यसैया 37 - लिम्बुयसैयाःल्ले़ मे़त्तुबा पाःन्निन् हाङ्ङिल्ले़ खे़प्सु ( २ हाङ् १९:१-७ ) 1 कन् पाःन्निन् हिजकिया हाङ्ङिल्ले़ खे़प्सु, हे़क्क्याङ् खुने़ॽ चाक्खुबा कुजाङ्हाॽ थे़ःक्खु, खे़म्ब्याङ् मे़रिङ् थक्मा सागि तेत् चाक्सिङ्ङाङ् यहवे दाङ्बे़ल्ले़ कुहिम्मो लासे़॥ 2 खुने़ॽ हाङ्हिम्मोबा युक्साबा एल्याकिम, सुहाङ्मिबा सेब्नाःन् नु निङ्वाॽफुसाम्बाहाॽओ सुम्ब्राङ् लाम्लोबाहाॽ सागि तेत् चाक्तुसिआङ् आमोजरे़ कुस्सा माङ्निङ्वाॽपान् के़बाःप्पा यसैयाओ पाङ्घुसि॥ 3 खे़ङ्हाॽरे़ खुने़ॽ मे़मे़त्तु, “हिजकिया हाङ्ङिल्ले़ अक्खे पाःत्तुॽ—आइन्बा ये़न्निन् तुक्खे चामा, पाःन्जामा हे़क्क्याङ् कुनामे़न्छाॽ पोङ्मा ये़म् वाॽ, अङे़ःक्वाहाॽ सावाःन्छिङ्मा मे़जोःक्किल्ले़ सावाःम्मा साॽइमे़न्याक्मना हे़क्तङ्बा पोःक्खे़आङ् वाॽ॥ 4 यहवे दाङ्बा के़निङ्वाॽफुमाङ्ङिल्ले़ थङ्ङोबा थक्मोबाल्ले़ कुबाःन्निन् खे़प्सुबि, खे़न् खुने़ॽ कुन्दाङ्बा अस्सुरबा हाङ्ङिल्ले़ सदादिङ् कुहिङ्वे़त् निङ्वाॽफुमाङ्ङिन् माङ्चे़ॽया मे़त्छे़ पाङ्घुआङ् वाॽ, हे़क्क्याङ् यहवे दाङ्बा के़निङ्वाॽफुमाङ्ङिल्ले़ खे़न् पाःन्निन् खे़प्सुआङ् खुने़ॽ खे़न् थक्मोबान् खुम्दिङ् पिरु॥ कल्ले़चोगुल्ले़ के़दाङ्बा के़याःक्पाहाॽरे़ खुन्छिॽ लागि खे़ने़ॽ पेलिगे़न् तुवा चोगे़ पिरे़से़ॽ॥” 5 हिजकियाःल्ले़ पाङ्घुसिबा सुहाङ्युक्पाहाॽ यसैयाओ मे़द्ये़॥ 6 खुने़ॽ खे़ङ्हाॽ मे़त्तुसि, “खे़निॽ दाङ्बान् कम्भ मे़त्ताम्मे़ॽ, ‘यहवे दाङ्बे़ल्ले़ अक्खे पाःत्तुॽ—अस्सुरबा हाङ्ङिल्ले़ कुसे़वारोबाहाॽरे़ आङ्गाॽ माङ्चे़ॽया मे़मे़त्ताङ्बा के़घे़प्सुबा पाःन्हाॽलाम् खे़ने़ॽ मे़गिसे़न्ने़ॽ॥ 7 खे़प्से़म्मे़ॽ, खे़न् अस्सुरबा हाङ्ङिल्ले़ कुनिङ्वाॽओ आङ्गाॽ अक्तङ्बा साम्धिक् याक्तुङ् पिरुङ्ॽ, खे़ल्ले़ लत्छा हयङ् किल्लिङ् पान् खे़प्सुआङ् खुने़ॽ आबाङे कुलाजेॽओ नुःङ्ङाङ् पेक् हे़क्क्याङ् खे़ॽयो आङ्गाॽ खुने़ॽ आप्फेक् कुलाजेॽओ ताभेःल्ले़ मे़ज्ये़प्तु मे़स्ये़रुर याःन्दुङ्सिङ्लो॥’” अस्सुरबा मनाहाॽरे़ याम्मो से़त्तासिगे़ मे़मे़त्तुसि ( २ हाङ् १९:८-१९ ) 8 अस्सुरबा हाङ्ङिल्ले़ लाकिस पाङ्जुम्मिन् ले़रुआङ् पे के़लॽबा इङ्घङ्ङिन् थङ्ङोबा थक्मोबाल्ले़ खे़प्सु, हे़क्क्याङ् खुने़ॽ यरुसले़मलाम् नुःक्खे़आङ् पेःल्ले़ हाङ्ङिन् लिब्नाःन्नु थङ् चोगे़र यागे़बा तुमु॥ 