यसैया 55 - लिम्बुयहवे दाङ्बे़ल्ले़ कुवा के़मिबाहाॽ उःत्तुसि 1 “के़रे़क् कुवा के़मिःक्पासे, च्वाःत् के़ने़बादे़न्नो त्ये़म्मे़ॽओ॥ हे़क्क्याङ् याङ् मे़ङ्गप्मनाबाहाॽआङ् त्ये़म्मे़ॽओ खे़ब्याङ् इङे़म्मे़ॽआङ् थुङे़म्मे़ॽओ॥ याङ् मेःन्नेए त्ये़म्मे़ॽओ, खे़म्ब्याङ् याङ् मेःन्ने नु कुमे़ल्लुङ् मेःन्नेए सेजङ्वान् नु पित्नुन् इङे़म्मे़ॽओ॥ 2 खरे़ःङ् मेःम्बा पाःन्नो थेआङ् याङ् चागे़सोःक्खुम्बाबे? हे़क्क्याङ् सिक्मे़न्एःप्मनाबा पाःन्नो थेआङ् स्याङ्मे़न्दाङ् याःम्बक् के़जोगिबाबे? नुरिक्काङ् खे़प्साम्मे़ॽ, सिङ्सिङ् ये़क्ये़क्काङ् आबाःन्निन् खे़प्साम्मे़ॽओ, खे़ब्याङ् आत्तिन् कुजान् नुबा चोक् आम्भा खे़न् चाम्मे़ॽओ, हे़क्केलॽरिक् कुजागे़नुॽबा कुजाहाॽ के़जाम्माङ् खिनिॽ सक्मासाम्मिन् कुनिङ्वाॽ तारो॥ 3 “खे़म्माओ निङ्वाॽ पिरे़म्मे़ॽ, हे़क्क्याङ् आङ्गाॽओ त्ये़म्मे़ॽओ, खे़प्साम्मे़ॽ, हे़क्केलॽरिक् खिनिॽ याम्साम्मिन् हिङ्लरो॥ आङ्गाॽ खे़निॽनु आभे़ल्ले़आङ् मे़न्नुप्मनाबा माङ्हुप् चोगुङ्लो, दाउदे़न्नु माङ्हुप् चोगुङ्बा आफाल्ले़आङ् मे़न्नुप्नाबा मिःम्जिन् खे़निॽ पिनिङ्लो॥ 4 आङ्गाॽ खुने़ॽ मे़न्छाम् सुवाङ्लुम्मो तोःन्दि के़बिबा चोगुङ्बान् ओमे़त्ते़म्मे़ॽओ, हे़क्क्याङ् मनाहाॽरे़ खुन्छिॽ लुम्मो खुने़ॽ लाम्लोबा चोगुङ्लो, खे़ब्याङ् खे़ङ्हाॽरे़ खुन्छिॽ थक्मोबा चोगुङ्लो॥ 5 आल्ल खे़निॽ वेॽ लाजेॽबा मे़न्छाम् सुवाङ्हाॽ के़उःत्तुम्सिम्लो— थिक् ये़म्मो खे़ङ्हाॽरे़ खे़निॽ कुसिङ् के़मे़न्निःत्तिल्लो, कर आल्ल खे़ङ्हाॽ खिनिॽनु फुत्छिङ्मारे़ लागि मे़लोक् मे़दारो! थेआङ्भे़ल्ले़ यहवे दाङ्बा खिनिॽ निङ्वाॽफुमाङ् इस्राइलबा सेसेबाल्ले़ खिनिॽ मिमिदिङ् चोःक्निङ्ङाङ् वाॽरो॥” 6 यहवे दाङ्बे़न् खोमा सुक्ते़त्ल फाॽआङ् कोःत्ते़म्मे़ॽओ खे़ब्याङ् खुने़ॽ निःत्ताङ् वाॽइल्ले़सा तुमे़म्मे़ॽओ॥ 