यसैया 30 - लिम्बुमिस्र लाजेःन्नु चोःक्मनाबा हने़बा नादङ् 1 यहवे दाङ्बे़ल्ले़ उवा चोगु, “चिःत्ताङ्लक् स्ये़रो! खे़न् पान् मे़ङ्घे़म्मनाबा साएहाॽग, खे़ङ्हाॽरे़ याःम्बक्हाॽ चोःक्मा मे़गोःत्तुरो खे़न् आङ्गाॽइन् मेःन्, नादङ् मे़जोगुरो, कर आयाम्साम् कुइसिक् मे़न्जोगुन्लो, लायो सम्धाङ् लायो मे़जोगुरो॥ 2 आङ्गाॽ सेःन्मे़न्दोए खे़ङ्हाॽ मिस्र लाजेॽ मे़बेःक्लो, फारो हाङ्ङिल्ले़ नाङिगे़र फाॽआङ् खे़ॽयो मे़लोःक्लो, मिस्र लाजेॽओ से़ःप्सिङ्से़ मे़धासिङ्लो॥ 3 कर फारोल्ले़ खे़निॽ नाङ्मा थेःक्मा के़न्छुक्तिन्नाङ् खिनिॽ नाधारो, हे़क्क्याङ् मिस्र लाजेॽबा से़ःप्सिङ्मान् मे़क्काङ् खिनिॽ सिक्फे़क्लो॥ 4 हे़क्केसाङ् खे़ङ्हाॽरे़ खुन्छिॽ सुहाङ्युक्पाहाॽ मिस्रबा ये़क्यक् सोअनओ मे़वाॽरो, हे़क्क्याङ् खे़ङ्हाॽरे़ खुन्छिॽ हाङ्लाइङ्लाबाहाॽ हानेसओ मे़द्ये़आङ् मे़वाॽरो, 5 अक्तङ्बा याप्मि फाॽमा मे़न्छुक्मनाबा सुवाङ्हाॽरे़ मे़जोगुल्ले़ खे़ङ्हाॽ के़रे़क् नाधामो मे़धारो, खे़ङ्हाॽरे़ इन्धाःक् नु कुभाॽ के़बोङ्बा थेआङ् ताःप्मा मे़न्छुक्तुन्लो, कर साम्धामा नु चाःत्थि पेःक्मा पाःन्लक् मे़दारुरो॥” 6 नेगेब लाजेॽबा थक्साहाॽरे़ याःम्बेओ माङ्निङ्वाॽपान्— केबाल्ले़ कुघा के़ने़बा, असेःक् नु कुनिङ् के़याक्पा के़बे़बा असेःक् के़लःम्बा, तुक्मा नु सिमा के़वाॽबा लाजेॽलाम् पोङ्मार हाङ्लाइङ्बाहाॽ लाङ्घेःक्मा के़बोङ्बा वाॽरो॥ याप्मि फाॽमा मे़न्छुक्मनाबा सुवाङ्हाॽ खुॽमासिरे़ लागि आबाङे खुन्छिॽ अदङ् नु उमेहाॽ इमे़ल्लुङ्बा सुङ्हाॽ मे़गुःत्तु मे़देॽरुसिरो॥ 7 मिस्र लाजेःल्ले़ कुभाॽइङ्ग कुसुम् मे़न्दम्मनाबा चोक्लो, खे़ल्ले़चोगुल्ले़ आङ्गाॽ खे़न् राहाब— थेआङ् आम्मे़त्ने़म्बा यम्बा असेःक् मे़त्तुङ्ङाङ् वाॽरो॥ पान् मे़ङ्घे़म्नाबा मनाहाॽ 8 आल्ल कन् पाःन्हाॽ सदादिङ्ले़ लागि साखि पोङ्ल फाॽआङ् यहवे दाङ्बे़ल्ले़ आङ्गाॽ लत्छा लुङ्साप्पो लक्ते़ॽओ, साप्कित्तो खे़न् साप्ते़ॽ मे़त्ताङ्लो॥ 9 कन्हाॽग पिफ्युङ्बा नु इङ्ले़क् के़बाःप्पा मनासिरो, इग्र यहवे दाङ्बे़ल्ले़ कुनिसाम् मे़ङ्घे़म्मनाबा याप्मिसिरो॥ 