Biblia Todo Logo
Bib sou entènèt

- Piblisite -

यसैया 48 - लिम्‍बु


निङ्‌वाॽफुमाङ्‌ङिन् ताये़म्‍ले़न् यहवे दाङ्‌बा

1 “याकुबरे़ कुमुॽइदाङ्‌सासे, खे़निॽग इस्राइल मिङ्‌लाम् के़म्‍उःत्तिआङ् के़वयिरो, हे़क्‍क्‍याङ् यहुदारे़ कुधाःक्‍लाम् के़द्‌ये़ॽइबारो॥ यहवे दाङ्‌बे़ल्‍ले़ कुमिङ्‌ङो खे़निॽ माङ्‌गे़हे़क्‍कासिरो हे़क्‍क्‍याङ् इस्राइलबा निङ्‌वाॽफुमाङ्‌ङिल्‍ले़ कुमिङ्‌ङो पेलिगे़न् तुवा के़जोगिरो, कर से़क्‍खा नु साम्‌योनिमो के़न्‍जोगुम्‍मिल्‍लो॥

2 खे़निॽग सेसे ये़क्‌यक्‍कोबा यक्‌युङ्‌बादिगे़ के़लॽरिरो हे़क्‍क्‍याङ् इस्राइलबा निङ्‌वाॽफुमाङ्‌ङो निङ्‌वाॽ के़युक्‍खुम्‍लो, मुक्‍साम्‍दाङ्‌बा यहवे दाङ्‌बान् खुने़ॽ कुमिङ्‌लो, कन् पाःन्‍निन् खे़प्‍से़म्‍मे़ॽओ—

3 “आसेःन्‍छा थे पोङ्‌मा के़बोङ्‌बा वये़ खे़न् आङ्‌गाॽ मे़त्‍निङ्‌ङाङ् वये़रो॥ हे़क्‍क्‍याङ् आङ्‌गाॽ खे़न् ओःन्‍धाक्‍निङ्‌लो, खे़न् आङ्‌गाॽ खिमो चोगुङ्, खम्‍ब्‍याङ् खे़न् पाःन्‍हाॽ पोःक्‍खे़रो॥

4 थेआङ्‌भे़ल्‍ले़ खे़निॽ पाःन्‍मे़ङ्‌घे़म्‍मनाबा के़वयिरो, खे़न् आङ्‌गाॽ कुसिङ् निःत्तुङ्‌ङाङ् वयाङ्‌लो, हे़क्‍क्‍याङ् खे़निॽ निगिःङ्‌माहाॽग मे़न्‍दुःङ्‌मनाबा फे़न्‍जेॽ कुसिङ् चोगे़रो, खे़निॽ त्‍वाबे़ङ्‌ग कासा हे़क्‍तङ्‌बा चोगे़रो॥

5 कल्‍ले़चोगुल्‍ले़ कन् पाःन्‍हाॽ आङ्‌गाॽ तगिए खे़ने़ॽ मे़त्‍ने़बारो, कन्‍हाॽ पोङ्‌मानुःल्‍ले़ तगिए आङ्‌गाॽ खे़ने़ॽ चे़क्‍ने़रो॥ हे़क्‍केलॽरिक् खे़ने़ॽ कम्‍भ पाःप्‍मा के़ङ्‌घोसुल्‍लरो, ‘आङ्‌गाॽ आनावाइत्‍लाहाॽरे़ कन् मे़जोगुबारो, आङ्‌गाॽ आसिङ् चइःत्तिल्‍ले़ नु साम्‍म्‍याङ् युप्‍पा माङ्‌ङिल्‍ले़ कन्‍हाॽ इङ्‌जाङ् चोगुबारो॥’

6 “खे़ने़ॽ कन् पाःन्‍निन् के़घे़प्‍सुआङ् के़वाॽरो, खे़ने़ॽ कन् के़रे़क् पाःन्‍हाॽ ओमे़त्ते़ॽओ॥ थे खे़ने़ॽ कन्‍हाॽ नसान् के़न्‍जोगुम्‍बि? आल्‍लआङ्‌धो आङ्‌गाॽ खे़ने़ॽ कुसङ् पाःन्‍हाॽ मे़त्‍ने़रो, खे़ने़ॽ के़ल्‍ले़सुम्‍बा सिबिॽ पाःन्‍हाॽ चे़क्‍ने़रो॥

7 खे़ङ्‌हाॽ आल्‍लो नावागे़न् चइःत् चोगे़बारो, तगि खे़ङ्‌हाॽ होःप्‍ते़रो, खे़ल्‍ले़ कुयाःम्‍बेओ आइन्‍नुःल्‍ले़ तगि मे़ङ्‌घे़म्‍मे के़वये़रो॥ कल्‍ले़चोगुल्‍ले़ खे़ने़ॽ पाःप्‍मा के़न्‍छुक्‍तुन्‍लो, ‘ओवा, आङ्‌गाॽ खे़न् निसुङ् ले़सुङ्‌ङाङ् वयाङ्‌लो॥’

