यसैया 44 - लिम्बुयहवे दाङ्बे़ल्ले़ इस्राइले़न् सेगुॽ 1 यहवे दाङ्बे़ल्ले़ अक्के पाःत्तुरो, “कर आल्ल आसे़वारोबा याकुबे, आङ्गाॽ सेःक्ने़बा इस्राइलए, सिङ्सिङ् ये़क्ये़क्काङ् खे़प्से़ॽओ, 2 खे़ने़ॽ के़जोःक्पा, खे़ने़ॽ के़म्मारे़ कुसाप्पोःक्को के़जोःक्पा हे़क्क्याङ् खे़ने़ॽ के़भाॽबा यहवे दाङ्बे़ल्ले़ अक्के पाःत्तुरो— आसे़वारोबा याकुबे, आङ्गाॽ सेःक्ने़बा यसुरुन्ने, खे़ने़ॽ मे़गिसे़न्ने़ॽओ॥ 3 थेआङ्भे़ल्ले़ आङ्गाॽ के़हेबा खाम्बाङ्ङो च्वाःत् नु कुहेद्याॽ खाम्बेःक्को वहःङ्हाॽ कुङ् युर याःन्दुङ्लो॥ आङ्गाॽ खे़ने़ॽ के़धाःक् सम्धाङ् आयाम्साम्मिन् पाङ्घुङ्लो, हे़क्क्याङ् के़सायोबोराहाॽ हाङ्वागे़न् मुॽइसाम् पिरुङ्सिङ्लो॥ 4 खे़ङ्हाॽ ने़ने़बादे़न्नो के़लिङ्बा यान् हे़क्के मे़लॽरो, च्वाःत् लाङ्गे़घेःक्पा वहःङ् पेसाङ् के़लिङ्बा पोरोःक्सिङ् हे़क्तङ्बा मे़बोङ्लो॥ 5 कुभारे़ मे़बाःत्तुरो, ‘आङ्गाॽ यहवे दाङ्बे़ल्ले़ कुमनाआरो॥’ वेॽइल्ले़ पाःत्तुरो, ‘आङ्गाॽ याकुबरे़ कुधाःक्साआरो॥’ कुभारे़ खुन्छिॽ हुक्को यहवे दाङ्बे़ल्ले़ कुमिङ् मे़साप्तुरो, हे़क्क्याङ् इस्राइलरे़ कुमिङ्ङिन् आबाङे खुन्छिॽइन् हे़क्के मिङ् मे़लोःक्खुरो॥” वेॽ निङ्वाॽफुमाङ् होप् 6 “इस्राइलबा पयम् यम्बा हाङ् से़न्लप्दाङ्बा हे़क्क्याङ् मुक्साम्दाङ्बा यहवे दाङ्बे़ल्ले़ अक्के पाःत्तुरो— आङ्गाॽ तगिबा नु एगाङ्बा लत्छारक् निङ्वाॽफुमाङ्आरो, आङ्गाॽनुःल्ले़ वेॽ निङ्वाॽफुमाङ् हाःत्ताङ् होप्लो॥ 7 आङ्गाॽ चोगुङ्बा हे़क्के हाःत्ले़ चोःक्मा सुक्तुबे? कुहेःक्सिङ्मा ये़म्माङ्धो कुनुप्मा ये़म्धारिक्ले़ थेधे पोङ्, खे़न् के़रे़क् तगिसा हाःत्ले़ पाःप्मा सुक्तुबे? 8 खे़निॽ मे़गिसे़म्मिन्ने़ॽ, मे़यक्खे़म्मिन्ने़ॽआङ्लो, थे कन् यरिक् ये़म् तगिए खे़निॽ मे़त्निङ्ङाङ् मे़वये़म्बि? खे़निॽग आङ्गाॽ आदोःन्दिनिङ्लो॥ थे आङ्गाॽनुःल्ले़ वेॽ निङ्वाॽफुमाङ् वाॽबि? आहाॽ, आङ्गाॽ मे़निसुङ्ङिम्बा वेॽ याक्पेॽ होप्लो॥” नावाइत्ला से़वा के़मे़प्पाहाॽ लासाक् मे़मे़त्तुसि 9 नावाइत्ला के़जोःक्पाहाॽ के़रे़क् थेनाधेबासिरो, हे़क्क्याङ् खे़ङ्हाॽरे़ कुमे़न् के़घिःक्पा मे़लेःत्तुसिबा चिगक्वाहाॽ हने़बा चोक्लो॥ खे़न् चिगक्वाहाॽ के़साम्बाहाॽ मिक्फःम्बासिरो, खे़ब्याङ् खे़ङ्हाॽ थेआङ् कुसिङ् मे़न्निःप्मनाबा मे़बोःक्खे़आङ् सिरिङ्ममो मे़ध्ये़आङ् मे़वाॽरो॥ 10 हाःत्ले़ माङ् चोगुॽ, इग्र खोःम्मना पे़प्मनाबा नावाइत्लान् सोःन्दुआङ् हाःत्ले़ चोगुॽ, खे़ल्ले़ खुने़ॽ थेआङ् मे़जक्तुन्लो॥ 11 खे़ङ्हाॽ के़रे़क्ले़ खुन्छिॽ नाधारो, खे़न् चबेगुहाॽग मनासिरक्लो॥ खे़ङ्हाॽ के़रे़क् मे़जुम्माङ् सोरिक् मे़ये़प्लो, खे़ङ्हाॽ सोरिक् यङ्मा मे़सिरो खे़ब्याङ् थिक्ले़ङ्ले़ सिरिङ्ममो मे़धारो॥ 12 फे़न्जेॽ के़धक्पे़ल्ले़ लत्छा सार्दाम्धिक् याङ्सिङ्लो हे़क्क्याङ् मिदःत्तो याःम्बक् चोक्लो, खुने़ॽ थवाःल्ले़ थगुआङ् नावाइत्लाःल्ले़ कुजइःत् लःत्तुरो॥ खुने़ॽ के़धुम्बा कुहुक्किल्ले़ खे़न् याःम्बक्किन् चोगुरो, खुने़ॽ कुसिक्लाःक्, हे़क्क्याङ् खुने़ॽ मे़न्धुम्मनाबा पोङ्लो खे़ल्ले़ च्वाःत् मे़धुङुन् हे़क्क्याङ् खुने़ॽ कुधना ले़ङ्लो॥ 13 सिङ्गे़गाम्बे़ल्ले़ खिदोराःन् खिङ्सुआङ् मिक्सेन् फत्छुरो, खुने़ॽ चःङ्ङिल्ले़ वरे़ङ्ले़ङ्बा पे़त्तुरो, खे़ब्याङ् खे़ल्ले़ कुजइःत् लःत्तुरो॥ हे़क्क्याङ् कुन्जोःल्ले़ खे़ॽयो अगुआङ् माङ्धाःन्नो युङ्मारे़ लागि मे़न्छाम् याप्मिरे़ के़रे़क् खे़म्सिङ्माल्ले़ नारुम्भुङ्ङो खे़ल्ले़ कुजइःत् लःत्तुरो॥ 14 खे़ल्ले़ साम्माङ्सिङ् इग्र आःङ्सिङ् इग्र यहिबा सिङ्बुङ्ङे़न् सेगुरो, हे़क्क्याङ् ताङ्भुङ्ङोबा वेॽ सिङ्बुङ्हाॽनु खे़न् पोरे़र याःन्दुरो॥ इग्र खे़ल्ले़ आःङ्ङिन् लेःत्तुरो खे़ब्याङ् हाङ्वामा ये़म्मोबा वहित्ते़ल्ले़ खे़न् पोरे़र याःन्दुरो॥ 15 खे़ब्याङ् खे़न् मनाःल्ले़ कुलागि हाःम्मा सिङ् पोङ्लो, हे़क्क्याङ् खुने़ॽ कुभा सिङ्जिॽ याङ्सिङ्ङाङ् आबाङे मि चाॽरुरो॥ खुने़ॽ खे़न् हाःन्दुआङ् खरे़ःङ् ले़ःङ्सुरो, हे़क्क्याङ् बाखे़न् सिङ्लाम्बा खुने़ॽ लत्छा माङ्धिक्काङ् चोगुआङ् खे़न् से़वा मे़त्तुरो॥ खुने़ॽ खे़न् सिङ्लाम्बा नावाइत्लाधिक् चोगुरो, खम्भ्याङ् खे़ल्ले़ कुदगि साम्बोन् हबत् फन्छिङ्लो॥ 16 खे़न् सिङ्ङे़ल्ले़ कुभ्रे़ःक् लक्किन् खुने़ॽ मिओ सिङ् हाःन्दुरो, खे़ल्ले़ कुसम्धाङ् तःक् थोःक्तुरो, हाबा खे़ॽयो खुने़ॽ सा नयुआङ् चरो॥ खे़ल्ले़ मिआङ् चाॽरुआङ् पाःत्तुरो, “आ! आङ्गाॽ कोसाङ्लो, आङ्गाॽ मि निमा खोसुङ्लो॥” 17 खे़न् के़नम्बा कुघे़ल्ले़क्किन् खे़ल्ले़ लत्छा नावाइत्ला, माङ्धिक् चोगुरो॥ खे़ल्ले़ कुदगि साबन् हप्पे़त् पत्ताङ् खे़न् से़वा मे़त्तुरो, हे़क्क्याङ् पेलि फाक्तुआङ् खे़न् अक्खे मे़त्तुरो, “आङ्गाॽ से़ःप्ताङ्ङे़ॽओ, थेआङ्भे़ल्ले़ खे़ने़ॽ आङ्गाॽ आमाङ्ने़रो॥” 18 खे़ङ्हाॽरे़ थेआङ् मे़ल्ले़सुन्लो, खे़ङ्हाॽरे़ थेआङ् कुसिङ् मे़न्निःत्तुन्लो॥ खे़ङ्हाॽरे़ खुन्छिॽ मिक्हाॽ इम् मे़मे़त्तुआङ् पत्लो, खे़ल्ले़चोगुल्ले़ खे़ङ्हाॽरे़ निमा मे़न्छुक्तुन्लो, खे़ङ्हाॽरे़ खुन्छिॽ निङ्वान् मे़साक्तुआङ् वाॽरो, हे़क्क्याङ् खे़ङ्हाॽरे़ कुसिङ् निःप्मा मे़न्छुक्तुन्लो॥ 19 हाःत्ताङ् युङ्ङाङ् निङ्वाॽ मे़इःत्छिङ्ङे़न्लो, कम्भे पाःप्मारे़ लागि आत्तिल्ले़आङ् सिक्कुम् निङ्वाॽ मे़गत्तुन्लो, इग्र खासिङ् मे़निःत्ने़न्लो, “आङ्गाॽ खे़ल्ले़ कुभ्रे़ःङ् सिङ् हाःन्दुङ्लो॥ हाबा खे़न् सिङ्ङिल्ले़ खरे़ःङ् ले़ःक्खुङ्लो, आङ्गाॽ सा नयुङ्ङाङ् चाङ्लो॥ थे आल्ल खे़न् के़नम्बा सिङ्ङिन् याम्गे़सिङ्बा सामा चोगुङ्बाबि? थे आङ्गाॽ सिङ्मुःत्ते़ल्ले़ कुदगाङ् साम्बोन् हबत् पप्मा पोङ्बाबि?” 20 खे़ल्ले़ खाप्पुःन् चरो, इङ्ले़क्के निङ्वाःल्ले़ खे़न् मुयःक् चोगुरो॥ खे़ल्ले़ कुसक्मा साम्मिन् से़ःप्मा मे़सुक्तुन्लो, अक्खे पाःप्माआङ् मे़सुक्तुन्लो, “थे आङ्गाॽ आजुक्वा हुक्को के़वाॽबा पाःन्निन् इङ्ले़क्केग मेःम्बि?” यहवे दाङ्बान् चइःत्दाङ्बा नु के़धे़ॽबा 21 “याकुबे, कन् पाःन्हाॽ निङ्वाॽ इःत्ते़ॽओ, थेआङ्भे़ल्ले़ इस्राइलए, खे़ने़ॽ आङ्गाॽ आसे़वारोबाने़रो॥ आङ्गाॽ खे़ने़ॽ चोःक्ने़बारो, खे़ने़ॽ आङ्गाॽ आसे़वारोबाने़रो, इस्राइलए, आङ्गाॽ खे़ने़ॽ निङ्वाॽ मे़मुःन्ने़ल्लो॥ 22 आङ्गाॽ खे़ने़ॽ ताप्फे़ःम्बा के़याःम्बक्हाॽ खाॽमित् हे़क्के हे़क्क्याङ् खे़ने़ॽ के़लायोहाॽ तानाम्बा तुङ्हिःक् हे़क्के खे़त्तुङ्देसुङ् पिने़रो नुःक्खे़ॽआङ् त्ये़ॽओ थेआङ्भे़ल्ले़ आङ्गाॽ खे़ने़ॽ के़मे़ल्लुङ् हुङुङ्ङाङ् थे़ॽने़आङ् वाॽरो॥” 