10 सुफो के़निबाहाॽ खे़ङ्हाॽरे़ मे़मे़त्तुसिरो, “आल्लआङ्धो सुफो मे़निसे़म्मिन्ने़ॽओ!” खे़ङ्हाॽरे़ माङ्निङ्वाॽपान् के़बाःप्पाहाॽ मे़मे़त्तुसिरो, “कुदोःप्मा पाःन्हाॽ सुफोलाम् आनिगे आम्मे़त्ते़न्ने़ॽओ! आनिगे सिराॽगे़धाङ्बा पाःन्हाॽ आजे़क्ते़ॽओ, मिक्ले़ःङ्मा पाःन्हाॽ पात्ताम्मे़ॽओ॥ 11 कन् लाम्मिन् ले़रे़म्मे़ॽ, कन् माराम्मिन् मे़नाःत्ते़म्मिन्ने़ॽओ, हे़क्क्याङ् इस्राइलबा सेसेबा निङ्वाॽफुमाङ्लाम् के़साक्पा पान् आनिगे थेआङ् खे़म्मा मे़नाःक्तुम्बे़न्लो॥” 12 कल्ले़चोगुल्ले़ इस्राइलबा सेसेबा निङ्वाॽफुमाङ्ङिल्ले़ पाःत्तुरो, “खे़निॽ कन् इङ्घङ्ङिन् खे़म्मा के़नाॽरुम्माङ् के़वयिरो, हे़क्क्याङ् मना हिप्मा नु इङ्ले़क् पाःन्नो ताःक्पो के़जोगुम्माङ् के़वयिरो॥ 13 कल्ले़चोगुल्ले़ कन् लायोन् खे़निॽ लागि ना चम्बे़त् के़लःम्बाआङ् मक्थामा पेःक्मा के़जोःक्पा लत्छा केःम्बा लुङ्धाक् हे़क्तङ्बा चोक्लो, खे़न् सप्फाधिक्ले़सा थिक्ले़ङ्ले़ हर्जुॽ चोःन्लो॥ 14 फुजिक्के़न् फयःप्फयःप् यःम्मनाबा हे़क्केए, खे़न् कुघे़ल्ले़क् कुघे़ल्ले़क् पोङ्ङाङ् यःप्लो, खे़ङ्ग मिहाःत्लुङ्ङो मि लःप्मा इग्र वगे़ङ्ङो च्वाःत् पाःक्मा कुघे़ल्ले़क् थिक्काङ् मे़याःक्ने़ल्लो॥” 15 यहवे दाङ्बा, इस्राइलबा सेसेबा निङ्वाॽफुमाङ्ङिल्ले़ अक्खे पाःत्तुरो— “हिम्मा नु नाःम्सिङ्मो खे़निॽ से़न्लप् के़घोसुम्लो॥ चिजि ये़म्ये़म् नु निङ्वाॽफुमाङ्ङो निङ्वाॽ के़युक्खुम्मिल्ले़ मुक्साम् के़घोसुम्लो, कर खे़निॽग हे़क्के चोःक्मा के़न्दे़न्दिन्लो॥ 16 खे़निॽ के़बाःत्तुम्, ‘मेःन्ना, आनिगे़ग अन्हाॽ युक्तुम्सिम्बे़आङ् खे़त्तासिगे़रो॥’ कल्ले़चोगुल्ले़ खे़निॽ के़घे़त्तासिरए पोङ्लो! खिनिॽ के़बाःत्तुम्, ‘आनिगे हारा के़लोःक्पा अन्हाॽ युक्तुम्सिम्बे़आङ् खे़त्तासिगे़रो॥’ कल्ले़चोगुल्ले़ खे़निॽ के़नाःप्पाहाॽ खिनिॽनुःल्ले़ मे़जाःत्लो॥ 17 लत्छा मनाधिक्ले़ के़भे़ःक्तिल्ले़ हे़न्छिङ् थिक् के़घे़त्तासिरो, ङासि मनारे़ के़म्भे़ःक्तिल्ले़ खे़निॽ के़रे़क् के़घे़त्तासि के़बेगिरो॥ हे़क्क्याङ् खे़निॽग थे़गु चङ्धो निसाःल्ले़ कुलाःन्नाङ्धो खे़निॽ थक्सुबाहाॽरे़ खुन्छिॽ थेआङ् मे़याःक्ने़न्लो॥” 18 हे़क्केसाङ् यहवे दाङ्बे़ल्ले़ खे़निॽ लुङ्माॽ तुक्मा कुनिङ्वाॽ वाॽरो, खे़निॽ नुरिक् मे़त्छे़ खुने़ॽ मुत्थ्रिक् पोःक्लो॥ थेआङ्भे़ल्ले़ यहवे दाङ्बाङ्ग कुदोःप्मा खासे़न्लोःम्बा निङ्वाॽफुमाङ्लो खुने़ॽ कुलाम् ओगे़मे़प्पा के़रे़क् मुॽइसाबासिरो॥ यहवे दाङ्बे़ल्ले़ कुमनाहाॽ हाङ्वागे़न् मुॽइसाम् पिरुसिॽ 19 यरुसले़म के़युङ्बा सियोनबा मनासे, आल्ल खे़निॽ याम्मो के़न्हाबिन्॥ खे़निॽ आभाॽरे़ फाॽआङ् के़हाबिबान् खे़प्सुआङ् खुने़ॽ आक्ख्यारिक् साॽरिक् लुङ्माॽ आदुक्तुक्पा चोक्! खे़निॽ के़भाक्तुम्बा पेलिन् खुने़ॽ खे़प्सुनुमे़ःन्ने खुने़ॽ नुगप् के़बिरिॽ॥ 20 दाङ्बे़ल्ले़ तुक्खे लाक्खेरे़ ये़म्हाॽ तुम्मा के़बाङ्घिसाङ् खे़निॽ निसाम् हुॽसे़ खे़निॽनुए वाॽ॥ हे़क्क्याङ् आल्लआङ्धो खे़निॽ खुने़ॽ कोःप्मा परमे़जोःक्ने़न्॥ 21 खे़निॽ चुक्वा ले़प्साङ् इग्र फे़ङ्वा ले़प्साङ् के़धाआसिल्ले़ खे़निॽ ने़क्खोॽ-ने़भाक्किल्ले़ एगाङ् ले़प्माङ्लाम्बा अक्खे के़लॽबा इक्ला के़घे़प्सुम्, “लाम् हाबा कन्लो, आम्भा कन् लाम् लाङ्घेगिन्ने़ॽ॥” 22 खे़ब्याङ् के़लक्तुम्माङ् युप्पाःल्ले़ के़सुःप्तुम्बा खे़निॽ माङ्हाॽ नु खे़निॽ साम्म्याङ् नावाइत्लाहाॽ आसुत्थो के़जोगुम्सिम्॥ खे़ङ्हाॽ खे़निॽ सिम् वाहप्मा आसुत्थो चिरिक् कुसिङ् लाप्के़देसुम्, हे़क्क्याङ् खे़ङ्हाॽ खे़निॽ अक्खे के़मे़त्तुम्सिम्, “नानाक् पेगे़म्मे़ॽ!” 23 खाम्बाङ्ङो खे़निॽ के़हेॽरुम्बा याॽरिःम्बाल्ले़ लागि खुने़ॽ वहित् थासु के़बिरि॥ खाम्बेःक्को के़लिङ्बा कुजान् पजाॽचाॽआङ् यरिक् कुजाॽ थोक्॥ खे़न् ये़न्नो खे़निॽ पित्हाॽ ताम्दाम्बा चाराम्मादे़न्नो चामे़राम्॥ 24 खे़निॽ प्याङ्सिओ के़क्चु के़उःङ्बा पित्हाॽ नु अदङ्हाॽरे़ कुहक् लाप्फेःम्नाबा के़रे़क्नुःल्ले़ नुबा चाःन् मे़जरो॥ 25 खे़न् मनासे़प्मा पयम् यम्बा ये़न्नो चङ्हिम्हाॽ थुप्, खे़ब्याङ् के़रे़क् केःम्ब केःम्बा नाङ्जङ्लुङ्हाॽ नु के़रे़क् थे़गुहाॽओ च्वाःत् वहःङ्हाॽ कुङ्॥ 26 खे़न्नुःल्ले़ वेॽ यहवे दाङ्बे़ल्ले़ आबाङे कुमनाहाॽरे़ खुन्छिॽ याङ्घेःक्हाॽ इभुत्तु पिरुसि, हे़क्क्याङ् खुने़ॽ खाःन्दुसिबा खे़ङ्हाॽरे़ खुन्छिॽ याङ्घेःक्हाॽ वेःत्ल याःन्दु खे़न् ये़न्नो लाबे़न् नाम् कुसिङ् ओःत् हे़क्क्याङ् नाम्मिन् वेॽ ये़न्नुःल्ले़ नुसिले़ङ् यारिक् साॽरिक् ओःत्लो॥ निङ्वाॽफुमाङ्ङिल्ले़ अस्सुरबा मनाहाॽ खुम्दिङ् पिरुसि 27 ओमे़त्ते़म्मे़ॽ, यहवे दाङ्बे़ल्ले़ कुमुक्साम्मिन् नु कुहाङ्वा कुमाङ्वान् लाःत्लाःत्नुए निदे़त्ल पत्लो॥ मिराःक् नु मिःक्खुल्ले़ खुने़ॽ कुसिक् पोगे़बान् ओसेःन् आधाक्लो, खुने़ॽ पाःत्ते़ल्ले़ खुने़ॽ कुइक्लान् मि कुइसिक् तिःत्लो॥ 28 खुने़ॽ कुसक्मान् के़रे़क् पाःन्हाॽ के़बङ्बा के़देॽबा के़गुङ्बा च्वाःत् हे़क्के लॽरो॥ खे़न् कुसक्माःल्ले़ इक्सादिङ् खाम्बेःक्कोबा मे़न्छाम् सुवाङ्हाॽ मे़क्मा सिमादे़न्नो के़त्तुसिरो, हे़क्क्याङ् खे़ङ्हाॽरे़ खुन्छिॽ मुराओ करेलि फत्छु पिरुसिआङ् मे़क्मासिमा लाम्मो तेॽरुसिरो॥ 29 कर खे़निॽ कुमनाहाॽग के़सःत्तिरो हे़क्क्याङ् सेसे तङ्नाम्मोबा से़न्दिक् हे़क्के निङ्वाॽ ताआङ् साम्गे़लोरिरो, इस्राइलबा याक्पेॽ यहवे दाङ्बे़ल्ले़ कुगोःक्माओ के़बेगिल्ले़ मुफ्रामा मुःत्नु खे़न् लाइक्पा कुइसिक् लाङ्गे़घेःक्पा मनाहाॽ हे़क्के खे़निॽ निङ्वाॽ पदादारो॥ 30 यहवे दाङ्बे़ल्ले़ के़रे़क् मनाहाॽ खुने़ॽ कुमिमिदिङ्गे़न् कुइक्लान् मे़घे़प्सुर याःन्दुसिरो, हे़क्क्याङ् तिङ्दिङ्गे़न् कुयाःक्ले़ॽमान् निङ्वाॽ मे़घोसुर चोगुसिरो॥ खे़ॽयो साःम्भे ले़क्ल खे़रे़ङ्घुरुङ् लॽआङ् मिधुङ् मिराःक् पोःक्लो, फःन् थाआङ् वहित् साम्मिःत् खइक् खइक् इक्सिङ्लो, खे़ब्याङ् वधोःक्को च्वाःत् हुङ्मना थेसिङ् के़लॽबा आबङ्बङ्बा वहित् थासुरो॥ 31 अस्सुरबा मनाहाॽ यहवे दाङ्बे़ल्ले़ कुइक्लान् मे़घे़प्सुआङ् थे़गक्कक्ना मे़यङ्लो, हे़क्क्याङ् खुने़ॽ कुहाङ् तक्काःत्तिल्ले़ खे़ङ्हाॽ खाक्खुसिआङ् मे़जोन्लो॥ 32 यहवे दाङ्बे़ल्ले़ खे़ङ्हाॽ चक्मे़ल्लॽए खुम्दिङ् पिरुसिर लःप्सुसिरो हे़क्केःल्ले़ खुने़ॽ कुमनाहाॽरे़ तुङ्ना नु के मे़हिप्तुआङ् खे़न् साम्लोमा मुक्लानु मे़दङ्घुरो यहवे दाङ्बान् आबाङे अस्सुरिहाॽनु ते़न्धङ् चोक्लो॥ 33 थेआङ्भे़ल्ले़ यरिक् ये़न् तगि अस्सुरबा यम्बा हाङ्ङिन् मिधिङ्मारे़ लागि यम्बा मि तुम्मादे़न्धिक् मे़जोगुआङ् वये़रो॥ खे़न् ते़न्निन् ताम्दाम्बा नु केःम्बा लुम्बात् चोक्लो हे़क्क्याङ् खे़प्मो यरिक् सिङ् मे़लुप्सुआङ् ने़रो॥ यहवे दाङ्बान् सक्मा सोःन्छिङ्ङिल्ले़ मिधुङ्दिङ् मिराःक् लःन्नाङ् खे़प्मो मि हाःन्दुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.