोःप्‍मा पोङ्‌मा आत्तिल्‍ले़आङ् निङ्‌वाॽ मे़जोगुन्‍लो, मनाहाॽरे़ खुन्‍छिॽ खासे़न्‍निन् इङ्‌ले़क्‍पा चोक्‍लो॥ खे़ङ्‌हाॽरे़ग ताप्‍फे़ःम्‍बा पाःन्‍हाॽओ निङ्‌वाॽ मे़बिरुरो हे़क्‍क्‍याङ् ताप्‍फे़ःम्‍बा पान् पोङ्‌लो॥

5 खे़ङ्‌हाॽरे़ग ताङ्‌बु असेःक्‍के़ल्‍ले़ कुधिःन्‍ने़न् मे़गुप्‍तुरो, हे़क्‍क्‍याङ् खाम्‍दाःक्‍पे़ल्‍ले़ कुइःन् मे़गे़सुरो॥ खे़ङ्‌हाॽरे़ मे़गुप्‍तुबा थिःन्‍ने़न् आत्तिन्‍हाॽरे़ मे़जःॽ खे़ङ्‌हाॽ के़रे़क् मे़सिररो, खे़ब्‍याङ् खे़न् हे़प्‍मे़ल्‍ले़ खे़म्‍मोनु असेःक्‍सा मे़लःन्‍लो॥

6 खे़ङ्‌हाॽरे़ खुन्‍छिॽ इःल्‍ले़ तेत्‍चाङ् फमा सुक्‍मे़दे़त्‍ने़न्‍लो, खे़ङ्‌हाॽरे़ मे़जोगुबा पाःन्‍हाॽरे़ आबाङे ते़प्‍सिङ्‌मा मे़न्‍छुक्‍ने़न्‍लो॥ खे़ङ्‌हाॽरे़ मे़जोगुबा याःम्‍बक्‍हाॽग लायोबा चोक्‍लो, हे़क्‍क्‍याङ् खार्मे़न्‍दक् याःम्‍बक् चोःक्‍मे़न् खुन्‍छिॽ हुक्‍को पत्‍लो॥

7 खे़ङ्‌हाॽ लायोबा याःम्‍बक् चोःक्‍मारे़ लागि मे़लोःक्‍लो, हे़क्‍क्‍याङ् खे़ङ्‌हाॽ कुदोःप्‍मा मनाहाॽरे़ खुन्‍छिॽ माक्‍खिॽ से़मा मे़जात्‍लो॥ खुन्‍छिॽ निङ्‌वाॽओ मे़इःत्तुबा पाःन्‍हाॽग लायोबा निङ्‌वाॽरो, लुङ्‌माॽ के़हिःम्‍बान् नु सिमा मे़क्‍मे़न् खुन्‍छिॽ लाम् पोङ्‌लो॥

8 खे़ङ्‌हाॽरे़ सनारुङ् लाम्‍मिन् कुसेःन् मे़न्‍निसुन्‍लो, हे़क्‍क्‍याङ् खुन्‍छिॽ माराम्‍मो कुदोःप्‍मा खासे़न् होप्‍लो॥ खे़ङ्‌हाॽरे़ खुन्‍छिॽ माराम्‍हाॽ पे़र्गे़क्-वर्गे़क् मे़जोगुआङ् ने़रो, खे़न् लाम्‍मो लाङ्‌गे़घेःक्‍पा आत्तिन्‍हाॽरे़आङ् तङ्‌मा सनारुङ्‌ङिन् कुसिङ् मे़न्‍निःत्तुन्‍लो॥


मनाहाॽ लायोलाम् मे़नुङ्

9 कल्‍ले़चोगुल्‍ले़ कुदोःप्‍मा खासे़न्‍निन् आनिॽलाम् माःङ्‌घा पोःक्‍खे़आङ् वाॽरो॥ साम्‌योबा पाःन्‍निल्‍ले़ आनिॽ सिॽमा आन्‍छुक्‍ने़न्‍लो आनिॽ खागे़ओःप्‍पा लाम्‍मिन् ओआमे़त्तुम्‍लो, कर के़रे़क् खागे़माक्‍पा चोक्‍लो॥ ओःत्तिःल्‍ले़ लाम्‍मिन् आहक्‍सुम्‍लो, कर माक्‍स्‍दिःङ्‌ग्‍याःप्‍पा खामाक्‍मो लाङ्‌आघेःक्‍लो!

