यसैया 58 - लिम्बुसे़क्खाबा तःक्ने़त् 1 यहवे दाङ्बे़ल्ले़ पाःत्तुरो, “थुत्थुरिःप्पाल्ले़ यम्बा कुइक्लान् कुइसिक् खे़निॽ साॽरिक् यम्बा इक्लाओ अःक्ते़म्मे़ॽओ! आङ्गाॽ आमना याकुबरे़ कुमुॽइदाङ्साहाॽरे़ खुन्छिॽ लायोन् मे़त्ताम्सिम्मे़ॽओ! 2 थेआङ्भे़ल्ले़ खे़ङ्हाॽरे़ आङ्गाॽ थिक्याःन्धक् मे़गोःत्तारो, आत्तिन् पाःन्निन् नुबा चोक् खे़न् के़जोःक्पा नु आबाङे निङ्वाॽफुमाङ्ङिल्ले़ कुइङ्जाङ्ङिन् मे़म्भेःम्मनाबा कर आङ्गाॽ आलाम्मिन् नाःप्मा कुसिङ् निःप्मा निङ्वाॽ के़जोःक्पा सुवाङ् हे़क्तङ्बाए खे़ङ्हाॽ निमे़दे़त्लो॥ खे़ङ्हाॽरे़ कुदोःप्मा निङ्वाॽ निःन्धोरे़ पाःन्हाॽ मे़नाःक्कारो, हे़क्क्याङ् निङ्वाॽफुमाङ्ङिन् खे़ङ्हाॽरे़ खुन्छिॽ निःत्ताङ् तार फाॽआङ् खुन्छिॽ निङ्वाॽ इगेःक् लॽबा निदे़त्लो॥ 3 कर खे़ङ्हाॽरे़ मे़बाःत्तुॽ, ‘आनिगे तःक्ने़त् युङिगे़रो, हे़क्क्याङ् खे़निॽ थेआङ् के़न्निसुम्मिम्बाबे? आनिगे नःम्नःम्बा पोःक्खिगे़रो, हे़क्क्याङ् खे़निॽ थेआङ् निनि के़न्लाप्तुम्मिम्बाबे?’ हे़क्केसाङ् खिनिॽ तःक्ने़त् के़युङिबा ये़न्नो खिनिॽ आबाङे चोःक्मा निङ्वाॽ के़जोगुम्बा पाःन्निन्लक् के़जोगुम्लो॥ खे़म्ब्याङ् खिनिॽ याःम्बक् के़जोःक्पा के़बिबाहाॽ के़रे़क् के़घुम्सुम् के़से़रुम्सिम्लो॥ 4 खिनिॽ तःक्ने़त् के़युङिबा ये़न्नो खेमा नु थक्माओ पेःक्लो हे़क्क्याङ् साॽरिक् ताप्फे़ःल्लिक् के़मे़त्तासिर हुक्के़याक्कासिरो॥ खिनिॽ आइन् हे़क्तङ्बा तःक्ने़त् के़युङिआङ् खिनिॽ इक्लान् साङ्ग्राम्पेदाङ्ङो खे़म्दे़त् फाॽआङ् निङ्साङ् चोःक्मा के़न्छुक्तुम्मिल्लो॥ 5 थे आङ्गाॽ सेगुङ्बा तःक्ने़त्तिन् हाबा अक्तङ्बारक्पि? मनान् थे थिक्याःन्लक् नःम्नःम्बा पोङ्बाबि? थे मिक्लान् कुसिङ् थे़गेक्पान् अःक्खुम् मे़प्मा हे़क्क्याङ् सिःङ्गो चाङ् चाङ्मा नु खाप्पु हुःत्छिङ्माआङ्लक् नःम्नःम् आबोङ्बाबि? थे हाबा कन् खे़निॽ तःक्ने़त् युङ्मा नु यहवे दाङ्बे़ल्ले़ ताःक्तुबा ये़न् फाॽआङ् के़बाःत्तुम्बि? 6 “मे़न्वाॽमनाबा खासे़न्निल्ले़ इघेःङ्हाॽ फाःङ्मा, खे़ःप्सिङ्ङिल्ले़ थाक्पान् फाःङ्मा, तुक्खे मे़जाःत्तुसिबा मे़युक्तुसिबाहाॽ चोःक्युम्भो पिमासि, के़रे़क् खे़ःप्सिङ्हाॽ ए़ङ्मारे़ लागि आङ्गाॽ सेगुङ्बा तःक्ने़त्तिन् हाबा कन् मेःम्बि? 7 कप्मनाबा चामा कुजाहाॽ कुसिक् के़लाःक्पाहाॽ पिमासि, हे़क्क्याङ् हिम्धाःङ् मे़ङ्गप्मनाबा याङ्गे़साॽबाहाॽ युङ्मादे़न् पिमासि— ले़क्चाबुधुक् के़वाॽबाहाॽ निमासिआङ् तेत् चाक्मासि, खे़ब्याङ् आबाङे फुॽनुसाॽ सःङ्हाॽलाम् चिङ्सिङ्मा मेःन्, मेःम्बि? 