यसैया 39 - लिम्बुबेबिलोनिया लाम्बा इङ्घङ् के़साबाहाॽ मे़भे़न् ( २ हाङ् २०:१२-१९ ) 1 खे़न् ये़म्मो बे़बिलोनियाबा हाङ् बलदाने़ल्ले़ कुस्सा मरोदक-बलदानरे़ हिजकियान् सक्इङ्घङ् हे़क्क्याङ् चासुङ्नु हाङ्लाइङ्बाहाॽ पाङ्घुदेसुसि॥ खुने़ॽ खे़न् तुगे़आङ् याम्मो वेःत्ते़आङ् वाॽ के़लॽबा इङ्घङ् खे़प्सुआङ् वये़॥ 2 हिजकियाःल्ले़ खे़न् हाङ्लाइङ्बाहाॽ लुङ्मे़न्दिङ् लाङ्दाःक् मे़त्तुसि, हे़क्क्याङ् खुने़ॽ कुहिम्मोबा साम्म्याङ्, युप्पा, मारुक्हाॽ, कुनाम्गे़नुॽबा निःङ्गेॽहाॽ, खुने़ॽ के़रे़क् कुभे़जा कुभे़युम् युङ्मा हिम्मिन् नु कुसामा कुबुमा युङ्मादे़न्नो के़युङ्बा के़रे़क् चिगक्वाहाॽ ओःन्धाक्तुसि॥ खुने़ॽ कुहिम् नु खुने़ॽ कुहाङ्जुम्मो ओसेःन्मे़धाक्तुन्छिन्बा चिगक्वा थेआङ् मे़याःक्ते़न्॥ 3 खे़ब्याङ् माङ्निङ्वाॽपान् के़बाःप्पा यसैयान् हिजकिया हाङ्ङे़ॽओ पेआङ् मे़त्तु, “खे़न् मनाहाॽरे़ थे़मा मे़बाःत्तु, हे़क्क्याङ् खे़ङ्हाॽ आत्तिलाम् मे़द्ये़आङ् मे़वये़?” हिजकियाःल्ले़ पाःत्तु, “खुन्छिॽग माःङ्घाबा लाजेॽ बेबिलोनलाम् आङ्गाॽओ मे़द्ये़आङ् मे़वये़॥” 4 माङ्निङ्वाॽपान् के़बाःप्पे़ल्ले़ सेःन्दोसु, “खे़ङ्हाॽरे़ खे़ने़ॽ के़हाङ्हिम्मो थेधेहाॽ मे़निसु?” हिजकियाःल्ले़ मे़त्तु, “खे़ङ्हाॽरे़ आङ्गाॽ आहिम्मो के़युङ्बा के़रे़क् चिगक्वाहाॽ मे़निसु॥ खे़ङ्हाॽ ओसेःन्मे़न्धाक्सेबा चिगक्वा आङ्गाॽ आधाःङ्ङो थेआङ् होप्॥” 5 खे़ब्याङ् यसैयाःल्ले़ हिजकियान् मे़त्तु, “मुक्साम्दाङ्बा यहवे दाङ्बे़ल्ले़ कुबाःन्जाक्किन् खे़प्से़ॽ— 6 खे़न् ये़म्मिन् से़क्खासाङ् के़दाबा वाॽ, खे़ने़ॽ के़हाङ्हिम्मो के़धाःक्थे़बाहाॽरे़ आइन् थारिक् मे़भुक्खु मे़युक्खुबा के़रे़क् चिगक्वाहाॽ बेबिलोन लाजेॽओ मे़देॽरु, थेधिक्काङ् मे़याःक्ने़न्, लॽरिक् यहवे दाङ्बे़ल्ले़ पाःत्तुॽ॥ 7 हे़क्क्याङ् खे़ने़ॽ कुभा के़मुॽइदाङ्सा, खे़ने़ॽ के़माक्खिॽ नु के़ने़क्सालाम् सावागे़वाःन्छिङ्बाहाॽ खे़न् ते़न्नो मे़देॽरुसिॽ, हे़क्क्याङ् खे़ङ्हाॽ बेबिलोनबा हाङ्हिम्मो सिङ्गारु मे़जोगुसिॽ॥” 8 हिजकियाःल्ले़ नुगप् पिरु, “खे़ने़ॽ के़बाःत्तुबा यहवे दाङ्बे़ल्ले़ कुबाःन्जाक्किन् नुबाए चोक्॥” थेआङ्भे़ल्ले़ खे़ल्ले़ कुनिङ्वाॽओ इःत्तु, “आङ्गाॽ आहिङ्हिङ्ग यहवे दाङ्बे़ल्ले़ नुॽमा तामा नु कम्ब्राङ्ङो कत्तारो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.