यसैया 52 - लिम्बुनिङ्वाॽफुमाङ्ङिल्ले़ यरुसले़म ये़क्यक्किन् से़ःप्तु 1 सियोनओ के़युङ्बा मनासे, पोगे़म्मे़ॽओ, पोगे़म्मे़ॽओ, खिनिॽ के़धुम्बा पोःक्खे़म्मे़ॽओ हे़क्क्याङ् याम्मो पयम् यम्बा पोःक्खे़म्मे़ॽओ! सेसे ये़क्यक् यरुसले़ःम्मो के़युङ्बा मनासे, हाङ्वा माङ्वारे़ चाङ् चाक्खाम्मे़ॽओ॥ हर्दो मे़न्हे़क्मनाबा नु आसुत्थोबाहाॽ यम्बा के़लाम्धेःत्तो याम्मो आभे़ल्ले़आङ् मे़न्लाःत्ने़ल्लो॥ 2 यरुसले़म के़युङ्बासे, पोगे़म्मे़ॽआङ् खाम्हिःक्किन् थाप्साम्मे़ॽओ, हे़क्क्याङ् आबाङे हाङ्युक्नाओ युङाम्मे़ॽओ! लाजेॽलाम् मे़दे़म्सु मे़देॽरुसिबा सियोनरे़ कुस्सा मे़न्छिन्से, खे़निॽ फे़न्थक्क्रङ्हाॽ फुॽराम्मे़ॽओ! 3 यहवे दाङ्बे़ल्ले़ कुमनाहाॽ अक्खे मे़त्तुसिरो, “योग्बा योःग्मा पोङ्से़ खे़निॽ याङ् मेःन्ने के़म्सङ्घिबा कुइसिक् याङ् मेःन्नेए खे़निॽ के़म्धे़ॽरिरो॥” 4 थेआङ्भे़ल्ले़ यहवे दाङ्बे़ल्ले़ अक्खे पाःत्तुॽ, “तगि आङ्गाॽ आमनाहाॽ मिस्र लाजेॽओ युङ्से़ मे़बेरो, हे़क्क्याङ् आल्लो अस्सुरिहाॽरे़ खे़ङ्हाॽ तुक्खे मे़जाःत्तुसिरो॥ 5 हे़क्क्याङ् आल्लो बेबिलोन लाजेॽओआङ् हाबाहे़क्के पोःक्खे़आङ् वाॽरो॥ खे़निॽ के़म्दे़म्सि के़म्देॽरिआङ् के़वयिरो हे़क्क्याङ् हाःत्ले़आङ् कुमे़न् मे़न्हुङ्ङे वाॽरो॥ खे़निॽ सम्धाङ् युक् के़जोःक्पाहाॽ मे़हे़न्छिङ्लो खे़ब्याङ् आङ्गाॽ आजाःत्थि के़देसुम्माङ् वाॽरो॥ 6 कर आङ्गाॽ आमनाहाॽ आमिङ्ङिन् ओसेःन्दाङ् चोगुङ् पिरुङ्सिङ्लो, हे़क्क्याङ् खे़ङ्हाॽरे़ आङ्गाॽ आमिङ्ङिल्ले़ कुमुक्साम्मिन् कुसिङ् मे़निःत्तुरो, खे़ब्याङ्, कुनुप्मो खे़ङ्हाॽनु के़बाःप्पे़ङ्ग आङ्गाॽएरो फाॽआङ् खे़ङ्हाॽरे़ कुसिङ् मे़निःत्तुरो॥” 7 कोःक्मा फाङ्जङ्हाॽओ सुनाइङ् के़से़बाहाॽरे़ खुन्छिॽ लाङ्हाॽ साॽरिक् के़घे़म्सिङ्बा चोक्लो, खे़ङ्हाॽरे़ सुनाइङ् इङ्मे़भोसुरो, खे़ङ्हाॽरे़ सनारुङ् उवा मे़जोगुरो॥ खे़ङ्हाॽरे़ से़न्लप् खोमा पाःन्हाॽ उवा मे़जोगुरो, खुने़ॽ सियोनबा मनाहाॽ मे़त्तुसिरो, “खे़निॽ निङ्वाॽफुमाङ्ङिल्ले़ हाङ्युक् चोगुरो॥” 