10 मिक्‍फःम्‍बा मनान् कुसिङ् लुङ्‌धाक्‍किन् आसप्‍सुम्‍लो, कुमिक् के़होप्‍पा मनाहाॽ हे़क्‍के आबाङे लाम्‍मिन् आनिॽ ससप् ससप् लॽरिक् आसप्‍सुम्‍लो॥ युःन्‍छिक् कुसिङ् ले़न्‍दिक् मसेरा आनिॽ आदोक्‍लो, के़धुम्‍बाहाॽरे़ खुन्‍छिॽ लुम्‍मो कुसिवे़त् हे़क्‍के आलॽरो॥

11 आनिॽ के़रे़क् माःॽयुन् हे़क्‍के हागाःक् हागाःक् आलॽरो, हे़क्‍क्‍याङ् साप्‍पे़त्रुःक्‍मान् हे़क्‍के तुःक् तुःक् आलॽरो॥ आनिॽ कुदोःप्‍मा खासे़न् आगोःत्तुम्‍लो, कर आनिॽ आत्तिआङ् आङ्‌घोसुम्‍ने़न्, से़न्‍लप् खोमा लाम् आहक्‍सुम्‍लो, कर खे़न् आनिॽलाम् माःङ्‌घा वाॽरो॥

12 थेआङ्‌भे़ल्‍ले़ आनिगे फे़न्‌याःम्‍बक्‍हाॽ के़निमो यरिक् वाॽरो, हे़क्‍क्‍याङ् कल्‍ले़ आनिगे लायोल्‍ले़ कुदक्‍ले़ङ्‌वाओ तोःन्‍दि पिरुरो॥ आनिगे चोगुम्‍बे़बा ताप्‍फे़ःम्‍बा पाःन्‍निन् आनिगे निसुम्‍बे़रो, हे़क्‍क्‍याङ् आनिगे फे़न्‌याःम्‍बक्‍हाॽ ते़न्‍दिङ् चोगुम्‍बे़रो॥

13 यहवे दाङ्‌बे़ल्‍ले़ कुदक्‍ले़ङ्‌वाओ पिफ्‍युङ् चोःक्‍मा नु आनिगे अप्‍मा याःम्‍बक् चोगुम्‍बे़रो, निङ्‌वाॽफुमाङ्‌लाम् नुःक्‍खिगे़आङ् निङ्‌घुम् नु पिफ्‍युङ् चोगुम्‍बे़आङ् वयिगे़रो, खे़ब्‍याङ् आनिगे निङ्‌वाःल्‍ले़ पाःत्तुबा इङ्‌ले़क् पाःत्तुम्‍बे़आङ् वाॽरो॥

14 कल्‍ले़चोगुल्‍ले़ खासे़न्‍निन् एगाङ् ले़प्‍माङ् मे़घे़त्तुआङ् वाॽरो, हे़क्‍क्‍याङ् साम्‌योबा पाःन्‍निन् माःङ्‌घा पोःक्‍खे़आङ् वाॽरो, से़क्‍खान् माराम्‍मो तोःक्‍ते़आङ् वाॽरो, खे़ब्‍याङ् कुदोःप्‍मा निस्‍सेन् सिगाङ् लाःप्‍मा मे़सुक्‍ने़न्‍लो॥

15 से़क्‍खान् साॽरिक् सुःन्‍लो, हे़क्‍क्‍याङ् ताप्‍फे़ःम्‍बा याःम्‍बक् चोःक्‍मा के़ले़प्‍पाहाॽ सावागे़म्‍बे़ल्‍ले़ कुहुक्‍को मे़धारो॥ यहवे दाङ्‌बे़ल्‍ले़ कन् के़रे़क् पाःन्‍हाॽ निसुआङ् वाॽरो खे़ब्‍याङ् कुदोःप्‍मा खासे़न् होप्‍पाल्‍ले़ चोगुल्‍ले़ खुने़ॽ कुनिङ्‌वाॽ तुगे़आङ् वाॽरो॥


