यसैया 41 - लिम्बुनिङ्वाॽफुमाङ्ङिल्ले़ इस्राइलिहाॽ निङ्वाॽ निःन्धो पिरुसि 1 “वहःङ् नाहाङ्बा लाजेॽओ के़युङ्बा मनासे, आङ्गाॽ आबेसाङ् स्वाःत् युङे़म्मे़ॽओ॥ इक्सादिङ् खाम्बेःक्मोबा मे़न्छाम् सुवाङ्हाॽ कुसङ् लॽरिक् के़धुम्बा मे़बोङ्लरो! खे़ङ्हाॽ निःत्ताङ् मे़दाआङ् मे़बाःत्लरो, आनिॽ सोरिक् खासे़न्दे़न्नो चुप्सिरो॥ 2 “निङ्वाॽफुमाङ्ङिल्ले़ कुसाम्योनिमो कुसे़वा याःम्बक् चोःक्मारे़ लागि हात् उःत्तुआङ् वाॽबे? तॽइ नाङ्गे़न् पिसाङ्नु हाङ्ङिन् हाःत्ले़ कुसिक्समे़र याःन्दुआङ् वाॽबे? खुने़ॽ इक्सादिङ् खाम्बेःक्मोबा मे़न्छाम् सुवाङ्हाॽ कुयुक्को मे़दार याःन्दुसिरो, हे़क्क्याङ् हाङ्हाॽ खे़ल्ले़ कुबेसाङ् कुयुक्को तारुसिरो॥ खुने़ॽ खे़ङ्हाॽ कुदाभेःल्ले़ खाम्पु थ्यःङ् चोगुसिरो, हे़क्क्याङ् कुलिःल्ले़ सुरिःत्तिल्ले़ फे़सुबा याॽसिप् हे़क्के चोगुसिरो॥ 3 खुने़ॽ खे़ङ्हाॽ नाःत्तुसिरो, हे़क्क्याङ् कुसिङ् मे़निःत्तुम्बा लाम्हाॽओ लाङ्घेःक्साङ् खुने़ॽ थेआङ् मे़ल्लॽए तगि पेःक्लो॥ 4 कुहेःक्सिङ्माआङ्धो थाःक्थाःक् थारिक् के़उःप्पा हे़क्क्याङ् कन् याःम्बक्किन् कुलिङ्दो के़गे़प्पान् हाःप्पे? खे़ङ्ग आङ्गाॽएरो, कुहेःक्सिङ्माआङ्धो के़वाॽबा नु याङ्सिआङ् के़वाॽबा यहवे दाङ्बान् आङ्गाॽएरो॥” 5 वागप्खेःङ्ङो के़युङ्बाहाॽरे़ कन् मे़निसुआङ् मे़गिसे़रो, इक्सादिङ् खाम्बेःक्किल्ले़ ना कुयाओ थारिक्पाहाॽ मे़यक्खे़रो, खे़ङ्हाॽ निःत्ताङ् मे़बेःक् हे़क्क्याङ् मे़दारो॥ 6 थिक्ले़ वेॽइन् फाॽरुरो, हे़क्क्याङ् कुन्साॽ मे़त्तुॽ, “हाङ्हाङ् लॽरे़ॽओ॥” 7 कुहुक्चो के़नुॽबा चोबेगुःल्ले़ साम्म्याङ् के़धक्पे़न् आःन्छिङ्मा पिरुरो, हे़क्क्याङ् खे़ल्ले़ साम्म्याङ्ङिन् थवाःल्ले़ हिप्तु तङ्घुरो, खे़ल्ले़ कुधुम्मा सिदाॽइल्ले़ तुम्सुरो, हे़क्क्याङ् पाःत्तुॽ, “कन् नुबा चोक्लो,” हे़क्क्याङ् खे़न् मुक्मे़धाने़न्ल फाॽआङ् फे़न्तिङ् मे़धे़प्तुआङ् मे़भोःन्दुरो॥ 