यसैया 35 - लिम्बुसेसेबा माराम् 1 मुरे़क् खारे़क्पा ये़ःङ्घादे़न्निन् नु चिजि खक्खक् के़लॽबा लाजेन् सःत्छिरो॥ थेआङ् के़होप्पा एःक्सादे़न्निन् ये़ये़ लॽआङ् फुङ् कुइसिक् फे़क्लो॥ 2 मुरे़क् खारे़क् थेआङ् के़होप्पा लाजेन् सःत्ताङ् साम्लोरो, खे़न् साॽरिक् कुसिराॽधाङ्ङाङ् अःक्लो॥ खे़ल्ले़ ले़बनानबा कुघे़म्सिङ्मे़न् खोसुरो, हे़क्क्याङ् खे़ल्ले़ कर्मेल कोःक्मान् नु सारोनबा ते़ल्लक्किल्ले़ कुहाङ्वा कुमाङ्वान् खोसुरो॥ खे़ङ्हाॽरे़ यहवे दाङ्बे़ल्ले़ कुमिमिदिङ् नु आनिॽ निङ्वाॽफुमाङ्ङिल्ले़ कुहाङ्वा कुमाङ्वान् मे़निसुरो॥ 3 ले़म्जुजुबा हुक्हाॽ के़धुम्बा चोगे़म्मे़ॽओ, हे़क्क्याङ् मे़न्धुम्मनाबा थुङ्बोॽहाॽ के़धुम्बा चोगे़म्मे़ॽओ॥ 4 निङ्वाॽओ साॽरिक् के़गिबाहाॽ मे़त्ते़म्सिम्मे़ॽओ, “हाङ्हाङ् लॽरे़म्मे़ॽ, मे़गिसे़म्मिन्ने़ॽओ॥ खे़निॽ निङ्वाॽफुमाङ्ङिन् कुले़क्वा हुङ्से़ युरो, साम्योबा हाङ्से़म्नु खे़निॽ ताङ्से़ःप्से़ युर पत्लो॥ 5 खे़ब्याङ् मिक्फःम्बाहाॽरे़ खामे़निसुरो, हे़क्क्याङ् नाधाक्पाहाॽरे़ नामे़घे़प्सुरो॥ 6 खम्भ्याङ् लाङ्सक्पाहाॽ पे़ःङ्वा कुइसिक् मे़बिन्ल लाङ्मे़घेःक्लो, हे़क्क्याङ् कुबान् मे़ल्लःम्मनाबा के़बाहाॽ मे़सःत्ल साम्मे़लोरो॥ थेआङ् के़होप्पा एःक्सादे़न्नो च्वाःत् लाक्तु लःन्लो, हे़क्क्याङ् ये़ःङ्घादे़न्नो वहःङ्हाॽ कुङ्लो॥ 7 साङ्याक्माल्ले़ मिगे़राक्पा ये़ःङ्घाःन् वरक् पोङ्लो, हे़क्क्याङ् के़हेबा खाम्मो वबुन्दाक्वा पुन्लःन्लो, स्यालाहाॽ मे़याक्पादे़न्नो, सारा नु फःङ्दु लिङ्धाङ्लो॥ 8 खे़ॽयो लत्छा माराम् पोङ्, खे़न् सेसेबा लाम् मे़मे़त्तुरो, आसुत्थो मना आत्तिन्नाङ् खे़न् लाम्बा पोङ्ङाङ् मे़बेःक्ने़न्लो, कर खे़न् माराम्मो लाङ्गे़घेःक्पाहाॽरे़ लागिरक् पोङ्लो, कुइगे़भे़म्बा अदङ्हाॽ खे़न् लाम् पोङ्माआङ् पेःक्मा मे़ङ्घोने़न्लो॥ 9 खे़ॽयो केबाहाॽ मे़होप्लो, हे़क्क्याङ् खे़ॽयोलाम् आजाजाबा थक्सा थेआङ् लाङ्मे़ङ्घेःक्ने़न्॥ खे़न् थक्साहाॽ खे़ॽयो खोमे़न्दे़त्ने़न्लो, कर थे़ॽमनासिबाहाॽरक् खे़ॽयोलाम्बा लाङ्मे़घेःक्लो॥ 10 हे़क्क्याङ् यहवे दाङ्बे़ल्ले़ कुमे़ल्लुङ् हुङुआङ् थे़ॽरुसिबाहाॽ मे़नुःङ् मे़भे़न्लो॥ खे़ङ्हाॽ साम्मे़लोर यरुसले़म ये़क्यक्को मे़लाःत्लो, सदादिङ् के़वाॽबा सःप्मान् खे़ङ्हाॽरे़ खुन्छिॽ तिच पोङ्लो॥ खे़ङ्हाॽ आभे़ल्ले़साङ् मे़सःत् मे़येःत्लो, हे़क्क्याङ् निङ्वाॽ तुक्मा मे़रिङ् थक्मा मे़बोङ्ने़ल्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.