Biblia Todo Logo
Bib sou entènèt

- Piblisite -

यसैया 42 - लिम्‍बु


यहवे दाङ्‌बे़ल्‍ले़ कुसे़वारोबा

1 यहवे दाङ्‌बे़ल्‍ले़ पाःत्तुरो, “कन् आङ्‌गाॽ आसे़वारोबारो, खे़न् आङ्‌गाॽ के़धुम्‍बा चोगुङ्‌लो, खे़न् सेगुङ्‌ङाङ् वाॽरो खुने़ॽनु आङ्‌गाॽ सःत्ताङ्‌ङाङ् वाॽआरो॥ आङ्‌गाॽ खे़न् आयाम्‍साम्‍मिल्‍ले़ थुक्‍तुर याःन्‍दुङ्‌ङाङ् वाॽरो हे़क्‍क्‍याङ् खे़ल्‍ले़ के़रे़क् सुवाङ्‌हाॽओ कुदोःप्‍मा खासे़न् तारुरो॥

2 खे़न् मे़अःक्‍ने़न्, हे़क्‍क्‍याङ् मे़भिःक्‍ने़न्‍नाङ्‌लो इग्र खे़ल्‍ले़ कुइक्‍लान् माराम्‍मो मनाहाॽरे़ मे़घे़प्‍सुर मे़जोगुन्‍लो॥

3 खे़ल्‍ले़ के़यःप्‍पा मिक्‍लाधिक्‍काङ् मे़ए़क्‍खुन्‍लो, हे़क्‍क्‍याङ् सिदोॽदोॽबा सेमिःन्‍नाङ् खे़ल्‍ले़ मे़से़रुल्‍लो, खे़ल्‍ले़ नसाःन्‍नो कुदोःप्‍मा खासे़न् लोःन्‍दुरो॥

4 खे़ल्‍ले़ इक्‍सादिङ् खाम्‍बेःक्‍को खासे़न् चोःक्‍मा याःम्‍बक्‍किन् थधप् मे़ल्‍लॽमनाबा मे़न्‍जोःक्‍के थारिक् खुने़ॽ योःन्‍जोॽजोॽबा मे़न्‍धुम्‍मनाबा मे़बोङ्‌ने़ल्‍लो॥ हे़क्‍क्‍याङ् कुसिक्‍काङ् मे़भे़क्‍ने़ल्‍लो, खे़ल्‍ले़ कुनिसाम्‍मो वागप्‍खाम्‍मो के़युङ्‌बाहाॽरे़ लाम् ओमे़मे़त्तुरो॥”

5 निङ्‌वाॽफुमाङ् यहवे दाङ्‌बे़ल्‍ले़ अक्‍खे पाःत्तुरो— ताङ्‌साङ्‌बे़न् के़जोःक्‍पाआङ् खे़न् के़घिङ्‌बे़न्, हे़क्‍क्‍याङ् इक्‍सादिङ् खाम्‍बेक् नु खे़प्‍मोलाम् के़लःम्‍बा के़रे़क् मे़बोःन्‍ल मे़धे़ॽर के़याःम्‍बा, खे़ब्‍याङ् खे़प्‍मो के़वाॽबा मनाहाॽ साःङ्‌गु सक्‍मा के़बिबा खे़म्‍ब्‍याङ् खे़ॽयो लाङ्‌गे़घेःक्‍पाहाॽ याम्‍साम् के़बिबा—

6 “आङ्‌गाॽ, यहवे दाङ्‌बे़ल्‍ले़ आसाम्‌योबा आयाःम्‍बक् कुइसिक् खे़निॽ उःत्‍निङ्‌ङाङ् वाॽरो॥ आङ्‌गाॽ खे़ने़ॽ के़हुक्‍किन् ते़म्‍सुङ्, हे़क्‍क्‍याङ् से़ःप्‍ने़रो, खे़ने़ॽए इक्‍सादिङ् खाम्‍बेःक्‍कोबा मे़न्‍छाम् सुवाङ्‌हाॽरे़ लागि माङ्‌हे़क् चोःक्‍ने़रो खम्‍ब्‍याङ् थिम्‍मे़न्‍दङ् सुवाङ्‌हाॽरे़ खुनिॽ लागि ओःत्ति चोःक्‍ने़रो॥

