यसैया 46 - लिम्बु1 बेबिलोनबा माङ्हाॽरे़ खुन्छिॽ नुप्मे़न् आम्भा कन्लो! थिक् ये़म्मो बेल मे़प्मनाबा नु नेबो मे़प्मनाबा माङ्हाॽ से़वा मे़मे़त्तुसिरो, कर आल्लो खे़ङ्हाॽ पलिःप् पलिःप् लिःप्ल अदङ्हाॽ मे़गुःत्तुसिआङ् वाॽरो, के़नाबा थक्साहाॽरे़ खुन्छिॽ एःक्थाःक्मो खे़ङ्हाॽ साॽरिक् के़लिःप्पा कक् मे़बोःक्खे़आङ् मे़वाॽरो॥ 2 नावाइत्लाहाॽ आबाङे से़ःप्सिङ्मा मे़न्छुक्ने़ल्लो, मनाहाॽ हुक्काप् मे़मे़त्छिङ्लो॥ हे़क्क्याङ् खे़ङ्हाॽ मे़देॽरुसिर मे़बत्लो, बेबिलोनबा माङ्हाॽरे़ खुन्छिॽ नुप्मे़न् हाबा कन्लो! 3 “याकुबरे़ कुमुॽइदाङ्सासे, नुरिक्काङ् खे़प्से़म्मे़ॽओ, आङ्गाॽ आमना इस्राइललाम् के़याःक्पा के़रे़क्ले़ खे़प्साम्मे़ॽओ॥ खे़निॽ सागे़वाःन्नासिबानुःल्ले़ तगिआङ्धो आङ्गाॽ खे़निॽ ओमे़त्निङ्ङाङ् वाॽआरो॥ 4 खदाक्मि के़दुम्सिआङ् खे़निॽ थे़गेक् फुःत्लधारिक्साङ् खे़ङ्ग आङ्गाॽएरो॥ आङ्गाॽ खे़निॽ नावागे़न् चइःत् चोःक्निङ्लो हे़क्क्याङ् कम्ब्राङ् मे़त्निङ्लो, आङ्गाॽ खे़निॽ फाॽनिङ् खे़ब्याङ् चोःक्युम्भो पिनिङ्लो॥ 5 “खे़निॽ आङ्गाॽ हाःत्नु याप्मि के़दङ्घिबे?” यहवे दाङ्बे़ल्ले़ मनाहाॽ पान् सेःन्दोसुसिरो, “आङ्गाॽ हे़क्तङ्बा वेॽ आत्तिन् वाॽबे? 6 कुभा मनारे़ सुक्वाओनु साम्म्याङ्ङिन् मे़लःत्तुरो, हे़क्क्याङ् युप्पान् थाङ्दुरिओ मे़धाङ्सुरो, खे़ङ्हाॽरे़ साम्म्याङ् के़धक्पान् कुनाम्याक् मे़बिरुआङ् खे़न् नावाइत्ला थक्मा मे़बाङ्घुरो खे़ब्याङ् साम्बोन् मे़भन्छिङ्ङाङ् खे़न् से़वा मे़मे़त्तुरो॥ 7 खे़ङ्हाॽरे़ खे़न् खुन्छिॽ फक्ताङ्ङो मे़बक्खुआङ् मे़देॽरुरो, हे़क्क्याङ् खे़न् कुयुक्नाओ मे़युक्खुरो, खे़ब्याङ् खे़न् खे़ॽयो तक्पे़त् ये़प्लो॥ खे़ॽयोनु खे़न् आबाङे चत्छिङ्मा पेःक्मा मे़सुक्ने़ल्लो, कुभारे़ खे़न् पेलि फाक्तुसाङ् खे़ल्ले़ नुगप् मे़बिरुल्लो, हे़क्क्याङ् कुदुक्खे कुलाक्खेलाम् खे़ल्ले़ से़ःप्माआङ् मे़सुक्तुल्लो॥ 8 “पिफ्युङ् के़जोःक्पासे, कन् पाःन्निन् निङ्वाॽ इःत्ताम्मे़ॽओ, हे़क्क्याङ् योधो मे़ल्लॽए निङ्वाॽओ युक्खाम्मे़ॽआङ् याम्साम्मो कत्ताम्मे़ॽओ॥ 9 उन्छोन् उन्छोःन्बा पाःन्हाॽ निङ्वाॽ लिङ्साम्मे़ॽओ, आङ्गाॽ निङ्वाॽफुमाङ्आ, हे़क्क्याङ् वेॽ आत्तिन्नाङ् होप्लो॥ आङ्गाॽ निङ्वाॽफुमाङ्आरो, आङ्गाॽ हे़क्तङ्बा वेॽ हाःत्ताङ् होप्लो॥ 10 कुहेःक्सिङ्माआङ्धो कुनुप्मा थारिक्पा, खे़म्ब्याङ् उनाहुरिबा ये़म्माङ्धो तामा के़बोङ्बा ये़म् थारिक्पा पाःन्हाॽ खे़निॽ मे़प्मा सुक्निङ्लो॥ आङ्गाॽ पाःत्तुङ्—चोःक्मा निङ्वाॽ चोगुङ्बा पाःन्हाॽ के़त्लो, हे़क्क्याङ् आङ्गाॽ आनिङ्वाॽ कुइसिक् के़रे़क् चोगुङ्लो॥ 11 तॽइ नाङ्गे़न् ले़प्साङ्लाम् आङ्गाॽ मनाधिक् उःत्तुङ्लो, खे़न् सावागे़म्बा मुयान् कुइसिक् सुःक्काङ् युरो, हे़क्क्याङ् आङ्गाॽ चोःक्मा निङ्वाॽ चोगुङ्बा पाःन्हाॽ के़त्तुरो॥ आङ्गाॽ थे चोःक्मा निङ्सेक् चोगुङ्ङाङ् वाॽ, आङ्गाॽ खे़न् के़रे़क् के़त्तुङ्ङेरो॥ 12 “हादिङ् थक्मा निङ्वाॽ के़गप्पासे हे़क्क्याङ् साम्योनिमालाम् माःङ्घा के़वाॽबा मनासे, आङ्गाॽ आबाःन्निन् नुरिक्काङ् खे़प्से़म्मे़ॽओ॥ 13 आङ्गाॽ तोःन्दोम्बा याःम्बक् चोःक्मा यारिप् वाॽआरो, आङ्गाॽ आसे़न्लप्पिन् मे़सुने़ल्लो॥ आङ्गाॽ यरुसले़म ये़क्यक्पा मनाहाॽ से़ःप्तुङ्सिङ्लो, हे़क्क्याङ् इस्राइले़न् मिङ्सो इङ्धाङ् पिरुङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.