यसैया 33 - लिम्बुआभाॽरे़ फाॽआङ् यहवे दाङ्बान् पेलि फाक्मा 1 मना के़से़प्पा खिनिॽ अस्सेरियाहाॽ, के़जिःत्ति के़स्ये़ॽइरो! कर खे़निॽग हाःत्ले़आङ् मे़न्छे़त्ते के़वयिॽ! चिःत्ते़स्ये़रो, खिनिॽ इङ्ले़क्स्वाबाहाॽ, खिनिॽग हाःत्ले़आङ् इङ्मे़ल्ले़क्के के़वयिरो! मनाहाॽ खे़निॽ मे़ङ्मा के़ले़रुम्सिम्मिल्ले़, खे़निॽआङ् के़म्मे़क्खिरो॥ मनाहाॽ खे़निॽ इङ्ले़क्मा के़ले़रुम्सिम्ॽ, खिनिॽआङ् इङ्ले़क्को के़ध्ये़ॽइरो॥ 2 यहवे दाङ्बाए, आनिगे लुङ्माॽ आदुक्ते़ॽओ, आनिगे खे़ने़ॽ के़लाम् ओमे़त्तुम्बे़रो॥ तानाम् थक्मा खे़ने़ॽ आनिगे मुक्साम् पोःक्खे़ॽआङ् तुक्खे लाक्खे तुमिगे़ल्ले़ आसे़ःप्ते़ॽओ॥ 3 खे़ने़ॽ यम्बा के़इक्लान् मे़घे़प्सुआङ् मनाहाॽ मे़घे़त्छिङ् मे़बेःक्लो, खे़ने़ॽ थङ् चोःक्से़ के़बोःक्किल्ले़ के़रे़क् मे़न्छाम् सुवाङ्हाॽ फुत्छिङ्छाःङ् मे़से़ मे़घे़त्लो॥ 4 इक्सादिङ् खाम्बेःक्कोबा के़रे़क् मे़न्छाम् याप्मिसे, खे़निॽ के़नाप्तुम् के़दारुम्सिम्बा कुजाहाॽ के़घाबा याक्लापुसाःत्हाॽरे़ मे़जबा थेसिङ्बा पोङ्लो, निःङ्घुक्वाहाॽरे़ मे़बन्छुबा कुसिङ् मनाहाॽरे़ खे़न् मे़सुम्दुरो॥ 5 यहवे दाङ्बान् के़रे़क्नुःल्ले़ पयम् यम्बा चोक्लो, थेआङ्भे़ल्ले़ खुने़ॽ के़रे़क्नुःल्ले़आङ् थाःङ्धाःङ् युङ्लो॥ खुने़ॽ सियोने़न् के़वाॽबा खासे़न् नु साम्योबा पाःन्हाॽरे़ के़क्कुङ्ल चोगुरो॥ 6 हे़क्क्याङ् खाम्घु लाजेन् थधप् मे़ल्लॽमनाबा चोगुरो, खुने़ॽ कुमनाहाॽ आभे़ल्ले़साङ् ताङ्से़ःप्तुसिरो॥ हे़क्क्याङ् खे़ङ्हाॽ सिक्कुम्दिङ् निङ्वाॽ नु ने़हिनिङ्वाॽ पिरुसिॽ॥ यहवे दाङ्बान्नु किमाङ्ग कन् पाःन्हाॽरे़ कुभु हम्मा तिमिक्लो॥ 7 ओमे़त्ते़म्मे़ॽ, खे़ङ्हाॽरे़ खुन्छिॽ साॽरिक् के़धुम्बा मनाहाॽ आभाॽरे़ फाॽआङ् लाम्मो उःक्काङ् उःक् मे़हाःप्लो, पान् के़दङ्बा हाङ्लाइङ्बाहाॽ वे़ःङ्ङाङ् वे़ःङ् मे़हाःप्लो॥ 8 माराम्हाॽ चिजि खक्खक् पोःक्खे़आङ् ने़रो, लाम्मो लाङ्गे़घेःक्पा लाम्दिःप्पाङ्हाॽ मे़होप्लो॥ के़दङ्बा पाःन्निन् याम्मो लङे़आङ् वाॽरो, के़निबाहाॽरे़ मे़बिरुबा तोःन्दि पाःन्हाॽ कुनामे़न्छाॽ पोःक्खे़आङ् वाॽरो, आन्तिन् मनाहाॽरे़न्नाङ् खुन्छिॽ मिङ्सो इङ्धाङ् होप्लो॥ 