9 आल्ल कुस लाजेॽबा हाङ् तिर्हाकाहन् थक्सुबाहाॽ फे़त्तुसिआङ् थङ् चोःक्से़ फे़ल्ल पत् के़लॽबा पाःन्निन् सनहेरिबरे़ खे़प्सु॥ हे़क्केलॽरिक् खुने़ॽ कन् पाःन्निन् खे़प्सुआङ् इङ्घङ् के़साबाहाॽ हिजकियाओ पाङ्घुसि— 10 “यहुदाबा हाङ् हिजकियान् अक्खे मे़त्ते़म्मे़ॽ, खे़ने़ॽ नागे़साॽरुबा निङ्वाॽफुमाङ्ङिल्ले़ ‘यरुसले़म ये़क्यक्किन् अस्सुरबा हाङ्ङिल्ले़ कुहुक्को थामा मे़भाःक्कान्’ के़मे़त्ताङ् खे़ने़ॽ इङ्ले़क्को के़न्धाने़ल्ल॥ 11 ओमे़त्ते़ॽ, अस्सुरबा हाङ्हाॽरे़ के़रे़क् खाम्घु लाजेॽहाॽ खाप्पुथ्यःङ् मे़जोगुसिबान् खे़ने़ॽ आबाङे के़घे़प्सुआङ् के़वाॽ॥ हे़क्केःल्ले़ खे़ने़ॽ के़दाङ्बि? 12 आङ्गाॽ आसुधे़बा आदाक्थे़बाहाॽरे़ इक्सादिङ् खाम्बेःक्मोबा मे़न्छाम् सुवाङ्हाॽ मे़मे़क्खुसिल्ले़ थे खे़ङ्हाॽरे़ खुन्छिॽ माङ्हाॽरे़ ताङ्से़ःप्मा मे़सुक्तुसिबि—इग्र गोजान, हारान, रेसेप नु तेल-अस्सारओ के़युङ्बा अदनबा माङ्हाॽरे़ खे़ङ्हाॽ मे़से़ःप्तुसिबि? 13 हमातबा हाङ्ङिन् नु अर्पादबा हाङ्ङिन्, सपर्बेम पाङ्जुम्मोबा हाङ् थे मे़बोःक्खे़? हेनाबा नु इब्बाबा हाङ्हाॽ आत्ति मे़बे?” हिजकियारे़ कुदुवान् 14 हिजकियाःल्ले़ इङ्घङ् के़साबाहाॽरे़ खुन्छिॽ हुक्कोलाम् सक्इङ्घङ्ङिन् ताःक्तुआङ् निरु॥ खम्भ्याङ् हिजकियान् यहवे दाङ्बे़ल्ले़ कुहिम्मो पेआङ् यहवे दाङ्बे़ल्ले़ कुदगि खे़न् फाःक्खुआङ् ने़स्सु॥ 15 हे़क्क्याङ् हिजकियाःल्ले़ यहवे दाङ्बान् कम्भलॽरिक् पेलि फाक्तु, 16 “मुक्साम्दाङ्बा यहवे दाङ्बाए, इस्राइलबा निङ्वाॽफुमाङ्ङे, कुलाप् के़बप्पा माङ्लाइङ्बा करुबहाॽरे़ कुलुम्मो हाङ्युक् के़जोःक्पाआङ् के़युङ्बाए, इक्सादिङ् खाम्बेःक्मोबा के़रे़क् खाम्घु लाजेॽहाॽओ निङ्वाॽफुमाङ्ग खे़ने़ॽरक् के़वाॽरो॥ साङ्ग्राम्पेदाङ् नु इक्सादिङ् खाम्बेःक्मान् खे़ने़ॽए नावागे़न् चइःत् के़जोगुबारो॥ 