यसैया 36 - लिम्बुसनहेरिबरे़ यरुसले़म्मिन् मे़ङ्मा कोःत्तुबा ( २ हाङ् १८:१३-२७ ; २ साप्मु ३२:१-१९ ) 1 हिजकिया हाङ्ङिल्ले़ युक् चोगुबा थिबोङ्ङाङ् लिसि तङ्बेॽ के़रे़ल्ले़ अस्सुरबा हाङ् सनहेरिबे़ल्ले़ यहुदा लाजेॽओ लुङ्धाक् मे़से़त्तुबा ये़क्यक्हाॽओ ते़न्धङ् चोगुआङ् के़रे़क् हुक्काप् मे़त्छिङ्॥ 2 हे़क्क्याङ् अस्सुरबा हाङ्ङिल्ले़ कुधक्मोबाधिक् यरिक् थक्सुबाहाॽनु लाकिसलाम् यरुसले़म ये़क्यक्कोबा हिजकिया हाङ्ङिल्ले़ओ पाङ्घुसि॥ खे़ब्याङ् थक्मोबान् चाङ् वागे़हप्पाल्ले़ कुब्याङ्सिःल्ले़ माराम्मो के़ने़बा थोसमा वरक्कोलाम् च्वाःत् के़लःम्बा के़युबा वालाम्मो के़रे़आङ् ये़म्सिङ्॥ 3 खे़म्ब्याङ् हिल्कियारे़ कुस्सा एल्याकिम हाङ्हिम्मोबा युक्साबे़न्, सुहाङ्मिबा सेब्ना, हे़क्क्याङ् खारात् के़युङ्बा आसापरे़ कुस्सा योआःन् लाःक्कात् मे़लःन्दे़आङ् थक्मोबान् मे़दुमु॥ 4 थङ् के़धक्पा थक्मोबाल्ले़ खे़ङ्हाॽ हिजकियान् अक्खे मे़त्ते़म्मे़ॽ मे़त्तुसि, “अस्सुरबा पयम् हाङ्ङिल्ले़ अक्खे पाःत्तुॽ—खे़ने़ॽ आत्तिन्नु के़घे़ःम्सिङ्ङाङ् निङ्वाॽ निःन्धोओ के़वाॽ? 5 खे़ने़ॽ थङ् चोःक्मा निङ्वाॽ के़जोगुआङ् वाॽ हे़क्क्याङ् यरिक् थक्सुबाहाॽ कत्तुङ्सिङ् फाॽआङ् के़बाःत्तुॽ, कर खे़ने़ॽग थेनाधेबा कुसुम् मे़न्दम्मनाबा पाःन्लक् के़बाःत्॥ खे़ने़ॽ हाःत्नु के़घे़ःम्सिङ्ङाङ् के़वाॽ हे़क्क्याङ् आङ्गाॽ आदक्ले़ङ्वाओ पिफ्युङ्बा के़बोक्खे़आङ् के़वाॽबे? 6 ओमे़त्ते़ॽ, आल्लो खे़ने़ॽ मिस्रओ के़घे़ःम्सिङ्ल के़वाॽ, खे़ङ्ग लत्छा के़ए़क्पा मिक्ला तक्कात् हे़क्तङ्बा चोक्, कुभा मनाहाॽ खे़प्मो मे़दक्सिङ्ने़भग्र खे़ल्ले़ मनाहाॽरे़ खुन्छिॽ हुक्हाॽ लक्तुआङ् मे़गाःन्॥ मिस्र लाजेॽबा फारो हाङ्ङो के़घे़ःम्सिङ्बाहाॽआङ् के़रे़क् हे़क्तङ्बाए मे़बोङ्॥ 7 “हे़क्क्याङ् आनिगे आबाङे यहवे दाङ्बा निङ्वाॽफुमाङ्ङो निङ्वाॽ युक्खुम्बे़ फाॽआङ् खे़निॽ याप्मि के़मे़त्तिबिला, कर हिजकियाःल्ले़ए चन्जम्बा ते़न्हाॽ, ले़त्ति तोःम्मादे़न्हाॽ खे़त्तुदेसुआङ् यहुदा नु यरुसले़मबा मनाहाॽ मे़त्तुसि, ‘खे़निॽ कप्मो साबन् हबत् पप्माआङ् कन् लत्छा ले़त्ति तोःम्मादे़न्नोरक् से़वा चोःक्मा पोङ्॥’ 