यसैया 43 - लिम्बुनिङ्वाॽफुमाङ्ङिल्ले़ कुमनाहाॽ से़ःप्मासि माङ्हुप् 1 कर आल्ल याकुबए, खे़ने़ॽ नावागे़न् चइत् के़ने़बा, इस्राइलए, खे़ने़ॽ के़जोःक्पा यहवे दाङ्बे़ल्ले़ अक्खे पाःत्तुरो— “मे़गिसे़न्ने़ॽओ, थेआङ्भे़ल्ले़ आङ्गाॽ खे़ने़ॽ के़मे़ल्लुङ् हुङुङ्ङाङ् थे़ॽने़आङ् वाॽरो॥ आङ्गाॽ खे़ने़ॽ मिङ्लोःक्ने़आङ् उःत्ने़आङ् वाॽरो, खे़ने़ॽग आङ्गाॽइन्नेरो॥ 2 खे़ने़ॽ च्वाःत्लाम्बा के़बोङ्ङाङ् के़बेःक्किल्ले़ आङ्गाॽ खे़ने़ॽनु वाॽआरो॥ खे़ने़ॽ यङ्घङ् वहःङ्लाम् लाङ्गे़घेःक्किल्ले़ खे़ल्ले़ खे़ने़ॽ के़न्हुम्ने़ल्लो॥ मिलाम्बा लाङ्गे़घेःक्काङ् के़बेःक्किल्ले़ खे़ने़ॽ मिगे़न्दिक्ने़ल्लो॥ खे़न् मिधुङ्दिङ् मिराःक्किल्ले़ खे़ने़ॽ खाप्पुथ्यःङ् के़न्जोःक्ने़ल्लो॥ 3 थेआङ्भे़ल्ले़ आङ्गाॽ यहवे दाङ्बा के़निङ्वाॽफुमाङ्आरो, आङ्गाॽ खे़ने़ॽ के़से़न्लप्दाङ्बा इस्राइलबा सेसेबा निङ्वाॽफुमाङ्आरो॥ आङ्गाॽ मिस्र लाजेन् पिरुङ्सिङ्ङाङ् खे़ने़ॽ थे़ॽने़रो, हे़क्क्याङ् खे़ने़ॽ के़ले़क्वाओ कुस नु सेबा लाजेन् पिरुङ्सिङ्लो॥ 4 खे़ने़ॽ ताङ्से़ःप्मारे़ लागि के़ले़क्वाओ के़रे़क् थिम्मे़न्दङ् सुवाङ्हाॽ पिरुङ्सिङ्लो थेआङ्भे़ल्ले़ खे़ने़ॽ आङ्गाॽ आलागि साॽरिक् इमे़ल्लुङ्बा के़जोःक्लो॥ हे़क्क्याङ् आङ्गाॽ खे़ने़ॽ इङ्धाङ् पिने़रो, खे़ब्याङ् लुङ्माॽ तुक्ने़रो॥ 5 मे़गिसे़न्ने़ॽ, थेआङ्भे़ल्ले़ आङ्गाॽ खे़ने़ॽनु वाॽआरो॥ आङ्गाॽ खे़ने़ॽ के़स्सा के़एहाॽ तइनाङ्गे़न् पिसाङ्नु फे़त्तुङ्सिङ्लो, हे़क्क्याङ् नाम्धा ले़प्साङ्नु खे़निॽ फुङ्निङ्लो॥ 6 आङ्गाॽ थाङ्गे़त् ले़प्साङ्ङिन् मे़त्तुङ्लो, ‘खे़ङ्हाॽ पेःक्मा फाःक्ते़से़ॽओ॥’ हे़क्क्याङ् लाङ्गे़त् ले़प्माङ्ङिन् मे़त्तुङ्लो, ‘खे़ङ्हाॽ मे़साक्ते़से़न्ने़ॽओ॥’ आङ्गाॽ आस्सा ये़म्बित्छाहाॽ माःङ्घालाम् नुःक्ते़से़ॽओ खे़ब्याङ् आस्सा मे़न्छुमाहाॽ इक्सादिङ् खाम्बेःक्माल्ले़ नासमा कुयाओनु फे़त्ते़से़ॽओ, 7 आङ्गाॽ आमिङ्ङो मे़उःत्तुसिबाहाॽ के़रे़क्, आङ्गाॽ आमिमिदिङ्ले़ लागि नावागे़न् चइःत् चोगुङ्सिङ्ङाङ् मे़वाॽरो, खे़ङ्हाॽरे़ खुन्छिॽ थक्ला लिङ्गे़न्निन् आङ्गाॽए चोगुङ्बारो॥” यहवे दाङ्बे़ल्ले़ कुदोःन्दि इस्राइल 8 आङ्गाॽ आमनाहाॽ तोःन्दि पिसे़ ताराम्से़ॽओ, खे़ङ्हाॽरे़ खुन्छिॽ मिक् पत्छाङ् खामे़न्निने़ल्लो, ने़क्खोॽ-ने़भाक्क पत्छाङ् नामे़ङ्घे़म्ने़ल्लो॥ 9 के़रे़क् मे़न्छाम् सुवाङ्हाॽ मे़भुङ्सिलरो, हे़क्क्याङ् मनाहाॽ मे़जुम्लरो॥ खुन्छिॽ आत्तिन् नावाइत्लाःल्ले़ कन् पाःन्हाॽ आनिॽ आमे़त्ते़बे, खे़ब्याङ् तगिबा पाःन्हाॽ उवा आजोगुम्बे? खे़ङ्हाॽ से़क्खाबा निमासिरे़ लागि आबाङे आबाङे के़निबा तोःन्दि मे़दारुसिररो, खे़म्ब्याङ् वेॽहाॽरे़ मे़घे़प्सुआङ् मे़बाःत्तुर, “कन् पाःन्निङ्ग से़क्खारो॥” 10 यहवे दाङ्बे़ल्ले़ पाःत्तुरो, “इस्राइलबा मनासे, खे़निॽग आङ्गाॽ आदोःन्दिनिङ्लो सेःक्निङ्बा आसे़वारोबानिङ्लो, खे़ल्ले़चोगुल्ले़ खे़निॽ आङ्गाॽ कुसिङ् याप्मि के़निःत्तिरो हे़क्क्याङ् नसान् याप्मि के़जोगिरो, खे़म्ब्याङ् खे़ङ्ग आङ्गाॽएरो फाॽआङ् कुसिङ् के़निःत्तुम्लो॥ आङ्गाॽनुःल्ले़ तगि हाःत्ताङ् माङ् मे़म्बोङ्ङे वये़रो, हे़क्क्याङ् ताःन्दिआङ् हाःत्ताङ् माङ् मे़बोङ्ने़ल्लो॥ 11 आङ्गाॽ, आङ्गाॽरक् लत्छा यहवे दाङ्बाआरो, आङ्गाॽरक् से़न्लप्दाङ्बाआ वेॽ हाःत्ताङ् होप्लो॥ 12 ताःन्दि के़बोङ्बा पाःन्हाॽ ओसेःन्धाङ् चोगुङ्ङाङ् वाॽआरो, ताङ्से़ःप्तुङ्ङाङ् वाॽ हे़क्क्याङ् उवा चोगुङ्ङाङ् वाॽरो— खे़निॽ लुम्मो आङ्गाॽ कन् चोगुङ्बा, वेॽ माङ्ले़ मे़जोगुबा मेःन्लो॥ खिनिॽग आङ्गाॽए निङ्वाॽफुमाङ्आ फाॽआङ् तोःन्दि के़बिबानिङ्लो” लॽरिक् यहवे दाङ्बे़ल्ले़ पाःत्तुरो॥ 13 “ओरो, उनाहुरिबा ये़म्माङ्धोए खुने़ॽग आङ्गाॽएरो, आङ्गाॽ आहुक्कोलाम् हाःत्ताङ् फिःन्छिङ्मा मे़न्छुक्ने़ल्लो, आङ्गाॽ चोगुङ्बा याःम्बक्किन् हाःत्ले़आङ् ले़ङ्मा मे़सुक्तुल्लो॥” बेबिलोनलाम्बा यहवे दाङ्बे़ल्ले़ इस्राइले़न् से़ःप्तुॽ 14 इस्राइलबा सेसेबा निङ्वाॽफुमाङ्, खे़निॽ ताङ्गे़से़ःप्पा यहवे दाङ्बे़ल्ले़ अक्के पाःत्तुरो, “खे़निॽ ताङ्से़ःप्मारे़ लागि बेबिलोन ये़क्यक्किल्ले़ कुदक्ले़ङ्वाओ थक्सुबाहाॽ पाङ्घुङ्सिङ्लो, आङ्गाॽ खे़न् साॽरिक् आङ्दिङ् के़लॽबा बेबिलोनिहाॽ वालाधाहाॽओ मे़घे़त्छिङ्ल याःन्दुङ्सिङ्लो हे़क्क्याङ् खे़ॽयोबा मनाहाॽ मे़हाःप् मे़जिःङ्लो॥ 15 आङ्गाॽ यहवे दाङ्बाआरो, खे़निॽ सेसे निङ्वाॽफुमाङ्आरो, इस्राइले़न् नावागे़न् चइःत् के़ने़बाआरो, हे़क्क्याङ् खे़निॽ हाङ्आरो॥” 16 यहवे दाङ्बे़ल्ले़ तुङ्गोदिङ् वरःङ्सम्धाङ् माराम् चोगुरो, खइक् खइक् के़इक्सिङ्बा च्वाःत्लाम् लाम् चोगुरो, 17 अन्लाधाहाॽ, अन्हाॽ नु थक्सुबाहाॽ खुने़ॽ मे़क्खुसिरो, खे़ङ्हाॽ आभे़ल्ले़आङ् पोःक्मा मे़न्छुक्के मे़जोन्लो, छक्कङ्ङो हाःम्मनाबा सेमिन् सिबा हे़क्केए खे़ङ्हाॽ मे़सिरो॥ 18 कर यहवे दाङ्बे़ल्ले़ अक्के पाःत्तुरो— के़बेःक्पा पाःन्हाॽ निङ्वाॽ फेःत्छे़म्मे़ॽओ, उन्छोःन्बा पाःन्हाॽ निङ्वाॽ मे़इःत्ते़म्मिन्ने़ॽओ॥ 