17 यहवे दाङ्बाए नुरिक् निङ्वाॽ पिरे़ॽआङ् खे़प्से़ॽओ॥ यहवे दाङ्बाए, के़मिक्किन् चाङ्जाङ् मे़त्ते़ॽआङ् ओमये़ॽओ॥ कुहिङ्वे़त् निङ्वाॽफुमाङ्ङिन् माङ्चे़ॽया मे़प्मारे़ लागि सनहेरिबे़ल्ले़ पाःत्तु फे़न्छुबा पाःन्हाॽ खे़प्से़ॽओ॥ 18 “यहवे दाङ्बाए, कङ्ग कुजे़क्पा से़क्खाएरो, अस्सुरबा हाङ्हाॽरे़ इक्सादिङ् खाम्बेःक्मोबा के़रे़क् मे़न्छाम् याप्मिहाॽ मे़मे़क्खुसिआङ् वाॽरो, हे़क्क्याङ् खे़ङ्हाॽरे़ खुन्छिॽ खाम्घु लाजेॽहाॽआङ् मुरे़क् खारे़क् मे़जोगुआङ् ने़रो॥ 19 खे़ङ्हाॽरे़ मे़न्छाम् याप्मिहाॽरे़ खुन्छिॽ माङ्साम्माङ्हाॽ मिओ लाम्मे़भेसुसिआङ् वाॽ हन्नाङ् खाप्पुथ्यःङ् मे़जोगुसि, थेआङ्भे़ल्ले़ खे़ङ्हाॽग निङ्वाॽफुमाङ्सि मेःन्, कर मनाहाॽरे़ खुन्छिॽ हुक्किल्ले़ मे़जोगुसिबा सिङ् नु लुङ्सिरक्लो॥ 20 आल्ल, यहवे दाङ्बा आनिगे निङ्वाॽफुमाङ्ङे, खे़ल्ले़ कुहुक्कोलाम् आनिगे चोःक्युम्भो आबिरे़ॽओ, हे़क्क्याङ् इक्सादिङ् खाम्बेःक्कोबा के़रे़क् खाम्घु लाजेॽहाॽरे़ खे़ने़ॽरक् यहवे दाङ्बा निङ्वाॽफुमाङ् के़वाॽ फाॽआङ् कुसिङ् मे़निःत्तुररो॥” यसैयाःल्ले़ हाङ्ङिन् इङ्घङ् हाक्तु ( २ हाङ् १९:२०-३७ ) 21 खे़ब्याङ् आमोजरे़ कुस्सा यसैयाःल्ले़ हिजकियान् अक्तङ्बा इङ्घङ् हाक्तु, “यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ—खे़ने़ॽ अस्सुरबा हाङ् सनहेरिबरे़ कुयाःम्बेॽओ आङ्गाॽ पेलि के़भाक्ताङ्, 22 कल्ले़चोगुल्ले़ खुने़ॽ कुदक्ले़ङ्वाओ यहवे दाङ्बे़ल्ले़ पाःत्तुबा पाःन्निन् हाबा कन्लो, “सियोने़ल्ले़ सिसागे़न् कुस्सा मे़न्छुमाःल्ले़ खे़ने़ॽ कुनामे़न्छाॽ के़म्मे़त्ताङ् एःत्लो॥ यरुसले़म ये़क्यक्किल्ले़ कुस्सा मे़न्छुमाःल्ले़ कुधे़गेःक्किन् तघुम्तघुम् मे़त्तुर लासाक् के़मे़त्लो॥ 23 खे़ने़ॽ हात् किनाःन्दि के़बिरुर चे़ॽया इङ्दो के़मे़त्तुआङ् वाॽ? हाःत्ले़ कुदक्ले़ङ्वाओ खे़ने़ॽ यम्बा इक्लाओ के़अःक्ते़आङ् वाॽ? हे़क्क्याङ् के़हे़न्छिङ्ङाङ् ओगे़मःॽ, थे इस्राइलरे़ कुसेसेबाल्ले़ कुदक्ले़ङ्वाओ कुनामे़न्छाॽ नु माङ्चे़ॽया मेःम्बि? 