8 खे़ने़ॽ मे़ङ्‌घे़म्‍मे के़वये़रो, हे़क्‍क्‍याङ् मे़ल्‍ले़एआङ् के़वये़रो॥ उनाहुरिआङ्‌धो खे़ने़ॽ के़ने़क्‍खोॽबान् मे़न्‍हन्‍ने वये़रो, खे़ने़ॽ आक्‍तङ्‌बा इङ्‌ले़क्‍स्‍वाबा के़जोःक्‍लो फाॽआङ् आङ्‌गाॽ कुसिङ् निःत्तुङ्‌लो, सागे़वाःन्‍छिङ्‌बा ये़न्‍नाङ्‌धोए पिफ्‍युङ्‌बा के़म्‍मे़त्ते़आङ् के़वये़रो॥

9 “आबाङे आमिङ् नु आमिमिदिङ्‌ले़ लागि आङ्‌गाॽ आसाक्‍के़न् थरुङ्‌लो, हे़क्‍क्‍याङ् खे़ने़ॽ मे़न्‍नाॽमा फाॽआङ् आङ्‌गाॽए खे़न् साक्‍तुङ् कत्तुङ्‌लो॥

10 ओमे़त्ते़ॽ, आङ्‌गाॽ खे़ने़ॽ के़निङ्‌वाॽ साॽरुङ्‌ङाङ् वाॽआरो, कर युप्‍पा योःम्‍माआङ् साॽमनाबा हे़क्‍केग मेःल्‍लो॥ आङ्‌गाॽ खे़ने़ॽ आओॽओॽबा मिराःक्‍ले़न् तुक्‍खेओ हे़क्‍के के़निङ्‌वाॽ साॽरुङ्‌ङाङ् वाॽरो॥

11 आङ्‌गाॽ आबाङे आलागि, आङ्‌गाॽ आबाङे फाॽआङ् खे़न् चोगुङ्‌लो॥ आक्‍खेलॽरिक् आङ्‌गाॽ आबाङे आजाःत्‍थि के़बेःक्‍पा पोङ्‌ङाबाबे? आङ्‌गाॽ आमिमिदिङ्‌ङिन् नावाइत्‍लाहाॽनु मे़हाआल्‍लो॥”


यहवे दाङ्‌बे़ल्‍ले़ सैरसे़न् लाम्‍लोबा सेगु

12 “याकुबे, आङ्‌गाॽ उःत्‍ने़बा इस्राइलए, आङ्‌गाॽ आबाःन्‍ने़न् खे़प्‍से़ॽओ, खुने़ॽग आङ्‌गाॽएरो॥ के़रे़क् पाःन्‍हाॽनुःल्‍ले़ तगि आङ्‌गाॽए वयाङ्‌लो, हे़क्‍क्‍याङ् के़रे़क् पाःन्‍हाॽनुःल्‍ले़ एगाङ्‌ङाङ् आङ्‌गाॽए वाॽआरो॥

13 आङ्‌गाॽ आबाङे आहुक्‍किल्‍ले़ इक्‍सादिङ् खाम्‍बेःक्‍माल्‍ले़ कुबुङ्‌हाॽ युक्‍खुङ्‌बारो, हे़क्‍क्‍याङ् आजुक्‌वा हुक्‍किल्‍ले़ ताङ्‌साङ्‌बे़न् खिङ्‌सुङ्‌बारो॥ आङ्‌गाॽ खे़ङ्‌हाॽ पाःन्‍छाःत्तुङ्‌सिङ्‌ङे़ल्‍ले़ खे़ङ्‌हाॽ थिक्‍ले़ङ्‌ले़ मुत्‍थ्रिक् मे़बोक्‍लो॥

14 खे़निॽ के़रे़क् चुप्‍साम्‍मे़ॽआङ् खे़प्‍साम्‍मे़ॽओ, माङ्‌हाॽओ हाःत्‍ले़ तगिए कन् पाःन्‍हाॽ पाःत्तुबे? यहवे दाङ्‌बे़ल्‍ले़ सेगुबा सैरसे़ल्‍ले़ बेबिलोन लाजेॽओ निङ्‌वाॽफुमाङ्‌ङिल्‍ले़ चोःक्‍मा निङ्‌वाॽ चोगुबान् के़त्तुरो, खुने़ॽ कुमुक्‍साम्‍मिन् बेबिलोनबा मनाहाॽरे़ खुन्‍छिॽ तक्‍ले़ङ्‌वाओ पोःक्‍लो॥

15 आङ्‌गाॽए कन् पाःन्‍निन् पाःत्तुङ्‌ङाङ् वाॽरो, ओःस्‍बा, आङ्‌गाॽ सैरसे़न् उःत्तुङ्‌ङाङ् वाॽरो॥ आङ्‌गाॽ खे़न् तारुङ्‌लो, हे़क्‍क्‍याङ् खे़ल्‍ले़ चोगुङ् फाॽआङ् सोःक्‍तुबा याःम्‍बक्‍किन् कुलिङ्‌दो के़त्‍लो॥