यहवे दाङ्‌बे़ल्‍ले़ कुमनाहाॽ से़ःप्‍तुसि

16 आत्तिन्‍हाॽआङ् मे़होःप्‍ले़त्‍छ फाॽआङ् खुने़ॽ निसुरो, हे़क्‍क्‍याङ् पाःन्‍दङ्‌साबा हाःत्ताङ् मे़होप्‍ते़बाल्‍ले़ चोगुल्‍ले़ साॽरिक् कुनिङ्‌वाॽ मये़रो॥ कल्‍ले़चोगुल्‍ले़ खुने़ॽ आबाङे कुमुक्‍साम्‍मिल्‍ले़ खे़ल्‍ले़ लागि से़न्‍लप् तारुरो, खे़ब्‍याङ् खुने़ॽए कुसाम्‌योबा याःम्‍बक्‍के़ल्‍ले़ खे़न् तक्‍तुरो॥

17 साम्‌योनिमान् खुने़ॽ सङ्‌बप्‍मोबा से़ःप्‍चाङ् हे़क्‍के चाक्‍खुरो हे़क्‍क्‍याङ् से़न्‍लप्‍पिन् थे़गेःक्‍को खुःङ्‌मनाबा ताङ्‌घुःक् कुइसिक् खुःक्‍खुरो॥ खुने़ॽ कुले़क्‌वा हुङ्‌मे़न् चाङ् कुइसिक् चाक्‍खुरो हे़क्‍क्‍याङ् सिक्‍सम्‍मे़न् हे़म्‍बारि कुइसिक् हे़प्‍सिङ्‌लो॥

18 खे़ङ्‌हाॽरे़ मे़जोगुबा कुइसिक् खुने़ॽ खे़ङ्‌हाॽ कुले़क्‌वा नुःक्‍तु पिरुसिरो, कुदक्‍ले़ङ्‌वाओ के़बोःक्‍पाहाॽरे़ खुन्‍छिॽ सम्‍धाङ् कुसाक्‍के़न्, हे़क्‍क्‍याङ् खुने़ॽ कुनिङ्‌मिहाॽ सम्‍धाङ् कुले़क्‌वा! वागप्‍खेःङ् लाजेॽओ के़युङ्‌बाहाॽरे़ मे़जोगुबा हे़क्‍केए खुने़ॽ कुले़क्‌वा नुःक्‍तु पिरुसिरो॥

19 नाम्‍धा पिसाङ्‌बा लाजेॽओ के़युङ्‌बा मनाहाॽरे़ यहवे दाङ्‌बे़ल्‍ले़ कुमिङ्‌ङिन् इङ्‌धाङ् मे़बिरुरो, हे़क्‍क्‍याङ् तॽइ नाङ्‌गे़न् ले़प्‍साङ्‌लाम् खे़ङ्‌हाॽरे़ खुने़ॽ मिमिदिङ् मे़बिरुरो॥ थेआङ्‌भे़ल्‍ले़ खुने़ॽ के़गुङ्‌बा के़युबा च्‍वाःत् हे़क्‍के युरो, खे़न् के़गुङ्‌बा के़युबा च्‍वाःत्‍हाॽ यहवे दाङ्‌बे़ल्‍ले़ कुसक्‍माःल्‍ले़ सुःन्‍दु युरुरो॥

20 यहवे दाङ्‌बे़ल्‍ले़ पाःत्तुरो, “आबाङे लायोलाम् के़नुःङ्‌बा याकुबरे़ कुमुॽइदाङ्‌साहाॽरे़ लागि के़धे़ॽबे़न् सियोनओ युआर पत्तारो॥

21 “हे़क्‍क्‍याङ् खे़निॽनु आङ्‌गाॽ आमाङ्‌हुप्‍पिन् आम्‍भा कन् पोङ्‌ॽ॥ आङ्‌गाॽ आयाम्‍साम्‍मिन् खे़निॽ सम्‍धाङ् वाॽ, हे़क्‍क्‍याङ् आङ्‌गाॽ आबाःन्‍जाःक्‍किन् खे़निॽ मुराओ केःत्तुङ् पिनिङ्‌ङाङ् वाॽ, खे़न् आबाःन्‍जाःक्‍किन् खे़ने़ॽ के़म्‍ब्राओलाम्, खे़ने़ॽ के़स्‍सा के़एहाॽरे़ खुनिॽ मुराओलाम्, हे़क्‍क्‍याङ् खे़ङ्‌हाॽरे़ खुन्‍छिॽ साहाॽरे़ मुराओलाम् आल्‍लआङ्‌धो सदादिङ्‌ले़ लागि आभे़ल्‍ले़आङ् मे़माने़ल्‍लो॥”

© 2009, 2023, Wycliffe Bible Translators, Inc. All rights reserved.

Wycliffe Bible Translators, Inc.
Swiv nou:



Piblisite