यसैया 50 - लिम्बुइस्राइलरे़ कुलायो हे़क्क्याङ् से़वारोबाल्ले़ इङ्जाङ् इःत्तुबा 1 यहवे दाङ्बे़ल्ले़ अक्खे पाःत्तुरो, “आङ्गाॽ नाजङ्सक् साप्तुङ्पिरुङ्बाल्ले़ चोगुल्ले़ के़म्मा मे़बाङ्सु मे़देसुआङ् वये़बाबि? इग्र आङ्गाॽ आत्तिन् सिङ्नात्साबे़ल्ले़ कुहुक्को खे़निॽ सङ्निङ्बे? मेःन्लो, खे़निॽ लायोहाॽरे़ चोगुल्ले़ खे़निॽ के़म्सङ्सिबारो, हे़क्क्याङ् खे़निॽ माःन्नाङ् खे़निॽ लायोल्ले़ चोगुल्ले़ माःङ्घा मे़बाङ्सुबारो॥ 2 आङ्गाॽ खे़ॽयो फे़राङ्ङिल्ले़ थेआङ् हाःत्ताङ् होःप्ते़बाबे? आङ्गाॽ पाःन्छाःत्तुङ्सिङ्ङे़ल्ले़ नुगप् के़बिबा थेआङ् एःन्नाङ् मे़वये़ने़म्बाबे? थे आङ्गाॽ आहुक्किन् खे़निॽ थे़ॽमा मे़न्छुक्मना पोःक्खे़आङ् वये़बि? थे खे़निॽ ताङ्से़ःप्मारे़ लागि आङ्गाॽ आमुक्साम्मिन् सुःम्बि? आङ्गाॽ वरःङ्ङिन् चबे़ःत्छिक् फे़ःक्तुङ्ङिल्ले़ खे़न् चप्प्रे़क् चप्लो, वहःङ्हाॽ आङ्गाॽ मुरे़क् खारे़क्पा ये़ःङ्घादे़न् चोगुङ्लो॥ च्वाःत्तिन् सुःम्बाल्ले़ चोगुल्ले़ खे़प्मोबा ङाहाॽ हर्गिॽ मे़गिरो खे़ब्याङ् वामिःक्माल्ले़ मे़सिरो॥ 3 आङ्गाॽ ताङ्साक्पान् माक्ताङ्बा पोङ्ल चोगुङ्लो, हे़क्क्याङ् खे़न् सगि तेःत्तिल्ले़ ते़प्तुङ्लो॥” 4 के़नाबाहाॽ के़धुम्बा चोःक्मा सुक्तुङ्सिङ्ल फाॽआङ् यहवे दाङ्बे़ल्ले़ कुसिक्कुम् निङ्वाॽबा पाःन्जाःक्किन् पिराङ्ङाङ् वाॽरो॥ खुने़ॽ आङ्गाॽ तानाम् थक्मा फोङ्ङारो के़हुॽसिङ्बा हे़क्के नुरिक्काङ् खे़म्मारे़ लागि खुने़ॽ आङ्गाॽ आने़क्खोॽबान् हन्दु पिआरो॥ 5 यहवे दाङ्बा निङ्वाॽफुमाङ्ङिल्ले़ आङ्गाॽ आन्भाक्किन् हन्दाङ् पिराङ्ङाङ् वाॽरो, हे़क्क्याङ् आङ्गाॽ कुदक्ले़ङ्वाओ पिफ्युङ् मे़न्जोःक्पाल्लो आङ्गाॽ एगाङ् मे़नुःक्खाङ्ङिल्लो॥ 6 आङ्गाॽ याप्मि के़हिप्पाहाॽ आएःक्किन् ताःक्तुङ् पिरुङ्सिङ्लो, हे़क्क्याङ् आम्धोॽ के़आःङ्बाहाॽ आन्देङ्बे़न् हिसुङ् पिरुङ्सिङ्लो॥ याप्मि किनाःन्दि के़बिबाहाॽ नु याप्मि थ्याःत् के़धोक्पाहाॽलाम् आङ्गाॽ आनारान् मे़जिक्खुङ्ङिल्लो॥ 7 कर आङ्गाॽ सिरिङ्ममा मे़बोङ्ने़ल्लो, थेआङ्भे़ल्ले़ यहवे दाङ्बा निङ्वाॽफुमाङ्ङिल्ले़ फाॽआरो॥ कल्ले़चोगुल्ले़ आङ्गाॽ आनारान् थिङ्धिङ् मे़त्तुङ्लो, कुनिङ्वाॽ इसिःक् चोःक्मा निङ्सेक् चोगुङ्लो, खे़ब्याङ् आङ्गाॽ आना मे़धाने़न् फाॽआङ् आङ्गाॽ निसुङ्लो॥ 8 आङ्गाॽ आप्तिक् मेःन्नेबा चोःक्काॽ फाॽआङ् पाःप्मा के़सुक्पे़न् आबेसाङ् वाॽरो॥ कल्ले़चोगुल्ले़ आङ्गाॽ आदक्ले़ङ्वाओ एःल्ले़ पाःन्धिक्काबे? आनिॽ लु नादुम्दुम्बा पेगिरो! आङ्गाॽ पाःन्गे़धिक्पा हात् वाॽ? खे़न् आङ्गाॽनु खे़माॽ चोःक्लरो! 9 यहवे दाङ्बा निङ्वाॽफुमाङ्ङिन् आबाङे आङ्गाॽ ले़प्माङ् पोङ्ङाङ् पाःत्लो॥ आङ्गाॽ आत्तिल्ले़ पान् थिक्मा सुक्काबे? खे़ङ्हाॽ के़रे़क् चाङ्देत् कुसिङ् कुद्रे़क् मे़बोङ्लो, थक्पाल्ले़ खे़ङ्हाॽ चसिरो॥ 10 खे़निॽओ हाःत्ले़ यहवे दाङ्बे़न् मिङ्सो इङ्धाङ् पिरुबे? हे़क्क्याङ् आत्तिल्ले़ खुने़ॽ कुसे़वारोबे़ल्ले़ कुबाःन्निन् खे़प्सुबे? ओःत्ति मेःन्ने खामाक्मो लाङ्गे़घेःक्पे़ल्ले़ यहवे दाङ्बान् ताःक्पो चोगुररो, हे़क्क्याङ् आबाङे कुनिङ्वाॽफुमाङ्ङो कुनिङ्वान् युक्खुररो॥ 11 कर आल्ल खिनिॽ के़रे़क् आत्तिन्हाॽरे़ मि के़हाःन्दुम् हे़क्क्याङ् हुरुरु लॽरिक् के़हाॽबा मिजोःत्ते़न् के़गाप्पासि, खिनिॽ पेगे़म्मे़ॽओ, खिनिॽ के़हाःन्दुम्बा मि नु मिजोःत्ते़ल्ले़ ओःत्तिओ लाङ्घेगे़म्मे़ॽओ॥ खे़निॽ आङ्गाॽ आहुक्कोलाम् हाबा कन् के़दुमुम्लो— खिनिॽ के़साक्पा तुक्खेलाक्खेओ के़ध्ये़ॽइरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.