यसैया 40 - लिम्बुहाङ्हाङ् लॽमा पाःन्जाःक् 1 खिनिॽ निङ्वाॽफुमाङ्ङिल्ले़ पाःत्तुरो, “आङ्गाॽ आमनाहाॽ हाङ्हाङ् मे़त्ताम्सिम्मे़ॽओ! खे़ङ्हाॽ हाङ्हाङ् मे़त्ताम्सिम्मे़ॽओ! 2 नःम्नःम्माङ् यरुसले़म ये़क्यक्को के़युङ्बा मनाहाॽ मे़त्ते़से़ॽओ, खे़ॽयोबा मनाहाॽरे़ खुन्छिॽ तुक्खेन् पेआङ् वाॽरो॥ हे़क्क्याङ् खे़ङ्हाॽरे़ खुन्छिॽ लायोहाॽ ले़प्मि पोःक्खे़आङ् वाॽरो, खे़ङ्हाॽरे़ खुन्छिॽ लायोहाॽरे़ लागि निले़ङ्बा खुम्दिङ् मे़घोसुआङ् वाॽरो॥ 3 “लत्छा इक्लाधिक् खे़म्दे़त्लो— ‘मुरे़क् खारे़क् थेआङ् के़होप्पादे़न्नो यहवे दाङ्बे़ल्ले़ कुलागि लाम्धिक् यारिप् चोगे़ॽओ॥ मुरे़क् खारे़क् थेआङ् के़होप्पा ये़ःङ्घादे़न्नो आनिॽ निङ्वाॽफुमाङ्ङिल्ले़ कुलागि माराम्धिक् तोॽदोन् चोगे़ॽओ॥ 4 के़रे़क् पाक्लुम्लुम्बा ने़ने़बादे़न्हाॽ चाङ्जाङ्बा मे़जोगुरो, काक् नाङ्जङ्लुङ् नु कोःक्मा फाङ्जङ्हाॽ ताङ्बा मे़जोगुरो॥ मे़न्दङ्मनाबा किक्क्वे़ःङ् किक्वे़ःङ्बा लाजेॽहाॽ तोॽदोःम्बा मे़जोगुरो, हे़क्क्याङ् पाक्लुम्लुम्बा लाजेॽहाॽ ले़प्पे़प्पा मे़जोगुरो॥ 5 हे़क्क्याङ् यहवे दाङ्बे़ल्ले़ कुमिमिदिङ् ओसेःन्धाङ् मे़जोगुरो, खे़ब्याङ् के़रे़क् मे़न्छाम् याप्मिहाॽरे़ खे़न् थिक्ले़ङ्ले़ सोरिक् मे़निसुरो, थेआङ्भे़ल्ले़ यहवे दाङ्बे़ल्ले़ए पाःन्निन् पाःत्तुआङ् वाॽरो॥’” 6 लत्छा इक्लाधिक्ले़ पाःत्तु, “अःक्ते़ॽओ” हे़क्क्याङ् आङ्गाॽ पाःत्तुङ्लो, “आङ्गाॽ थे पाःत्तुङ्ङाङ् अःक्काबाबे?” “के़रे़क् मे़न्छाम् याप्मिहाॽ याःन्सुङ्हाॽ हे़क्तङ्बा मे़जोक्लो, खे़ब्याङ् खे़ङ्हाॽरे़ खुन्छिॽ खे़म्सिङ्मे़न् सुङ्याःन्ले़ कुभुङ् कुसिक्ताङ्बा चोक्लो॥ 7 याःन्निन् इले़म्, फुङ्ङिन् मुत्थाबेःक्लो, थेआङ्भे़ल्ले़ यहवे दाङ्बे़ल्ले़ खे़न् मुःत्तुरो, से़क्खासाङ् मनाहाॽग यान् हे़क्तङ्बा मे़जोक्लो॥ 8 याःन्निन् इरे़म्, फुङ्हाॽ मुत्थारो, कर आनिॽ यहवे दाङ्बे़ल्ले़ कुबाःन्जाक्किन् सदादिङ् आभे़ल्ले़साङ् मे़माने़ल्लो॥ 