यसैया 54 - लिम्बुयहवे दाङ्बे़ल्ले़ इस्राइलिहाॽ लुङ्माॽ तुक्तुसि 1 यहवे दाङ्बे़ल्ले़ अक्के पाःत्तुॽ, “यरुसले़ःम्मे, खे़ने़ॽ सामे़ङ्गप्मनामा मे़न्छुमा कुसिङ् के़वये़रो, कर आल्ल खे़ने़ॽ सःप्माआङ् साम्लोमा नु अःक्मा के़सुक्लो, थेआङ्भे़ल्ले़ हिम्धक्मा मे़न्छुमाःल्ले़ कुस्साहाॽनुःल्ले़ खे़ने़ॽ के़स्सा के़एहाॽ यरिक् मे़बोङ्लो॥ 2 “खे़ने़ॽ के़याङ्धोःक्मा साःङ्गाहिम्मे़न् फोसे़ॽओ, के़साःङ्गाहिम्मे़ल्ले़ कुघाप्मे़न् यम्बा खिङ्से़ॽओ, खे़ल्ले़ कुघेःङ्मा थाक्पाहाॽ केःम्बा चोगे़ॽओ, हे़क्क्याङ् किल्लाहाॽ मे़म्मुन्ने हाक्ते़ॽओ॥ 3 थेआङ्भे़ल्ले़ यरिक् के़बोङ्ङाङ् चुक्वा नु फे़ङ्वा के़बोरो, हे़क्क्याङ् खे़ने़ॽ के़धिन्दाङ् सायोबोराहाॽरे़ मे़न्छाम् सुवाङ्हाॽ खुन्छिॽ मे़युङ्बादे़न्नोलाम् मे़लःत्तु मे़देसुसिरो, खे़ब्याङ् खे़ङ्हाॽरे़ मे़ले़रु मे़धबा ते़न्हाॽओ मे़युङ्लो॥ 4 “मे़गिसे़न्ने़ॽ, खे़ने़ॽ सिरिङ्ममो थामा मे़बोङ्ने़ल्लो, कुनामे़न्छाॽ के़म्मे़त्ते़ल्ले़ मे़ङ्गिओ, खे़ने़ॽ चुक्मा के़म्बोङ्ने़ल्लो॥ खे़ने़ॽ के़वे़न्ने़ल्ले़बा नुःम्मे़न् निङ्वाॽ के़भेःत्छुरो, हे़क्क्याङ् मेमेदुमा के़बोःक्खे़बा इङ्दोन् खे़ने़ॽ याम्मो आभे़ल्ले़आङ् निङ्वाॽ के़न्इःत्तुल्लो॥ 5 थेआङ्भे़ल्ले़ खे़ने़ॽ नावागे़न् चइःत् के़जोःक्पान् के़हिम्साबारो, खुने़ॽ कुमिङ्ग मुक्साम्दाङ्बा यहवे दाङ्बारो॥ इस्राइलबा सेसे निङ्वाॽफुमाङ्ङिन् खे़ने़ॽ के़धे़ॽबारो, खुने़ॽ के़रे़क् इक्सादिङ् खाम्बेःक्मोबा निङ्वाॽफुमाङ् मे़मे़त्तुरो॥ 6 मे़नाॽरुमा नु कुनिङ्वाॽ तुक्खे के़जामा, मे़न्छ्या वये़ल्ले़ मेःक्खिम् के़बोङ्मा हे़क्क्याङ् ताःन्दि कुये़म्बाःल्ले़ नाॽरुमा मेःत् हे़क्केए खे़ने़ॽ के़न्दाङ्बा यहवे दाङ्बे़ल्ले़ खे़ने़ॽ याम्मो के़उःत्लो,” खे़निॽ निङ्वाॽफुमाङ्ङिल्ले़ पाःत्तुॽ॥ 7 “सप्मारे़ लागि आङ्गाॽ खे़ने़ॽ नाॽने़आङ् वये़रो, कर साॽरिक् लुङ्माॽ तुक्ने़आङ् याम्मो ताःत्ने़रो॥ 8 आङ्गाॽ आसिक् अयाक् लॽरे़ल्ले़ सप्मारे़ लागि आङ्गाॽ खे़ने़ॽलाम् लाःत्लाःत् पोःक्खाङ्ङाङ् वयाङ्लो, कर आङ्गाॽ आभे़ल्ले़आङ् मे़न्नुप्मनाबा मिःम्जि ओःन्धाक्ने़आङ् लुङ्माॽ तुक्ने़रो,” यहवे दाङ्बा खे़ने़ॽ के़धे़ॽबाल्ले़ पाःत्तुॽ॥ 