24 खे़ने़ॽ के़इङ्घङ् के़साबाहाॽलाम् खे़ने़ॽ यहवे दाङ्बान् यरिक् किनाःन्दि के़बिरुआङ् वाॽरो॥ हे़क्क्याङ् खे़ने़ॽ अक्खे के़बाःत्तुआङ् वाॽरो, ‘आङ्गाॽ कत्तुङ्सिङ्बा यरिक् अन्लाधाहाॽनु सोरिक् आङ्गाॽ थे़गु सम्धाङ् लिङुङ्लो, ले़बनानबा कोःक्मा फाङ्जङ्हाॽआङ् लिङुङ्लो॥ खे़ॽयो के़युङ्बा केःम्ब केःम्बा साम्माङ्सिङ्हाॽ नु नुःब्नुबा आःङ्हाॽ सोःन्दुङ्सिङ्ङाङ् ने़रो॥ खे़ॽयोबा काक्नुःल्ले़ माःङ्घाबा नाङ्जङ्लुङ्ङो नु सिराॽगे़धाङ्बा ताम्भुङ्ङो थारिक्के के़राङ्ङाङ् वाॽरो॥ 25 आङ्गाॽ वेॽ लाजेॽहाॽओ वबाक् तयुङ्ङाङ् ने़रो हे़क्क्याङ् आङ्गाॽ खे़ॽयो च्वाःत् थुङुङ्ङाङ् वाॽरो॥ आङ्गाॽ आलाङ्ताप्पेॽइल्ले़ तोॽरुङ्ङाङ् मिस्र लाजेॽबा के़रे़क् वहःङ्हाॽ चप्सुङ्ङाङ् ने़रो॥’ 26 “थे खे़ने़ॽ के़घे़प्सुबा होःप्पि? आङ्गाॽ कन् उन्छोःन्ने निःन्धो चोगुङ्ङाङ् वये़रो, उनाहुरिबा ये़म्मोए कन् चोःक्मा निङ्वाॽ चोगुङ्ङाङ् वये़रो, आल्लो आङ्गाॽ खे़न् के़त्तुङ्ङाङ् वाॽरो, खे़ने़ॽ खे़न् कब्रिङ् फाङ्मनाबा ये़क्यक्हाॽ हक्तक् के़जोगुरो॥ 27 खे़ॽयो के़युङ्बा मनाहाॽरे़ खुन्छिॽ साम्मिक् मे़ये़बाल्ले़ चोगुल्ले़ खे़ङ्हाॽ मे़गिसे़आङ् मे़नुःन्दे़रो, खे़ङ्हाॽ खाम्बाङ्ङोबा यान् हे़क्के, ले़क्वा फुङ् नु खारक् के़लिङ्बा कुनःक् कुइसिक्, लिङ्घाम्बुओ के़लिङ्बा हे़क्क्याङ् पोमानुःल्ले़ तगि के़हेबा के़बेःक्पा यान् हे़क्तङ्बा मे़बोःक्खे़रो॥ 28 “कर खे़ने़ॽ आत्ति के़युङ् हे़क्क्याङ् खे़ने़ॽ आभे़ल्ले़ के़दा के़बेःक् खे़न् आङ्गाॽ निसुङ्ङाङ् वाॽरो, खे़ब्याङ् आङ्गाॽनु खे़ने़ॽ के़याःक्ले़ॽरे़आङ् वाॽबान् आङ्गाॽ कुसिङ् निःत्तुङ्ङाङ् वाॽरो॥ 29 खे़ने़ॽ के़हे़न्छिङ्मे़न् आन्भाक्को के़रे़बाल्ले़ चोगुल्ले़, आङ्गाॽ खे़ने़ॽ के़न्बोओ खेःङ्ङिल्ले़ वेॽने़रो खे़ने़ॽ के़म्ब्राओ करे़लिन् फत्छुङ्लो, खे़ब्याङ् खे़ने़ॽ के़द्ये़बा लाम्मो लाम्बाए आङ्गाॽ के़नुःङ् के़बेःक्ल याःन्ने़रो॥” 