7 खे़ने़ॽ मिक्‍फःम्‍बाहाॽरे़ खुन्‍छिॽ मिक्‍किन् के़हन्‍दु के़बिरुसिरो, पुङ्‌लाहिम्‍मो साक्‍पा के़धाबाआङ् के़युङ्‌बाहाॽ के़ले़रुसिरो खागे़माक्‍पा लुम्‍बाःत्तोलाम् लाःक्‍कात् के़लःत्तुसिरो॥

8 “आङ्‌गाॽ यहवे दाङ्‌बाआरो, आङ्‌गाॽ आमिङ् हाबा खे़न्‍नेरो! आङ्‌गाॽ आमिमिदिङ्‌ङिन् वेॽहाॽ मे़बिआसिङ्‌ङिल्‍लो, इग्र आङ्‌गाॽ आनारा फोमान् नावाइत्‍लाहाॽ मे़बिरुङ्‌सिङ्‌ङिल्‍लो॥

9 ओमे़त्ते़ॽ, तगिबा पाःन्‍हाॽ पोःक्‍खे़ चुरे़रो, आङ्‌गाॽ कुसङ् पाःन्‍हाॽ चे़क्‍खुङ् पाःत्तुङ्‌लो॥ खे़ङ्‌हाॽ पोङ्‌मानुःल्‍ले़ तगिए आङ्‌गाॽ खे़न् पाःन्‍हाॽरे़ कुयाःम्‍बेओ मे़त्‍निङ्‌लो॥”


यहवे दाङ्‌बे़ल्‍ले़ कुनारा फोमा साम्‍लो

10 यहवे दाङ्‌बे़ल्‍ले़ कुलागि कुसङ् साम्‍लोधिक् साम्‍मे़त्ताम्‍मे़ॽओ, इक्‍सादिङ् खाम्‍बेःक्‍माल्‍ले़ नासमा कुयाओनु खुने़ॽ कुनारा फोसे़म्‍मे़ॽओ, तुङ्‌गोदिङ् वरःङ्‌ङो लाम्‍दिक् के़जोःक्‍पासे, हे़क्‍क्‍याङ् खे़ॽयो के़याक्‍पा के़रे़क् परिक्‍पा पाधुङ् ले़ःक्‍ङासे, वागप्‍खाम्‍हाॽ नु खे़ॽयो के़युङ्‌बासे साम्‍लोरे़म्‍मे़ॽओ!

11 मुरे़क् खारे़क्‍पा ये़ःङ्‌घादे़न् नु खे़प्‍मोबा पाङ्‌जुम्‍हाॽओ के़युङ्‌बाहाॽ मे़अःक्‍लरो॥ केदार के़युङ्‌बा पाङ्‌भेॽओबा मनाहाॽ साम्‍मे़लोररो, सेलाबा मनाहाॽ मे़सःत्ताङ् साम्‍मे़लोररो, खे़ङ्‌हाॽ थे़गु सम्‍धाङ्‌लाम् मे़अःक्‍लरो॥

12 खे़ङ्‌हाॽरे़ यहवे दाङ्‌बान् मिमिदिङ् मे़बिरुररो, वागप्‍खाम्‍हाॽओ खुने़ॽ कुनारा फोमा उवा मे़जोगुररो॥

13 यहवे दाङ्‌बान् मुक्‍के़गुबा ये़म्‍बित्‍छा कुइसिक् लःन्‍लो, लत्‍छा थक्‍सुबा कुइसिक् खुने़ॽ कुसिक् सम्‍मे़न् ओसेःन्‍धाङ् चोगुॽरो॥ खुने़ॽ अःक्, हे़क्‍क्‍याङ् थङ् चोःक्‍मा यम्‍बा इक्‍लाओ अःक्‍लो, खुने़ॽ कुनिङ्‌मिहाॽ नाःन्‍दुसिरो॥


