यसैया 5 - लिम्बुचे़ल्ले़क्सेॽ इक्ताप्पोबा साम्लो 1 आङ्गाॽ आसिराॽ के़धाङ्बे़न् खुने़ॽ कुजे़ल्ले़क्सेॽ इक्के़ल्ले़ कुयाःम्बेओ लत्छा साम्लोधिक् साम्मे़त्तुङ्लो॥ साॽरिक् चागे़नुॽबा कोःक्मा सम्धाङ् आङ्गाॽ लुङ्माॽ हिःप्तुङ्बा मनाःल्ले़ लत्छा कुजे़ल्ले़क्सेॽ इक्थिक् खे़त्थो ने़स्से़रो॥ 2 खे़न् मनाःल्ले़ खे़न् यान् मयुरो हे़क्क्याङ् खे़ॽयोबा लुङ्हाॽ खप्सुआङ् लाप्फुसुरो, हे़क्क्याङ् खे़ॽयो के़रे़क्नुःल्ले़ नुबा चे़ल्ले़क्सेःन् लेःत्तुरो॥ खे़न् चे़ल्ले़क्सेॽ इक्किल्ले़ कुलुम्मो लत्छा याक्माहिम्धिक् चोगुरो खे़ब्याङ् याक्पेःल्ले़ कुबेसाङ् लत्छा चे़ल्ले़क्सेॽ एःम्मादे़न् थिक्काङ् चोगुरो॥ हे़क्क्याङ् के़लिम्बा चे़ल्ले़क्सेॽ थोःक्पिला फाॽआङ् खे़ल्ले़ निङ्साङ् चोःक्मा हेःक्तुरो कर खे़ॽयोग के़सुःप्पा चे़ल्ले़क्सेॽनि थोःक्ते़रो॥ 3 कल्ले़चोगुल्ले़ आङ्गाॽ आसिराॽ के़धाङ्बे़ल्ले़ पाःत्तुरो, “यरुसले़म नु यहुदाबा मनासे, आङ्गाॽ नु आजे़ल्ले़क्सेॽ इक्लुम्मो खासे़न् चोगे़ आबिरे़ॽरो॥ 4 आङ्गाॽ आजे़ल्ले़क्सेॽ इक्किल्ले़ कुलागि मे़न्जोःक्के के़वाॽबा याःम्बक् थे वाॽआङ्बे? के़लिम्बा चे़ल्ले़क्सेॽनि थोःक्कि फाॽआङ् निङ्साङ् चोगुङ्लो कर थेआङ् के़सुःप्पा चे़ल्ले़क्सेॽ थोःक्ते़बाबे? 5 आल्ल आङ्गाॽ आजे़ल्ले़क्सेॽ इक्किन् थे़मा चोगुङ्ॽ, आङ्गाॽ खे़ल्ले़ कुयाःम्बेओ खे़निॽ मे़त्निङ्लो— आङ्गाॽ खे़ॽयो फाङ्मनाआङ् के़बप्पा कुधेःक्माहाॽ हाॽयाक् वयाक् आःक्खुङ्देसुङ्लो, हे़क्क्याङ् खे़न् खाप्पुथ्यःङ् पोङ्लो॥ खे़न् चे़ल्ले़क्सेॽ इक्किन् थेःक्मारे़ लागि से़प्मनाबा लुङ्धाक्हाॽ लुःन्दुङ्देसुङ्लो, खे़म्ब्याङ् खे़न् चे़ल्ले़क्सेॽ इक्किन् चिराक् चिराक् मे़लाःक्तुरो॥ 6 आङ्गाॽ खे़न् मुरे़क् खारे़क् चोगुङ्ङाङ् लाप्फुसुङ्लो, खे़न् हाःत्ले़आङ् मे़न्छित्तुन् मे़न्छाःक्तुन्लो॥ खे़ॽयो सेर्द्राःक्मा नु तिङ्हाॽरक् लिङ्लो आङ्गाॽ खाॽमिःत्ते़न्नाङ् खे़ॽयो वहित् मे़धाने़ल्ल फाॽआङ् इङ्जाङ् पिरुङ्लो॥” 7 मुक्साम्दाङ्बा यहवे दाङ्बे़ल्ले़ कुजे़ल्ले़क्सेॽ इक्किङ्ग इस्राइलबा हिम्सयङ्लो, हे़क्क्याङ् यहुदाबा मनाहाॽग खुने़ॽ कुयाम्नाःम्मिल्ले़ सिङ्सेॽ इक्लो॥ खुने़ॽग नुबा खासे़न् पोङ् के़लॽबा निङ्साङ् चोगुरो, कर माक्खिॽ वरक् पोःक्खे़रो, साम्योबा पोङ् के़लॽबा निङ्साङ् चोगुरो, कर तुक्खेलाक्खे नु मे़रिङ् पोःक्खे़रो॥ यहुदाबा मनाहाॽरे़ खुन्छिॽ ताप्फे़ःम्बा याःम्बक् 8 आत्तिन् मनाहाॽरे़ वेॽरे़ लागि चुक्सा खाम्बेक् ले़प्थिक्काङ् मे़न्याःक्के थारिक् यरिक् हिम्ले़ हिम् मे़इङु, हे़क्क्याङ् प्याङ्सिगे़न् इक्ताप्ले़ इक्ताप् मे़इङुॽ खे़ङ्हाॽग मे़जिःत्ते़ मे़स्ये़रो! थेआङ्भे़ल्ले़ खे़ङ्हाॽ लाजेॽओ ए़क्लेःक् युङ्मा पोङ्लो॥ 9 मुक्साम्दाङ्बा यहवे दाङ्बे़ल्ले़ आङ्गाॽ खे़प्सुङ्ल पाःत्तुआङ् वाॽरो, “से़क्खासाङ् यम्बयम्बा हिम्हाॽ चिजि खक्खक् पोङ्लो, हे़क्क्याङ् नुबा पयम् यम्बा हिम्हाॽआङ् चिजि खक्खक् पोङ्लो॥ 10 थोङ्माल्ले़ थिबोङ् कुगाप् पित् के़लाःप्पा चे़ल्ले़क्सेॽ इक्को फुलक् ङासि चे़ल्ले़क्सेॽ थिरक् लःन्लो, हे़क्क्याङ् फुलक् ङाबोङ् याॽरिःम्बा के़लाःप्पो फुलक् लिसिरक् कुजाॽ थोःक्लो!” 11 तानाम्सा के़बोःक्पाआङ् थि के़धुङ्बा, हे़क्क्याङ् थिःल्ले़ मयुसिआङ् ले़रे़म्भे़ना पोङ्मारे़ लागि आक्खो से़न्दिक् थारिक् के़युङ्बा मनाहाॽग मे़जिःत्ते़ मे़स्ये़रो! 12 खे़ङ्हाॽरे़ खुन्छिॽ साभःङ्जाहाॽओ अन्मे खिङ्मनाबा तुङ्ना नु तुःङ्गे, के नु मुफ्रामा हे़क्क्याङ् सेजःङ्वा वाॽरो, कर खे़ङ्हाॽरे़ यहवे दाङ्बे़ल्ले़ कुयाःम्बक्किन् खे़म्घे़म् निनिआङ् मे़ल्लाप्तुन्लो॥ खे़ङ्हाॽरे़ खुने़ॽ कुहुक्किल्ले़ चोगुबा याःम्बक्किन् मिङ्सो इङ्धाङ्ङे मे़म्बिरुन्लो॥ 13 खे़ल्ले़चोगुल्ले़ आमनाहाॽरे़ खुन्छिॽ ने़हिनिङ्वाॽ होःप्मारे़ खे़ङ्हाॽ साक्के़ल्ले़क् लाजेॽ ले़प्मा मे़बाङ्घुसिरो, हे़क्क्याङ् खे़ङ्हाॽरे़ मिङ्सो इङ्धाङ् मे़बिरुसिबा मनाहाॽ साक्किल्ले़ मे़सिरो हे़क्क्याङ् मनालुप्हाॽ वामिःक्माल्ले़ मे़सिरो॥ 14 कल्ले़चोगुल्ले़ खे़मायङ्सङ्ङिल्ले़ कुसिक्लाःक्मे़न् फोसुआङ् वाॽरो, हे़क्क्याङ् कुम्ब्राःन् आत्तातान्ने यम्बा हा मे़त्तुआङ् ने़रो॥ खे़ङ्हाॽरे़ खुन्छिॽ सुहाङ्युक्पाहाॽ खे़ब्याङ् मनालुप्हाॽ, खे़ङ्हाॽनु खे़माॽ के़जोःक्पा मनाहाॽ नु के़अःक्पा के़भिःक्पाआङ् निङ्धे़न्धे़न् के़मे़प्पाहाॽ खे़न् सिगाङ् मे़लाःत्लो॥ 15 अक्खेलॽरिक् यम्बा के़ले़ङ्सिङ्बा मनाहाॽ यो खाम्बाङ्ङो थारिक् मे़धारो॥ हे़क्क्याङ् आङ्दिङ् के़लॽबा मनाहाॽ चुङ्जिगे़न् नःम्नःम्बा मे़बोङ्लो, खे़ब्याङ् के़हे़न्छिङ्बा मनाहाॽरे़ खुन्छिॽ मिक्किन् सुरे़म् लॽरो॥ 