यसैया 51 - लिम्बुयरुसले़म के़युङ्बाहाॽरे़ लागि आःन्छिङ्मा 1 यहवे दाङ्बे़ल्ले़ पाःत्तुरो, “साम्योनिमाओ के़बप्पा नु यहवे दाङ्बान् के़गोःप्पासे, खे़निॽग लुङ्याक्पेॽलाम् फुङ् लक्मना लःप्मनाआङ् के़वयिरो, लुङ् लःप्मादे़न्नोलाम् खे़निॽ लःप्मनानिङ्ङाङ् के़वयिरो, कन् पाःन्हाॽ खे़निॽ निङ्वाॽ इःत्ते़म्मे़ॽओ॥ 2 खिनिॽ थाःक्थे़बा अब्राहाम्मिन् हे़क्क्याङ् खे़निॽ के़गप्मा सारान् निङ्वाॽ इःत्ते़म्मे़ॽओ॥ आङ्गाॽ अब्राहाम्मिन् उःत्तुङ्ङिल्ले़ खुने़ॽरक् ए़क्लेःक् वये़रो, कर खे़न् आङ्गाॽ हाङ्वामुॽइ पिरुङ्लो खे़ब्याङ् खे़न् यरिक् फोसुङ्लो॥ 3 “यहवे दाङ्बे़ल्ले़ से़क्खासाङ् यरुसले़म के़युङ्बाहाॽ हाङ्हाङ् मे़त्तुसिरो, हे़क्क्याङ् खुने़ॽ खे़न् के़लुःम्बा हिम्यःक्हाॽ लुङ्माॽ तुक्तुआङ् ओमे़त्तुरो॥ खे़ब्याङ् खे़प्मोबा मुरे़क् खारे़क्पा ये़ःङ्घादे़न्निन् अदन सिङ्सेॽइक्के़न् कुसिङ् चोगुरो, हे़क्क्याङ् चा मे़न्नुॽमनाबा खाम्बेःक्के़न् यहवे दाङ्बे़ल्ले़ कुसिङ्सेॽइक् हे़क्के चोगुरो॥ पसःत् सःप्मा नु निङ्वाॽ तामा, हे़क्क्याङ् नुगे़न् पिमा नु साम्लोमारे़ इक्लान् खे़ॽयो खोदे़त्लो॥ 4 “आमनासे, आङ्गाॽ आबाःन्निन् खे़म्साम्मे़ॽओ, आङ्गाॽ आसुवाङ्से, आबाःन्निन् निङ्वाॽ पिरे़म्मे़ॽओ॥ आङ्गाॽओलाम् साम्योथिम् इङ्जाङ् लःन्लो, खे़ब्याङ् आङ्गाॽ आघासे़न्निन् मे़न्छाम् सुवाङ्हाॽरे़ खुन्छिॽ लागि ओःत्ति पोङ्लो॥ 5 आङ्गाॽ आसाम्योबा पाःन्हाॽ हारा निःत्ताङ् तारो, आङ्गाॽ आसे़न्लप्पिन् लाम्मोसा तार पत्लो, हे़क्क्याङ् आङ्गाॽ आमुक्साम्मिल्ले़ मे़न्छाम् सुवाङ्हाॽओ खासे़न् तारुङ्लो॥ वरःङ्ङिल्ले़ कुयाओ के़युङ्बाहाॽरे़ आङ्गाॽ ओमे़मे़त्तारो, खे़ब्याङ् आङ्गाॽ आमुक्साम्मो खे़ङ्हाॽरे़ लाम् ओमे़मे़त्तुरो॥ 6 खे़निॽ आबाङे मिक्किन् हन्दे़म्मे़ॽआङ् थाःङ् ताङ्साङ्बो ओमये़म्मे़ॽओ, हे़क्क्याङ् यो इक्सा खाम्बेःक्किन् ओमे़त्ते़म्मे़ॽओ॥ ताङ्साङ्बे़न् मिःक्खोॽ हे़क्के माबेःक्लो, खे़ब्याङ् इक्सादिङ् खाम्बेःक्किन् चाङ्देत् कुसिङ् कुद्रे़क् पोङ्बेःक्लो॥ खे़म्ब्याङ् खे़प्मो के़युङ्बाहाॽ सिजा कुइसिक् मे़सिरो, कर आङ्गाॽ आसे़न्लप्पिन् सदादिङ् आभे़ल्ले़साङ् वाॽरो, आङ्गाॽ आसाम्योबा पाःन्निन् आभे़ल्ले़आङ् मे़मे़क्ने़ल्लो॥ 7 “थेःन् नुबा चोक् खे़न् कुसिङ् के़निःप्पाहाॽरे़ खे़प्साम्मे़ॽओ, हे़क्क्याङ् खे़निॽ निङ्वाॽओ आङ्गाॽ आइङ्जाङ्ङिन् वाॽरो, मनाहाॽरे़ चे़क्या के़म्मे़त्तिल्ले़ मे़गिसे़म्मिन्ने़ॽओ, खे़ब्याङ् खे़ङ्हाॽरे़ कुनामे़न्छाॽ के़म्मे़त्तिल्ले़ खे़निॽ यङ्मा मे़स्ये़ॽइन्ने़ॽओ॥ 