यसैया 53 - लिम्बु1 मनाहाॽरे़ नुगप् मे़बिरुसिरो, “आनिगे इङ्घङ्ङिन् हाःत्ले़ नसान् चोगुआङ् वाॽबे? हे़क्क्याङ् यहवे दाङ्बे़ल्ले़ कुमुक्साम्मिन् हात् ओःन्मे़धाक्तुआङ् वाॽबे? 2 यहवे दाङ्बे़ल्ले़ कुसे़वारोबे़न् खुने़ॽ कुबेसाङ् चिनॽनॽबा याःन्निल्ले़ कुनःक् हे़क्के हे़क्क्याङ् कुहेद्याॽ खाम्बाङ्ङोलाम् के़लःम्बा सिङ्साप् कुसिङ् पोरे़रो॥ खुने़ॽ नुबा कुनारुम्भुङ् होःप्ते़रो, खुने़ॽ कुनाराओ आनिगे सिराॽगे़धाङ्बा पान् थेआङ् होःप्ते़रो॥ 3 खुने़ॽ मनाहाॽरे़ मे़जिःत्तुआङ् वये़रो हे़क्क्याङ् मे़नाॽरुरो, खुने़ॽ तुक्खे नु ये़त्तुक्खेहाॽ थरुरो॥ हाःत्ले़आङ् खुने़ॽ ओमे़मे़त्तुल्लो, आनिगे खुने़ॽ थे हे़क्तङ्बाआङ् मे़लेःत्तुम्बे़ल्लो॥ 4 “से़क्खाए खुने़ॽ आनिॽ तुक्खेन् थरुरो, आनिॽ ये़त्तुक्खेहाॽ कुयुदेॽरुरो॥ कर खुने़ॽ तुमुबा ये़त्तुक्खेहाॽग निङ्वाॽफुमाङ्ङिल्ले़ खुम्दिङ् पिरुबा फाॽआङ् आनिॽ आइःत्तुम्लो॥ 5 कर खुने़ॽग आनिॽ लायोल्ले़ चोगुल्ले़ मे़धुबुरो, आनिॽ फे़न्याःम्बक्किल्ले़ चोगुल्ले़ ते़ःम्भुक् च्ये़रो॥ खुने़ॽ खुम्दिङ् खोसुबाल्ले़ चोगुल्ले़ आनिॽ सनारुङ् नुॽमा तामा आघोसुम्लो, खुने़ॽ ते़ःम्भुक्किल्ले़ काःन्दे़बाओ आनिॽ आवेःत्ते़रो॥ 6 आनिॽ के़रे़क् लाम् के़बोःप्पा मे़ल्लुक्हाॽ हे़क्तङ्बा आवये़रो, आनिॽ आबाङे लाम्मो लाङ् आघेगे़रो, कर आनिॽ के़रे़क्ले़ आजोगुम्बा लायोन् यहवे दाङ्बे़ल्ले़ खुने़ॽ कुसम्धाङ् चुक्ते़र याःन्दुरो॥ 7 “खुने़ॽ साॽरिक् ताप्फे़ःल्लिक् मे़मे़त्तुरो कर खे़ङ्हाॽ के़रे़क् थरुआङ् नःम्नःम्बा पोःक्खे़रो, खुने़ॽ कुम्ब्राओलाम् लत्छा पाःन्सुत्लाधिक्काङ् मे़बाःत्तुन्लो॥ से़प्मा मे़जोगुबा मे़ल्लुक् कुसिङ् कुम्ब्रिक् नःङ्मा मे़इःत्तुबा मे़ल्लुक् कुसिङ् खुने़ॽ कुम्ब्रा मे़भाःक्खुल्लो॥ 8 खुने़ॽ साॽरिक् ताप्फे़ःल्लिक् मे़मे़त्तुरो हे़क्क्याङ् खुम्दिङ् मे़बिरुआङ् से़त्छे़ मे़देॽरुरो॥ खे़ब्याङ् खुने़ॽ कुमुॽइदाङ्साहाॽ मेःन्ने स्ये़रो फाॽआङ् हाःत्ले़ निङ्वाॽ इःत्तुबे? थेआङ्भे़ल्ले़ कुहिङ्वे़त्हाॽरे़ खुन्छिॽ लाजेॽलाम् मे़लःत्तु मे़देसुरो, खुने़ॽग आमनाहाॽरे़ खुन्छिॽ लायोल्ले़ चोगुल्ले़ मे़धगुरो॥ 9 फे़न्याःम्बक् के़जोःक्पाहाॽनु खुने़ॽ इपुङ्ङो मे़ने़स्सुरो, याङ्सा कुन्धेसाबाहाॽनु मे़जिक्खुरो हे़क्केसाङ् खुने़ॽ आभे़ल्ले़आङ् ताप्फे़ःम्बा याःम्बक् मे़जोगुन्लो, खुने़ॽग आभे़ल्ले़आङ् इङ्ले़क् पान् मे़बाःत्तुन्लो॥ 10 “कर खुने़ॽ खाःम्मा नु तुक्खे थःप्पाङ्माग यहवे दाङ्बे़ल्ले़ कुनिङ्वाॽ वये़रो॥ यहवे दाङ्बे़ल्ले़ खुने़ॽ कुहिङ्मन्निन् खुने़ॽनु याम्मो तङ्मारे़ लागि वयागे़न् सिदुङ्जभा कुइसिक् चोगुरो॥ हे़क्केसाङ् खुने़ॽ कुमुॽइदाङ्साहाॽ निसुसिरो हे़क्क्याङ् खुने़ॽ कुधाक् चाॽरो॥ खे़ब्याङ् निङ्वाॽफुमाङ्ङिल्ले़ चोःक्मा निङ्वाॽ चोगुबा पाःन्हाॽ खुने़ॽलाम्बा कुलिङ्दो के़त्लो॥ 11 के़साक्पा ये़त्तुक्खे तुमुआङ् एगाङ् खुने़ॽ कन् के़रे़क् निमा खोसुरो हे़क्क्याङ् कुनिङ्वाॽ तारो॥ साम्योबा आसे़वारोबे़ल्ले़ यरिक् मनाहाॽ साम्योबा चोगुसिरो हे़क्क्याङ् खुन्छिॽ के़रे़क् लायोहाॽ कुयुरो॥ 12 कल्ले़चोगुल्ले़ आङ्गाॽ खुने़ॽ लत्छा मिङ्सो इङ्धाङ्ले़ युक्नादे़न् पिरुङ्लो, हे़क्क्याङ् मे़नाप्तुसिबा चिगक्वाहाॽ मुक्कुम्साबाहाॽनु खुने़ॽ कुलक् फःक्खुआङ् हाःत्तुसिरो, खुने़ॽ आबाङे ते़न्दे़आङ्ङे खुने़ॽ कुहिङ्मन्निन् सिदुङ्जभा चोगुरो, हे़क्क्याङ् लायोबाहाॽनु कुदङ्बा पोःक्खे़रो॥ खुने़ॽ यरिक् लायोबाहाॽरे़ खुन्छिॽ लायोहाॽ कुयुरो खे़ब्याङ् खे़ङ्हाॽरे़ ले़प्मि मे़घोसुर फाॽआङ् पेलि फाक्तुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.