16 कर मुक्साम्दाङ्बा यहवे दाङ्बे़ल्ले़ कुमिङ्ङिन् खासे़न्लाम्बा थोधो पोङ्लो, हे़क्क्याङ् निङ्वाॽफुमाङ्ङिन् सेसेबा चोक्लो फाॽआङ् आबाङे कुसाम्योबालाम् ओसेःन्धाङ् चोःक्सिङ्लो॥ 17 खे़ब्याङ् मे़ल्लुक्हाॽ आबाङे चाराम्दे़न्नो हे़क्के चारामे़राम्लो, हे़क्क्याङ् थुःम्बाहाॽरे़ग याङ्साकुन्धेसाबाहाॽरे़ खुन्छिॽ के़लुःम्बा नु के़यम्बा के़याःक्पा लुम्मो मे़जरो॥ 18 से़क्खा मेःम्बा इङ्ले़क्के पाःन्निल्ले़ के़घेःङ्बा हे़क्क्याङ् लायोहाॽ खुन्छिॽ एगाङ् एगाङ् के़उःङ्बा के़दाःप्पा मनाहाॽरे़ लागि खुन्छिॽ मे़क्मासिमे़न् खा से़क्खाए वाॽरो, खे़ङ्हाॽग मे़जिःत्ते़ मे़स्ये़रो! 19 खे़ङ्हाॽरे़ निङ्वाॽफुमाङ्ङिन्नाङ् किनाःन्दि मे़बिरुआङ् मे़बाःत्तुरो, “हाराआङ् थेहाॽइ चोगे़ॽओ, थे चोःक्मा के़सुक्तु आनिगे चाल्लिक् ओसेःन् आधाक्ते़ॽओ॥ इस्राइलबा सेसे निङ्वाॽफुमाङ्ङिल्ले़ चोःक्मा निङ्सेःक् के़जोगुबे़न् आनिगे ओमे़प्मा निङ्वाॽ कत्तुम्बे़रो॥” 20 खे़निॽग के़जिःत्ति के़स्ये़ॽइरो, खे़निॽ नुबा पाःन्निन् ताप्फे़ःम्बा नु ताप्फे़ःम्बा पाःन्निन् नुबा के़बाःत्तुम्लो, हे़क्क्याङ् से़न्दिक्किन् ले़न्दिक् नु ले़न्दिक्किन् से़न्दिक् के़बाःत्तुम्लो हे़क्क्याङ् के़घिःक्पे़न् के़लिम्बा नु के़लिम्बे़न् के़घिःक्पा के़बाःत्तुम्लो॥ 21 आबाङे ओगे़मे़त्छिङ्बाआङ् सिक्कुम्निबा नु आबाङे खुन्छिॽ निङ्वाॽबो चाःप्पादिगे़ के़लॽबाहाॽ मे़जिःत्ते़ मे़स्ये़रो॥ 22 चे़ल्ले़क्सेॽ थि थुङ्मा के़धुम्बा के़ले़ङ्सिङ्बा, हे़क्क्याङ् थिओ आममबा फुप्मा के़ले़बा मनाहाॽग मे़जिःत्ते़ मे़स्ये़रो! 23 अक्तङ्बा मनाहाॽरे़ सुरुत्याङ् मे़जआङ् ताप्फे़ःम्बा याःम्बक् के़जोःक्पाहाॽ आप्तिक् मेःन्नेबा मे़जोगुसिरो, हे़क्क्याङ् कुदोःप्मा याःम्बक् के़जोःक्पाहाॽ खासे़न् मे़ल्लोःन्दुन् मे़म्बिरुसिन्लो॥ 24 खे़ल्ले़चोगुल्ले़ मिःल्ले़ याॽलाङ्ङिन् हाॽरुआङ् खाप्पुथ्यःङ् चोगुबा नु के़हेबा याःन्निन् मिःल्ले़ हाॽरुआङ् खाप्पुथ्यःङ् पोङ्बा कुइसिक् खे़ङ्हाॽरे़ खुन्छिॽ साःप्पे़न् किबेःक्लो॥ खे़ब्याङ् खे़ङ्हाॽरे़ खुन्छिॽ फुङ्ङिन्नाङ् खाम्हिःक् पेबा कुइसिक् पे़बेःक्लो थेआङ्भे़ल्ले़ खे़ङ्हाॽरे़ मुक्साम्दाङ्बा यहवे दाङ्बे़ल्ले़ कुधिम्मे़न् इःप्मा नाःप्मा मे़ले़रुआङ् वाॽरो॥ हे़क्क्याङ् इस्राइलबा सेसेबा निङ्वाॽफुमाङ्ङिल्ले़ कुइङ्जाङ्ङिन् कुनामे़न्छाॽ मे़मे़त्तुआङ् वाॽरो॥ 25 खे़ल्ले़चोगुल्ले़ यहवे दाङ्बान् आबाङे कुमनाहाॽरे़ खुन्छिॽ तक्ले़ङ्वाओ कुसिक् पोगे़आङ् वाॽरो॥ खे़न् मनाहाॽ खुम्दिङ् पिमासि फाॽआङ् खुने़ॽ कुहुक्किन् थाःङ् फोःक्खुआङ् पत्लो, हे़क्क्याङ् आल्ल खे़ङ्हाॽ हिप्तुसिरो॥ कोःक्मा फाङ्जङ् थे़गु माङ्वाहाॽ यङ्लो खम्ब्याङ् के़सिबा मनाहाॽरे़ खुन्छिॽ नासिङ्गे़न् चेधक्लाहाॽ माराम्हाॽओ ताम्जिॽ कुइसिक् ने़रो॥ कम्भ्यारिक्साङ् खुने़ॽ कुसाक्के़न् पोःक्मा मे़जिप्तुन्नाङ् खुम्दिङ् पिमासिरे़ लागि आल्लसाङ् खुने़ॽ कुहुक्किन् हाबा थाःङ् पोगे़आङ् पत्लो॥ 26 खुने़ॽ माःङ्घाबा मे़न्छाम् सुवाङ्हाॽरे़ खुन्छिॽ लागि लत्थिक् निसा लेःत्तुरो, हे़क्क्याङ् खुने़ॽ योॽबा लाजेःल्ले़ कुनुप्मो थारिक् के़युङ्बा सुवाङ्हाॽ ख्योःक्वालाम्बा उःत्तुसिरो, खे़ङ्हाॽ हाराआङ् चाःत्चाःत् लॽरिक् मे़दारो! 27 खे़ङ्हाॽओ आत्तिन्हाॽआङ् मे़न्नाने़न्लो हे़क्क्याङ् खुन्छिॽ लाङ्हाॽआङ् मे़दोःक्ने़न्लो, खे़ङ्हाॽओ आत्तिन्हाॽआङ् इम्धक्वा मे़ल्लोने़न्लो॥ खे़ङ्हाॽरे़ खुन्छिॽ मे़युप्सुबा फॽइःन् वाःङ्सःक्सःक्पा मे़बोङ्ने़न्लो, खे़ङ्हाॽरे़ खुन्छिॽ लाङ्सुःप्पिल्ले़ कुघेःङ्मे़न् मे़बुॽने़न्लो॥ 28 खे़ङ्हाॽरे़ खुन्छिॽ तोःङ्हाॽ हासम्सम्बा चोक्लो, हे़क्क्याङ् थङ् चोःक्मारे़ लागि लिओ मे़घिङ्घुआङ् पत्लो॥ खे़ङ्हाॽरे़ खुन्छिॽ अन्हाॽरे़ लाङ्सुःप्पिन् लुङ्से़रुङ्बा कुइसिक् चोक्लो, खे़म्ब्याङ् खे़ङ्हाॽरे़ खुन्छिॽ अन्लाहाॽरे़ काप्लोःक्किङ्ग सुरित् केजङ् हे़क्के के़सुक्पा चोक्लो॥ 29 खे़ङ्हाॽ मे़अःक्के़ल्ले़ केबे़न् हुःक्पा कुइसिक् लॽरो, हे़क्क्याङ् खे़ङ्हाॽ के़वे़म्बा केबे़न् हे़क्के मे़हुःक्लो॥ खे़ङ्हाॽरे़ सान् मे़दे़म्सुल्ले़ हागाःक् हागाःक् मे़लॽरो, खे़ब्याङ् खे़न् सान् खे़ङ्हाॽलाम् के़नाप्पा हाःत्ताङ् होप्लो॥ 30 खे़न् ये़न्नो इस्राइलिहाॽरे़ खुन्छिॽ तक्ले़ङ्वाओ वाहःङ्ङिन् सःक्पा हे़क्के खे़ङ्हाॽ मे़अःक्लो॥ हे़क्क्याङ् मनाहाॽरे़ लाजेन् ओमे़मे़त्तुल्ले़, खे़ॽयो माक्चिगे़न् खामाक्मा नु तुक्खे लाक्खेरक् खे़ङ्हाॽरे़ मे़निसुरो, खे़ब्याङ् खाओःप्मान्नाङ् खाॽमिःप्पाल्ले़ माक्ताङ्बा चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.