30 खे़न् एगाङ् हिजकियाःल्ले़ हाङ्ङिन् मे़त्तुरो, “खे़ने़ॽ के़लागि मिक्सेन् हाबा कन् पोङ्लो, कन् तङ्बेॽ आबाङे के़लिङ्बा कुजाहाॽ खे़निॽ के़जाम्लो, हे़क्क्याङ् के़दाबा तङ्बेओ आम्भा खे़ॽयो के़धोःक्पाहाॽ के़जाम्लो, कर तङ्बेॽ सुम्सि एगाङ्ग याॽरिःम्बा हेॽराम्मे़ॽओ, कुजा फुक्खाम्मे़ॽ, चे़ल्ले़क्सेॽ लेःत्ताम्मे़ॽआङ् कुजाॽइन् चाम्मे़ॽओ॥ 31 सिङ्बुङ्ङिन् कुसाःप् लेःत्छिङ्ङाङ् कुजाॽ थोःक्पा हे़क्के यहुदारे़ कुहिम्सयङ्लाम् के़दाङ्बा के़याःक्पा मनाहाॽ याम्मो मे़बोन् मे़धे़ॽरो॥ 32 थेआङ्भे़ल्ले़ यरुसले़मलाम् के़दाङ्बा के़याःक्पा लत्छा मनालुप् नु सियोन कोःक्मालाम् कुहिङ्वे़त् मनालुप्हाॽ मे़लःन्लो, मुक्साम्दाङ्बा यहवे दाङ्बे़ल्ले़ कुसिक्सम्माल्ले़ कन् चोगुरो॥ 33 “कल्ले़चोगुल्ले़ अस्सुरबा हाङ्ङिल्ले़ कुयाःम्बेओ यहवे दाङ्बे़ल्ले़ अक्खे पाःत्तुरो— “खुने़ॽ कन् ये़क्यक्को मे़दाने़न् इग्र लत्छा तोःङ्धिक्काङ् मे़आबुन्लो, खे़न् कल्ले़ कुबेसाङ् खोःन् फे़त्तुआङ् मे़भे़न्ने़न्लो, कन् फप्मारे़ लागि चन्छिङ्मा लुङ्धाक्काङ् मे़से़त्तुन्लो॥ 34 आत्ति लाम्बा खे़न् फे़रे़ हाबा खे़न् लाम्मे पोङ्ङाङ् नुःङ्बेःक्लो, कन् ये़क्यक्को खुने़ॽ मे़लाःत्ने़न्लो” यहवे दाङ्बे़ल्ले़ हाबा कन् उवा चोगुरो॥ 35 “आङ्गाॽ आलागि नु आसे़वारोबा दाउदरे़ कुलागि आङ्गाॽ कन् ये़क्यक्किन् नाङुङ्ॽ हे़क्क्याङ् से़ःप्तुङ्लो!” 36 खे़ब्याङ् यहवे दाङ्बे़ल्ले़ कुमाङ्लाइङ्बान् अस्सुरिहाॽरे़ खुन्छिॽ तुराहिम्मो पेआङ् लाङे़न्छिङ् थिक् नु ये़प्पोङ्ङाङ् हे़न्छिङ् ङासि (१,८५,०००) मनाहाॽ हदॽ स्ये़रुसि॥ मनाहाॽ तानाम् मे़बोगे़ल्ले़ खे़ङ्हाॽरे़ खे़न् के़सिबा मनाहाॽ मे़निसुसि॥ 37 कल्ले़चोगुल्ले़ अस्सुरिहाॽरे़ खुन्छिॽ हाङ् सनहेरिबे़ल्ले़ तुराहिम्हाॽ यस्सुआङ् नुःक्तु तेॽरुसि॥ खुने़ॽ निनबे पेआङ् खे़प्मो युङ्मा हेःक्ते़॥ 38 थिक्यान् खुने़ॽ कुमाङ् निस्रोकिल्ले़ कुमाङ्हिम्मो सिदुङ्जभा तोःन्दुर यागे़ल्ले़ खुने़ॽ कुस्सा अद्रम्मलेक नु सरेसेरे़ल्ले़ ताभेःल्ले़ च्ये़प्तु स्ये़रुसि, खे़ब्याङ् खे़त्ने़छिआङ् आरारात लाजेॽओ पेसि॥ खे़न् एगाङ् खुने़ॽ कुले़क्वा कुस्सा एसरहदोने़न् हाङ् पोःक्खे़आङ् युक् चोःक्मा हेःक्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.