यसैया 45 - लिम्बुयहवे दाङ्बे़ल्ले़ कोरेसे़न् माङ्थोःक्ना चोगु 1 यहवे दाङ्बे़ल्ले़ कोरेसे़न् हाङ् पोङ्मारे़ लागि माङ्थोःक्ना चोगुआङ् वाॽरो॥ खुने़ॽ खे़न् इक्सादिङ् खाम्बेःक्मोबा मे़न्छाम् सुवाङ्हाॽ नाःम्मासिरे़ लागि युक्तिङ् चोगुआङ् वाॽरो॥ खुने़ॽ खे़न् हाङ्हाॽरे़ खुन्छिॽ हुक्कोलाम् युक् नाप्मासिरे़ लागि पाङ्घुरो, यहवे दाङ्बे़ल्ले़ खे़ल्ले़ कुलागि ये़क्यक् पाङ्जुम्बा मालाम्धेःत्हाॽ मे़सुबुन्लो॥ यहवे दाङ्बे़ल्ले़ कोरेसे़न् अक्खे मे़त्तुरो— 2 “आङ्गाॽ खे़ने़ॽ के़दगाङ् के़दगाङ् पेःक्कारो, हे़क्क्याङ् थे़गुहाॽ ले़प्पे़त् तङ्घुङ्लो॥ ये़क्यक्कोबा यम्बा कासा लाम्धेःत्हाॽ आङ्गाॽ फयःप्फयःप् यःप्सुङ्लो, खम्ब्याङ् फाङ्मनाबा फे़न्जेॽहाॽ चाक्खक् चाक्खक् खक्तुङ्लो॥ 3 खामाक्मादे़न्नो के़युङ्बा नु हाःत्ले़आङ् मे़न्निसुम्बा ते़न्नो के़वाॽबा याङ्साकुन्धेन् खे़ने़ॽ पिने़रो, खे़ल्ले़चोगुल्ले़ आङ्गाॽ यहवे दाङ्बाआरो, आङ्गाॽए इस्राइलबा निङ्वाॽफुमाङ्आरो, हे़क्क्याङ् आङ्गाॽए खे़ने़ॽ मिङ्लोःक्ने़आङ् उःत्ने़बारो फाॽआङ् खे़ने़ॽ कुसिङ् के़निःत्तुरो॥ 4 आङ्गाॽ आसे़वारोबा याकुब, सेगुङ्बा इस्राइलरे़ कुलागि, आङ्गाॽ मिङ्लोःक्ने़आङ् उःत्ने़बारो॥ खे़ने़ॽ कुसिङ् के़न्निःत्तान्छाङ् मिङ्सो इङ्धाङ् पिने़आङ् वाॽरो॥ 5 “आङ्गाॽ यहवे दाङ्बाआरो, आङ्गाॽनुःल्ले़ वेॽ निङ्वाॽफुमाङ् एःन्नाङ् होप्लो, खे़ने़ॽ आङ्गाॽ के़न्दाःक्ताङ्ङिन्छाङ् के़धुम्बा चोःक्ने़आङ् वाॽरो॥ 6 हे़क्केःल्ले़ नाङ्गे़न् पिसाङ्ङाङ्धो नाम्धा थारिक् मनाहाॽरे़ आङ्गाॽरक् निङ्वाॽफुमाङ्आ वेॽ हाःत्ताङ् होप् फाॽआङ् कुसिङ् मे़निःत्तुररो, आङ्गाॽ यहवे दाङ्बाआ, आङ्गाॽनुःल्ले़ वेॽ हाःत्ताङ् होप्लो॥ 7 आङ्गाॽ ओःत्तिःन् चोगुङ्लो, हे़क्क्याङ् खामाक्मे़न् नावागे़न् चइःत् ने़स्सुङ्लो॥ आङ्गाॽ नुॽमादामा नु मे़क्मासिमान् ने़प्माङ् तारुङ्लो, आङ्गाॽ यहवे दाङ्बे़ल्ले़ए कन् के़रे़क् याःम्बक्हाॽ चोगुङ्लो॥ 