9 “सियोनबा मनाहाॽओ सुनाइङ् के़से़बासे, खे़निॽ केःम्बा नाङ्जङ्लुङ्ङो पेगे़म्मे़ॽओ॥ यरुसले़म ये़क्यक्पा मनाहाॽ सुनाइङ् इङ्भन् के़हाबासे, साॽरिक् अःक्ते़म्मे़ॽओ, अःक्ते़म्मे़ॽओ, मे़गिसे़म्मिन्ने़ॽओ॥ यहुदा पाङ्जुम्मोबा मनाहाॽ मे़त्ते़म्सिम्मे़ॽओ, ‘ओमे़त्ते़म्मे़ॽ, खे़निॽ निङ्वाॽफुमाङ्ङिन् हाबा कॽयो वाॽरो!’ 10 “ओमे़त्ते़म्मे़ॽ, यहवे दाङ्बान् पयम् यम्बा मुक्साम्नु युक् चोःक्से़ युर पत्लो, ओमे़त्ते़म्मे़ॽ, खुने़ॽ कुधुम्घोन् खुने़ॽ कुहुक्कोए वाॽरो, खे़ब्याङ् खुने़ॽ खोमा के़बोङ्बान् खुने़ॽनु वाॽरो॥ 11 खुने़ॽ कुमे़ल्लुक् लुप्हाॽ पित् मे़ःन्दा ओगे़मे़प्पे़ल्ले़ कुइसिक् चाराम्सुसिरो॥ खुने़ॽ कुधुःम्बाहाॽ आबाङे कुभक्ताङ्ङो कत्तुसिरो, हे़क्क्याङ् खे़ङ्हाॽ आबाङे खुने़ॽ कुनिङ्वाॽ सिगाङ् पक्खुसिरो॥ चुजुक्सा कुस्सा के़वाॽबाहाॽग खुने़ॽ याःक्याःक्काङ् लाम्लोसुसिरो॥” इस्राइलबा निङ्वाॽफुमाङ् 12 हाःत्ले़ च्वाःत्तिन् कुबे़ःङ्गोओ सिःक्तुआङ् वाॽबे इग्र कुबित्ताःल्ले़ ताङ्साङ्बे़न् सिःक्तुआङ् वाॽबे? हाःत्ले़ इक्सादिङ् खाम्बेःक्कोबा खाम्मिन् पक्काओ सिःक्तुआङ् वाॽबे? इग्र हाःत्ले़ नाङ्जङ्लुङ्हाॽ नु कोःक्मा फाङ्जङ् थे़गु माङ्वाहाॽ ते़म्दुरिओ थाङ्सुआङ् वाॽबे? 13 हाःत्ले़ यहवे दाङ्बे़ल्ले़ कुनिङ्वान् निसुआङ् वाॽबे, इग्र हात् खुने़ॽ कुसुजादाङ्बा पोःक्खे़आङ् खुने़ॽ हुॽरुआङ् वाॽबे? 14 ने़हिनिङ्वाॽरे़ लागि यहवे दाङ्बे़ल्ले़ हात् सुजा नाःक्तुआङ् वाॽबे हे़क्क्याङ् हाःत्ले़ खुने़ॽ कुदोःप्मा लाम् हुॽरुबे? हाःत्ले़ खुने़ॽ ने़हिनिङ्वाॽ हुॽरुबे, इग्र खासिङ्निःप्मा लाम् हुॽरुबे? 15 इक्सादिङ् खाम्बेःक्कोबा मे़न्छाम् सुवाङ्हाॽग च्वाःत् ते़प्पक्वा हे़क्के मे़लॽरो॥ खे़ङ्हाॽग थाङ्दुरिओ के़घिप्पा खाम्हिःक् कुसिङ् मे़लॽरो, खुने़ॽग वागप्खेःङ्हाॽ कुम्जिक् खाम्बुत्त्रा हे़क्के थाङ्घुरो॥ 