निङ्‌वाॽफुमाङ्‌ङिल्‍ले़ कुमनाहाॽ फाॽमासि माङ्‌हुप् चोगु

14 “यरिक् ये़म् थारिक् आङ्‌गाॽ स्‍वाःत् युङाङ्‌लो, आङ्‌गाॽ मे़म्‍बाःत्ते युङाङ्‌लो, हे़क्‍क्‍याङ् आबाङे थेःक्‍सिङ्‌ङारो॥ कर अङे़ःक्‌वा सागे़वाःम्‍मा मे़न्‍छुमा कुसिङ् आल्‍ल अःक्‍कारो, आङ्‌गाॽ हे़ङ्‌गे़ःक् हे़ङ्‌गे़ःक् लॽआरो खे़ब्‍याङ् सक्‍मा सोःन्‍छिङ्‌ङारो॥

15 आङ्‌गाॽ कोःक्‍मा फाङ्‌जङ् नु थे़गु माङ्‌वाहाॽ मुरे़क् खारे़क् चोगुङ्‌लो, हे़क्‍क्‍याङ् खे़प्‍मो के़युङ्‌बा के़रे़क् सिङ्‌बुङ्‌हाॽ सर्गे़ङ् हेसुङ्‌लो॥ वहःङ्‌हाॽ वागप्‍खाम् पोङ्‌ल ले़क्‍खुङ्‌लो, खे़ब्‍याङ् वरक्‍हाॽ चप्‍प्रे़क् चप्‍सुङ्‌लो॥

16 आङ्‌गाॽ मिक्‍फःम्‍बाहाॽ खे़ङ्‌हाॽरे़ मे़न्‍निसुम्‍बा लाम्‍मो लाम्‍लोसुङ्‌सिङ्‌लो॥ खे़ङ्‌हाॽरे़ कुसिङ् मे़न्‍निःत्तुम्‍बा लाम्‍मिन् खे़ङ्‌हाॽ ओसेःन्‍धाक्‍तुङ्‌सिङ्‌लो॥ आङ्‌गाॽ खे़ङ्‌हाॽरे़ खुन्‍छिॽ तगि खागे़माक्‍पे़न् खागे़ओःप्‍पा चोगुङ्‌लो हे़क्‍क्‍याङ् पाक्‍लुम् उःक्‍चम् के़लॽबा ते़न्‍हाॽ ले़प्‍पे़प्‍पा तङ्‌सुङ्‌लो॥ आङ्‌गाॽ कन् याःम्‍बक्‍हाॽ चोगुङ्‌लो, आङ्‌गाॽ खे़निॽ मे़ले़त्‍ने़न्‍निङ्‌लो॥

17 कर माङ्‌साम्‍माङ्‌हाॽ नागे़साॽबाहाॽ, हे़क्‍क्‍याङ् नावाइत्‍लाहाॽ ‘खे़निॽए आनिगे माङ्‌निङ्‌लो’ के़मे़प्‍पाहाॽ नाधामो मे़धारो॥”


इस्राइलबा मनाहाॽ मे़न्‍हुॽसिङ्‌ङे़न्

18 यहवे दाङ्‌बे़ल्‍ले़ पाःत्तुरो, “नाधाक्‍पासे, ने़क्‍खोॽबाल्‍ले़ खे़प्‍साम्‍मे़ॽओ, मिक्‍फःम्‍बासे, नुरिक्‍काङ् ओमे़त्ते़म्‍मे़ॽओ॥

19 आङ्‌गाॽ आसे़वारोबान्‍नुःल्‍ले़ वेॽ मिक्‍फःम्‍बा हात् वाॽबे? इग्र आङ्‌गाॽ पाङ्‌घुङ्‌बा इङ्‌घङ्‌साबान् हे़क्‍तङ्‌बा नाधाक्‍पा वेॽ हात् वाॽबे? आङ्‌गाॽओ हुक्‍के़सुप्‍सिङ्‌बा हे़क्‍तङ्‌बा मिक्‍फःम्‍बा एःन् वाॽबे? यहवे दाङ्‌बे़ल्‍ले़ कुसे़वारोबा हे़क्‍तङ्‌बा आसाःत् वाॽबे?