8 “कर खे़ने़ॽ, आङ्गाॽ आसे़वारोबा इस्राइलए, आङ्गाॽ सेःक्ने़बा याकुबए, आङ्गाॽ आन्देङ्बा अब्राहाम्मिल्ले़ कुमुॽइदाङ्सा, 9 आङ्गाॽ खे़ने़ॽ इक्सादिङ् खाम्बेःक्माल्ले़ कुनुप्मोनु ते़म्ने़आङ् फे़त्ने़रो, हे़क्क्याङ् इक्साःल्ले़ कुसुक्पोनु खे़ने़ॽ उःत्ने़रो॥ आङ्गाॽ मे़त्ने़, ‘खे़ने़ॽग आङ्गाॽ आसे़वारोबाने़रो’ खे़ने़ॽ आङ्गाॽ सेःक्ने़आङ् वाॽरो, हे़क्क्याङ् आङ्गाॽ खे़ने़ॽ मे़न्नाॽए कत्ने़रो॥ 10 कल्ले़चोगुल्ले़ खे़ने़ॽ मे़गिसे़न्ने़ॽओ, थेआङ्भे़ल्ले़ आङ्गाॽ खे़ने़ॽनु वाॽआरो॥ के़निङ्साङ् मे़बुगे़न्ने़ॽ, थेआङ्भे़ल्ले़ आङ्गाॽ के़निङ्वाॽफुमाङ्आरो, आङ्गाॽ खे़ने़ॽ के़धुम्बा चोःक्ने़रो॥ आङ्गाॽ खे़ने़ॽ फाॽने़रो, साम्योबा आजुक्वा आहुक्किल्ले़ आङ्गाॽ खे़ने़ॽ फाॽने़ चोःक्ने़रो॥ 11 “खे़ने़ॽनु कुयाःक् के़ले़ॽबाहाॽ के़रे़क् से़क्खासाङ् सिरिङ्ममो मे़धारो, हे़क्क्याङ् नामे़न्छाॽ मे़बोङ्लो, खे़ने़ॽ के़अप्पाहाॽ थेनाधेबा मे़बोङ् खे़ब्याङ् मे़मे़क्लो॥ 12 खे़ने़ॽ के़निङ्मिहाॽ के़गोःत्तुसिसाङ् खे़ङ्हाॽ के़ङ्घोसुसिल्लो, खे़ने़ॽ के़दक्ले़ङ्वाओ थङ् के़जोःक्पाहाॽआङ् हने़बा मे़बोङ्लो, खे़म्ब्याङ् मे़मे़क् मे़सिरो॥ 13 थेआङ्भे़ल्ले़ आङ्गाॽ यहवे दाङ्बा के़निङ्वाॽफुमाङ्आरो, आङ्गाॽ खे़ने़ॽ के़जुक्वा हुक्किन् ते़म्सुङ्लो, हे़क्क्याङ् खे़ने़ॽ अक्खे मे़त्ने़रो, ‘मे़गिसे़न्ने़ॽ, आङ्गाॽ खे़ने़ॽ फाॽने़रो॥’” 14 यहवे दाङ्बे़ल्ले़ अक्खे पाःत्तुरो, “फेॽबात् याकुबए, चुःक्सा इस्राइलए, मे़गिसे़ने़ॽओ! थेआङ्भे़ल्ले़ आङ्गाॽए फाॽने़रो, खे़ने़ॽ के़धे़ॽबा, इस्राइलबा सेसे निङ्वाॽफुमाङ् आङ्गाॽएरो॥ 15 ओमे़त्ते़ॽ, आङ्गाॽ खे़ने़ॽ कुसङ् नु हासम्सम्बा कुहाबोॽ के़युङ्बा चा हिप्मा खजुम् खया चोःक्ने़रो॥ खे़ने़ॽ नाङ्जङ्लुङ्हाॽ के़साःक्तुरो, हे़क्क्याङ् चिधक् चिधक् के़धगुआङ् खाप्पुथ्यःङ् के़जोगुरो, खे़ब्याङ् थे़गुहाॽ चासिप् हे़क्तङ्बा के़जोगुरो॥ 