23 ताङ्साङ्बे, सःत्ते़ॽआङ् साम्लोरे़ॽओ, थेआङ्भे़ल्ले़ यहवे दाङ्बे़ल्ले़ हे़क्के चोगुआङ् वाॽरो॥ इक्सादिङ् खाम्बेःक्माए, यम्बा इक्लाओ अःक्ते़ॽओ, थे़गुसे, ताम्भुङ् नु खे़ॽयोबा के़रे़क् सिङ्बुङ्से, खे़म्गे़दे़प्पा इक्लाओ साम्लोरे़म्मे़ॽओ, थेआङ्भे़ल्ले़ यहवे दाङ्बे़ल्ले़ कुमे़ल्लुङ् हुङुआङ् याकुबे़न् थे़ॽरुआङ् वाॽरो, खुने़ॽ आबाङे इस्राइलओ कुमिमिदिङ्ङिन् ओःन्धाक्तुसिॽरो॥ 24 खे़ने़ॽ के़धे़ॽबा, साप्पोःक्को खे़ने़ॽ के़जोःक्पा यहवे दाङ्बे़ल्ले़ अक्खे पाःत्तुरो— “आङ्गाॽ यहवे दाङ्बाआ, आङ्गाॽ के़रे़क् पाःन्हाॽ चोगुङ्बारो, आङ्गाॽए ताङ्साङ्बान् खिङ्सुङ्बारो, आङ्गाॽ आबाङे इक्सादिङ् खाम्बेःक्मान् फे़सुङ्बारो॥ 25 आङ्गाॽ इङ्ले़क् माङ्निङ्वाॽपान् के़बाःप्पाहाॽरे़ खुनिॽ मिक्सेःन्निन् कुसुम् मे़न्दम्मनाबा चोगुङ्लो, हे़क्क्याङ् थुम्म्या के़इबाहाॽ अदङ् चोगुसिङ्लो॥ आङ्गाॽ सिक्कुम्साबा मनाहाॽरे़ खुन्छिॽ ने़हिनिङ्वान् खादाःक्पा चोगुङ्लो, खे़ब्याङ् खे़ङ्हाॽ खासिङ् मे़न्निःप्मना मे़बोङ्ल चोगुङ्सिङ्लो॥ 26 आङ्गाॽ आसे़वारोबाहाॽरे़ खुन्छिॽ पाःन्निन् निःन्धो चोगुङ्लो, हे़क्क्याङ् आइङ्घङ् के़साबाहाॽरे़ खुन्छिॽ माङ्निङ्वाॽपान्निन् कुलिङ्दो के़त्तुङ्लो॥ आङ्गाॽ यरुसले़म ये़क्यक्किल्ले़ कुयाःम्बेओ अक्खे पाःत्तुङ्लो, ‘खे़न् मनाहाॽरे़ खुन्छिॽ युङ्मादे़न् पोङ्लो,’ आङ्गाॽ यहुदाबा ये़क्यक्हाॽरे़ कुयाःम्बेओ कम्भ पाःत्तुङ्लो, ‘खे़ङ्हाॽ याम्मो चोःक्मा पोङ्लो,’ आङ्गाॽ खे़न् मे़धुप्सु मे़यसुबादे़न्हाॽरे़ कुयाःम्बेओ अक्खे पाःत्तुङ्लो, ‘आङ्गाॽ याम्मो से़त्तुङ् चोगुङ्लो॥’ 27 आङ्गाॽ कुदिःम्बे केःम्बा के़ने़बा च्वाःत्तिन् अक्खे मे़त्तुङ्लो, ‘चप्प्रे़क् चबे़ॽ, आङ्गाॽ के़वहःङ्हाॽ चप्ल याःन्दुङ्लो॥’ 28 आङ्गाॽ कोरेसरे़ कुयाःम्बेओ पाःत्तुङ्लो, ‘खे़न् आङ्गाॽ आमे़ल्लुक् के़गम्बारो’ हे़क्क्याङ् खे़ल्ले़ आङ्गाॽ चोःक्मा इःत्तुङ्बा के़रे़क् के़त्तु पिआरो॥ यरुसले़म ये़क्यक्किल्ले़ कुयाःम्बेओ खे़ल्ले़ अक्खे पाःत्तुरो, ‘खे़न् याम्मो मे़जोगुररो,’ खे़ब्याङ् माङ्हिम्मे़ल्ले़ कुयाःम्बेओग, ‘कल्ले़ कुयुक्ना पाङ्यक्किन् मे़युक्खुररो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.