8 नुरिक्काङ् खे़प्से़ॽओ, ये़क्यक्को खे़ने़ॽ के़इक् के़गोबाहाॽ यम्बा इक्लाओ सोरिक् मे़सःत्ल साम्मे़लोरो॥ यहवे दाङ्बे़न् सियोन कोःक्माओ नुःङ्दारो, हे़क्केःल्ले़ खे़ङ्हाॽरे़ आबाङे खुन्छिॽ मिक्किल्ले़ खुने़ॽ मे़निसुरो॥ 9 यरुसले़म ये़क्यक्पा के़लुःम्बा के़धुप्पा पाङ्यक्से, सोरिक् पोःक्खे़म्मे़ॽआङ् निङ्वाॽ तार साम्लोराम्मे़ॽओ, थेआङ्भे़ल्ले़ यहवे दाङ्बे़ल्ले़ कुमनाहाॽ आःन्छिङ्मा पिरुसिआङ् वाॽरो॥ खुने़ॽ कुमे़ल्लुङ् हुङुआङ् यरुसले़म ये़क्यक्किन् थे़ॽरुआङ् ने़रो॥ 10 यहवे दाङ्बे़ल्ले़ आबाङे कुसेसे मुक्साम्मिन् ओसेःन्धाङ् चोगुरो, खुने़ॽ कुमनाहाॽ ताङ्से़ःप्तुसिरो हे़क्क्याङ् खे़न् इक्सादिङ् खाम्बेःक्मोबा के़रे़क् मे़न्छाम् याप्मिहाॽरे़ मे़निसुरो॥ 11 पेगे़म्मे़ॽ, पेगे़म्मे़ॽ, कॽयोलाम्बा पेगे़म्मे़ॽओ, आजिःन्जिःम्बा पाःन्हाॽ मे़सुसाम्मिन्ने़ॽओ! यहवे दाङ्बे़ल्ले़ कुहिम्मोबा सामाबुमा के़बङ्बासे, खे़प्मोलाम् लःन्दे़म्मे़ॽआङ् फे़राम्मे़ॽओ, हे़क्क्याङ् आबाङे सेसेसाङ्साङ् चोःक्कासिम्मे़ॽओ॥ 12 कर खे़निॽ के़जात्तिर पेःक्मा मे़बोङ्ने़ल्लो इग्र के़घे़त्तासिआङ् के़म्बेगिल्लो, थेआङ्भे़ल्ले़ यहवे दाङ्बे़न् खे़निॽ तगि तगि पेःक्लो, इस्राइलबा निङ्वाॽफुमाङ्ङिल्ले़ खे़निॽ एगाङ् ताङ्गे़से़ःप्तिरो॥ तुक्खे लाक्खे के़दुम्बा से़वारोबा 13 यहवे दाङ्बे़ल्ले़ पाःत्तुॽ, “ओमे़त्ताम्मे़ॽओ, आसे़वारोबे़ल्ले़ सिक्कुम्दिङ् निङ्वाॽरे़ याःम्बक् चोगुरो, खुने़ॽ थो पोक्, खुने़ॽ साॽरिक् कुमिङ्सो कुधाःङ्सो मे़जोगुरो॥ 14 यरिक् मनाहाॽरे़ मे़निसुल्ले़ खुन्छिॽ याम् चिजिङ् लॽरे़आङ् वये़रो, खुने़ॽ मना फाॽआङ् कुसिङ्ङे मे़न्निःत्ते थारिक् कुनारान् साॽरिक् फे़त्मे़लाःन्दु मे़बिरुआङ् वये़रो॥ 15 हे़क्केलॽरिक्के खुने़ॽ यरिक् मे़न्छाम् सुवाङ्हाॽ खुन्छिॽ निङ्वाॽ मासु पिरुसिरो खुने़ॽ चोगुल्ले़ हाङ्हाॽ स्वाःत् मे़म्बाःत्ते मे़युङ्लो, थेआङ्भे़ल्ले़ खुन्छिॽ मे़म्मे़त्छिङ्ङे के़वाॽबा पाःन्हाॽ खे़ङ्हाॽरे़ मे़निसुरो, खे़ब्याङ् खे़ङ्हाॽरे़ मे़ङ्घे़म्मे के़वाॽबा पाःन्हाॽ कुसिङ् मे़निःत्तुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.