9 “कङ्ग आङ्गाॽ आलागि नुहःल्ले़ कुये़म्मोबा ये़न्हाॽ कुसिक् लॽरो, थेआङ्भे़ल्ले़ इक्सादिङ् खाम्बेःक्मे़न् वदप्मे़ल्ले़ याम्मो मे़मे़ङ्ङान् फाॽआङ् माङ्हे़क् चोगुङ्ङाङ् वयाङ्लो, हे़क्केलॽरिक्के आल्लआङ्धो खे़ने़ॽनु आसाक्के़न् मे़भोङ्ङाल्लो, आङ्गाॽ खे़ने़ॽ आभे़ल्ले़आङ् मे़भे़ःक्ने़न् फाॽआङ् माङ्हे़क् चोगुङ्ङाङ् वाॽरो॥ 10 कोःक्मा फाङ्जङ्हाॽ मे़यक्खु हे़क्क्याङ् थे़गु माङ्वाहाॽ मे़घे़त्तुरो हे़क्केसाङ् आफाल्ले़आङ् मे़न्नुप्नाबा मिःम्जि मे़प्मा मे़ले़त्ने़ल्लो, आङ्गाॽ चोगुङ्बा सनारुङ्ले़न् माङ्हुप्पिन्नाङ् मे़ङ्गे़प्मनाबा मे़बोङ्ने़ल्लो,” खे़ने़ॽ लुङ्माॽ के़दुक्पा यहवे दाङ्बे़ल्ले़ पाःत्तुॽ॥ के़दाबा ये़म्मो यरुसले़म 11 यहवे दाङ्बाल्ले़ पाःत्तुॽ, “यरुसले़ःम्मे, तुक्खे लाक्खे के़दुम्बाआङ् के़याक्पा, हाङ्हाङ् के़मे़प्पा नु के़भाॽबा हाःत्ताङ् के़होप्पा ये़क्यक्, आङ्गाॽ साॽरिक् कुमे़ल्लुङ् के़घिःक्पा माङ्लुङ् नु कुभिङ्लुङ्ङिल्ले़ खे़ने़ॽ के़लुङ्धाक्किल्ले़ कुबुङ् युक्खुङ्लो॥ 12 आङ्गाॽ खे़ने़ॽ के़जङ्हिम्हाॽ के़ओःप्पा कुहे़ःत्ला हिल्लिःल्ले़ चोगुङ्लो, हे़क्क्याङ् यम्बा के़लाम्धेःप्पाहाॽ मि हे़क्के के़दिःप्पा कुमे़ल्लुङ् के़घिःक्पा लुङ्लाम् चोगुङ्लो खे़ब्याङ् के़रे़क् पिसाङ्बा के़लुङ्धाक्हाॽ माङ्लुङ् इस्सेःङ् से़त्तुङ्लो॥ 13 खे़ने़ॽ के़मनाहाॽ आङ्गाॽ आबाङे निसाम् हुॽरुङ्सिङ्लो, हे़क्क्याङ् खे़ङ्हाॽ मे़नुॽमे़दार याःन्दुङ्सिङ्लो॥ 14 खासे़न् चोःक्मा नु साम्योबा पाःन्निल्ले़ खे़ने़ॽ के़धुम्बा के़बोङ्लो, मनारे़ ताप्फे़ःल्लिक् मे़प्मा नु किमा यङ्मालाम् किमा मे़बोङ्ने़ल्लो॥ 15 कुभारे़ खे़ने़ॽ के़म्सॽ के़म्भत्तिल्ले़ खे़ङ्हाॽ आङ्गाॽ मुरा मे़त्तुङ्सिङ्बा मेःल्लो, खे़ने़ॽनु थङ् के़जोःक्पाहाॽ हारिमे़दारो॥ 16 “यहवे दाङ्बे़ल्ले़ अक्के पाःत्तुॽ, ‘ओमे़त्ते़ॽओ, मिदःत् के़मुःप्पा नु खजुम्घया के़जोःक्पा फे़न्गे़धक्पे़न् आङ्गाॽए चोगुङ्बारो॥ हे़क्क्याङ् खाप्पुथ्यःङ् के़जोःक्पे़न्नाङ् आङ्गाॽए नावागे़न् चइःत् चोगुङ्बारो॥ 17 खे़ने़ॽ के़दक्ले़ङ्वाओ मे़जोगुबा आक्तङ्बा फे़जुम्भे़यारे़आङ् खे़ने़ॽ नाःम्मा के़न्छुक्ने़ल्लो, हे़क्क्याङ् खे़ने़ॽ आप्तिक् के़गुःप्पा मनाहाॽ खे़ने़ॽ याङ्ना आप्तिक् के़गुःत्तुसिरो॥ कङ्ग यहवे दाङ्बे़ल्ले़ कुसे़वारोबाहाॽरे़ खुन्छिॽ लागि याङ्सा कुन्धेरे़न् लक्लो, खे़ब्याङ् आङ्गाॽलाम् खे़ङ्हाॽरे़ खुन्छिॽ आप्तिक् मेःन्नेबा पर्माःङ्गि हाबा कन्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.