यसैया 32 - लिम्बुसाम्योबा हाङ् 1 ओमे़त्ते़म्मे़ॽ, लत्छा हाङ्धिक्ले़ साम्योबा याःम्बक् चोगुआङ् हाङ्युक् चोगुरो, हे़क्क्याङ् युक्साबाहाॽरे़ कुदोःप्मा खासे़न् मे़जोगुरो॥ 2 खे़ङ्हाॽ सुरित् केजङ्लाम् वइःम्सिङ्मा नु खइक् खइक् के़इक्सिङ्बा वहित् साम्मिःत्लाम् इःम्सिङ्मादे़न् कुसिङ्बा मे़बोङ्लो॥ खे़म्ब्याङ् थेआङ् के़होप्पा मुरे़क् खारे़क्पा ये़ःङ्घादे़न्नो च्वाःत् लाङ्गे़घेःक्पा वहःङ् हे़क्तङ्बा मे़बोङ्लो, च्वाःत् के़हेबा खाम्बाङ्ङो यम्बा याक्पेओबा नाम्इःक्खङ् हे़क्तङ्बा मे़बोङ्लो॥ 3 खे़न् ये़म्मो ओगे़मबाहाॽरे़ खुन्छिॽ मिक्किन् याम्मो आभे़ल्ले़आङ् तःम्दःम्बा मे़बोङ्ने़न्लो, हे़क्क्याङ् के़घे़म्बाहाॽरे़ खुन्छिॽ ने़भाक्किल्ले़ मे़घे़प्सुरो॥ 4 आल्लआङ्धो खे़ङ्हाॽ नासिमे़न्धःप्मनाबा मे़म्बोङ्ने़न्लो हे़क्क्याङ् खे़ङ्हाॽ खासिङ् मे़निःत्लो, हे़क्क्याङ् मुरा के़घॽबाहाॽ नुरिक्काङ् मे़बाःत्लो॥ 5 खासिङ् मे़न्निःप्मनाबा अदङ् मनान् आभे़ल्ले़आङ् के़नुॽबा मे़प्मा मे़बोङ्ने़न्लो, हे़क्क्याङ् कुइगे़भे़म्बा मनाःन्नाङ् इङ्धाङ् पिमा मे़बोङ्ने़न्लो॥ 6 थेआङ्भे़ल्ले़ अदङ् मनाःन् अदङ् पाःन्ने पाःत्लो, हे़क्क्याङ् खे़ल्ले़ कुनिङ्वान् ताप्फे़ःम्बा याःम्बक् चोःक्माओरक् पत्लो, खे़ल्ले़ लायोबा याःम्बक् चोगुॽ खे़ब्याङ् यहवे दाङ्बे़ल्ले़ कुदक्ले़ङ्वाओ के़बेःम्बा पाःन्हाॽ इङ्घु ने़स्सुरो॥ खे़ल्ले़ कुसे़क्के़लाःक्पाहाॽ कुजा मे़बिरुसिन्लो, खम्ब्याङ् कुवा के़मिबाहाॽ थुङ्मा च्वाःत्ताङ् मे़बिरुसिन्लो॥ 7 कुइगे़भे़म्बा मनाःल्ले़ कुयाःम्बक्किन् ताप्फे़ःम्बाए चोक्लो, थेआङ् के़होःप्पाहाॽरे़ मे़नाःक्तुबा पाःन्निन् के़वाॽबाए चोःक्साङ् याङ्गे़साॽबाहाॽ इङ्ले़क् पाःन्निल्ले़ मे़ङ्मासि फाॽआङ् खे़ल्ले़ ताप्फे़ःम्बा चे़म्भन् चोगुरो॥ 8 कर के़नुॽबा मनाःल्ले़ नुबा याःम्बक्हाॽ चोःक्मा निङ्वाॽ चोगुरो, हे़क्क्याङ् खे़ल्ले़ कुदोःप्मा याःम्बक्के चक्मे़ल्लॽए चोगुआङ् पत्लो॥ मे़न्छुमाहाॽ सिङ्सिङ् ये़क्ये़क् लॽमा 9 तुक्खे मे़न्जाए के़युङ्मा मे़न्छुमासे, आल्ल पोगे़म्मे़ॽआङ् आङ्गाॽ आबाःन्निन् नुरिक्काङ् खे़प्से़म्मे़ॽओ॥ निङ्वाॽ तुक्खे मे़न्जाए के़युङ्मा मे़न्छुमा सासे, आङ्गाॽ थे पाःत्तुङ् खे़न् खे़प्से़म्मे़ॽओ! 10 आल्ल तङ्बेॽ थिक्नुःल्ले़ आजे़ःत्छिक् एगाङ् खे़निॽ निङ्वाॽ तुक्खे मे़न्जाए के़युङ्माहाॽ के़यक्खिरो॥ चे़ल्ले़क्सेॽ इक्ताप्पिन् सॽआङ् चे़ल्ले़क्सेॽइल्ले़ कुजाॽआङ् मे़धोःक्ने़न्लो॥ 11 कुनिङ्वाॽ तुक्खे मे़न्जाए के़युङ्मा मे़न्छुमासे, यक्खे़म्मे़ॽओ, निङ्वाॽ निःन्धोओ के़युङ्मा मे़न्छुमा सासे, चिरिम्लिम्भ यक्से़म्मे़ॽओ॥ आबाङे खिनिॽ चाङ्हाॽ फे़न्दे़म्मे़ॽओ, हे़क्क्याङ् खे़निॽ फॽइ युम्मादे़न्नो सागि चाङ् चाक्खाम्मे़ॽओ॥ 12 खिनिॽ सङ्बप्मे़न् हिप्ते़म्मे़ॽर हाबाम्मे़ॽओ थेआङ्भे़ल्ले़ सिराॽगे़धाङ्बा इक्ताप्हाॽ नु कुजाॽ के़बप्पा चे़ल्ले़क्सेल्ले़ कुबुङ्हाॽ खाप्पुथ्यःङ् मे़जोगुआङ् ने़रो॥ 13 हे़क्क्याङ् आङ्गाॽ आमनाहाॽरे़ खुन्छिॽ तिङ्ग्रेक् नु सेर्दाःक्मा के़लिङ्बा इक्ताप्पिल्ले़ लागि हाबाम्मे़ॽओ॥ ओवा, सोसोत्लराङ् चोःक्मा हिम्हाॽरे़ लागि हे़क्क्याङ् निङ्वाॽ तादा निङ्वाॽ पाःप्पाःत् चोःक्मा पाङ्जुम्मिल्ले़ लागि मे़रिङ् थक्ते़म्मे़ॽओ॥ 14 हाङ्हिम्मिन्नाङ् मनामे़ःन्ने चिजि खक्खक् पोङ्लो, हयङ् किल्लिङ् के़बोङ्बा हाङ्पाङ्ङो हाङ्यक् नु चङ्हिम्हाॽआङ् चिजि ये़म्ये़म् पोङ्लो॥ खे़ॽयो ताम्भुङ्बा थक्सा अदङ्हाॽ ताम्दाम्माङ् ताक्मे़गन्लो, खे़ब्याङ् मे़ल्लुक्हाॽ चामे़राम्लो॥ 15 कर निङ्वाॽफुमाङ्ङिल्ले़ थाःङ्लाम् आनिॽ सम्धाङ् कुयाम्साम्मिन् पाङ्घुरो॥ हे़क्क्याङ् ये़ःङ्घादे़न्निन् चा के़नुॽबा प्याङ्सि पोङ्लो खे़ब्याङ् प्याङ्सिओ यरिक् कुजा थोःक्लो॥ 16 खे़न् मुरे़क् खारे़क् थेआङ् के़होप्पा ये़ःङ्घादे़न्नो कुदोःप्मा खासे़न् पोङ्लो, हे़क्क्याङ् चा के़नुॽबा इक्ताप् प्याङ्सिओ साम्योबा पाःन्हाॽ वाॽरो॥ 17 साम्योबा पाःन्हाॽरे़ नुॽमा तामा तारुरो, हे़क्क्याङ् साम्योबा पाःन्हाॽलाम् खोगे़दे़प्पा पाःन्हाॽ सदादिङ् सनारुङ् नु से़ःप्सिङ्मा पोङ्लो॥ 18 आङ्गाॽ आमनाहाॽ तुक्खे मे़न्जाए निङ्वाॽ निःन्धोओ मे़वाॽरो, आसे़ःप्से़ःप्पा हिम्हाॽओ, नु हयङ् किल्लिङ् मे़म्बोङ्मनाबा नाःम्सिङ्मादे़न्हाॽओ मे़युङ्लो॥ 19 फःन् थासुआङ् ताम्भुङ् याक्ला लरे़ःङ् फरे़ःङ् सोःन्दुरो, हे़क्क्याङ् के़रे़क् ये़क्यक्किन् खाप्पुथ्यःङ् चोगुरो॥ 20 हे़क्केसाङ् कुजा हेॽमारे़ लागि वे़त्ते़सरे़ वहित् थासुरो, अदङ् नु पित्हाॽरे़ लागि चाराम्मादे़न् मे़घोसु हे़क्क्याङ् के़रे़क् मे़सःत्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.