यसैया 47 - लिम्बुबेबिलोन लाजेॽओ खुम्दिङ् 1 यहवे दाङ्बे़ल्ले़ पाःत्तुरो, “बेबिलोनरे़ सिसागे़न् कुस्सा मे़न्छ्याए, खे़ने़ॽ के़हाङ्युक्नाओलाम् यो थ्ये़ॽआङ् खाम्बाङ्ङोबा खाम्हिःक्को युङे़ॽओ॥ बेबिलोनरे़ कुस्साए, आल्लआङ्धो खे़ने़ॽ हुक्थुङ्मो कप्नामा नु नुमासुक्मा के़मे़म्मे़त्ने़न्लो॥ 2 लुङ्सुम्मिन् याङ्सिङ्ङे़ॽआङ् याॽयुःत्ते़ॽओ, के़बःत्थाङ्ङिन् खे़त्ते़ॽओ, के़सिम्मे़न् थाङ् सिःक्खे़ॽओ, के़लाङ् थुङ्बोॽइन् थाःप्से़ॽओ, खे़ब्याङ् वहःङ्ङिन् काःक्ते़ॽओ॥ 3 खे़ने़ॽ ले़क्चाॽबुधुक् के़बोङ्बे़न् मनाहाॽरे़ मे़निसुरो, खे़ने़ॽ के़नुःम्मे़न् ओसेःन्धाङ् पोङ्लो॥ आङ्गाॽ कुले़क्वा हुङुङ्लो, आङ्गाॽ हाःत्ताङ् मे़ले़त्तासिङ्ङिल्लो॥” 4 इस्राइलबा सेसे निङ्वाॽफुमाङ्ङिल्ले़ आनिॽ से़न्लप् आबिरो, खुने़ॽ कुमिङ् से़न्लप्दाङ्बा, मुक्साम्दाङ्बा यहवे दाङ्बारो॥ 5 “नुमासुक्मा बेबिलोने, खे़ने़ॽ स्वाःत्ताङ् खामाक्लुम्बाःत्तो पेगे़ॽआङ् युङे़ॽओ, आल्लआङ्धो याम्मो खे़ने़ॽ हाङ्जुम् हाङ्जुम्बा हाङ्मा के़मे़न्मे़त्ने़ल्लो॥ 6 आङ्गाॽ सेगुङ्सिङ्बा आमनाहाॽनु आयाक् ले़ॽरे़आङ् वयाङ्लो, हे़क्क्याङ् आङ्गाॽ खे़ङ्हाॽ आबाङे आमना हे़क्के नुरिक् मे़म्मे़प्पासिरो॥ आङ्गाॽ खे़ङ्हाॽ खे़ने़ॽ के़हुक्को थासुङ्सिङ्लो, कर खे़ङ्हाॽ खे़ने़ॽ लुङ्माॽ के़न्दुक्तुसिल्लो॥ काप्पोबा काप्मुमाहाॽआङ् खे़ने़ॽ साॽरिक् के़लिःप्पा के़गक्किन् के़गुःत्तुसिरो॥ 7 खे़ने़ॽ के़बाःत्तु, ‘आङ्गाॽ सदादिङ् सदादिङ्ले़ लागि आभे़ल्ले़आङ् मे़न्नुप्मनामा हाङ्मा पोङ्ङारो!’ कर ताःन्दि थे पोङ् फाॽआङ् खे़ने़ॽ निङ्वाॽ के़न्इःत्तुन्लो, पिप्मिरि कुसोःन्दिओ थे पोङ् फाॽआङ् खे़ने़ॽ निङ्वाॽ के़न्इःत्तुन्लो॥ 8 “खे़ल्ले़चोगुल्ले़ निङ्वाॽ तादा चोःक्मा कुसिराॽ के़धाङ्मे, आबाङे ताङ्से़ःप्सिङ्मारे़ लागि थेआङ् मे़न्इःत्ते के़युङ्मे, निङ्वाॽओ ‘आङ्गाॽएःक् के़लॽमा हे़क्क्याङ् आङ्गाॽनुःल्ले़ वेॽ हाःत्ताङ् होप् के़लॽमा आङ्गाॽ आभे़ल्ले़आङ् मेमेदुमा मे़बोङ्ङान् इग्र आस्सा आएहाॽ मे़सिबा मे़निआन्’ के़लॽमे आल्ल कन् पाःन्निन् सिङ्सिङ् ये़क्ये़क्काङ् खे़प्से़ॽओ॥ 9 कन् ने़त्छि पाःन्हाॽ खे़ने़ॽ के़सम्धाङ् सप्माधिक्ले़, थिक्याःन्ले़ पोङ्दारो— के़स्सा के़एहाॽ सिमा मामा नु मेमेदुमा पोङ्मान् तारो॥ खे़ने़ॽ यरिक् कित्चाक् चोःक्मा नु मुक्साम्साबा साम्मुःप्मा के़गत्तुसाङ् खे़न् के़साक्पा पाःन्हाॽ खे़ने़ॽ के़सम्धाङ् इदारो॥ 10 “खे़ने़ॽ आबाङे के़भे़न्याःम्बक्किल्ले़ से़ःप्पा लॽरिक् निःन्धो के़जोगुआङ् के़वाॽरो, हे़क्क्याङ् ‘आङ्गाॽ हाःत्ले़आङ् मे़निआन्’ के़लॽरे़आङ् के़वाॽरो॥ खे़ने़ॽ के़ने़हि नु के़निङ्वाःल्ले़ लाम् के़भोःत्ते़आङ् के़वाॽरो, खे़ने़ॽ के़निङ्वाॽओ अक्खे के़लॽरो, ‘आङ्गाॽएरो, आङ्गाॽनुःल्ले़ वेॽ हाःत्ताङ् होप्लो॥’ 11 के़साक्पा तुक्खे लाक्खेहाॽ खे़ने़ॽ के़सम्धाङ् इदारो, खे़न् तुक्खेहाॽ आक्तङ्बा कित्चाक्किल्ले़ के़घे़त्तुबे? हान्ति पोङ्मा पाःन्हाॽ खे़ने़ॽ के़दुमुरो, खे़ल्ले़ कुमे़न् के़हुङुसाङ् खे़न् तुक्खेन् खे़प्मा के़न्छुक्तुन्लो॥ खे़ने़ॽ तगि आभे़ल्ले़आङ् मे़न्दुम्मे के़वये़बा मे़क्मासिमे़न् आल्लोघोरो के़दुमुरो॥ 12 खे़ने़ॽ के़जुःक्ते़आङ्धोए स्याङ्मे़न्दाङ् के़जोगु के़धाक्तुबा हे़क्क्याङ् खे़ने़ॽ के़गत्तुबा के़रे़क् कित्चाक्हाॽ नु साम्माङ्च्याःङ् मुरामे़प्मा पाःन्हाॽ आल्लसाङ् हाबा चोगे़ॽर वये़ॽओ॥ हे़क्केःल्ले़ खे़ने़ॽ कुलिङ्दो के़गे़प्पि, हे़क्क्याङ् के़निङ्मिहाॽ मे़गिर के़याःन्दुसिबि॥ 13 खे़ने़ॽ के़म्बिबा सुजाहाॽलाम् खे़ने़ॽ के़नासे़आङ् के़वाॽरो! खागे़इक्पाहाॽ, लाबा, नाम् खेःम्सिक्पा ओगे़मे़प्पाआङ् लाधक्मा ताःन्दि के़दाबा पान् के़बाःप्पाहाॽ मे़दाररो, हे़क्क्याङ् खे़ने़ॽ के़सम्धाङ् तामा के़इःप्पा पाःन्हाॽलाम् के़म्से़ःप्लरो॥ 14 “से़क्खासाङ् खे़ङ्हाॽ के़हेबा याॽलाङ् कुसिङ् मे़लॽरो, मिःल्ले़ खे़ङ्हाॽ मिधिक्खुसिरो॥ मिधुङ्दिङ् मिराःक्ले़ मिसाम्लाम् खे़ङ्हाॽ आबाङे से़ःप्सिङ्मा मे़न्छुक्ने़ल्लो॥ हाःत्ले़ कुलागिआङ् कॽयो मिजाॽमा मिदत् होप्लो, हे़क्क्याङ् कप्मो युङ्माआङ् मिजाॽमा मिआङ् होप्लो॥ 15 खे़ङ्हाॽरे़ खे़ने़ॽ के़लागि खे़म्भरक् चोःक्मा मे़सुक्तुरो— खे़ङ्हाॽनु कन् खे़ने़ॽ साक्ते़र याःम्बक् के़जोगुआङ् वये़रो, खे़ङ्हाॽ के़रे़क् आप्फेक् खुन्छिॽ मे़भेःन्दुबा याःम्बक् ले़प्माङ् मे़बेःक्लो, खे़ने़ॽ हाःत्ले़आङ् से़ःप्मा के़मे़न्छुक्ने़ल्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.