यसैया 38 - लिम्बुहिजकिया हाङ्ङिन् कुयाम्दुक् ( २ हाङ् २०:१-११ ; २ साप्मु ३२:२४-२६ ) 1 खे़न् ये़म्मो हिजकिया हाङ्ङिन् तुगे़आङ् खा खप्मे़न् स्ये़॥ हे़क्केःल्ले़ आमोजरे़ कुस्सा माङ्निङ्वाॽपान् के़बाःप्पा यसैयान् खुने़ॽ कुदुम्से़ पेआङ् मे़त्तु, “यहवे दाङ्बे़ल्ले़ अक्खे पाःत्तु—के़हिम्सयङ्हाॽ सुजा पिरे़से़ॽ, थेआङ्भे़ल्ले़ खे़ने़ॽ के़सिःॽ, खे़ने़ॽ के़न्वेःत्ने़न्॥” 2 हे़क्केःल्ले़ हिजकियाःल्ले़ कुनारान् लुङ्धाक् ले़प्माङ् हिसु हे़क्क्याङ् अक्खे पाःत्तुआङ् यहवे दाङ्बान् पेलि फाक्तु, 3 “यहवे दाङ्बाए, खे़ने़ॽ के़दगि आङ्गाॽ आक्खे़न् नसानिबा पोःक्खाङ्ङाङ् के़रे़क् आनिङ्वाःल्ले़ के़से़वा याःम्बक् चोगुङ्ल लाङ्घेगाङ्ङाङ् वाॽआ, हे़क्क्याङ् खे़ने़ॽ ओगे़मे़त्तुल्ले़ थेःन् नुबा चोक् आङ्गाॽ हाबा खे़न् चोगुङ्ङाङ् वाॽआ, खे़न् निङ्वाॽ इःत्ते़ॽओ॥” हे़क्क्याङ् हिजकियान् उःक्काङ् उःक् हाबे़॥ 4 खे़ब्याङ् यहवे दाङ्बे़ल्ले़ अक्तङ्बा कुबाःन्जाक्किन् यसैयाओ के़रे़, 5 “खे़ने़ॽ पेगे़ॽआङ् हिजकियान् मे़त्ते़ॽ, ‘खे़ने़ॽ के़सुधे़बा के़दाक्थे़बा दाउद हाङ्ङिल्ले़ कुनिङ्वाॽफुमाङ् यहवे दाङ्बे़ल्ले़ अक्खे पाःत्तुॽ—आङ्गाॽ खे़ने़ॽ पेलि के़भाक्ताङ्बान् खे़प्सुङ् हे़क्क्याङ् आङ्गाॽ के़हाबे़बा के़मिक्वान् निसुङ्॥ आङ्गाॽ आल्लसाङ् थिबोङ्ङाङ् ङासि तङ्बे (१५) खे़ने़ॽ के़धाःक् फोसुङ् पिने़॥ 6 आङ्गाॽ कन् पाङ्जुम्मिन् अस्सुरबा हाङ्ङिल्ले़ कुहुक्कोलाम् ताङ्से़ःप्तुङ्ङाङ् खे़ने़ॽ से़ःप्ने़॥ हे़क्क्याङ् आङ्गाॽ कन् ये़क्यक्किन् थेःक्तुङ्॥ 7 “‘यहवे दाङ्बे़ल्ले़ माङ्हुप् चोगुबान् खुने़ॽ आबाङे के़त्तु के़लॽबा यहवे दाङ्बे़ल्ले़ कुमिक्सेःन्निन् खे़ने़ॽ के़लागि कन् पोङ्— 8 आहाज हाङ्ङिल्ले़ कुनाहाङ्सेःक्को नाम्इःक्खङ्ङिन् योयोक् पेआङ् पत्, आङ्गाॽ खे़न् थिबोङ् नाहाङ्सेक् थारिक् याङ्धो नुःक्तुङ्॥’” कल्ले़चोगुल्ले़ नाम्इःक्खङ्ङिन् योयोक् थारिक् पेआङ् पत्छे़साङ् थिबोङ् नाहाङ्सेक् थारिक् एगाङ् नुःक्खे़॥ 9 यहुदा लाजेॽबा हाङ् हिजकियान् तुगे़आङ् वेःत्ते़ हे़क्क्याङ् खुने़ॽ साप्तुबा पाःन्हाॽ— 10 आङ्गाॽग अक्खे पाःत्तुङ्लो, “थे आङ्गाॽ थाङ्बे़न् आवे़म्मोए सिमे़ल्ले़ लाम्धेत् सिगाङ् लाःत्ताबाबि? हे़क्क्याङ् आधाक् सॽआङ् आल्ल मे़हिङ्ङान्बाबि?” 11 आङ्गाॽ इःत्तुङ्, “कन् कुहिङ्वे़त्हाॽरे़ खुन्छिॽ लाजेॽओ यहवे दाङ्बान् आङ्गाॽ मे़निआन्लो॥ मे़न्छाम् याप्मिहाॽ आङ्गाॽ मे़निआसिङ्ङिन्लो, हे़क्क्याङ् इक्सादिङ् खाम्बेःक्मो के़युङ्बा मनाहाॽनु वाॽमा मे़घोआन्लो॥ 12 पित् मे़ःन्दा चागे़राम्बाल्ले़ कुसाःङ्गाहिम् हे़क्के आङ्गाॽ आहिम्मे़न् मे़यसुआङ् मे़नाप्ताङ् मे़देॽराङ्लो॥ थाक् के़धाक्पे़ल्ले़ सिङ्ङो चिरिक्के़न् कित्तुबा हे़क्के आङ्गाॽ आहिङ्मने़न् कित्तुङ्ङाङ् पत्लो॥ हे़क्क्याङ् खुने़ॽ खे़न् थाक्कोलाम् आङ्गाॽ खक्ताङ्देसाङ्लो, ले़न्दिक् नु से़न्दिक् के़रे़क् आङ्गाॽ आधाःक्किन् के़नुप्सुरो॥ 13 तानाम् थारिक् नासि थःत्तुङ्ङाङ् हाङ्घुङ्ङाङ् युङाङ्लो, कर केबाल्ले़ कुइसिक् खुने़ॽ आङ्गाॽ आलुङ्सिहाॽ के़रे़क् यरप् ए़क्खाङ् पिराङ्लो, ले़न्दिक् नु से़न्दिक् नाम्दाःत्तात्ले़ए खे़ने़ॽ के़नुप्साङ्लो॥ 14 आङ्गाॽग काराःङ्वा इग्र कःङ्धे़ङ्ना पु हे़क्के पाराङ्लो, साप्पे़त्त्रुःक्मा-पुत्तुःक्के कुइसिक् मे़रिङ् थक्ताङ्लो, आङ्गाॽ थाःङ् ओमुमारे़ आमिक्हाॽ याॽरुरो॥ यहवे दाङ्बाए, आङ्गाॽग तुक्खे लाक्खे तुमुङ्लो, खे़ने़ॽ आङ्गाॽ से़ःप्ताङ्ङे़ॽओ॥” 15 कर आल्ल आङ्गाॽ थे पाःप्मा सुक्तुङ्ङाङ्बे? यहवे दाङ्बे़न् आङ्गाॽनु पारे़रो॥ कङ्ग खुने़ॽए चोगुबारो॥ आङ्गाॽ आहिङ्मन्निल्ले़ निङ्साम्मो थ्याङ्बाल्ले़ आङ्गाॽ आहिङ्हिङ् नःम्नःम्बा पोङ्ङाआङ् लाङ्घेःक्कारो॥ 16 यहवे दाङ्बाए, कन् के़रे़क् पाःन्हाॽलाम् मनाहाॽ मे़हिङ्लो, हे़क्क्याङ् आयाम्साम्मिल्ले़आङ् खे़ॽयोए हिङ्मन् खोसुरो॥ आङ्गाॽ खे़ने़ॽ के़नुसाङ् के़वेःन्दाङ्लो, खे़ब्याङ् आङ्गाॽ हिङ्मा के़भाःक्ताङ्लो॥ 17 से़क्खासाङ् आङ्गाॽ आलागि नुबा पोङ्ल फाॽआङ् अक्तङ्बा तुक्खे थम्मा के़बोङ्बा पोःक्खे़रो॥ खे़ने़ॽ आङ्गाॽ लुङ्माॽ के़दुक्ताङ्ङाङ् मे़क्मासिमा लुम्बाःत्तोलाम् के़से़ःप्ताङ्लो, आङ्गाॽ के़रे़क् आलायोहाॽ खे़ने़ॽ के़एगाङ् ले़प्माङ् के़युक्खुरो॥ 18 खे़मायङ्सङ्ङिल्ले़ खे़ने़ॽ के़नारा फोमा मे़सुक्तुल्लो, सिमे़ल्ले़ खे़ने़ॽ मिङ्सो इङ्धाङ् पिमा के़न्छुक्ने़ल्लो॥ इपुङ्ङो के़बेःक्पाहाॽरे़ खे़ने़ॽ नसाःन्साबा के़जोःक्पा पाःन्निन् निङ्साङ् चोःक्मा मे़न्छुक्तुल्लो॥ 19 आइन् आङ्गाॽ खे़ने़ॽ के़नारा फोसुङ्बा हे़क्के कुहिङ्वे़त्, के़हिङ्बाहाॽरे़रक् खे़ने़ॽ के़नारा मे़भोसुरो॥ खे़ने़ॽ नसाःन्साबा के़जोक् फाॽआङ् पानुदिङ् पाहाॽरे़ खुन्छिॽ साहाॽ मे़जे़क्तुसिरो॥ 20 यहवे दाङ्बे़ल्ले़ आङ्गाॽ से़ःप्पारो, यहवे दाङ्बे़ल्ले़ कुहिम्मो अन्मे खिङ्मनाबा मुक्लाहाॽ मुक्खुम्बे़रो, हे़क्क्याङ् आनिगे हिङ्हिङ् थारिक्के आनिगे साम्लोरिगे़रो॥ 21 यसैयाःल्ले़ अक्खे पाःत्तुआङ् वये़, “पःत्छेल्ले़ कुजाॽइन् इनानाबा चोगे़म्मे़ॽआङ् हिजकियाःल्ले़ कुहोॽओ हुःत्ते़म्मे़ॽ, खे़ब्याङ् खुने़ॽ वेःत्॥” 22 हिजकियाःल्ले़ अक्खे पाःत्तुआङ् सेःन्दोसुसि, “आङ्गाॽ यहवे दाङ्बे़ल्ले़ कुहिम्मो पेःक्का के़लॽबा मिक्सेन् थे वाॽ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.