8 थेआङ्भे़ल्ले़ थक्पे़ल्ले़ चिरिक्के़न् चबा कुइसिक् खे़ङ्हाॽ चसिरो, खिःन् चबा कुइसिक् थाॽबाःल्ले़ खे़ङ्हाॽ चसिरो॥ कर आङ्गाॽ आसाम्योबा पाःन्निन् सदादिङ्ले़ लागि वाॽरो, आङ्गाॽ आसे़न्लप्पिन् थाःक्थाःक्को थारिक् वाॽरो॥” 9 पोगे़ॽओ, पोगे़ॽओ, यहवे दाङ्बाए, हे़क्क्याङ् आभाॽरे़ॽओ! के़मुक्साम्मिन् ओगप् चोगे़ॽआङ् आनिगे आभाॽरे़ॽओ! उनाहुरिबा ये़म्मो ओगप् के़जोगुबा हे़क्केए पोगे़ॽओ, राहाब आजाजाबे़न् स्याक् स्याक् के़भुॽबान् खे़ने़ॽएरो, खे़ब्याङ् खे़न् असेःक्किन् फ्याक् लस्सुर के़धुबुरो॥ 10 खे़ने़ॽए वरःङ्ङिन् चप्प्रे़क् के़जप्सुरो, तुङ्गोदिङ् वरःङ्ङोबा च्वाःत्तिन् के़हेसुरो, हे़क्क्याङ् खे़ने़ॽ के़से़ःप्तुसिबाहाॽ नाधाःम्बि तेॽमासिरे़ लागि वरःङ्सिगाङ् लाम् के़जोगु के़बिरुसिरो॥ 11 यहवे दाङ्बे़ल्ले़ कुमे़ल्लुङ् हुङुआङ् थे़ॽरुसिबाहाॽ मे़नुःङ् मे़दारो, खे़ङ्हाॽ सियोन ये़क्यक्को साम्मे़लोर मे़लाःत्लो, खम्ब्याङ् सदादिङ् सःप्मान् खे़ङ्हाॽरे़ खुन्छिॽ थे़गेःक्कोबा तिच हे़क्के पोङ्लो॥ खे़ङ्हाॽरे़ सःप्मा नु निङ्वाॽ तामान् मे़घोसुरो, खे़ब्याङ् हाःप्मा नु मे़रिङ्धक्मा मे़बोङ्ने़ल्लो॥ 12 यहवे दाङ्बे़ल्ले़ पाःत्तुॽ, “खिनिॽ हाङ्हाङ्वा के़बिबाङ्ग आङ्गाॽएरो, याःन्सुङ् हे़क्के इगे़ले़म्बाआङ् के़सिबा के़बेःक्पा मनाहाॽनु खे़निॽ थेआङ् के़गिसिबाबे? 13 खिनिॽ नावागे़न् चइःत् के़जोःक्पा ताङ्साङ्बे़न् के़जोःक्पाआङ् खे़न् के़घिङ्बा नु इक्सादिङ् खाम्बेःक्मे़ल्ले़ कुबुङ् के़युङ्बा, यहवे दाङ्बे़न् खिनिॽ निङ्वाॽ के़भेःत्छुम्बि? खिनिॽ मे़ङ्मा के़इःप्पाहाॽ नु खिनिॽ तुक्खे के़जाःप्पाहाॽरे़ खुन्छिॽ सिक्पोःक्माल्ले़ चोगुल्ले़ चक्मे़ल्लॽए खिनिॽ के़गिसिआङ् के़वयिबाबि? खे़ङ्हाॽरे़ खुन्छिॽ सिक्पोःक्माल्ले़ खिनिॽ सुमा के़न्छुक्तिन्लो॥ 14 किमे़ल्ले़ युम्सुङ्मा के़बोङ्बा मे़दे़म्सु मे़देॽरुसिबाहाॽ हाराए मे़ले़रुसिरो॥ खे़ङ्हाॽ पुङ्लाहिम्मोबा याक्फाङ्ङो मे़न्छिने़ल्लो, खे़ङ्हाॽरे़ खुन्छिॽ लागि चामा थुङ्माहाॽ मे़सुःन्ने़लो॥ 15 थेआङ्भे़ल्ले़ आङ्गाॽ यहवे दाङ्बा खे़ने़ॽ के़निङ्वाॽफुमाङ्आरो, वरःङ्ङिन् छिम्लिङ् छिम्लिङ् के़मे़प्पा, हे़क्क्याङ् वाभे़ल्ले़ङ्हाॽ हुःक्ल के़याःम्बा आङ्गाॽएरो, आङ्गाॽ आमिङ् मुक्साम्दाङ्बा यहवे दाङ्बारो! 