8 ताङ्साङ्बाए, साम्योनिमान् वहित् कुइसिक् थासे़ॽओ, खे़न् ताःक्मारे़ लागि इक्सादिङ् खाम्बेःक्माल्ले़ कुम्ब्राःन् हम्बाःङ् फाःक्खुररो॥ हे़क्क्याङ् इक्सादिङ् खाम्बेःक्मो से़न्लप् नु साम्योबा याःम्बक्किन् पोररो, आङ्गाॽ यहवे दाङ्बे़ल्ले़ कन् याःम्बक्किन् चोगुङ्बारो॥” नावागे़न् चइःत् नु साप्मुःन्धुम्ले़ निङ्वाॽफुमाङ् 9 “आबाङे कुनावागे़न् चइःत् के़जोःक्पे़न्नु खे़माॽ के़जोःक्पे़ङ्ग चिःत्ते़स्ये़रो, खे़ङ्ग खाम्बाङ्ङो के़ने़बा फुजिक् खे़ल्ले़क्हाॽओ लत्छा कुघे़खे़ल्ले़क् रक्लो॥ सॽमनाबा खाम्मिल्ले़ कोम्भाल्यान् ‘खे़ने़ॽ थे़मा के़जोगुर के़बत्?’ फाॽआङ् सेःन्दोसुबि? फुजिक्किल्ले़ आङ्गाॽ के़जोःक्पे़ल्ले़ कुहुक्चो फे़ॽ फाॽआङ् पाःत्तुबि? 10 अक्खे के़बाःप्पे़ङ्ग चिःत्ते़स्ये़रो, खे़ल्ले़ कुम्बा मे़त्तुरो, ‘खे़ने़ॽ हात् सागे़वाःन्दुबे?’ इग्र कुम्मा मे़त्तु, ‘खे़ने़ॽ थे सागे़गत्तुबे?’ 11 “इस्राइलबा सेसेबा निङ्वाॽफुमाङ्, खे़ङ्हाॽ नावागे़न् चइःत् के़जोःक्पा निङ्वाॽफुमाङ्, यहवे दाङ्बे़ल्ले़ अक्खे पाःत्तुरो— ‘खे़ने़ॽ ताःन्दि पोङ्मा के़इःप्पा पाःन्निल्ले़ कुयाःम्बेॽओ सेःन्गे़दोआबि? आङ्गाॽ आस्साहाॽ नु आहुक्किल्ले़ चोगुबा आयाःम्बक्किल्ले़ कुयाःम्बेओ मुरा के़मे़त्ताबाबि? खे़न् सेःन्लाप्मा के़युक् होप्लो! 12 इक्सादिङ् खाम्बेःक्मान् आङ्गाॽए चोगुङ्बारो, हे़क्क्याङ् खे़ॽयो मनाहाॽ आङ्गाॽ नावागे़न् चइःत् चोगुङ्सिङ्बारो॥ आङ्गाॽ आहुक्किल्ले़ए ताङ्साङ्बे़न् खिङ्घुङ्बारो, खे़ब्याङ् खे़त्थो के़बप्पा के़रे़क् खेःम्सिक्पाहाॽ आङ्गाॽए आबाङे आबाङे ते़न्नो तङ्घुङ् फत्छुङ्सिङ्बारो॥ 13 कोरेसे़न् आङ्गाॽ आसाम्योबा याःम्बक्किन् के़त्ल फाॽआङ् फोःक्खुङ्लो, आङ्गाॽ खे़ल्ले़ के़रे़क् कुलाम्हाॽ तोःन्दोम्बा चोगुङ्लो॥ खे़ल्ले़ आङ्गाॽ आये़क्यक्किन् याम्मो चोगुरो, हे़क्क्याङ् मे़दे़म्सु मे़देॽरुसिबा के़रे़क् आमानाहाॽ खे़ल्ले़ ले़रुसिरो, कर कुमे़ल्लुङ् हुङुआङ्ग मेःल्लो, कुजे़न्नाङ् मे़दाःक्तुल्लो,’” मुक्साम्दाङ्बा यहवे दाङ्बे़ल्ले़ पाःत्तुरो॥ 14 यहवे दाङ्बे़ल्ले़ अक्खे पाःत्तुरो— “मिस्र लाजेॽओ के़बोःक्पा कुजान् नु कुस लाजेॽबा याङ्साकुन्धेन् खे़ने़ॽ के़याङ्साकुन्धे पोङ्लो॥ हे़क्क्याङ् सेबाबा कुलिङ्गे़न् केःम्ब केःम्बा मनाहाॽ खे़ने़ॽ के़योःग्बा मे़बोङ्लो॥ फे़न्जेॽ थक्क्रङ्ङिल्ले़ इमे़घेःक्खुसिआङ् खे़ङ्हाॽ के़एगाङ् मे़भे़न्लो, खे़ङ्हाॽरे़ खे़ने़ॽ से़वा के़म्मे़त् हे़क्क्याङ् अक्खे पाःप्मा मे़दे़ल्लो॥ ‘निङ्वाॽफुमाङ्ङिन् खे़ने़ॽनु वाॽरो, खुने़ॽरक् निङ्वाॽफुमाङ्लो॥’” 15 से़क्खाए खे़ने़ॽ निङ्वाॽफुमाङ्ने़रो, खे़ने़ॽ निमे़न्धाःप्मनाबा ते़न्नो के़युङ्लो, खे़ने़ॽग इस्राइलबा से़न्लप्दाङ्बा निङ्वाॽफुमाङ्ने़रो॥ 16 नावाइत्ला के़जोःक्पा के़रे़क्ले़ खुन्छिॽ नारा सिर्मःङ् लॽरो हे़क्क्याङ् खे़ङ्हाॽ सिरिङ्ममो मे़धारो, खे़ङ्हाॽ के़रे़क् सोरिक् कुनामे़न्छाॽ मे़बोङ्लो॥ 17 कर यहवे दाङ्बे़ल्ले़ इस्राइले़न् सदादिङ् से़न्लप्लाम्बा ताङ्से़ःप्तुआङ् वाॽरो, खे़प्मो के़युङ्बाहाॽ आभे़ल्ले़आङ् सिरिङ्ममा मे़बोङ्ने़ल्लो॥ 18 थेआङ्भे़ल्ले़ यहवे दाङ्बे़ल्ले़ साङ्ग्राम्पेदाङ्ङिन् चोगुरो, खुने़ॽए निङ्वाॽफुमाङ्लो! खुने़ॽ इक्सादिङ् खाम्बेःक्मान् नावागे़न् चइःत् ने़स्सुआङ् चोगुरो, खुने़ॽ खे़न् सदादिङ् के़बप्पा नु आभे़ल्ले़साङ् के़वाॽबा चोगुरो॥ खुने़ॽ इक्सादिङ् खाम्बेःक्मान् मुरे़क् खारे़क्पा थेआङ् के़होप्पा मेःन्लो कर मे़न्छाम् याप्मिरे़ युङ्मा वाॽमादे़न् चोगुरो॥ खुने़ॽ आबाङेए अक्के पाःत्तुरो— “यहवे दाङ्बा आङ्गाॽएरो वेॽ हाःत्ताङ् निङ्वाॽफुमाङ् होप्लो॥ 19 खामाक्मा लाजेॽओ आत्तिलाम्माङ् स्वाःत् पाराङ्बा होप्लो, ‘आङ्गाॽ थेनाधे आगोःत्ते़म्मे़ॽ’ फाॽआङ् याकुबरे़ कुमुॽइदाङ्साहाॽ मे़मे़त्तुङ्सिङ्ङिल्लो॥ आङ्गाॽ, यहवे दाङ्बान् से़क्खा पाःत्तारो, आङ्गाॽ के़वाॽबा पाःन्हाॽ उवा चोगुङ्लो॥” यहवे दाङ्बे़न् नु बेबिलोनबा नावाइत्लाहाॽ 20 “खे़निॽ के़रे़क् चुप्साम्मे़ॽआङ् त्ये़म्मे़ॽओ, सोसोरिक् निःत्ताङ् त्ये़म्मे़ॽओ, इक्सादिङ् खाम्बेःक्मोबा के़दाङ्बा के़याःक्पा सुवाङ्से! सिङ्मुःत् नावाइत्लाहाॽ के़बङ्बाआङ् के़वाॽबाहाॽ, हे़क्क्याङ् याप्मि ताङ्से़ःप्मा मे़न्छुक्मनाबा माङ्हाॽ पेलि के़भाक्पाहाॽ थेआङ् मे़न्निम्नाबा मे़जोक्लो॥ 21 पोङ्मा के़इःप्पा पाःन्हाॽ पाःत्ते़म्मे़ॽओ, खे़न् ओसेःन्धाङ् चोगे़म्मे़ॽओ॥ खे़ङ्हाॽरे़ खुन्छिॽ लुम्मो आबाङे पान् मे़दङ्घुररो, यरिक् तङ्बे तगि कन् पाःन्निन् हाःत्ले़ पाःत्तुआङ् वये़बे? थे आङ्गाॽ यहवे दाङ्बे़ल्ले़ए मेःम्बि? आङ्गाॽनुःल्ले़ वेॽ हाःत्ताङ् निङ्वाॽफुमाङ् होप्लो॥ साम्योबा निङ्वाॽफुमाङ् नु से़न्लप्दाङ्बा, आङ्गाॽनुःल्ले़ वेॽ हाःत्ताङ् होप्लो॥ 22 “इक्सादिङ् खाम्बेःक्माल्ले़ कुयाओ के़युङ्बासे, आङ्गाॽ ले़प्माङ् हिआसिम्मे़ॽओ, हे़क्क्याङ् से़न्लप् खोसे़म्मे़ॽओ, थेआङ्भे़ल्ले़ आङ्गाॽ निङ्वाॽफुमाङ्आरो खे़ब्याङ् वेॽ हाःत्ताङ् होप्लो॥ 23 आङ्गाॽ आबाङे माङ्हे़क् चोगुङ्ङाङ् वाॽआरो, के़रे़क् पाःन्हाॽ कुदोःप्माआङ् आङ्गाॽ पाःत्तुङ्ङाङ् वाॽआरो, खे़न् पाःन्हाॽ याम्मो हने़ मे़नुःक्काल्लो॥ के़रे़क् मे़न्छाम् याप्मि मे़दाआङ् आदगि थुङ्बोहजॽ मे़युङ्लो॥ के़रे़क्ले़ आङ्गाॽ आमिङ्ङो माङ्हे़क् मे़जोगुरो॥ 24 “आङ्गाॽ आयाःम्बेओ खे़ङ्हाॽरे़ मे़बाःत्तुरो, ‘यहवे दाङ्बाओरक् साम्योबा नु मुक्साम् वाॽरो॥’” खुने़ॽ कुदक्ले़ङ्वाओ कुसाक्के़न् के़बोक्पाहाॽ के़रे़क् खुने़ॽओए मे़दारो, हे़क्क्याङ् सिरिङ्ममो मे़धारो॥ 25 कर यहवे दाङ्बाओए इस्राइलबा के़रे़क् थाःक्हाॽ साम्योबा खोमे़दे़त्लो, हे़क्क्याङ् खे़ङ्हाॽ मे़सःत्ताङ् मिमिदिङ् मे़बिआरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.