8 खे़ब्याङ् खे़निॽ ओःत्तिःन् तानाम् हे़क्के ओःत्लःन्लो, हे़क्क्याङ् खे़निॽ के़गाःन्दिबा याङ्घेःक्हाॽ हाराए नुॽरो॥ खिनिॽ साम्योनिमाल्ले़ लाम् के़लोसिरो, हे़क्क्याङ् यहवे दाङ्बे़ल्ले़ कुहाङ्वा कुमाङ्वाःल्ले़ एगाङ्लाम्बा खिनिॽ ताङ्गे़से़ःप्तिरो॥ 9 खिनिॽ पेलि के़भाक्तुम्मिल्ले़ खुने़ॽ नुगप् के़बिरिरो, खे़निॽ पाःन्गे़साःत्तुम्मिल्ले़ खुने़ॽ पाःन्गे़साःत्तिरो॥ “खिनिॽ मना तुक्खे चाःप्मा, मना कुनामे़न्छाॽ मे़प्मा, हे़क्क्याङ् मुराओलाम् के़लःम्बा के़रे़क् फे़न् पाःन्हाॽ के़ले़रुम् के़देसुम्ने़भग्र, 10 कुसिक् के़लाःक्पे़न् खिनिॽ कुजा के़बिरुम्ने़भग्र हे़क्क्याङ् के़साक्पा के़दुम्बाहाॽ के़भाॽरुम्सिम्मने़भग्र खिनिॽ ओःत्तिःन् खामाक्मालाम् ओःत्लो, हे़क्क्याङ् खिनिॽ खिरिबा खामाक्मे़न् ले़न्दिक्पा खाओःप्मान् कुइसिक् पोङ्लो॥ 11 यहवे दाङ्बे़ल्ले़ खिनिॽ चक्मे़ल्लॽए लाम्गे़लोसिरो, हे़क्क्याङ् साॽरिक् नाम्गे़लाःङ्बा ते़न्हाॽओआङ् नुबा पाःन्हाॽरे़ खे़निॽ निङ्वाॽ तार चोगुरो॥ खे़म्ब्याङ् खे़निॽ ये़प्पा लुङ्सिहाॽ के़धुम्बा चोगु के़बिरिरो, च्वाःत्तिल्ले़ पयो योरुर वारङ्मनाबा सिङ्सेॽइक् कुइसिक् हे़क्क्याङ् मे़न्जप्मनाबा वाबुन्दाक्वा हे़क्तङ्बा के़बोक्खिरो॥ 12 खिनिॽ मनाहाॽरे़ के़लुःम्बा के़धुप्पा हिम्पाङ्यक्हाॽ याम्मो मे़जोगुरो, साॽरिक् उःन्छोःम्बा हिम्युक्नाहाॽ खे़ङ्हाॽरे़ याम्मो मे़भोःक्खुर॥ खिनिॽ ‘के़लुःम्बा लुङ्धाक्हाॽ के़से़प्पा नु युङ्मा हिम्हाॽरे़ लागि लाम् याम्मो कुसङ् के़जोःक्पा’ के़म्मे़त्तिरो॥” नाःम्सिङ्मा ये़न्निन् आसुत्थो चोःक्मा मेःन् 13 यहवे दाङ्बे़ल्ले़ पाःत्तुरो, “नाःम्सिङ्मा ये़न्निन् खे़निॽ सेसे के़गत्तुम्लो हे़क्क्याङ् खे़ल्ले़ याःन्दिक् आबाङे निङ्वाॽ पाःप्पाःत् के़न्जोगुम्मिन्ने़भग्र, आङ्गाॽ आसेसे ये़न्निन् के़इःत्तुम् के़नाःत्तुम् खे़ब्याङ् खे़ल्ले़ याःन्दिक् आत्तिआङ् माःङ्घा के़म्बेगिन्ने़भग्र कुसुम् मे़न्दम्मनाबा याःम्बक् के़न्जोगिन्नाङ् खे़न् ये़न्निन् इङ्धाङ् के़बिरुम्ने़भग्र 14 आङ्गाॽओ निङ्वाॽ तामा पाःन्हाॽ के़घोसुम्लो, आङ्गाॽ खिनिॽ काक् इक्सादिङ् खाम्बेःक्को मिङ्सो इङ्धाङ् पिनिङ्लो हे़क्क्याङ् आङ्गाॽ खिनिॽ थाःक्थे़बा याकुबे़न् पिरुङ्बा लाजेॽओ खिनिॽ साभःङ्जा पिनिङ्ङाङ् के़सःत्तिरो आङ्गाॽ यहवे दाङ्बे़ल्ले़ए कन् पाःन्निन् पाःत्तुङ्ङाङ् वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.