16 वयागे़न् सिदुङ्जभारे़ लागि ले़बनानबा सिङ्हाॽरे़ मे़योरुन्लो, खे़प्मो के़याक्पा थक्साहाॽरे़आङ् वयागे़न् सिदुङ्जभा चोःक्मा मे़योरुन्लो॥ 17 इक्सादिङ् खाम्बेःक्कोबा मे़न्छाम् सुवाङ्हाॽ खुने़ॽ कुदगि थेसिआङ् मेःल्लो॥ खुने़ॽग खे़ङ्हाॽ थेनाधेबा नु हने़बा लेःत्तुसिरो॥ 18 हे़क्केःल्ले़ निङ्वाॽफुमाङ्ङिन् खे़निॽ हाःत्नु के़दङ्घुम्बे? इग्र आक्तङ्बा चइत्तिन्नु के़दङ्घुम्बे? 19 नावाइत्लाःङ्ग सिङ्गे़गाम्बे़ल्ले़ सोःन्दुआङ् चोगुरो, साम्म्याङ् के़धक्पाल्ले़ खे़न्निन् साम्म्याङ्ङिल्ले़ सुःप्तुरो, हे़क्क्याङ् खे़ल्ले़ लागि युप्पा सिक्क्रिहाॽ चोगुरो॥ 20 अक्तङ्बा सिदुङ्जभा तोःम्मा मे़न्छुक्मनाबा साॽरिक् याङ्गे़साॽबे़ल्ले़ मे़न्यःप्मनाबा सिङ्ङिन् सेगुरो॥ खुने़ॽ कुलागि खोःन्दु लक्तुबा नावाइत्लान् मे़म्मुन्ने युङ्मारे़ लागि कुभा कुहुक्चो के़नुॽबा लत्छा सिङ्गे़गाम्बा सेगुरो॥ 21 थे खे़निॽ निङ्वाॽ मे़ङ्घोए के़वयिबि? थे खे़निॽ मे़ङ्घे़म्मे के़वयिबि? थे कन् पाःन्निन् कुहेःक्सिङ्माआङ्धोए खे़निॽ मे़म्मे़त्ते के़म्गत्तिबि? थे इक्सादिङ् खाम्बेःक्माल्ले़ नावागे़न् चइःत् पोःक्खे़आङ्धोए खे़निॽ कुसिङ् मे़न्निःत्ते के़वयिबि? 22 खुने़ॽ इक्सादिङ् खाम्बेःक्माल्ले़ कुघिरिनुःल्ले़ थाःङ्धाक् हाङ्युक् चोःक्काङ् युङ्लो, हे़क्क्याङ् इक्सादिङ् खाम्बेःक्मोबा मे़न्छाम् सुवाङ्हाॽग फेॽबात् हे़क्के मे़लॽरो॥ खुने़ॽ ताङ्साङ्बे़न् पःत्थाङ् कुइसिक् खिङ्घुरो, खे़ब्याङ् खे़ॽयो याङ्धोःक्मारे़ लागि खे़न् साःङ्गा हे़क्के फोसुरो॥ 23 खुने़ॽ हाङ्साहाॽ थेनाधेबा चोगुसिरो, हे़क्क्याङ् इक्सादिङ् खाम्बेःक्कोबा युक्साबाहाॽ कुसुम् मे़न्दम्मनाबा चोगुसिरो॥ 24 याॽरिःम्बा हे़क्के खे़ङ्हाॽ खाम्बाङ्ङो मे़धानुमे़ःन्ने, मे़जुक्नुमे़ःन्ने, खाम्बाङ्ङो खे़ङ्हाॽरे़ खुन्छिॽ साःप् लेःत्छिङ्ङिल्ले़सा, खुने़ॽ खे़ङ्हाॽ मुःत्तुदेसुसिरो हे़क्क्याङ् खे़ङ्हाॽ इमे़ले़म्लो, खे़ब्याङ् सुरित् केजङ्ङिल्ले़ खे़ङ्हाॽ याॽसिप् हे़क्के फे़सु तेॽरुसिरो॥ 