20 खे़ने़ॽ यरिक् पाःन्‍हाॽ के़निसुआङ् के़वाॽरो, कर सिङ्‌सिङ् ये़क्‌ये़क्‍काङ् निङ्‌वाॽओ मे़न्‌युङ्‌ङे के़गत्तुरो॥ खे़निॽ के़ने़भाक्‍हाॽग हङ् लॽरिक्‍के पत्‍लो, कर खे़ने़ॽ थेआङ् के़ङ्‌घे़प्‍सुल्‍लो॥

21 आबाङे कुसाम्‌योनिमाल्‍ले़ लागि आबाङे कुसाम्‌योथिम् इङ्‌जाङ्‌ङिन् यम्‍बा चोःक्‍मा नु मिमिदिङ् पिमा यहवे दाङ्‌बे़न् कुसिराॽ थाङे़रो॥

22 कर कन्‍हाॽग लत्‍छा अक्‍तङ्‌बा सुवाङ्‌सिरो, खे़ङ्‌हाॽ इङ्‌ले़क्‍को मे़ध्‍ये़आङ् मे़नाप्‍तुसिआङ् मे़वाॽरो॥ खे़ङ्‌हाॽ के़रे़क् लुम्‍बाःत्तो मे़ध्‍ये़आङ् मे़याक्‍लो इग्र पुङ्‌लाहिम्‍मो साक्‍पा मे़ध्‍ये़आङ् मे़याक्‍लो॥ खे़ङ्‌हाॽ मे़नाप्‍तुसिआङ् के़नाङ्‌बा के़धेःक्‍पा हाःत्ताङ् होप्‍लो, खे़ङ्‌हाॽ मे़नाप्‍तु मे़देॽरुसिबा याङ्‌साकुन्‍धेहाॽ नुःक्‍ताम् पिराम्‍सिम्‍मे़ॽ के़लॽबा हाःत्ताङ् होप्‍लो॥

23 “खे़निॽ लुम्‍मो कन् पाःन्‍निन् के़घे़म्‍बा हात् वाॽबे? इग्र के़दाबा ये़म्‍मिन् नुरिक् के़घे़म्‍बा एःन् वाॽबे?

24 चिगक्‌वा याङ्‌साकुन्‍धे के़नाप्‍पाहाॽरे़ खुन्‍छिॽ हुक्‍को याकुबे़न् हाःत्‍ले़ हुक्‍सुप्‍तुबे, हे़क्‍क्‍याङ् इस्राइले़न् फाःन्‍दाहाॽरे़ खुन्‍छिॽ हुक्‍को हाःत्‍ले़ थासुबे? थे आनिॽ खुने़ॽ कुदक्‍ले़ङ्‌वाओ लायो आजोगुम्‍बा यहवे दाङ्‌बे़ल्‍ले़ए थासुसिबा मेःम्‍बि? थेआङ्‌भे़ल्‍ले़ खे़ङ्‌हाॽ खुने़ॽ कुलाम्‍मो लाङ्‌मे़ङ्‌घेगे़ल्‍लो, खे़ङ्‌हाॽरे़ खुने़ॽ कुइङ्‌जाङ्‌ङिन् मे़न्‍इःत्तुन् मे़न्‍नाःत्तुल्‍लो॥

25 खे़ल्‍ले़चोगुल्‍ले़, खे़ङ्‌हाॽरे़ खुन्‍छिॽ सम्‍धाङ् मि हे़क्‍तङ्‌बा खुने़ॽ कुसिक्‍के़न् थासुरो हे़क्‍क्‍याङ् ते़न्‍धङ्‌ङो खे़ङ्‌हाॽ मे़क्‍खुसिरो॥ खे़ल्‍ले़चोगुल्‍ले़ खे़ङ्‌हाॽरे़ खुन्‍छिॽ के़रे़क् पिसाङ् मि तिरे़रो, हम्‍भसाङ् खे़ङ्‌हाॽरे़ कुसिङ् मे़न्‍निःत्तुल्‍लो॥ खे़न् मिःल्‍ले़ खे़ङ्‌हाॽ मे़क्‍खुसिरो, हे़क्‍केसाङ् खे़न् पाःन्‍निन् खे़ङ्‌हाॽरे़ खुन्‍छिॽ निङ्‌वाॽओ मे़न्‌युक्‍खुल्‍लो॥”

© 2009, 2023, Wycliffe Bible Translators, Inc. All rights reserved.

Wycliffe Bible Translators, Inc.
Swiv nou:



Piblisite