19 ओमे़त्ते़म्मे़ॽ, आङ्गाॽ लत्छा कुसङ् पान् चोगुङ्ल पत्तारो! हे़क्क्याङ् आल्ल खे़न् पोङ्लो॥ थे खे़न् खे़निॽ के़न्निसुम्मिन्बि? आङ्गाॽ मुरे़क् खारे़क्पा ये़ःङ्घादे़न्नो लत्छा लाम् तयुङ्लो, खे़म्ब्याङ् चा मे़न्नुॽमनाबा लाजेॽओ यङ्घङ् वहःङ्हाॽ कुङ् युर याःन्दुङ्लो॥ 20 ताम्भुङ् थक्साहाॽरे़, किधिहाॽरे़ हे़क्क्याङ् फक्थिःम्बाहाॽरे़ मिङ्सो इङ्धाङ् मे़बिआरो, थेआङ्भे़ल्ले़ एःक्सादे़न्नो च्वाःत् पिरुङ्सिङ्लो, आङ्गाॽ आमना, आङ्गाॽ सेगुङ्सिङ्बाहाॽरे़ खुन्छिॽ थुङ्मारे़लागि ये़ङ्घादे़न्हाॽओ वहःङ्हाॽ कुङ्ल चोगुङ् पिरुङ्सिङ्लो, 21 आङ्गाॽ आनारा मे़भोसुर फाॽआङ् कन् मनाहाॽ आङ्गाॽ आलागि चोगुङ्सिङ्बारो॥ इस्राइलिहाॽरे़ खुन्छिॽ लायो 22 “हे़क्केसाङ् याकुबे, खे़ने़ॽ आङ्गाॽ पेलि मे़म्भाक्के के़गत्तारो, इस्राइलए, खे़ने़ॽ आङ्गाॽ आलागि मे़न्नाए के़वाॽरो॥ 23 खे़ने़ॽ मिधिङ्मनादेमनाबा सिदुङ्जभा तोःम्मारे़ लागि मे़ल्लुक् मे़न्दाःत्ते के़वाॽरो, हे़क्क्याङ् वयागे़न् सिदुङ्जभाःल्ले़ आङ्गाॽ मिङ्सो इङ्धाङ् मे़म्बिए के़गत्तारो॥ कुजा सिदुङ्जभा तोःम्माआङ् माङ्से़वा आयाःम्बक् चोःक्मारे़ लागि खे़ने़ॽ के़लिःप्पा कक् मे़ङ्गुःत्ते कत्ने़रो, खे़ब्याङ् सुक्पा साङ्सिङ्ङाङ् नाःक्ने़आङ् के़नासे़र याःन्ने़बा होप्लो॥ 24 खे़ने़ॽ आङ्गाॽ आलागि कुनाम् के़से़बा लुप्लाःक्के़न् के़न्इङुन्लो, खे़ने़ॽ सासोःत्तिल्ले़ सिदुङ्जभा के़न्दोःन्दुन्नाङ् आसिक् मे़एःप्तुन्लो॥ कर खे़ने़ॽ के़लायोल्ले़ कक् के़गुःत्ताङ्ङाङ् वाॽरो, खे़ने़ॽ के़लायोल्ले़ चोगुल्ले़ नासाङ्ल के़याःन्दाङ्ङाङ् वाॽरो॥ 25 “आङ्गाॽ हाबा खे़न्नेआरो, आङ्गाॽ के़लायो के़लासोःत्हाॽ आलागि तुगुङ् पिने़रो, हे़क्क्याङ् ताप्फे़ःम्बा के़याःम्बक्हाॽ निङ्वाॽ मे़इःत्ताल्लो॥ 26 आङ्गाॽ आलागि तगिबा पाःन्हाॽ निङ्वाॽसोओ ताराम्मे़ॽओ, कन् पाःन्हाॽरे़ लागि आनिॽ सोरिक् पान् थक्तिरो, खे़ने़ॽ आप्तिक् मेःन्नेबा कुदोःप्मा निधाःप्मारे़ लागि के़बाःन्हाॽ युक्खे़ॽओ॥ 27 थिक्सिगेक्पा के़धाःक् थे़बाःल्ले़ लायो चोगुरो, हे़क्क्याङ् के़लाम्लोबाहाॽ आदक्ले़ङ्वाओ पिफ्युङ्बा मे़बोःक्खे़रो॥ 28 कल्ले़चोगुल्ले़ खे़ने़ॽ के़माङ्हिम्मोबा निङ्वाॽफुसाम्बाहाॽ सिरिङ् मे़मर याःन्दुसिङ्लो, हे़क्क्याङ् याकुबे़न् मे़क्मारे़ लागि नु इस्राइले़न् आप्तिक्को थामारे़ लागि मनाहाॽ हुक्सुप्तुङ्सिङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.