यसैया 3 - लिम्बुयरुसले़म नु यहुदाओ खासे़न् 1 आल्ल ओमे़त्ते़म्मे़ॽ, दाङ्बा, मुक्साम्दाङ्बा यहवे दाङ्बे़ल्ले़ खुन्छिॽ खोमा के़बोङ्बा पाःन्हाॽ नु खोमा के़बोङ्बा कुभाॽहाॽ खे़ब्याङ् खे़ङ्हाॽरे़ खुन्छिॽ चामा कुजा नु थुङ्मा च्वाःत्तिन्नाङ् यरुसले़म नु यहुदालाम् खे़त्तुदेसुरो॥ 2 हे़क्क्याङ् के़धुम्बा नु थङ् के़जोःक्पा, खासे़न्लोःम्बा नु माङ्निङ्वाॽपान् के़बाःप्पा, खागे़लोःम्बा हे़क्क्याङ् साम्योसिक्साम्बा, 3 थक्सुबाहाॽरे़ खुन्छिॽ थक्तुम्बाहाॽ नु थोसुदिम्बा मनाहाॽ, सुजादाङ्बाहाॽ, के़ले़बा के़निबा चोबेगुहाॽ हे़क्क्याङ् चाचाःप्पा कित्चाक् के़जोःक्पाहाॽआङ् खुने़ॽ खे़त्तु देसुसिरो॥ 4 हे़क्क्याङ् खारक् थाङ्बे़न् चप्प्रक् के़गे़प्पा मनाहाॽ आङ्गाॽ खे़ङ्हाॽरे़ खुन्छिॽ सम्धाङ् युक्साबा चोगुङ्सिङ्लो, खे़ब्याङ् हिन्जाॽबित्छाॽहाॽरे़ खे़ङ्हाॽरे़ खुन्छिॽ सम्धाङ् युक् मे़जोगुरो॥ 5 थिक् मनाःल्ले़ वेॽसमा मनान् निङ्घुम् मे़त्तुरो थिक् मनान् वेॽसमा मनाःल्ले़ कुदक्ले़ङ्वाओ पोःक्लो॥ थिक् हिम्बेसाङ्बे़न् वेॽसमा हिम्बेसाङ्बे़ल्ले़ कुदक्ले़ङ्वाओ पोःक्लो, काप्पो तुम्साहाॽरे़ खुन्छिॽ तक्ले़ङ्वाओ चप्प्रक् थाङ्बे़न् के़गे़प्पाहाॽ मे़बोक्लो हे़क्क्याङ् मिङ्सो इङ्धाःङ्साबाहाॽरे़ खुन्छिॽ तक्ले़ङ्वाओ थेनाधेबा सुहि मनाहाॽ मे़बोक्लो॥ 6 कन् ये़म्मो फुॽनुसाॽहाॽओ लत्छा मनान् आबाङे कुम्बारे़ कुहिम्मोए मे़दे़म्सुआङ् मे़मे़त्तुरो, “खे़ने़ॽग चाङ्मा तेत् के़गत्तुरो, खे़ने़ॽ कन् के़साक्पा तुक्खेबा ये़म्मो खे़ने़ॽ आनिगे लाम्लोबा पोःक्खे़ॽओ!” 7 कर खे़न् ये़न्नो खे़न् मनाःल्ले़ यम्बा इक्लाओ अःक्ल पाःत्तुरो, “कन् के़साक्पा तुक्खेबा ये़म्मो खे़निॽ लाम्लोबा पोङ्मा मे़सुक्कान्लो॥ आङ्गाॽ आहिम्मो चामा थुङ्मा नु चाङ्मा वाःप्मा थेआङ् होप्लो, आङ्गाॽ मनाहाॽरे़ खुन्छिॽ लाम्लोबा याप्मि आन्जोगे़म्मिन्ने़ॽओ॥” 8 यरुसले़ःम्मिन् खा लुःम्मा खे़प्मा चोक्लो, हे़क्क्याङ् यहुदाःन्नाङ् चोःन्ल पत्लो, खे़ॽयो के़युङ्बा मनाहाॽरे़ खुन्छिॽ पाःन्जाःक्किन् नु याःम्बक्किन् यहवे दाङ्बे़ल्ले़ कुनिमाओ ताप्फे़ःम्बा चोक्लो खुने़ॽ कुमिमिदिङ्गे़न् कुदामा कुयुमे़न् खे़ङ्हाॽरे़ निनिबा मे़अत्तुरो॥ 