यसैया 34 - लिम्बुयहवे दाङ्बे़ल्ले़ निङ्मिहाॽ खुम्दिङ् पिरुसिॽ 1 इक्सादिङ् खाम्बेःक्मोबा के़रे़क् मे़न्छाम् सुवाङ्से, निःत्ताङ् त्ये़म्मे़ॽ हे़क्क्याङ् सिङ्सिङ् ये़क्ये़क्काङ् खे़प्साम्मे़ॽओ॥ मे़न्छाम् याप्मिसे, नुरिक् निङ्वाॽ पिरे़म्मे़ॽओ! इक्सादिङ् खाम्बेक् नु खे़प्मो के़वाॽबा काक्ले़ मे़घे़प्सुररो, योॽबालाजेॽ नु खे़ॽयो नावागे़न् चइःत् के़बोङ्बा के़रे़क्ले़ निङ्वाॽ मे़बिरुररो! 2 इक्सादिङ् खाम्बेःक्मोबा के़रे़क् मे़न्छाम् सुवाङ्हाॽ सम्धाङ् यहवे दाङ्बे़ल्ले़ कुसिक् पोगे़आङ् वाॽरो, खुने़ॽ कुसाक्के़न्निन् खे़ङ्हाॽरे़ खुन्छिॽ के़रे़क् थक्सुबाहाॽ सम्धाङ् चुक्ते़आङ् वाॽरो॥ खुने़ॽ खे़ङ्हाॽ थिक्काङ् मेःन्ने के़रे़क् मे़क्खुसिरो, मना के़से़प्पा मनाःल्ले़ कुहुक्को खे़ङ्हाॽ हुक्सुप्तुसिरो॥ 3 मे़से़रुसिबा खुन्छिॽ मनाहाॽ लाःक्कात् लाप्पुङ् मे़देसुसिरो, हे़क्क्याङ् खे़ङ्हाॽरे़ खुन्छिॽ कुसिवे़त् थक्हाॽ किआङ् साॽरिक् नाम्गे़सुबा कुनाम् लःन्लो॥ खे़ब्याङ् कोःक्मा फाङ्जङ् थे़गुमाङ्वाहाॽ खे़ङ्हाॽरे़ खुन्छिॽ माक्खिल्ले़ वरक्सुरो॥ 4 ताङ्साङ्बो के़बप्पा के़रे़क् खेःम्सिक्पाहाॽ मे़मा मे़बेःक्लो, हे़क्क्याङ् ताङ्साङ्बान् किप्नाबा साप्ला थङ्मान् हे़क्के कित्छिङ् पेःक्लो॥ चे़ल्ले़क्सेल्ले़ कुबुङ्ङोनु इगे़ले़म्बा कुभे़क्वाहाॽ मुत्थाबा हे़क्के खे़म्ब्याङ् पएप्पाल्ले़ कुबुङ्ङोनु इगे़सुॽबा कुजाॽहाॽ मुत्थाबा हे़क्के ताङ्साङ्बोबा खेसे-खेःम्सिक्पाहाॽ मक्मे़धारो॥ 5 साङ्ग्राम्पेदाङ्ङो यहवे दाङ्बे़ल्ले़ कुदाभेन् यारिप् चोगुआङ् वाॽरो, ओमे़त्ते़म्मे़ॽ, खासे़न् लोःम्मारे़ लागि एदोमबा मनाहाॽरे़ खुन्छिॽ सम्धाङ् खे़न् ताभेन् थारो, आङ्गाॽ मे़ङ्मारे़ लागि से़न्दुङ्सिङ्बा खे़न् मे़न्छाम् याप्मिहाॽ सम्धाङ् चुक्लो॥ 6 यहवे दाङ्बे़ल्ले़ कुदाभेन् माक्खिॽओ हुमे़आङ् वाॽरो, खे़न् सोःत्ते़ल्ले़ पन्छुआङ् पत्लो— मे़ल्लुक् मे़ःन्दा माक्खिल्ले़ हे़क्क्याङ् मे़ल्लुक् मे़ःन्दा ले़म्भेःप्मोबा सोःत्ते़ल्ले़ खे़न् ताभेन् नाःन्दुआङ् पत्लो॥ थेआङ्भे़ल्ले़ बोज्रा ये़क्यक्को यहवे दाङ्बे़ल्ले़ वयागे़न् सिदुङ्जभा चोगुआङ् वाॽरो, हे़क्क्याङ् एदोम्मो यरिक् माक्खिॽसिवा से़सुआङ् वाॽरो॥ 7 खे़ङ्हाॽ ताम्भुङ् साःङ्वाहाॽनु सोरिक् मे़मे़क्लो, हे़क्क्याङ् पित्सात्हाॽ, यम्बयम्बा आधोःङ्धोःङ्बा पित्हाॽ लरे़ःङ् फरे़ःङ् मे़सिरो॥ खे़ङ्हाॽरे़ खुन्छिॽ लाजेन् माक्खिल्ले़ वज्रःप्मा पोङ्लो खे़ब्याङ् खाम्मिन् सोःत्ते़ल्ले़ पन्छु ने़स्सुरो॥ 