7 कुॽइगे़भे़म्बे़ल्ले़ आबाङे कुलाम्मिन् नाःप्मा नाॽरुररो हे़क्क्याङ् लायो के़जोःक्पाल्ले़ कुनिङ्वाॽओ इःत्तुबा पाःन्निन् ले़रुदेसुररो॥ खे़ब्याङ् यहवे दाङ्बा ले़प्साङ् नुःङ्लरो, हे़क्क्याङ् खुने़ॽ खे़न् लुङ्माॽ तुक्तुरो॥ आनिॽ निङ्वाॽफुमाङ् पिसाङ् खे़न् हिसिङ्लरो, हे़क्क्याङ् खुने़ॽ खे़न् साम्बान् मे़न्हुङ्ङे ले़प्मि पिरुरो॥ 8 यहवे दाङ्बे़ल्ले़ अक्खे पाःत्तुरो, “आङ्गाॽ इःत्तुङ्बा पाःन्हाॽ खिनिॽ के़इःत्तुम्बा पाःन्हाॽ मेःन्लो, हे़क्क्याङ् खिनिॽ के़नाःत्तुम्बा लाम्हाॽ आलाम् मेःल्लो॥ 9 ताङ्साङ्बे़न् इक्सा खाम्बेःक्नुःल्ले़ थाःङ् पत्लो, खे़म्भलॽरिक्के आङ्गाॽ आलाम्हाॽ हे़क्क्याङ् आङ्गाॽ इःत्तुङ्बा पाःन्हाॽ खिनिॽ के़इःत्तुम्बान्नुःल्ले़आङ् यम्बा चोक्लो॥ 10 “ताङ्साक्पोलाम् वहित् नु नाःङ् थासुरो हे़क्केसाङ् खे़न् याङ्धाःङ् मे़नुःङ्ने़न् मे़बेःक्ने़ल्लो, कर खाम्बाङ्ङिन् वभिःन्दुआङ् चा लिङ्ल याःन्दुरो, खे़ब्याङ् चा के़हेॽबाल्ले़ लागि याॽरिःम्बा नु चामा कुजा पिरुरो, 11 हे़क्केलॽरिक्के आङ्गाॽ पाःत्तुङ्बा आबाःन्जाःक्किन्नाङ् पोङ्लो॥ खे़न् आबाःन्जाःक्किन् थेनाधे याङ्ना आङ्गाॽओ मे़नुःङ्ने़ल्लो, कर आङ्गाॽ चोःक्मा कोःत्तुङ्बा याःम्बक्किन् खे़ल्ले़ चोगुरो, खे़ब्याङ् आङ्गाॽ याःम्बक् चोःक्मारे़ लागि पाङ्घुङ्बान् खे़ल्ले़ कुलिङ्दो के़त्तुरो॥ 12 खिनिॽ निङ्वाॽ ताआङ् के़बेगिरो, हे़क्क्याङ् सनारुङ्ङाङ् लाम् के़म्लोसिरो॥ कोःक्मा फाङ्जङ् नु थे़गु माङ्वाहाॽ खिनिॽ पिसाङ् साम्मे़लोरो, खे़म्ब्याङ् ते़म्बेॽओ के़युङ्बा के़रे़क् सिङ्बुङ्हाॽरे़ हिप्ला मे़हिप्तुरो॥ 13 खम्ब्याङ् तिङ्ङिल्ले़ कुले़क्वा आःङ् लिङ्लो, सेर्दाःक्माल्ले़ कुले़क्वा फुङ् के़भे़क्पा सिङ्बुङ् लिङ्लो॥ खे़ङ्ग यहवे दाङ्बे़ल्ले़ कुमिङ् तिःप्मारे़ लागि पोङ्लो, खे़न् आभे़ल्ले़आङ् मे़म्मे़क्मनाबा सदादिङ्ले़ लागि मिक्सेन् पोङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.