9 खे़ङ्हाॽरे़ खुन्छिॽ आबाङे नाराःल्ले़ए खे़ङ्हाॽरे़ खुन्छिॽ तक्ले़ङ्वाओ तोःन्दि पिरुरो॥ सदोम ये़क्यक्को के़युङ्बा मनाहाॽ कुइसिःक्के खे़ङ्हाॽरे़आङ् आबाङे खुन्छिॽ लायोन् ओसेःन्धाङ् मे़जोगुरो॥ खे़ङ्हाॽरे़ खे़न् खुन्छिॽ लायोन् मे़न्जिक्खुन्लो॥ खे़ङ्हाॽग मे़जिःत्ते़ मे़स्ये़रो! खे़ङ्हाॽरे़ आबाङे खुन्छिॽ सम्दाङ् मे़क्मासिमान् मे़दारुआङ् वाॽरो॥ 10 साम्योबा मनाहाॽ मे़त्ते़से़ॽओ, खे़ङ्हाॽरे़ खुन्छिॽ लागिग नुबाए पोङ्लो, थेआङ्भे़ल्ले़ खे़ङ्हाॽरे़ग नुबा याःम्बक् मे़जोगुबा कुइसिक् निङ्वाॽ के़माबा थुम्घो मे़घोसुरो॥ 11 कर ताप्फे़ःम्बा याःम्बक् के़जोःक्पा मनाहाॽग मे़जिःत्ते़ मे़स्ये़रो! खे़ङ्हाॽरे़ खुन्छिॽ मे़क्मासिमान् आबाङे खुन्छिॽ सम्धाङ् थ्ये़आङ् वाॽरो, थेआङ्भे़ल्ले़ खे़ङ्हाॽरे़ खुन्छिॽ हुक्किल्ले़ मे़जोगुबा याःम्बक् कुइसिक् तुम्घो मे़घोसुरो॥ 12 हिन्जाॽबित्छाॽहाॽरे़ आङ्गाॽ आमनाहाॽ तुक्खे मे़जाःत्तुसिरो, हे़क्क्याङ् मे़न्छुमाहाॽरे़ खे़ङ्हाॽरे़ खुन्छिॽ सम्धाङ् युक् मे़जोगुरो॥ आमनासे, खे़निॽ लाम्गे़लोबाहाॽरे़ खे़निॽ के़म्हम्सि के़म्देॽरिआङ् मे़वाॽरो, हे़क्क्याङ् खे़ङ्हाॽरे़ खे़निॽ लाङ्घेःक्मा लाम्हाॽओ लाम्के़म्भोःत्तिरो॥ यहवे दाङ्बे़ल्ले़ कुमनाहाॽ खासे़न् चोगुसि 13 यहवे दाङ्बान् कुघासे़न्लोःम्मा हिम्मो आबाङे कुयुक्नाओ युङ्लो, खुने़ॽ आबाङे कुमनाहाॽरे़ खुन्छिॽ तक्ले़ङ्वाओ खासे़न् चोःक्मारे़ लागि ये़म्सिङ्लो॥ 14 आबाङे कुमनाहाॽरे़ खुन्छिॽ साम्योसिक्साम्बाहाॽ नु युक्साबाहाॽरे़ खुन्छिॽ तक्ले़ङ्वाओ यहवे दाङ्बे़ल्ले़ खासे़न् चोगुरो॥ “खिनिॽए आङ्गाॽ आजे़ल्ले़क्सेॽइक् के़मे़ङ्बानिङ्लो॥ याङ्गे़साॽबाहाॽ के़नाप्तुम्सिम्बा चिगक्वाहाॽ खे़निॽ हिम्हाॽओए वाॽरो॥ 15 आङ्गाॽ आमनाहाॽ खे़निॽ थेआङ् के़युक्तुम्सिम्बा हे़क्क्याङ् थेआङ् याङ्गे़साॽबाहाॽ के़युःत्तुम्सिम्बाबे?” मुक्साम्दाङ्बा यहवे दाङ्बे़ल्ले़ अक्तङ्बा उवा चोगुरो॥ यरुसले़ःम्मोबा मे़न्छुमाहाॽरे़ लागि साम्दिङ् 16 यहवे दाङ्बे़ल्ले़ पाःत्तुरो, “सियोने़ल्ले़ कुस्सा मे़न्छिन्हाॽ आङ्दिङ् मे़लॽरो, हे़क्क्याङ् खुन्छिॽ सित्लान् ङाःक्ले़ॽ मे़मे़त्तुरो खुन्छिॽ मिक्हाॽ कारिक् कारिक् मे़मे़त्तुरो, खे़ब्याङ् लाङ्बाःङ्गिहाॽ मे़वाःत्छिङ्लो किल्लिङ् किल्लिङ् लॽरिक् याःक्याःक्काङ् लाङ्गाङ् मे़जत्तुर लाङ्मे़घेःक्लो॥ 17 कल्ले़चोगुल्ले़ दाङ्बे़ल्ले़ सियोने़ल्ले़ कुस्सा मे़न्छिन्हाॽरे़ खुन्छिॽ थे़गेःक्को याङ्घेःक्के— याङ्घेःक्किल्ले़ थिम्सु पिरुसिरो॥ हे़क्क्याङ् यहवे दाङ्बे़ल्ले़ पयम् यम्बा माङ्दुक्मान् पाङ्घु तासुरो हे़क्क्याङ् खे़ङ्हाॽरे़ खुन्छिॽ थे़गेःक्मुरिक्हाॽ लिगोॽ लुःक्पेःक्ल याःन्दुसिरो॥” 18 खे़न् ये़न्नो खे़ङ्हाॽरे़ खुन्छिॽ चोःक्सिङ्मा पाःत्छिङ्मा वाःत्तिहाॽ, हे़क्क्याङ् हुक्पाःङ्गि नु त्वाबो वाःप्मना पाःन्दि, लाबाघे़ःक्वा, 19 कुन्दुल्लो, हुक्पाःङ्गि, पोराःक्वा, 20 तिच पःत्थाङ्, लाङ्बाःङ्गि, फॽइ फुङ्नाम् याङ्मा नु माक्पे़न्छाप् पाङ्दाॽ, 21 स्वागेप् नु मुन्द्रि 22 नुःब्नुबा चाङ्देःत्, आल्फिॽ सुङ्घेक्वा हे़क्क्याङ् साप्रि, 23 से़त्लेङ्गो ऐना नु चुन्जुम्बा चिरिक्, साम्म्याङ्भुङ् हे़क्क्याङ् नाम्भे़क्वाहाॽ खे़त्तुदेसु पिरुसिरो॥ 24 कुनाम्गे़नुॽबा मारुक्किल्ले़ कुले़क्वा के़गिबा नाम्गे़सुबा पोङ्लो, हे़क्क्याङ् फॽइःल्ले़ कुले़क्वा इदाक्, नुरिक् फमनाबा थाःक्फमाल्ले़ कुले़क्वा थे़गेःक्इन्नाङ् लिगोसा पोङ्लो, नुबा चाङ्मा तेःत्तिल्ले़ कुले़क्वा सागि तेत् पोङ्लो, हे़क्क्याङ् खे़ङ्हाॽरे़ खुन्छिॽ नुबा नारुम्भुङ्ङिन् नुःम्मासिमाओ ले़ङ्सिङ्लो॥ 25 खे़ने़ॽ के़मनाहाॽ ताभेःल्ले़ मे़ज्ये़प्तुसिआङ् मे़से़रुसिरो, के़धुम्बा के़मनाहाॽ थङ्ङो थ्यःङ् मे़मे़क्लो॥ 26 सियोन ये़क्यक्कोबा पयम् यम्बा लाम्धेःप्पाहाॽ मे़रिङ् मे़धक्ल मे़हाःप्लो॥ खाम्बाङ्ङो थेधिक्काङ् मेःन्ने के़युङ्मा मे़न्छुमा कुइसिक् खे़न् ये़क्यक्किन् ओसेःन्धाङ् पोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.