9 खाम्घु लाजेन् मे़रिङ् थक् हे़क्क्याङ् मुरे़क् खारे़क् पोङ्लो, ले़बनानबा मनाहाॽरे़ खुन्छिॽ नासाम् थाःॽ खे़म्ब्याङ् इमे़सुॽरो॥ सारोन लाजेॽओ चागे़नुॽबा ने़ने़बादे़न्हाॽ अराबा लाजेॽओ के़ने़बा ये़ःङ्घादे़न् हे़क्तङ्बा पोङ्लो, खे़ब्याङ् बासान लाजेॽओ नु कर्मेल कोःक्माओबा सिङ्बुङ्हाॽओनु ते़त्ले़फे़क्वाहाॽ लुःक्थारो॥ यहवे दाङ्बे़ल्ले़ निङ्मिहाॽ खुम्ने़निङ् मे़त्तुसि 10 यहवे दाङ्बे़ल्ले़ इक्सादिङ् खाम्बेःक्मोबा मे़न्छाम् सुवाङ्हाॽ मे़त्तुसि, “आल्ल आङ्गाॽ पोःक्कारो॥ आल्ल आङ्गाॽ आबाङे थाःङ्धाःङ् पोःक्कारो, आङ्गाॽ आमुक्साम्मिन् ओसेःन्धाङ् चोगुङ्लो॥ 11 खे़निॽ अस्सेरियाबा मनाहाॽरे़ कुहेद्याॽ याॽलाङ्हाॽ सुम्मनाबा हे़क्के कुसुम् मे़न्दम्नाबा याःम्बक् चोःक्मा के़गोःत्तुम्लो॥ खे़निॽ सक्माःङ्ग खे़निॽ आबाङे खाप्पुथ्यःङ् के़जोःक्पा मिधुङ् मिराःक्लो॥ 12 मनाहाॽ चुनि लुङ् मिधिङ्मनादेमनाबा कुइसिक् मिमे़दिक्लो, हे़क्मना ने़मनाबा तिङ्ग्रेक् लाःन् लाप्मनाबा हे़क्के खे़ङ्हाॽ मे़लाबुसिरो॥ 13 “माःङ्घा के़वाॽबा मनासे, आङ्गाॽ चोगुङ्ङाङ् के़वाॽबा के़रे़क् पाःन्हाॽ खे़प्से़प्मे़ॽओ, निःत्ताङ्बा मनासे, आङ्गाॽ आमुक्साम्मिन् कुसिङ् निःत्ते़म्मे़ॽओ॥ 14 सियोनओ के़वाॽबा लायोबाहाॽ मे़गिसे़आङ् मे़वाॽरो, निङ्वाॽफुमाङ् वाॽ फाॽआङ् निङ्वाॽफुमाङ्ङिन् कुसिङ् मे़न्निप्नाबा मनाहाॽ किमा यङ्मारे़ ते़म्सुसिआङ् मे़वाॽरो, खाप्पुथ्यःङ् आजोःक्चोःक्पा मिओ युङ्मा के़सुक्पा आनिॽओ हात् वाॽबे? आभे़ल्ले़साङ् मिधुङ्दिङ् मिराःक् के़बोःक्पादे़न्नो युङ्मा के़सुक्पा आनिॽओ आत्तिन् वाॽग? 15 हात् कुदोःप्मा लाम्मो लाङ्घेःक्, हे़क्क्याङ् के़वाॽबा पान् पाःत्, हात् याङ्ङिल्ले़ कुस्सा चामा मे़दे़न्ने़न्, आत्तिल्ले़ स्वाःत्ताङ् सुरुत्याङ् ताःक्मारे़ लागि कुहुक्के़न् मे़सन्छुन्, हात् मनासे़प्मा चे़म्भन् पान् खे़म्मा मे़दे़न्ने़न्, ताप्फे़ःम्बा पाःन्निन् निङ्वाॽ इःप्मानुःल्ले़ परु कुमिक्के़न् इम् मे़त्तुॽ॥ 16 हाबा खे़न् मनान् थोधोक्पा ते़न्नो युङ्लो, खे़ल्ले़ कुइःम्सिङ्मा ते़न्निङ्ग कोःक्माओ के़ने़बा हाङ्यक्को पोङ्लो॥ खे़न् चामा कुजा मे़बिरुरो हे़क्क्याङ् च्वाःत्तिल्ले़ तुक्खे मे़बोङ्ने़ल्लो॥” हाङ्वा माङ्वा के़याक्पा ताये़म् 17 हाङ्ङिल्ले़ कुघे़म्सिम्मे़न् खे़निॽ मिक्किल्ले़ निसुरो, हे़क्क्याङ् माःङ्घा थारिक् के़बोबाआङ् के़ने़बा लाजेन् खे़निॽ मिक्के़ल्ले़ तासुरो॥ 18 खे़निॽ निङ्वाॽओ तगिबा किमा यङ्माहाॽ निङ्वाॽ के़इःत्तुम्लो, “तुम् सुहाङ्युक्पान् आत्ति वाॽ? एःङ्याङ् के़भोङ्बान् आत्तो पेबे? चङ्हिम्हाॽ ओगे़मे़प्पा लक्पे़न् के़घोबा सुहाङ्युक्पान् आत्ति वाॽ?” 19 खे़निॽ कुसिङ् के़न्नित्तुम्मिम्बा पाःन्दाङ् के़बाःप्पा के़हे़न्छिङ्बा वेॽ लाजेॽबा मनाहाॽ याम्मो के़न्निसुम्सिम्मे़न्लो॥ 20 आनिॽ निःन्धो आजोगुम्बा तङ्नाम्हाॽरे़न् पाङ्जुम् सियोने़न् ओमे़त्ते़म्मे़ॽओ, खे़निॽ मिक्के़ल्ले़ यरुसले़म ये़क्यक्किन् निसुरो, चिजि ये़म्ये़म् के़लॽबा लत्छा युङ्मादे़न्, लत्छा साःङ्गाहिम्मे़न् आभे़ल्ले़आङ् मे़न्जत्छिङ् मे़म्बेःक्मनाबा चोक्लो, खे़ॽयोबा किल्लाहाॽ आप्फाल्ले़आङ् मे़न्आःक्खुन्लो, हे़क्क्याङ् थाक्पाहाॽ मे़म्भुॽरुन्लो॥ 21 खे़प्मोग यहवे दाङ्बा आनिॽ मुक्साम्दाङ्बान् वाॽरो, कन् यम्बयम्बा वहःङ् नु यङ्घङ्ले़ कुगुङ्मादे़न् हे़क्तङ्बा पोङ्लो॥ लङ्घत्हाॽरे़ लोःङ्मनाबा खःङ्बेॽहाॽ खे़ॽयो मे़ल्लोःक्ने़न्लो, यम्बा वालाधाहाॽआङ् खे़ॽयो लाङ्मे़ङ्घेःक्ने़न्लो॥ 22 थेआङ्भे़ल्ले़ यहवे दाङ्बान् आनिॽ ले़प्माङ् खासे़न् के़लोःम्बा के़बिबा चोक्लो, यहवे दाङ्बान् आनिॽ साम्योथिम् आबिबिबा चोक्लो॥ यहवे दाङ्बान् आनिॽ हाङ्लो, हे़क्क्याङ् खुने़ॽए आनिॽ ताङ्आसे़ःप्लो॥ 23 खे़निॽ वालाधाहाॽ इघेःङ्मा थाक्पाहाॽ वाःङ्सःक्सःक्पा पोःक्खे़आङ् पत्लो, मनाहाॽरे़ खे़ल्ले़ कुदक्मा सित्लाङ्हाॽ मे़म्मुन्ने युङ्मा मे़न्छुक्तुन्लो॥ खे़ङ्हाॽरे़ सुरित् चे़प्मा चिरिक्किन् खिङ्मा मे़न्छुक्तुन्लो, खे़ब्याङ् मे़नाप्तु मे़दारुसिबा यरिक् चिगक्वाहाॽ मे़भःक्खुरो॥ लाङ्सक्पाहाॽरे़आङ् खे़न् मे़नाप्तु मे़दारुसिबा चिगक्वाहाॽरे़ कुलक् मे़दाःक्तु मे़देॽरुरो॥ 24 सियोन कोःक्माओ के़युङ्बा आत्तिन्नाङ् “आङ्गाॽ आयाम्दुक्” मे़लॽने़न्लो, हे़क्क्याङ् खे़ॽयो के़युङ्बा मनाहाॽरे़ खुन्छिॽ लायोलाम् ले़प्मि मे़घोसुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.