16 आङ्‌गाॽ आबेसाङ् त्‍ये़म्‍मे़ॽओ, हे़क्‍क्‍याङ् खे़निॽ कन् खे़प्‍से़म्‍मे़ॽओ— थिक्‍सिगेक्‍पा उवा पोःक्‍खे़आङ्‌धोए आङ्‌गाॽ स्‍वाःत्ताङ् पाःत्तुङ्‌बा होप्‍लो, खे़न् हिन्‍धोःक्‍किन् के़प्‍पा ये़म्‍मो आङ्‌गाॽ खे़ॽयो वाॽआरो॥” खे़ब्‍याङ् आल्‍ल यहवे दाङ्‌बे़ल्‍ले़ आङ्‌गाॽ खुने़ॽ कुयाम्‍साम्‍मिन्‍नु पाङ्‌घाङ्‌ङाङ् वाॽआरो॥

17 यहवे दाङ्‌बा, खे़ने़ॽ के़धे़ॽबा नु इस्राइलबा सेसे निङ्‌वाॽफुमाङ्‌ङिल्‍ले़ अक्‍खे पाःत्तुरो— “आङ्‌गाॽ यहवे दाङ्‌बा खे़ने़ॽ के़निङ्‌वाॽफुमाङ्‌आरो, आङ्‌गाॽ खे़ने़ॽ के़नुॽ के़दार फाॽआङ् हुॽने़रो, आङ्‌गाॽ खे़ने़ॽ पेःक्‍मा के़बोङ्‌बा लाम्‍मो लाङ्‌घेःङ्‌ने़रो॥

18 आङ्‌गाॽ आइङ्‌जाङ्‌हाॽ सिङ्‌सिङ् ये़क्‌ये़क्‍काङ् के़घे़प्‍सुबा कुसिक्‍किल्‍ले़ सनारुङ्‌ङिङ्‌ग मे़न्‍जप्‍मनाबा वहःङ् कुइसिक् के़घोसुबामे़न्‍लो॥ हे़क्‍क्‍याङ् साम्‌योनिमान् वरःङ्‌ङोबा वाभे़ल्‍ले़ङ् कुइसिक् के़सम्‍धाङ् त्‍ये़बामे़न्‍लो॥

19 खे़ने़ॽ के़सायोबोराहाॽ ये़ःङ्‌घा यारिक् यरिक् मे़वये़बामे़न्‍लो, हे़क्‍क्‍याङ् खे़ने़ॽ के़स्‍सा ये़म्‍बित्‍छा मे़न्‍छुमाहाॽ खे़न् ये़ःङ्‌घाःल्‍ले़ कुहिक् यारिक् यरिक् मे़बोःक्‍खे़मे़न्‍लो॥ खे़ङ्‌हाॽरे़ खुन्‍छिॽ मिङ्‌हाॽ आभे़ल्‍ले़आङ् मे़मये़म्‍बामे़न्‍लो, खे़ब्‍याङ् खे़ङ्‌हाॽ आङ्‌गाॽ आदगाङ् मे़म्‍मे़गे़म्‍बामे़न्‍लो॥”

20 बेबिलोनलाम्‍बा लःन्‍दे़म्‍मे़ॽआङ् पेगे़म्‍मे़ॽओ, बेबिलोनबा मनाहाॽलाम् खे़त्तासिम्‍मे़ॽओ॥ के़सःप्‍पा इक्‍लाःल्‍ले़ अःक्‍ताम्‍मे़ॽर कन् पाःन्‍निन् उवा चोगे़म्‍मे़ॽओ॥ इक्‍सादिङ् खाम्‍बेःक्‍माल्‍ले़ नासमा कुयाओ थारिक् कन् पाःन्‍निन् चे़क्‍ताम्‍सिम्‍मे़ॽओ॥ “यहवे दाङ्‌बे़ल्‍ले़ आबाङे कुसे़वारोबा याकुबे़न् चोःक्‌युम्‍भो पिरुआङ् वाॽ” पाःत्ताम्‍मे़ॽओ॥

21 खुने़ॽ खे़ङ्‌हाॽ मुरे़क् खारे़क्‍पा ये़ःङ्‌घादे़न्‍लाम् तेॽरुसिल्‍ले़ खे़ङ्‌हाॽरे़ खुन्‍छिॽ वामे़मिःक्‍ते़ल्‍लो॥ खुने़ॽ खे़ङ्‌हाॽरे़ खुन्‍छिॽ लागि याक्‍पेॽओनु च्‍वाःत् लःत्तु पिरुसिरो॥ खुने़ॽ याक्‍पेॽइन् कुलुम्‍मो पक्‍क्रे़ॽ फःक्‍खुरो, हे़क्‍क्‍याङ् च्‍वाःत् कुक्‍से़ लःन्‍दे़रो॥

22 यहवे दाङ्‌बे़ल्‍ले़ पाःत्तुरो, “कुनिङ्‌वाॽ के़जिःप्‍पाहाॽ मे़न्‍नुॽने़न् मे़न्‍दाने़ल्‍लो॥”

© 2009, 2023, Wycliffe Bible Translators, Inc. All rights reserved.

Wycliffe Bible Translators, Inc.
Swiv nou:



Piblisite