16 खे़ने़ॽ खे़ङ्हाॽ के़आःप्सुसिरो, हे़क्क्याङ् सुरिःत्तिल्ले़ खे़न् पक्खु तेॽरुरो, खे़ब्याङ् सुरित् केजङ्ङिल्ले़ फे़सु तेॽरुसिरो॥ कर खे़ने़ॽग यहवे दाङ्बाओ के़सःत्लो, खे़ने़ॽ इस्राइलबा सेसे निङ्वाॽफुमाङ्ङिन् मिमिदिङ् के़बिरुरो॥ 17 “याङ्गे़साॽबा नु थेआङ् मे़ङ्गप्मनाबाहाॽरे़ च्वाःत् मे़गोःत्तुरो, कर च्वाःत् मे़ङ्घोसुल्लो, वामिःक्माल्ले़ खे़ङ्हाॽरे़ खुन्छिॽ मुरान् हेरो॥ कर आङ्गाॽ यहवे दाङ्बे़ल्ले़ खे़ङ्हाॽ नुगप् पिरुङ्सिङ्लो, आङ्गाॽ इस्राइलबा निङ्वाॽफुमाङ्ङिल्ले़ खे़ङ्हाॽ मे़ले़त्तासिङ्ङिल्लो॥ 18 मुरे़क् खारे़क्पा कोःक्मा फाङ्जङ् थे़गु माङ्वाहाॽओनु वहःङ् कुङ्ल याःन्दुङ्लो, हे़क्क्याङ् ते़म्भोओ वाबुन्दाक्वाहाॽ लःन्ल चोगुङ्लो॥ मुरे़क् खारे़क्पा ये़ःङ्घादे़न्निन् वरक् पोङ्ल चोगुङ्लो, हे़क्क्याङ् के़हेबा खाम्बेःक्मान् च्वाःत् पुन्दाक्वा चोगुङ्लो॥ 19 मुरे़क् खारे़क्पा ये़ःङ्घादे़न्नो आङ्गाॽ साम्माङ्सिङ्, कुदिङ् के़युङ्बा, अङ्गम् फुङ् नु पे़ःङ्वा लिःत्छे सिङ्बुङ्हाॽ लिङ्ल याःन्दुङ्लो॥ आङ्गाॽ चा मे़न्नुॽमनाबा खाम्बेःक्को आःङ्हाॽ हे़क्क्याङ् सुक्पा सिङ्हाॽ थिक्ले़ङ्ले़ लिङ्ल चोगुङ्लो, 20 हे़क्केलॽरिक् मनाहाॽरे़ मे़निसुआङ् निङ्वाॽ मे़इःत्तुररो, हे़क्क्याङ् कङ्ग यहवे दाङ्बे़ल्ले़ कुहुक्किल्ले़ चोगुबा याःम्बक् इग्र इस्राइलबा सेसे निङ्वाॽफुमाङ्ङिल्ले़ चोगुबा फाॽआङ् नुरिक्काङ् कुसिङ् मे़निःत्तुररो॥” यहवे दाङ्बे़ल्ले़ माङ्साम्माङ्हाॽ हने़बा लेःत्तुसि 21 यहवे दाङ्बा, याकुबरे़ कुहाङ्ङिल्ले़ अक्खे पाःत्तुरो, “आबाङे खिनिॽ तुःन्दे पाःन्हाॽ युक्खे़म्मे़ॽओ, खे़निॽ पाःप्मा युङ्मा के़बोङ्बा पाःन्हाॽ ताराम्मे़ॽओ॥ 22 थे के़बोङ्बा वाॽ खे़न् पाःप्मारे़ लागि खे़निॽ नावाइत्लाहाॽ ताराम्से़ॽओ॥ कम्भलॽरिक् के़बोङ्बा के़जुःप्पा पाःन्हाॽ आनिगे आमे़त्ते़ॽओ, हे़क्क्याङ् आनिगे खे़न् पाःन्नो निङ्वाॽ हे़त्तासिगे़रो॥ खे़ब्याङ् निन्धासेःक्ओ खे़न् थे़मा पोङ्लत्छ फाॽआङ् आनिगे कुसिङ् निःप्मा सुक्तुम्बे़ररो, इग्र पोङ्मा के़इःप्पा पाःन्निन् आनिगे आजे़क्ते़ॽओ॥ 