यसैया 57 - लिम्बुइस्राइलबा नावाइत्लाहाॽओ खासे़न् थाःॽ 1 साम्योबा मनाहाॽ मे़मे़क्लो, हे़क्क्याङ् खे़न् पाःन्निन् हाःत्ले़आङ् निनि खे़म्घे़म् मे़ल्लाप्तुन्लो॥ निङ्वाॽफुमाङ्ङो से़वा के़जोःक्पाहाॽ मे़भोःक्खु मे़देॽरुसिरो, कर के़दाबा तुक्खेलाम् से़ःप्मासिरे़ लागि साम्योबाहाॽ मे़भोःक्खु मे़देॽरुसिबा फाॽआङ् आत्तिन्हाॽरे़आङ् कुसिङ् मे़न्निःत्तुन्लो॥ 2 कुदोःप्मा लाम्मो लाङ्गे़घेःक्पाहाॽ नुॽमादामाओ मे़लाःत्लो, खे़ङ्हाॽ मे़सिःल्ले़ खे़ङ्हाॽरे़ नाःम्सिङ्मा मे़घोसुर॥ 3 यहवे दाङ्बे़ल्ले़ पाःत्तुरो, “कर माङ्देःम्मे़ल्ले़ कुस्सासे, हे़क्क्याङ् याम्बोःप्मा याःम्बक् के़जोःक्मा नु फे़क्के़लाॽमे़ल्ले़ कुधिन्दाङ् सायोबोरासे, कॽयो त्ये़म्मे़ॽओ! 4 खिनिॽ हात् के़गे़ॽरुम् के़साःत्तुम्बे? खिनिॽ आत्तिल्ले़ कुदक्ले़ङ्वाओ खिनिॽ मुरान् के़वे़सुम्ल खिनिॽ ले़सोःप्पान् के़लःत्तुम्बे? थे खिनिॽ पिफ्युङ् के़जोःक्पाहाॽरे़ खुन्छिॽ थिन्दाङ् सायोबोरा नु इङ्ले़क् के़बाःप्पाहाॽरे़ खुन्छिॽ सानिङ् मेःम्बि? 5 यहिबा सिङ्बुङ्हाॽरे़ कुलुम्मो नु कुसिगाङ् हे़क्क्याङ् के़रे़क् हुम्बे़प्पा सिङ्बुङ् सिगाङ् याम्बोःप्मा याःम्बक् चोःक्मारे़ के़धुक्तिरो॥ खिनिॽ आबाङे ये़म्बित्छा मे़न्छुमा साहाॽ वहःङ् नु याक्पेॽफिःप्माहाॽओ वयागे़न् सिदुङ्जभा के़जोगुम्सिम्लो॥ 6 ने़वालाहाॽओबा वरे़ङ्ले़ङ्बा लुङ्हाॽ खिनिॽ माङ्सिरो, खे़ङ्हाॽ खे़निॽ चे़ल्ले़क्सेल्ले़ सेजःङ्वान् नु कुजान् सिदुङ्जभा के़दोःम्दुम्माङ् से़वा के़मे़त्तुम्सिलो॥ आङ्गाॽग मेःन्, खे़ङ्हाॽए, खिनिॽ लक्लो, अक्तङ्बा पाःन्हाॽरे़ आनिङ्वा तारो फाॽआङ् निङ्वाॽ के़इःत्तुम्बि? 7 केःम्बा नु चाङ्जाङ्बा कोःक्मा फाङ्जङ् थे़गु माङ्वाओ खिनिॽ याम्बोःप्मा याःम्बक् के़जोगिरो, खे़त्थो खिनिॽ सिदुङ्जभा तोःन्छे़ के़बेगिरो॥ 8 खिनिॽ लाम्धेत् नु लाम्धेःत्पुङ्ङिल्ले़ कुएगाङ् खे़निॽ थिम्मे़न्दङ् सुवाङ्हाॽरे़ खुन्छिॽ मिक्सेःन्निन् के़युक्खुम्लो॥ आङ्गाॽ याप्मि के़ले़रिआङ् खे़निॽ इप्नाःन् हल्ले़क् के़हन्दुम्लो! खिनिॽ खे़प्मो के़लासिरो॥ खे़ब्याङ् ले़क्चाॽबुधुक् के़जोःक्कासिरो, खुन्छिॽ इप्नाःन् खे़निॽ सिराॽथाङे़आङ् खे़ङ्हाॽनु माङ्हे़क् के़जोगुम्लो, हे़क्क्याङ् खे़निॽ खे़ङ्हाॽरे़ खुन्छिॽ ले़क्चाॽबुधुःक्किन् ओगे़मे़त्तुम्लो॥ 9 मोलोख माङ्ङिल्ले़ कुदगि खिनिॽ साॽरिक् कुनाम्गे़नुॽबा निःङ्गेन् के़हुःत्तासिआङ् के़बेगिरो॥ हाङ्लाइङ्बाहाॽ खिनिॽ सिराॽ के़धाङ्बा माङ् कोःत्छे़ साॽरिक् माःङ्घा माःङ्घा के़बाङ्घुम्सिम्लो, खे़ब्याङ् खिनिॽग खे़मायङ्सङ् थारिक्काङ् के़बाङ्घुम्सिम्लो॥ 10 खिनिॽ के़जोगुम्बा याःम्बक्किल्ले़ चोगुल्ले़ आबाङे के़नासिरो, करसाङ् खिनिॽ हे़क्के चोःक्मा के़ल्ले़रुमिन्लो॥ याम्गे़सिङ्बा नावा इःत्लाहाॽरे़ सक्मा आबिरो हे़क्क्याङ् आफाल्ले़आङ् मे़न्धुम्ना आम्बोङ्ने़न् के़लॽरिरो॥” 11 यहवे दाङ्बे़ल्ले़ पाःत्तुरो, “खिनिॽ यङ्मा किमाओ के़धाबा कन् माङ्हाॽ हाःत्छिआङ् आङ्गाॽ इङ्ले़क् पान् याप्मि के़मे़त्ति खे़ब्याङ् सगप् याप्मि निङ्वाॽ के़भेःत्छिबाबे? थे आङ्गाॽ कन् पाःन्हाॽरे़ कुयाःम्बेओ यरिक् ये़म् थारिक् स्वाःत् युङ्ङाबाल्ले़ चोगुल्ले़ आङ्गाॽ मिङ्सो इङ्धाङ् पिमा याप्मि के़ले़रे़बाबि? 12 आनिगे च्या चोगुम्बे़साङ् खे़न् कुदोःप्माए चोक् फाॽआङ् खे़निॽ के़इःत्तुम्लो कर खिनिॽ के़जोगुम्बा याःम्बक्किन् निधाःप्ल चोगुङ्लो हे़क्क्याङ् खे़निॽ याःम्बक्किल्ले़ कुभाॽ पिमा के़न्छुक्तिन्लो॥ 13 खिनिॽ आभाॽरे़ॽ फाॽआङ् पेलिगे़न् तुवा के़जोगुम्मिल्ले़, खिनिॽ नावाइत्लाहाॽरे़ खे़निॽ के़म्से़ःप्तिररो॥ साम्मिःत्थिक् सुइक् लॽइल्ले़ खे़ङ्हाॽ फे़सु तेॽरुसिरो, कर आङ्गाॽओ निङ्वाॽ के़युङ्बाहाॽरे़ग आलाजेन् लक् मे़घोसुरो हे़क्क्याङ् आसेसे कोःक्मान् युक् मे़जोगुरो॥” नुॽमादामा नु कुभाॽरे़ लागि यहवे दाङ्बे़ल्ले़ कुमाङ्हुप् 14 यहवे दाङ्बे़ल्ले़ पाःत्तुरो, “आङ्गाॽ आमनाहाॽरे़ खुन्छिॽ लाम्मो के़ने़बा आघघबा के़रे़क् पाःन्हाॽ खे़त्ताम्मे़ॽओ॥ हे़क्क्याङ् खे़ङ्हाॽ आङ्गाॽओ मे़नुःङ्लरो! लाम् तयाम्मे़ॽ, लाम् यारिप् चोगे़म्मे़ॽओ! 15 आङ्गाॽ के़रे़क्नुःल्ले़ थाःङ् के़युङ्बा, सेसे नु सदादिङ् के़वाॽबा निङ्वाॽफुमाङ्आरो॥ आङ्गाॽ के़रे़क्नुःल्ले़ केःम्बा नु सेसेबादे़न्नो युङ्ङारो कर याम्साम्मो नःम्नःम्बा नु लायोलाम् के़हिःन्छिङ्बाहाॽ आःन्छिङ्मा पिसे़आङ् खे़ङ्हाॽनु वाॽआरो॥ 16 आङ्गाॽ आभे़ल्ले़साङ् आप्तिक् के़गुःप्पा मे़बोङ्ङान्लो, हे़क्क्याङ् कुयाक् के़ले़ॽबा मे़बोङ्ङान्लो, मे़ःन्निःल्ले़ग आङ्गाॽ आदगि आङ्गाॽ नावागे़न् चइत् चोगुङ्बा— मे़न्छाम् याप्मिःल्ले़ कुयाम्साम्मिन् नायोबा पोःक्खे़बारो॥ 17 आङ्गाॽरक् चोगुङ् पाःत्तुङ् के़लॽबा खे़ल्ले़ लायो इस्सेःङ्बा कुनिङ्वाःल्ले़ चोगुल्ले़ आङ्गाॽ आयाक् ले़ॽरे़आङ् वयाङ्लो॥ आङ्गाॽ खे़न् खुम्दिङ् पिरुङ्लो, हे़क्क्याङ् आङ्गाॽ आनारान् चिक्खुङ्लो॥ करसाङ् खे़न् पाःन्मे़ङ्घे़म्मनाबा पोःक्खे़आङ् आबाङे कुलाम्मिन् नाःप्मा मे़ले़रुन्लो॥ 18 आङ्गाॽ खे़ल्ले़ कुवाॽमा कुबेःक्मा लाम्हाॽ निसुङ्लो, कर आङ्गाॽ खे़न् वेःन्दुङ्लो॥ आङ्गाॽ खे़न् लाम्लोसुङ्लो, हे़क्क्याङ् याम्मो आःन्छिङ्मा पिरुङ्लो, 19 इस्राइल लाजेॽओ मे़रिङ् के़धक्पाहाॽरे़ खुन्छिॽ मुराओ नाराफोमा पाःन्हाॽ लःप्मारे़ लागि, माःङ्घा नु निःत्ताङ् के़युङ्बाहाॽरे़ ने़प्माङ् सनारुङ् नुॽमा तामा पोङ्लरो, आङ्गाॽ आमनाहाॽ वेःन्दुङ्सिङ्लो” यहवे दाङ्बे़ल्ले़ पाःत्तुरो॥ 20 कर ताक्के़भे़ॽबा मनाहाॽग वाभे़ल्ले़ङ् के़बोःक्पा वरःङ् कुइसिःक्सिरो, खे़ङ्हाॽ स्वाःत् वाॽमा मे़न्छुक्ने़न्लो, खे़न् च्वाःत्तिल्ले़ माक्खुन्द्या नु ले़क्वान् लाःक्कात् लाप्फुसुरो॥ 21 “कुॽइगे़भे़म्बा मनाःल्ले़ कुनिङ्वान् चिजि ये़म्ये़म् मे़बोङ्ने़न्लो” फाॽआङ् आनिङ्वाॽफुमाङ्ङिल्ले़ पाःत्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.