8 थेआङ्भे़ल्ले़ यहवे दाङ्बे़ल्ले़ कुले़क्वा हुङ्मा ये़न्, एदोमे़न् कुले़क्वा नुःक्माआङ् सियोने़न् से़ःप्मा ये़म् निङ्सेक् चोगुआङ् वाॽरो॥ 9 एदोमबा वहःङ्हाॽ आलाकात्रा पोङ्लो, खे़ॽयो के़बोःक्पा खाम्भुत्छ्रुम्बान् मिगे़दिःप्पा कान्धाक् पोङ्लो, के़रे़क् लाजेन् मिधुङ् मिराःक् के़दिःप्पा आलाकात्रा पोङ्लो॥ 10 खे़न् से़न्दिक् ले़न्दिक् आभे़ल्ले़आङ् मे़सिने़न्लो, खे़ॽयो के़लःम्बा मिःक्खुन् चक्मे़ल्लॽए सुःङ्गु सुःङ्गु लॽरिक् थाःङ् पोःक्काङ् पत्लो॥ थाःक्थाःक् थारिक् खे़न् मुरे़क् खारे़क् थेआङ् के़होप्पा लाजेॽ पोङ्ङाङ् ने़रो, आत्तिन्हाॽआङ् याम्मो खे़न् लाम्बा मे़बोङ्ङाङ् मे़म्बेःक्ने़न्लो॥ 11 कर मुरे़ःक् खे़रे़ःक् थेआङ् के़होप्पा ये़ःङ्घादे़न्नोबा फक्थिःम्बे़न् नु के़अःक्पा सोङाःक्वाःल्ले़ कुयाक्मादे़न् पोङ्लो, हम्बुःम्मा नु काःक्वाहाॽरे़ खे़प्मो हाप् मे़जोगुरो॥ निङ्वाॽफुमाङ्ङिल्ले़ ए़दोम लाजेन् मुसुन्ने खे़सुन्ने नु मुहःङ्लिङ् खे़हःङ्लिङ्ङिल्ले़ सिःक्तुरो॥ 12 अक्खे मे़बाःत्तुॽ, “आल्लआङ्धो खे़प्मोग हाङ्जुम् होप्लो” खे़ल्ले़ कुसुहाङ्युक्पा नु कुहाङ्साहाॽ मे़मये़ मे़बेरो॥ 13 खे़न् लाजेॽओबा हाङ्यक् चङ्हिम्हाॽओ तिङ्ग्रेक्, नु खे़ॽयोबा हाङ्यक्हाॽओ सगि-सिक्वा नु सेर्दाःक्मा लिङ्लो, खे़न् स्याला याक्मा खा नु फक्थिःम्बाल्ले़ कुहाप् पोङ्लो॥ 14 मुरे़क् खारे़क् थेआङ् के़होप्पा ये़ःङ्घादे़न्नोबा थक्साहाॽ ताम्भुङ् कोःत्चोहाॽनु सोरिक् मे़वाॽरो, साम्मे़ःन्दाहाॽरे़ खुन्छिॽ तेःङ्जुम्हाॽ मे़मे़ःक्ल मे़उःत्तुसिरो, से़न्दिक्पा आजाजाबा थक्साहाॽ मे़लःन्नाङ् ने़मादे़न् मे़गोःत्तुर खे़ॽयो मे़नाःम्सिङ्लो॥ 15 खे़ॽयो फक्थिःम्बे़ल्ले़ हाप् चोगुआङ् थिःन्दुरो, हे़क्क्याङ् कुस्सा लःत्तुसिरो, खे़ब्याङ् कुलाप् सिगाङ् कुस्साहाॽ कुप्तुसिरो, खे़प्मो कुम्मामा कुम्बाबा फिःत्चोहाॽ कुगाप् कुगाप् मे़बोङ्ङाङ् मे़जुम्लो॥ 16 यहवे दाङ्बे़ल्ले़ कुबाःन्जाक् के़बप्पा साप्कित्तो ओमे़त्ते़म्मे़ॽआङ् निरे़म्मे़ॽओ॥ कन् थक्सा पुसाहाॽओ लत्थिक्काङ् मे़म्माने़न्लो, कुगाप् खोमारे़ लागि आत्तिल्ले़आङ् के़साक्पा मे़दुमुन्लो, थेआङ्भे़ल्ले़ कङ्ग यहवे दाङ्बे़ल्ले़ कुम्ब्राःल्ले़ इङ्जाङ् चोगुबारो, खे़ब्याङ् खुने़ॽ कुयाम्साम्मिल्ले़ खे़ङ्हाॽ थिक्ले़ङ्ले़ सोरिक् फुक्खुसिरो॥ 17 खुने़ॽ खे़ङ्हाॽरे़ खुन्छिॽ लागि खोमा लक् से़न्दु पिरुसिरो, खुने़ॽ आबाङे कुहुक्किल्ले़ सिःक्तुआङ् फःक्खु पिरुसिआङ् वाॽरो॥ खे़ङ्ग सदादिङ्ले़ लागि खुन्छिॽइन् पोङ्लो, खे़ब्याङ् थाःक्थाःक् थारिक् खे़ङ्हाॽ खे़ॽयो मे़युङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.