23 आल्ल के़दाबा पाःन्हाॽ आनिगे ओसेन् आधाक्ते़ॽओ, हे़क्क्याङ् खे़निॽ माङ्निङ् फाॽआङ् कुसिङ् निःप्मा सुक्तुम्बे़रो॥ नुबा इग्र ताप्फे़ःम्बा थे़माइ चोगे़म्मे़ॽओ, हे़क्केलॽरिक् आनिगे सावेःत् यङ्ङाङ् किसिगे़रो॥ 24 कर खे़निॽग कुसुम् मे़न्दम्मनाबानिङ्लो, हे़क्क्याङ् खे़निॽ याःम्बक्किन् साॽरिक्के थेनाधेबा चोक्लो, हाःत्ले़ खे़निॽ से़वा के़मे़त्तिॽ खे़न् सिक्के़ले़ःङ्बा पोङ्लो॥ 25 “कुभा मनाधिक् थाङ्गे़त् ले़प्माङ्लाम् हुसुङ्ङाङ् वाॽरो, हे़क्क्याङ् खे़न् यो युरो॥ नाङ्गे़न् ले़प्साङ्नु फे़न्नाङ् खे़ल्ले़ आङ्गाॽ आमिङ्ङिन् पाःत्तुरो, कोःम्भाल्याःल्ले़ खाम्मिन् लाःक्तुबा हे़क्के युक्साबाहाॽ तोॽरुसिरो॥ 26 कुहेःक्सिङ्माआङ्धो हाःत्ले़ ओसेःन्धाङ् चोगुआङ् आनिगे कुसिङ् निःप्मा सुक्तुम्बे़बे? इग्र तगिआङ्धो आत्तिल्ले़ कन् याप्मि ओःन्धाक्ते़आङ् खुने़ॽ कुदोःप्मा वये़ फाॽआङ् आनिगे पाःप्मा सुक्तुम्बे़आङ्बे? कन् पाःन्निन् हाःत्ले़आङ् आनिगे मे़मे़त्तिगे़न्लो, तगि एःल्ले़आङ् लत्छा पाःन्सुत्लाधिक्काङ् मे़बाःत्तुल्लो, खिनिॽ पान् के़घे़म्बा आसाःत्ताङ् मे़वये़ने़ल्लो॥ 27 के़रे़क्नुःल्ले़ तगि सियोन कोःक्मान् ‘ओमे़त्ते़म्मे़ॽओ, खे़ङ्हाॽग कॽयो मे़वाॽ’ के़मे़प्पाङ्ग आङ्गाॽए वयाङ्लो॥ यरुसले़म ये़क्यक्को के़युङ्बाहाॽ सुनाइङ् पिमासिरे़ लागि लत्छा इङ्घङ्साबा के़बाङ्बे़न्नाङ् आङ्गाॽए वयाङ्लो॥ 28 आङ्गाॽ हक्सुङ्सिङ् कर खे़ॽयो हाःत्ताङ् मे़होप्लो, सुजा पिमारे़ लागि खे़ङ्हाॽरे़ खुन्छिॽ लुम्मो एःन्नाङ् मे़वाॽने़ल्लो, खे़ङ्हाॽ सेःन्दोमासिल्ले़ आत्तिल्ले़आङ् नुगप् आमे़म्बिने़ल्लो॥ 29 ओमे़त्ते़म्मे़ॽ, खे़ङ्हाॽ के़रे़क् इङ्ले़क्केसिरो! खे़ङ्हाॽरे़ खुन्छिॽ याःम्बक्किल्ले़ थेआङ् मे़यारुल्लो, खे़ङ्हाॽरे़ खुन्छिॽ नावाइत्लाहाॽग थेआङ् मेःम्बा सुरित् हे़क्तङ्बारक्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.