8 “कल्ले़चोगुल्ले़ आल्ल खिनिॽ त्ये़म्मे़ॽ, आङ्गाॽ आन्दाङ्बा अस्सुरबा हाङ्ङिन्नु ताॽजे़क्खे़म्मे़ॽ॥ आङ्गाॽ हे़न्छिङ् ने़त्छि अन्हाॽ पिने़निङ्॥ ओमे़त्तुम् साॽरुम्, खे़ङ्हाॽ लोःङ्मा के़सुक्पा मना खे़निॽ लःप्मा के़सुक्तुम्सिम्बि मेःम्बि? 9 अस्सुरबा के़रे़क्नुःल्ले़ चुक्पा युक्साबा याःप्पाआङ् के़न्जोःक्ने़न् हे़क्केःल्ले़ मिस्रबा अन्लाधाहाॽ नु अन्गे़युक्पाहाॽरे़ के़म्भाॽसाङ् आङ्गाॽ आन्दाङ्बाल्ले़ कुधक्सुबाहाॽनु थक्मा के़न्छुक्ने़न्॥ 10 कन्नुःल्ले़ वेॽ थे कन् लाजेन् फप्मा नु मे़ङ्मारे़ लागि आङ्गाॽ यहवे दाङ्बान् मेःन्ने फे़राङ्बा फाॽआङ् के़इःत्तुबि? यहवे दाङ्बे़ल्ले़ए आङ्गाॽ ‘खे़न् लाजेॽओ पेगे़ॽआङ् खे़न् खाप्पुथ्यःङ् चोगे़ॽ’” मे़त्ताङ्ङाङ् वाॽ॥ 11 खे़ब्याङ् एल्याकिम, सेब्ना नु योआःल्ले़ थङ् के़जोःक्पा थक्मोबान् मे़मे़त्तु, “आदाङ्बे पेलि फाक्कासिगे़, आनिगे के़से़वारोबाहाॽनु आरमेइक पाःन्दाङ्ङो पारे़ॽओ, थेआङ्भे़ल्ले़ आनिगे खे़न् पाःन्दाङ्ङिन् कुसिङ् निःत्तुम्बे़॥ लुङ्धाक्को के़ये़प्पा मनाहाॽरे़ मे़घे़प्सुर आनिगे़नु हिब्रु पाःन्दाङ्ङो मे़बारे़न्ने़ॽओ॥” 12 कर थक्मोबाल्ले़ खे़ङ्हाॽ मे़त्तुसि, “थे आङ्गाॽ आन्दाङ्बाल्ले़ खे़निॽ नु खे़निॽ दाङ्बाल्लोरक् कन् पाःन्निन् पाःप्मारे़ लागि पाङ्घाङ्बाबि? थे खुने़ॽ लुङ्धाक्को के़ये़प्पा मनाहाॽओआङ् पाङ्घाङ्बा मेःम्बि? खिनिॽ कुसिक्के खे़ङ्हाॽरे़आङ् खुन्छिॽ आप्फेक् हि सेॽमाःत्हाॽ चामा के़बोङ्बा वाॽ॥” 13 खे़ब्याङ् थङ्ङोबा थक्मोबान् तक्पे़त् ये़म्सिङ्, हे़क्क्याङ् यम्बा इक्लाओ हिब्रु पाःन्दाङ्ङो अक्खे पाःत्तु, “पयम् हाङ्, अस्सुरबा हाङ्ङिल्ले़ कुबाःन्निन् खे़प्से़म्मे़ॽ! 14 पयम् हाङ्ङिल्ले़ अक्खे पाःत्तुॽ, हिजकियाःल्ले़ खे़निॽ इङ्गे़ल्ले़क्तिन्ल, थेआङ्भे़ल्ले़ खे़ल्ले़ खे़निॽ ताङ्से़ःप्मा के़न्छुक्तिन्! 15 हिजकियाःल्ले़ खे़निॽ अक्खे के़मे़त्तिआङ् यहवे दाङ्बाओ निङ्वाॽ के़युङ्बा के़न्जोगिल्ल ‘यहवे दाङ्बे़ल्ले़ से़क्खासाङ् आनिगे से़ःप्तिगे़॥ खुने़ॽ कन् पाङ्जुम्मिन् अस्सुरबा हाङ्ङिल्ले़ कुहुक्को थार मे़याःन्दुन्॥’ 16 “हिजकियाःल्ले़ कुबाःन्निन् मे़घे़प्से़प्मिन्ने़ॽ॥ अस्सुरबा पयम् हाङ्ङिल्ले़ अक्खे पाःत्तुॽ—खे़निॽ आङ्गाॽनु तङे़म्मे़ॽ, हे़क्क्याङ् लःन्दाम्मे़ॽआङ् आङ्गाॽओ त्ये़म्मे़ॽ॥ हे़क्केःल्ले़ खे़निॽ के़रे़क्ले़ आबाङे चे़ल्ले़क्सेल्ले़ कुजाॽ नु पये़प्पाल्ले़ कुजाॽहाॽ चामा के़घोसुम्, खे़ब्याङ् खे़निॽ आबाङे वबाक्को च्वाःत् थुङ्मा के़घोसुम्॥ 17 कर खिनिॽ आबाङे लाजेॽ कुसिङ्बा चा हे़क्क्याङ् कुबोक् चे़ल्ले़क्सेॽ थि, खरे़ःङ् नु चे़ल्ले़क्सेॽ इक्ताप्ले़ थिम्सुबा लाजेॽओ खिनिॽ तेॽनिङ्॥ 18 “हिजकियाःल्ले़ खे़निॽ अक्खे के़मे़त्तिआङ् इङ्ले़क्को के़न्धासिल्ल, ‘यहवे दाङ्बे़ल्ले़ आनिगे से़ःप्तिगे़॥’ थे इक्सादिङ् खाम्बेःक्कोबा मे़न्छाम् याप्मिहाॽरे़ खुन्छिॽ माङ्ङिल्ले़ खुन्छिॽ लाजेन् अस्सुरबा हाङ्ङिल्ले़ कुहुक्को थामालाम् कम्भ थारिक् से़ःप्मा सुक्तुआङ् वाॽबि? 19 हमात नु अर्पादरे़ खुन्छिॽ माङ्हाॽ आत्ति मे़वाॽ? सपर्बेम माङ्हाॽ आत्तो मे़वाॽ? थे खे़ङ्हाॽरे़ सामरियान् आङ्गाॽ आहुक्को थामालाम् से़ःप्मा मे़सुक्तुआङ् वाॽबि? 20 कन् लाजेॽहाॽओबा आत्तिन् माङ्हाॽरे़ खुन्छिॽ लाजेन् आङ्गाॽ आहुक्को थामालाम् से़ःप्मा मे़सुक्तुबा वाॽबि? हे़क्केःल्ले़ यहवे दाङ्बे़ल्ले़ यरुसले़म ये़क्यक्किन् आङ्गाॽ आहुक्को थामालाम् आभेलॽरिक् से़ःप्मा सुक्तुइ?” 21 कर खे़ङ्हाॽ स्वाःत् मे़म्बाःत्ते मे़युङे़, हे़क्क्याङ् खुने़ॽ पाःत्तुबा पाःन्निन् लत्छाआङ् मे़न्नुःक्तुन्॥ थेआङ्भे़ल्ले़ खुने़ॽ पाःत्तुबा पाःन्निन् लत्छाआङ् नुःक्मा मेःन् के़लॽबा हाङ्ङिल्ले़ कुइङ्जाङ् वये़॥ 22 हे़क्केःल्ले़ हाङ्हिम्मोबा युक्साबा हिल्लिकियाहरे़ कुस्सा एल्याकिम, सुहाङ्मिबा सेब्ना नु आसापे़ल्ले़ कुस्सा खारात् के़युङ्बा योआ, खे़ङ्हाॽरे़ खुन्छिॽ चाङ्हाॽ मे़धे़ःक्खु, हे़क्क्याङ् थङ्ङोबा थक्मोबाल्ले़ पाःत्तुबा पाःन्निन् मे़बेआङ् हिजकियान् मे़जे़क्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.