25 “खे़निॽ आङ्गाॽ हाःत्नु याप्मि के़दङ्घिबे? इग्र आङ्गाॽ हे़क्तङ्बा हात् वाॽबे?” पयम् यम्बा सेसे निङ्वाॽफुमाङ्ङिल्ले़ पाःत्तुरो॥ 26 खे़निॽ मिक्किन् थाःङ् फोःक्खाम्मे़ॽआङ् ताङ्साङ्बे़न् ओमे़त्ते़म्मे़ॽओ, कङ्हाॽ के़रे़क् हाःत्ले़ चोगुबाबे? थे खुने़ॽए मेःम्बि, खुने़ॽ खेःम्सिक्पाल्ले़ कुबन्ज्याङ्माहाॽ थिक्थिक् चोगु तारुसिरो हे़क्क्याङ् के़रे़क् थिक्थिक् लॽरिक् मिङ् लोःक्तुसिआङ् उःत्तुसिरो॥ खुने़ॽ पयम् यम्बा कुमुक्साम् नु मुक्साम्साबा कुमुक्किल्ले़ चोगुल्ले़ खे़ङ्हाॽओ लत्छाआङ् मे़म्माने़ल्लो॥ 27 याकुबे, खे़ने़ॽ थेआङ् अक्खे के़बाःत्तुबाबे? इस्राइलए, खे़ने़ॽ थेआङ् निङ्वाॽतुक्मा पान् के़बाःप्पाबे? “आङ्गाॽ आलाम्मिन् यहवे दाङ्बालाम् मये़आङ् वाॽरो, यहवे दाङ्बे़ल्ले़ आङ्गाॽ निनि मे़लाप्पान्लो॥” 28 थे खे़ने़ॽ निङ्वाॽ मे़ङ्घोए के़वाॽबि? थे खे़ने़ॽ मे़ङ्घे़म्मे के़वाॽबि? यहवे दाङ्बे़ङ्ग आभे़ल्ले़साङ् सदादिङ् के़वाॽबा निङ्वाॽफुमाङ्लो, इक्सादिङ् खाम्बेःक्मे़ल्ले़ कुनुप्मो थारिक् नावागे़न् चइःत् के़ने़बारो॥ खुने़ॽ मे़नाने़न्नाङ् कुसक्माआङ् मे़बुॽने़ल्लो, हे़क्क्याङ् हाःत्ले़आङ् खुने़ॽ कुसिक्कुम् निङ्वान् कुसिङ् निःप्मा मे़सुक्तुल्लो॥ 29 के़नाबाहाॽ खुने़ॽ थुम् पिरुसिरो, हे़क्क्याङ् योःन्जोॽजोॽबाहाॽ मुक्साम् पिरुसिरो॥ 30 थाङ्बे़न् मनाःन्नाङ् मे़न्धुम्मनाबा पोङ्लो, हे़क्क्याङ् पनानासिरो, खे़ब्याङ् नालिगे़न् थाङ्बे़न्साबाहाॽआङ् खुन्छिॽ सक्मा पुॽआङ् मे़जोन्लो॥ 31 कर यहवे दाङ्बे़ल्ले़ कुलाम् ओगे़मे़प्पाहाॽ याम्मो के़धुम्बा मे़बोङ्लो, खे़ङ्हाॽ कक्कफिःक्मा हे़क्के थाःङ्धाःङ् मे़बे़रो॥ हे़क्क्याङ् मे़लोःक्साङ् मे़न्नाने़ल्लो, खे़ङ्हाॽ लाङ्मे़घेःक् हे़क्केसाङ् खुन्छिॽ थना मे़ले़ङ्ने़ल्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.