यसैया 31 - लिम्बुनिङ्वाॽफुमाङ्ङिल्ले़ यरुसले़म ये़क्यक्किन् से़ःप्तु 1 आभाॽरे़ फाॽआङ् मिस्र लाजेॽओ के़बेःक्पाहाॽग मे़जिःत्ते़ मे़स्ये़रो! खे़ङ्हाॽरे़ मिस्र लाजेॽओबा यरिक् अन्हाॽ, अन्लाधाहाॽ हे़क्क्याङ् थक्सुबाहाॽरे़ ताङ्मे़से़ःप्तिगे़ फाॽआङ् मे़इःत्तुरो॥ कर इस्राइलबा सेसेबा निङ्वाॽफुमाङ्ङिल्लो निङ्वाॽ मे़न्युक्खुन्लो, हे़क्क्याङ् खुने़ॽओ कुभाॽआङ् मे़ङ्गोःत्तुन्लो॥ 2 हे़क्केसाङ् खुने़ॽग सिक्कुम्साबा चोक्लो, हे़क्क्याङ् खुने़ॽ मे़क्मासिमा ताःप्मा सुक्तुरो, हम्भ्याङ् पाःत्तुबा पाःन्निन् याङ्ना मे़नुःक्तुन् मे़देॽरुन्लो॥ ताप्फे़ःम्बा याःम्बक् के़जोःक्पाहाॽरे़ खुन्छिॽ हिम्सयङ् नु लायो लासोत् के़जोःक्पाहाॽ कुभाॽ के़बिबाहाॽ खुने़ॽ खुम्दिङ् पिरुसिरो॥ 3 कर मिस्रिहाॽग मनासिरक् निङ्वाॽफुमाङ्सि मेःन्लो, खे़ङ्हाॽरे़ खुन्छिॽ अन्हाॽ नासिगे़न् थक्लासि, याम्साम्सि मेःन्लो, निङ्वाॽफुमाङ्ङिल्ले़ कुहुक्किन् सन्छुल्ले़ खे़ङ्हाॽ कुभाॽ के़बिबे़न् के़ङ्लो, हे़क्क्याङ् मे़भाॽरुबान्नाङ् हर्जुॽ चोःन्लो खे़ब्याङ् ने़प्माङ् थिक्ले़ङ्ले़ मे़क्सिरो॥ 4 दाङ्बे़ल्ले़ आङ्गाॽ अक्खे मे़त्ताङ्लो, “यम्बा केबान् से़रुबा साओ हुःक्लो, हे़क्क्याङ् पित् मे़ःन्दा के़गप्पा यम्बा लुप्हाॽ आक्ख्यारिक् साॽरिक् मे़अःक् मे़भिःक्साङ् खे़ङ्हाॽरे़ यङ्मा मे़से़रुबालाम् केबान् यङ्मा मे़सिने़ल्लो— हे़क्केलॽरिक्के सियोन कोःक्मान् नु खे़ल्ले़ कुभाङ्जङ्हाॽओ थङ् चोःक्से़ मुक्साम्दाङ्बा यहवे दाङ्बान् युरो॥ 5 पुहाॽरे़ खुन्छिॽ हाप्पिन् से़ःप्मारे़ लागि कब्रिङ् मे़बे़आङ् मे़वाॽबा हे़क्केए आङ्गाॽ मुक्साम्दाङ्बा यहवे दाङ्बे़ल्ले़ यरुसले़म ये़क्यक्किन् कम्ब्राङ् मे़त्तुङ्लो॥ खे़न् ताङ्से़ःप्तुङ्, हे़क्क्याङ् खे़न् नाङुङ् थेःक्तुङ्लो, खे़न् लाम् पोङ्ङार पेःक्का खे़ब्याङ् खे़न् चोःक्युम्भो पिरुङ्लो॥” 6 यहवे दाङ्बे़ल्ले़ पाःत्तु, “इस्राइलबा मनासे, आङ्गाॽ आदक्ले़ङ्वाओ खे़निॽ यम्बा लायो के़जोगुम्माङ् वाॽ, आल्ल आङ्गाॽ ले़प्माङ् हिआसिम्मे़ॽ॥ 7 थेआङ्भे़ल्ले़ आल्ल कम्भदाङ्बा ये़न् तार पत्, खे़निॽ के़रे़क्ले़ आबाङे लायोबा हुक्किल्ले़ के़जोगुम्सिम्बा साम्म्याङ् युप्पा नावाइत्लाहाॽ लाप्पुङ् के़देसुम्सिम्, खे़ङ्हाॽ के़नाॽरुम्सिम्॥ 8 “अस्सुरबा मनाहाॽ ताभेःल्ले़ मे़ज्ये़प्तु मे़स्ये़रुसिरो, कर मनारे़ मे़याङुबा ताभेलाम्बा मेःन्लो॥ हाबा ताभेःल्ले़ खे़ङ्हाॽ मे़मे़क्लो, कर मे़न्छाम् याप्मि नासिगे़न् थक्लाओ मेःन्लो॥ खे़न् ताभेन् मे़निसुआङ् खे़ङ्हाॽ मे़घे़त्छिङ् मे़बेःक्लो, हे़क्क्याङ् खे़ङ्हाॽरे़ खुन्छिॽ थाङ्बे़न् मे़न्छ्या साहाॽ योग्बा योःग्मा मे़जोगुसिरो॥ 9 खे़ङ्हाॽरे़ खुन्छिॽ हाङ्यक्किन् किमा यङ्मारे़ चोगुल्ले़ लुःन्लो, हे़क्क्याङ् खे़ङ्हाॽरे़ खुन्छिॽ थक्मोबाहाॽरे़ थङ्ङिल्ले़ निसान मे़निसुआङ् आल्ल आक्खेने चोःक्मा पाःप्मा मे़लॽरो॥” खे़न् मिन् सियोन कोःक्माओ नु मिधुङ्दिङ् मिराःक्किन् यरुसले़म ये़क्यक्को युङ् फाॽआङ् यहवे दाङ्बे़ल्ले़ पाःत्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.