यसैया 56 - लिम्बुथिम्मे़न्दङ् सुवाङ्हाॽरे़ लागि से़न्लप् 1 यहवे दाङ्बे़ल्ले़ अक्खे पाःत्तुरो, “कुदोःप्मा खासे़न्लोम्मा याःम्बक् चोगे़म्मे़ॽओ, साम्योबा याःम्बक् चोगे़म्मे़ॽओ, थेआङ्भे़ल्ले़ आङ्गाॽलाम् खोमा के़बोङ्बा से़न्लप्पिन् निःत्ताङ् वाॽरो, हे़क्क्याङ् आङ्गाॽ आसाम्योनिमान् हाराए ओसेःन्धाङ् पोङ्लो॥ 2 आत्तिल्ले़ नाःम्सिङ्मा ये़न्निन् मे़म्भेःन्ने इःत्तु नाःत्तुॽ, हाःत्ले़ कुहुक्किन् फे़न्याःम्बक् चोःक्मालाम् लाःत्लात् कत्तुॽ, खे़न् मनाःङ्ग मुॽइसाबारो॥” 3 यहवे दाङ्बे़ल्ले़ कुमनाहाॽनु के़दङ्बा वेॽ लाजेॽबा आत्तिन् मनाःल्ले़आङ् अक्खे मे़बाःत्तुल्लरो, “से़क्खासाङ् यहवे दाङ्बे़ल्ले़ कुहुक्कोलाम् आङ्गाॽ लाःत्लात् चोःक्कारो॥” आत्तिन् सिङ्गारुल्ले़आङ् मनाहाॽ अक्खे मे़मे़त्तुसिल्लरो, “ओमे़त्ते़म्मे़ॽ, आङ्गाॽग के़हेबा सिङ्बुङ्आरो॥” 4 थेआङ्भे़ल्ले़ यहवे दाङ्बे़ल्ले़ पाःत्तुरो, “आङ्गाॽ आनाःम्सिङ्मा ये़न्हाॽ के़इःप्पा के़नाःप्पाहाॽ, आङ्गाॽ आसिराॽ के़धाङ्बा याःम्बक् के़जोःक्पाहाॽ, हे़क्क्याङ् आमाङ्हुप्हाॽ थधप् मे़ल्लॽए के़इःप्पा के़नाःप्पा सिङ्गारुहाॽ 5 आङ्गाॽ आहिम्मो नु खे़ॽयोबा लुङ्धाक्हाॽ सिगाङ् आस्सा आएहाॽनुःल्ले़आङ् साॽरिक् निङ्वाॽसोक् चोगुङ्सिङ्लो॥ खे़ब्याङ् खे़ङ्हाॽ नुबा मिङ् पिरुङ्सिङ्लो, खे़ङ्हाॽ आभे़ल्ले़आङ् मे़म्मामनाबा मिङ् पिरुङ्सिङ्लो॥ 6 हे़क्क्याङ् खुने़ॽ कुमनाहाॽनु तङ्सिङ्से़ के़दाबा वेॽ लाजेॽबा मना, खुने़ॽ कुसे़वा याःम्बक् के़जोःक्पा, खुने़ॽ मिःम् के़मे़प्पा, खुने़ॽ कुसे़वारोबा के़बोङ्बा, हे़क्क्याङ् नाःम्सिङ्मा ये़न्निन् नु कुमाङ्हुप्पिन् नुरिक् के़इःप्पा के़नाःप्पा, खे़ङ्हाॽ यहवे दाङ्बे़ल्ले़ अक्के मे़त्तुसिरो, 7 आङ्गाॽ सियोन नु सेसेबा कोःक्माओ ताःत्निङ्लो, ले़त्ति तोःम्मादे़न्नो के़दोःन्दुम्बा मिधिङ्मनादेमनाबा सिदुङ्जभा नु वयागे़न् सिदुङ्जभाहाॽ ताःक्तुङ्लो॥ आङ्गाॽ आहिम्मे़न् के़रे़क् मे़न्छाम् सुवाङ्हाॽरे़ खुन्छिॽ लागि पेलि फाक्मा हिम् पोङ्लो॥” 8 इस्राइललाम् लाःक्कात् मे़लःत्तुसिबाहाॽ के़भुङ्बा, यहवे दाङ्बा निङ्वाॽफुमाङ्ङिल्ले़ कन् पाःन्निन् उवा चोगुरो, “के़जुम्बा के़जुःप्पाहाॽनुःल्ले़ वेॽ आल्लसाङ् चुम्मा के़बोङ्बाहाॽ आङ्गाॽ सुप्सुङ्सिङ्लो॥” इस्राइलबा लाम्लोबाहाॽरे़न् आप्तिक् 9 ने़ने़बादे़न्नो के़वाॽबा के़रे़क् थक्सासे, त्ये़म्मे़ॽओ, ताम्भुङ्ङोबा के़रे़क् थक्सासे, त्ये़म्मे़ॽआङ् च्ये़म्मे़ॽओ! 10 इस्राइलबा कम्ब्राङ्बाहाॽ मिक्फःम्बा मे़जोक्लो, खे़ङ्हाॽ के़रे़क् सिक्कुम् निङ्वाॽ मेःन्नेबा मे़जोक्लो॥ खे़ङ्हाॽ हमा मे़न्छुक्मनाबा के़बा कोःत्चो कुसिक् मे़लॽरो, हाबा ले़म्बे़त् ने़मा नु इम्मारक् खुन्छिॽ सिराॽधाङ्लो॥ 11 खे़ङ्हाॽग साॽरिक् खुन्छिॽ सिक्के़लाःक्पा कोःत्चोसिरो, खे़ङ्हाॽ आभे़ल्ले़आङ् मे़ङ्घाने़न्लो, खे़ङ्हाॽ खासिङ् मे़न्निःप्मनाबा मे़ःन्दा पित् के़गम्बासिरो॥ खे़ङ्हाॽ के़रे़क् आबाङे खुन्छिॽ लाम्मो लाङ्मे़घेःक्काङ् मे़वाॽरो, के़रे़क्ले़ आबाङे खुन्छिॽ नुबा के़बोङ्बा पाःन्हाॽरक् मे़गोःत्तुरो॥ 12 खे़ङ्हाॽ के़रे़क्ले़ मे़बाःत्तुरो, “त्ये़म्मे़ॽ, आङ्गाॽ चे़ल्ले़क्सेॽ थि ताःप्मा आबाङ्घे़ॽओ! थिआङ् सुक्सुक् थुङुम्लो! ताःन्दिक्काङ् आइन्बा ये़न् हे़क्केए पोङ्लो इग्र आइन्नुःल्ले़आङ् साॽरिक् नुबा पोङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.