16 आङ्गाॽ आबाःन्जाःक्किन् खे़ने़ॽ के़म्ब्राओ केःत्तुङ् पिने़आङ् वाॽरो आङ्गाॽ आहुक् साम्मिःक्खुङ्बाल्ले़ खे़ने़ॽ थेःक्ने़आङ् वाॽरो— आङ्गाॽ ताङ्साङ्बे़न् आबाङे कुबप्मादे़न्नो फत्छुङ्ङाङ् पत्लो, हे़क्क्याङ् इक्सादिङ् खाम्बेःक्मे़ल्ले़ कुबुङ् यक्खुङ्ङाङ् युङ्लो, खे़ब्याङ् सियोन ये़क्यक्किन् ‘आमनाने़’ मे़त्तुङ्ङाङ् वाॽरो॥” यरुसले़मरे़ लागि साम्दिङ् 17 यरुसले़ःम्मे, सोरे़ॽओ! सोरे़ॽओ हे़क्क्याङ् पोगे़ॽओ! यहवे दाङ्बे़ल्ले़ साॽरिक् कुसाक्के़न् पोगे़ल्ले़ थुङ्मा के़बिरे़बा कुसिक्के़ल्ले़न् चल्लाङ्ना खोर्यान् खे़ने़ॽ के़धुङुआङ् के़वाॽरो॥ खे़ने़ॽ खे़न् कुयुःन्दाङ्वाःन्नाङ् सरक् के़धुङुआङ् खे़ने़ॽ के़लाङ्हाॽ ए़त्छिङ्लो॥ 18 खे़ने़ॽ लाम् ओःन्गे़धाक्पा आत्तिन्नाङ् होप्लो, के़मनाहाॽलुम्मो के़हुक् के़दे़म्बाआङ् लाम्गे़लोबा हाःत्ताङ् मे़होप्लो॥ 19 कन् ने़त्छि पयम् यम्बा तुक्खेहाॽ खे़ने़ॽ के़सम्धाङ् इदारो— खे़ने़ॽ हाःत्ले़ हाङ्हाङ् मे़प्मा के़सुक्पे? खे़ने़ॽ के़लाजेन् थङ्ङिल्ले़ खाप्पुथ्यःङ् पोःक्खे़आङ् ने़रो, के़मनाहाॽ साक्किल्ले़ तरुसिआङ् मे़वाॽरो, खे़ने़ॽ हाङ्हाङ् के़मे़प्पा हाःत्ताङ् होप्लो॥ 20 के़रे़क् लाम्हाॽरे़ कुया कुदिङ् के़मनाहाॽ खुन्छिॽ थना ले़क्खे़आङ् हर्जुॽ मे़जोःन्दे़आङ् मे़ने़रो॥ खे़ङ्हाॽग सावागे़म्बाल्ले़ कुइओ के़धाबा पे़ःङ्वा कुसिक् मे़लॽरो, खे़ङ्हाॽओ यहवे दाङ्बे़ल्ले़ कुसिक् पोःक्मे़न् थासुआङ् वाॽरो॥ हे़क्क्याङ् खुन्छिॽ निङ्वाॽफुमाङ्ङिल्ले़ साॽरिक् फे़ःक्तुसिआङ् मे़वाॽरो॥ 21 खे़ल्ले़चोगुल्ले़ कन् खे़प्से़म्मे़ॽओ, तुक्खे के़दुम्बासे, के़मसिङ्बासे, कर सेजःङ्वाःल्ले़ग मेःन्लो, 22 खिनिॽ ताङ्गे़से़ःप्पा यहवे दाङ्बा खिनिॽ निङ्वाॽफुमाङ्ङिल्ले़ अक्खे पाःत्तुॽ, “आसाक्के़न् पोगे़आङ् थेआङ् मे़न्निबे़न्निल्ले़ खिनिॽ पिनिङ्बा चल्लाङ्ना खोर्यान् खे़त्तुङ्ल पत्तारो॥ खिनिॽ लाङ् ए़त्छिङ्ल के़याःम्बा चल्लाङ्ना खोर्यान् आल्लआङ्धो आफाल्ले़आङ् थुङ्मा मे़बोङ्ने़ल्लो॥ 23 खे़न् चल्लाङ्ना खोर्यान् खिनिॽ ताप्फे़ःल्लिक् के़मे़प्पाहाॽ पिरुङ्सिङ्लो, खे़ङ्हाॽरे़ खिनिॽ अक्खे के़म्मे़त्तिआङ् मे़वये़रो, ‘खिनिॽ साम्बोन्नाङ् लम्बे़त् ने़साम्मे़ॽओ आनिगे खिनिॽ सम्धाङ् लाङ्घेगिगे़रो॥ हे़क्क्याङ् खिनिॽ एःक्के़न् खाम्बाङ् कुसिङ् चोगे़म्मे़ॽओ खे़ब्याङ् लाङ्घेःक्मा लाम् हे़क्तङ्बा पोङ्लरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.